Mateo 7
7
Mutapingula auzo
(Luk 6:37-38, 41-42)
1“Mutapingula auzo, kuti namwe Leza atakamupingule. 2#Mk 4:24 Pano vino mukapingula auzo avino namwe mulapingulwa. Pelini namwe mulapelwa. Mulapelwa cilingilo cisuma cisindelwe, pano cilingilo cino mukalingila auzo, acino namwe Leza alamulingila. 3Pacani ukulolekesya akakona akali mwi linso lya munyonko, lelo utasakamile mulando uli mwi linso lyako? 4Uzye ungavwanga uli ku munyonko uti, ‘Mwinane, leka nkusisizye akakona mwi linso lyako,’ lino wemwisikulu uli nu mulando mwi linso lyako? 5We musomvi we! Utale usisye mulando uli mwi linso lyako, alino umalola ningo pa kufumya akakona akali mwi linso lya munyonko.
6“Mutapela yasimbwa vintu vyamuzilo, pano yalaseleukila kunomuli yamulume. Mutapela yakapoli vintu vicindame wa mawe yamutengo, pano yene yalavilyatola.
Ukulonda nu kukonkonsya
(Luk 11:9-13)
7“Caleka namunena nati, lengini nga mumapelwa, londini nga mumazana, konkonsyini nga mumayulilwa. 8Pano wensi akalenga akapelwa, na wino akalonda akazana, nga na wino akakonkonsya akayulilwa. 9Uzye umwi muli mwe yaisi, mwana ndi wamulenga umukate ungamupeela iwe? 10Nanti ndi walenga inswi uzye ungamupeela inzoka? 11Mwe yaipe mwamanya kupeela vintu visuma ku yana yinu. Uzye So uwa mwiyulu atalalusya kupeela vintu visuma kuli yao akamulenga?
12 #
Luk 6:31
“Acino vintu vyonsi vino mukasi kuti antu yamucitile namwe kwene avino mwayacitila. Pano avino Masunde yakwe Mose nu usambilizyo wakwe yakasema vikalanda.
Mpongolo ifyenkane
(Luk 13:24)
13“Ingililini pa mpongolo ifyenkane, pano mpongolo yakwingilila ku ononesi iisalale. Nu museo wakuilamo uusalale, nga na antu aingi yakaingila nu kupitamo. 14Lelo mpongolo yakwingilila ku umi iifyenkane. Nu museo wakuilamo wene watala kulondela, cakuti antu akauzana anono sile.
Umuti ni vizao vyauko
(Luk 6:43-44)
15“Cenjelini na yakasema yaufi, yano akaiza kunomuli mu ufuke kwati umwana wa mfwele, lelo mukasi kao yakoline wa mimbulu ikali. 16Mulayamanyila ku milimo yao. Uzye antu yakakulula matingi ku munga, nanti masamvu kuli nkololwe? 17Mu musango uli onga kwene, umuti onsi usuma ukaseeka vizao visuma, lelo umuti uwipe ukaseeka vizao viipe. 18Umuti usuma utangaseeka vizao viipe, nu muti uwipe utangaseeka vizao visuma. 19Umuti onsi uno usyaseeka vizao visuma ukakomwa, nu kusumbwa mu moto. 20#Mat 12:33 Caleka mulayamanyila ku milimo yao.
Uwanda wa upinguzi
(Luk 13:25-27)
21“Asi muntu wensi akangama ati, ‘Mwene, Mwene’ alingila mu Wene wa mwiyulu, suka sile yao akacita kulonda kwakwe Tata uwa mwiyulu. 22Pa wanda ulya uwa upinguzi, aingi yalavwanga kunondi yati, ‘Mwene, Mwene uzye asi mwi zina lyako amuno twakosololelanga? Uzye asi mwi zina lyako amuno twafumizizye mipasi yankota, nu kucita ivinjelengwe?’ 23#Mas 6:9 Lyene nani ndayanena paswe inti, ‘Ntamumanyile, fumini pano, mwe yakacita ya viipe.’
Yakakuula ya Ng'anda Yaili
(Luk 6:47-49)
24“Caleka wino wensi akauvwa mazwi yane nu kuyayela, wene wakolana wa muntu wa mano, wino wakuuzile ng'anda yakwe pa lwala. 25Lyene imvula itonya, mulamba aiiza nu mukuku ni cipupu ciiza cipuma pa ng'anda iyo, lelo itaponyile, pano yakuuzilwe pa lwala.
26“Lelo wensi akauvwa mazwi yane nu kuntayela, wene wakolana wa muntu muwelewele wino wakuuzile ng'anda yakwe pa lusenga. 27Lyene imvula itonya, mulamba nawe aiiza ni cipupu ciza cipuma pa ng'anda iyo, nga nayo ipona, kupona kukulu cuze.”
Yesu wasambilizya na maka
28Lino Yesu wamala kuvwanga vintu vii, maumba yazunguka misambilizizye yakwe. 29#Mk 1:22; Luk 4:32 Wene atasambilizyanga wakwe yakasambilizya ya Masunde, lelo wa muntu akweti maka.
