Loma 11
11
Leza uwa luse ku ina Izlaeli
1 #
Fil 3:5
Lyene nuzye, uzye Leza wafutatila antu yakwe? Awe, cumi kwene citangaya vivyo. Pano nani kwene nene mwina Izlaeli, wamu mupanda wakwe Abulaamu, nupya nene uwamu mutundu wakwe Benjamini. 2Leza atafutatila antu yakwe yano wasolwile kufuma ku utandiko wa uumbo. Uzye mutakwiusya vino calembwa mu malembelo ukuti Eliya wailizyanyizye kuli Leza pamulandu wa ina Izlaeli ati, 3#1Yam 19:10, 14 “Mwene yati yakoma yakasema yako nu konona tuvuwa twako. Nene sile nenga nsile nga nani yakulonda kunkoma.” 4#1Yam 19:18 Uzye Leza wamwaswike ati uli? Watile, “Naisungila antu yane amazimbi cinimbali atatala yapepa Baali, leza kaluwi.” 5Avino cili na ndakai. Apano yali yamwi aina Izlaeli yano Leza wasolola pamulandu wa cikuku cakwe. 6Lelo wene wayasolwile pa kuya ni cikuku kunoyali asi pamulandu wa milimo yao ino yaomba. Pano ndi cili pa milimo, ale lyene cikuku cakwe cile cisi cikuku ca cumi.
7Lyene, cili uli? Aina Izlaeli yatazanyile cino yalondanga. Impendwa sile inono yakwe yano Leza wasolwile acizanyile. Asyala yene ayakomya myenzo. 8#Malg 29:4; Eza 29:10 Ndi vino calembwa mu malembelo cati,
“Leza wayapile myenzo ikome cakuti
kufika ni lelo yaposiwa ukulola
nanti ukuuvwa.”
9 #
Mas 69:22
Na Davidi wavwanga ati,
“Lekini vimulo vyao viye ulukose lwakuyateya
pakuti yapone nga yavunukwe.
10Leka manso yao yandatilwe nakanda
pakuti yatalola. Leka yapita
yakutunduza ni visendo vya ucuzi wa manda onsi.”
11Lyene nkuuzya nti, uzye ukupempezyoka kwa Ayuda ukwakuti yapone kwaula kukatuka? Awe cumi kwene citangaya vivyo! Lelo pamulandu wa kwifya kwa Ayuda, kutuulwa kwaya ku Akulukuwa kuti Ayuda yayazuwila.
12Caleka kwifya nu kuposiwa kwa Ayuda ndi kwaleta muzano ku antu a mitundu yonsi ya pano nsi, lyene lino Ayuda yonsi asolwa yalayela Leza ale kupolelelwa kulavula.
Akulukuwa yalatuulwa
13Nkuvwanga kunomuli ndakai mwe Akulukuwa. Nkuti vino nene mutumwa ku Akulukuwa namaikako mano nu kucindikisya mulimo wane. 14Limwi mungaleka antu amu mutundu wane yuvwe uzuwa pakuti yamwi yatuulwe. 15Leza wafutatile Ayuda nga pacisila awikizyanya na antu yauze muno nsi. Uzye cilaya uli lino alapokelela Ayuda nupya? Cumi cilaya wa kuzyukuka kufuma ku mfwa.
16Pano ndi cimokolwa ca nkolelo ca mukate capeelwa kuli Leza, ale nu mukate onsi kwene uwakwakwe. Ndi misisi ya muti yapeelwa kuli Leza, ale ni misambo kwene iyakwakwe. 17Misambo imwi ya muolivi uno antu yalema yene yaputulwa, nga pa viposi vya misambo iyo palematikwa misambo ya muolivi uwamu mpanga. Mwe Akulukuwa mukoline wa misambo ya muolivi uwamu mpanga ino yalematikweko, nga ndakai mwati mukumako kukupolelelwa kwakuya vilundwa ku Ayuda. 18Caleka mutalinzile kusuula yao aputwilwe wa misambo ilya. Uzye pacani mungaitutumika? Mwemo mwemwe misambo. Mwemo musyatungilila misisi. Lelo misisi ikatungilila mwemwe.
