2 Tìmɔ̀té 3

Kpɔ́lù wà wíìnyɛ̀-àsòkò líle yèé nákó wáa wá nɔ́dzɔ́-ìtã̀ntã́ ŋa#á

1Báàyí#ɛ́, tédzú si rere ní nɔ́dzɔ́-ìtã̀ntã́ ŋa#á, àsòkò líle-kã̀ŋa nákó wáa wá. 2Náàsòkò nyɛ̀ŋɛ̀ ŋa#á, ɔ̀nyà ŋa nákó wà wo ti ara-ŋa gé ni. Tsí à nákó wà dzáfɔ̀-owó gbo tó bɛ́ɛ̀. À nákó wà rí ara-ŋa gbegbé, tsí wà wíìnyɛ̀ lákṹ lákṹ, tsí wà bú ɔ̀nyà ŋa. À kàkó wà rɛ̃tígbè-boba-ŋà ŋa òŋu ìnà-ŋà ŋa gbo. Bí à tse ore fú ŋa, à kàkó ɖɔ́kpɛ́ fúnɛ gbo. Iŋɛ́ yèé ŋa dzɛ́ ti Ɔ̀ɖáyé gìɖì gbo#ɛ́, à kàkó wà bu ìɖì si fú ŋa. 3À kàkó wà nɛ́ àmúɖɔ̃̀ fú tiŋà ŋa gbo. À kàkó wà mú tɔrɛ fúnɛ gbo. À nákó wà bàdzɛ́nɛ, tsí wà tse iŋɛ́ kíbí ɛrã-kóko ŋa bɛ́. À nákó dzɛ́ ɔ̀tɛ̀-iŋɛ́-ire. 4À nákó wà tanɛ, tsí wà bɔ́ dzì ńŋɛ́ ŋa làkóò gé ni. À nákó wà kɛ́ ara-ŋa, tsí wà dzáfɔ̀-iŋɛ́-ayè títɛ́ ŋa náàrìmáa dzáfɔ̀-Ɔ̀ɖáyé. 5À nákó wà tsìyɛ̀ ní àŋa wà sɛ̃ Ɔ̀ɖáyé òŋu òtítɔ́, tsí à nákó sì kɔ ikpá yèé wà nɔ́Ɔ̀ɖáyé#ɛ́ sísɛ̃̀#ɛ́. Ńbɛ̀ɛ́, ìwɔ òŋu, máa sɔ́má-ɔ̀nyà-ìrɔ́ nyɛ̀ŋɛ̀ ŋa gìɖì.

6Ó ɖi báàyí gìɖì#ɛ́, ɔ̀nyà kã̀ŋa wà bɛ́ɛ̀, tsí à náa tsifɛ̀ɛ́nɔ́, tsí lɔ ńkpàtá ŋa. Tsí bí ɔnɔbɛ̃̀ɛ̃ kã̀ŋa wà bɛ̀, tsí à kò ɖá#á, à náa rú ŋa, tsí mú ìsérè-ŋa. Ɔnɔbɛ̃̀ɛ̃ nyɛ̀ŋɛ̀ ŋa#á, àbi kpíkpɔ̀ ti wà nára-ŋa si, tsí awù-iŋɛ́-ìrɔ́ǹrɔ́ ŋa náa fà ŋá, tsí à náa dzàbi-Ɔ̀ɖáyé. 7Tsí à náa wà rɛ̃tígbè-ɛ̀kɔ́ ɔ̀kã̀lɔ́ɔ̀kã̀, tsí à kà sì nyáa gbɔ́ òkpì-ɛ̀kɔ́-òtítɔ́#ɛ́.

8Ɛnɛ yèé ŋa náa wà rú ɔnɔbɛ̃̀ɛ̃ ŋa bɛ́ɛ̀#ɛ́, à wà kíbí Yànɛ́sì òŋu Yàmbérè bɛ́.#3:8 Yànɛ́sì òŋu Yàmbérè yèé ŋa à wà báfɔ̀ ńbíbɛ́#ɛ́, ológù ŋa ní à dzɛ́#ɛ́, tsí à tsitsɛ́ ńlé-ólú Fárɔ̃̀ wáa lɔ ńǹlú-Èdzíkpítì. Ńbɛ̀ɛ́, nórò-ɔma-Ìyúɖà ŋa ní à náa wíìnyɛ̀ ti nára-ŋa#á. Kíbí àŋa méèdzì#ɛ́ ɖugbã̀-Mɔ̀ɔ́sè† wáa lɔ, tsí kɔ afɔ̀‐ɛ̀#ɛ́, bɛ́ɛ̀ ké ní ɛnɛ nyɛ̀ŋɛ̀ ŋa#á gbo wà kɔ òtítɔ́#ɛ́. Ìsérè-ŋa bàdzɛ́, tsí àkaralé yèé à nɛ́ si ńǹtá-Yèésù#ɛ́ gbo kà dzɔ iŋɛ́-kã̀ kpókpó. 9Ó ɖi, à kàkó nyáa lɔ ńwádzú lárè bɛ́ɛ̀. Iŋɛ́ yèé tse#ɛ́, ɔ̀nyà kpó nákó rí ní éwo bàdzɛ́ fú ŋa kíbí ɛnɛ dzɔ̀ɔ́ dzɔ̀ɔ́ ŋa gbo rí ti nára-Yànɛ́sì òŋu Yàmbérè#ɛ́.