Currently Selected:
Mateo 7: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
Mateo 7
7
Mutapingula auzo
(Luk 6:37-38, 41-42)
1“Mutapingula auzo, kuti namwe Leza atakamupingule. 2#Mk 4:24 Pano vino mukapingula auzo avino namwe mulapingulwa. Pelini namwe mulapelwa. Mulapelwa cilingilo cisuma cisindelwe, pano cilingilo cino mukalingila auzo, acino namwe Leza alamulingila. 3Pacani ukulolekesya akakona akali mwi linso lya munyonko, lelo utasakamile mulando uli mwi linso lyako? 4Uzye ungavwanga uli ku munyonko uti, ‘Mwinane, leka nkusisizye akakona mwi linso lyako,’ lino wemwisikulu uli nu mulando mwi linso lyako? 5We musomvi we! Utale usisye mulando uli mwi linso lyako, alino umalola ningo pa kufumya akakona akali mwi linso lya munyonko.
6“Mutapela yasimbwa vintu vyamuzilo, pano yalaseleukila kunomuli yamulume. Mutapela yakapoli vintu vicindame wa mawe yamutengo, pano yene yalavilyatola.
Ukulonda nu kukonkonsya
(Luk 11:9-13)
7“Caleka namunena nati, lengini nga mumapelwa, londini nga mumazana, konkonsyini nga mumayulilwa. 8Pano wensi akalenga akapelwa, na wino akalonda akazana, nga na wino akakonkonsya akayulilwa. 9Uzye umwi muli mwe yaisi, mwana ndi wamulenga umukate ungamupeela iwe? 10Nanti ndi walenga inswi uzye ungamupeela inzoka? 11Mwe yaipe mwamanya kupeela vintu visuma ku yana yinu. Uzye So uwa mwiyulu atalalusya kupeela vintu visuma kuli yao akamulenga?
12 #
Luk 6:31
“Acino vintu vyonsi vino mukasi kuti antu yamucitile namwe kwene avino mwayacitila. Pano avino Masunde yakwe Mose nu usambilizyo wakwe yakasema vikalanda.
Mpongolo ifyenkane
(Luk 13:24)
13“Ingililini pa mpongolo ifyenkane, pano mpongolo yakwingilila ku ononesi iisalale. Nu museo wakuilamo uusalale, nga na antu aingi yakaingila nu kupitamo. 14Lelo mpongolo yakwingilila ku umi iifyenkane. Nu museo wakuilamo wene watala kulondela, cakuti antu akauzana anono sile.
Umuti ni vizao vyauko
(Luk 6:43-44)
15“Cenjelini na yakasema yaufi, yano akaiza kunomuli mu ufuke kwati umwana wa mfwele, lelo mukasi kao yakoline wa mimbulu ikali. 16Mulayamanyila ku milimo yao. Uzye antu yakakulula matingi ku munga, nanti masamvu kuli nkololwe? 17Mu musango uli onga kwene, umuti onsi usuma ukaseeka vizao visuma, lelo umuti uwipe ukaseeka vizao viipe. 18Umuti usuma utangaseeka vizao viipe, nu muti uwipe utangaseeka vizao visuma. 19Umuti onsi uno usyaseeka vizao visuma ukakomwa, nu kusumbwa mu moto. 20#Mat 12:33 Caleka mulayamanyila ku milimo yao.
Uwanda wa upinguzi
(Luk 13:25-27)
21“Asi muntu wensi akangama ati, ‘Mwene, Mwene’ alingila mu Wene wa mwiyulu, suka sile yao akacita kulonda kwakwe Tata uwa mwiyulu. 22Pa wanda ulya uwa upinguzi, aingi yalavwanga kunondi yati, ‘Mwene, Mwene uzye asi mwi zina lyako amuno twakosololelanga? Uzye asi mwi zina lyako amuno twafumizizye mipasi yankota, nu kucita ivinjelengwe?’ 23#Mas 6:9 Lyene nani ndayanena paswe inti, ‘Ntamumanyile, fumini pano, mwe yakacita ya viipe.’
Yakakuula ya Ng'anda Yaili
(Luk 6:47-49)
24“Caleka wino wensi akauvwa mazwi yane nu kuyayela, wene wakolana wa muntu wa mano, wino wakuuzile ng'anda yakwe pa lwala. 25Lyene imvula itonya, mulamba aiiza nu mukuku ni cipupu ciiza cipuma pa ng'anda iyo, lelo itaponyile, pano yakuuzilwe pa lwala.
26“Lelo wensi akauvwa mazwi yane nu kuntayela, wene wakolana wa muntu muwelewele wino wakuuzile ng'anda yakwe pa lusenga. 27Lyene imvula itonya, mulamba nawe aiiza ni cipupu ciza cipuma pa ng'anda iyo, nga nayo ipona, kupona kukulu cuze.”
Yesu wasambilizya na maka
28Lino Yesu wamala kuvwanga vintu vii, maumba yazunguka misambilizizye yakwe. 29#Mk 1:22; Luk 4:32 Wene atasambilizyanga wakwe yakasambilizya ya Masunde, lelo wa muntu akweti maka.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013