19Limwi mwemo mungati misambo ilya yaputwilwe pakuti mwemo mungikwa mu cifulo caiko. 20Cii ica cumi. Yene yaputwilwe pano yatataile. Lelo mwemo muli mu cifulo caiko pano mwataila. Acino mutaitumika pali cii. Lelo muye ni ntete. 21Ndi Leza atacisile celelezi pa Ayuda, yao akoline wa misambo ya civyalilwa ya muti, uzye lyene atangacita cili conga kuli mwemwe? 22Pali cii, twalola vino Leza uwa luse nupya umukali. Wene umukali ku antu yano akapona, lelo kuli mwemwe uwa luse ndi mwatwalilila mu vintu vikalenga kuti aye nu luse. Pano limwi namwe kwene mungaputulwa. 23Ayuda nao ndi yangazenzuka nu kutaila, yalaweziwa pa cifulo cino yalipo nkolelo. Pano Leza ali na maka yakuyawezya. 24Mwe Akulukuwa mukoline wa musambo wa muolivi uwamu mpanga uno waputulwa, nga lyene ulematikwa ku muolivi uwalemwa nu muntu. Ayuda nao yakoline wa muolivi uwalemwa nu muntu. Cili cangupale cuze kuti Leza alematike misambo ii iyaputulwa ku cimuti kuno yaputwilwe.
Leza akayela antu yonsi mizu
25Kuli nkama ya cumi, inane, ino nkasi mumanye kuti mutize mwaelenganya ukuti mwemwe yamano. Inkama iyakuti, ukukoma kwa myenzo ya ina Izlaeli kusi kwa manda pe, lelo kulatwalilila kufika pa nsita ino Akulukuwa yonsi asolwa iiza kuli Leza. 26#Eza 59:20 Vii, ali vino aina Izlaeli yalatuulwa. Ndi vino calembwa mu malembelo cati,
“Katuula alafuma mu Zioni
nu kusisya ukakasi onsi
kufuma pa vizikulula vyakwe Yakobo.
27 #
Yel 31:33
Ndacita upangano uu nao,
lino ndelela maifyo yao.”
28Pano yakana Ilandwe Lisuma, Ayuda yaya anisi yakwe Leza pamulandu wakwe mwemwe mwe Akulukuwa. Lelo pamulandu wakuti Leza uwayasolwile, Ayuda yene a yacuza yakwe pamulandu wa vikolwe vyao. 29Pano Leza asyasenuka pali wino wasolola nu kupolelela. 30Namwe mwe Akulukuwa, pa nsita imwi mutayelanga Leza. Lelo ndakai pano Ayuda yasyayela Leza, Leza wamuyela mizu. 31Mu musango uli onga, pamulandu wakuti Leza watamuyela mizu, Ayuda nao yakana kuyela Leza, pakuti nao kwene Leza ayayele mizu. 32Pano antu yonsi yaya akuntayela Leza, uli mulandu uno wayacita wa anyepwe. Lelo wene akacita cii, pakuti angayela antu yonsi mizu.
Paulo walumbanya Leza
33 #
Eza 55:8
Lolini vino ukama wakwe Leza wavulisya! Na mano yakwe vino yavulisya nga nu kumanya vino wamanyikisya vintu. Uzye aweni angalondolola vino upinguzi wakwe waya? Uzye aweni angamanya vino akacita? 34#Eza 40:13 Ndi vino calembwa mu malembelo cati,
“Uzye aweni wamanya mano yakwe Leza?
Uzye aweni angamupanda mano?
35 #
Yob 41:11
Uzye aweni uwatala amupeela cimwi nawe
amuwezezya?”
36 #
1Kol 8:6
Pano vintu vyonsi vyaumvilwe na aliwe, nupya vintu vyonsi vyacisilwe pamulandu na aliwe, lulumbi luye kunoli manda pe. Ameni.
Currently Selected:
Loma 11: MamL13
Highlight
Share
Compare
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