10Ó ɖi ìwɔ òŋu fee, ò tɛ̀ náànyì-mi, tsí rí iŋɛ́ yèé ǹ tse ŋa kpó#ɛ́. Ò gbɔ́ ɛ̀kɔ́-mi, tsí rí ìgbèngbé-mi, tsí rí ètò yèé ǹ tse si ŋa gbo#ɛ́. Ò rí kíbí ǹ nɛ́ àkaralé si ńǹtá-Yèésù gbo#ɛ́, tsí rí kíbí mà gbódzú gbo gbà, tsí mà nɛ́ àtɛ̀si gbo, tsí mà nɛ́ àmúɖɔ̃̀ fúnɛ gbo#ɛ́. 11Tsí ò rí kíbí à tsoró bá mi, tsí mú mi réré tó ńǹlú-Àntìyɔ́tsì òŋu Ìkɔ́nì má nára-Lùsìtɛ́rà gbo#ɛ́. Oró yèésí à kò tse bá mi? Tsí Ɔlá-wa gbà mí nárũ-iŋɛ́ nyɛ̀ŋɛ̀ ŋa kpó. 12Ìɖéǹɖè#ɛ́, bí Yèésù Kírísítò tse ɔ̀kã̀ntso bá ɔ̀nyà-kã̀ si, tsí ɛnɛ nyɛ̀ŋɛ̀ wà wo kó gbé kíbí ɛnɛ yèé ma Ɔ̀ɖáyé#ɛ́ náa gbé gbà#á, à nákó tsoró báa gé ni. 13Ó ɖi, ɔ̀nyà-íbàɖí ŋa òŋu ɔ̀nyà yèé náa rúnɛ ŋa#á, àŋa òŋu, à nákó wà wɔ̀ ńbàɖí tsítse máa làkóò gé ni. À wà rú ɔ̀nyà ŋa, tsí wà rú ara-ŋa gbo.

14Ó ɖi, ìwɔ oŋu fee, ɛ̀kɔ́ yèé à tse fɛ́ɛ, tsí ìwɔ ká-ɛ̀ɛ gìɖì ò mà rere ní òtítɔ́ ni#ɛ́, nà báa banɛ́ si kũkũ. Ò ma ɛnɛ yèé ŋa tsɛ̀kɔ́#ɛ́ fɛ́ɛ#ɛ́ nɔ̀! 15Tsí ò mà gbo ní títí ńmaɖé-ɛ̀ɛ#ɛ́, à kã Ìwé-Ɔ̀ɖáyé† fɛ́ɛ ní o màá. Ìwé-Ɔ̀ɖáyé#ɛ́ nákó tse tsí o nɛ́ ifɛ̀ɛ́nɔ́, tsí o nyáa mà ní Ɔ̀ɖáyé náa gbanɛ là, bí à gba Yèésù Kírísítò gbɔ́. 16Ìwé-Ɔ̀ɖáyé†#ɛ́ kpó#ɛ́, ńǹsérè-Ɔ̀ɖáyé ní ó ti#ɛ́. Tsí ó nɛ́ èrè, tsí ká ń tsɛ̀kɔ́ fúnɛ. Tsí bí à tse iŋɛ́-kã̀ sé#ɛ́, nákó ɖíreé, tsí ká tɔ́tseé. Tsí nákó ɖíre kíbí à nákó tse fáà, tsí wà tse òtítɔ́-Ɔ̀ɖáyé#ɛ́ gbo. 17Ìwé-Ɔ̀ɖáyé#ɛ́ náa tse bɛ́ɛ̀, àtsùgbée àtsìtsɛ́-Ɔ̀ɖáyé kó nɛ́kpá, tsí kó nyáa tse iŋɛ́-ire ɔ̀kã̀lɔ́ɔ̀kã̀ kpó.

Currently Selected:

2 Tìmɔ̀té 3: ngl

Highlight

Copy

Compare