Utandiko 4
4
Kaini na Abeli
1Lyene Adamu amanya Eva umuci wakwe, nga nawe asenda indilwa avyala umwana umonsi. Eva avwanga ati, “Ku wazwilizyo wakwe Yawe navyala umwana umonsi.” Acino amutemela izina ati Kaini. 2Pacisila avyala umwana umonsi namuze, nga amutemela izina ati Abeli. Abeli wali umucemi wa mfwele, lelo Kaini wali umulimi. 3Pacisila ca nsita imwi, Kaini asenda vilimwa vimwi vyamu calo, aya apeela uwila kuli Leza. 4#Aye 11:4 Lelo Abeli asenda ana mayeli ya mfwele zyakwe, ayafyula nga apeela uwila viputulwa vya mafuta. Yawe azanga muli Abeli nu mu wila wakwe kwene. 5Lelo Yawe atazangile muli Kaini nu mu wila wakwe kwene. Caleka Kaini asoka, nga afinya pa manso.
6Lyene Yawe auzya Kaini ati, “Uzye pacani cino wasoka? Uzye pacani cino wafinya pa manso? 7Ndu cita visuma ngani nakuzangila. Lelo pamulandu wakuti watucita iviipe, iifyo lyatilikuteyamila pa mulyango wako wa cilyanyi. Likukulondesya kuti likuteeke uzya, lelo ufwile kulicimvya.”
8 #
Mat 23:35; Luk 11:51; 1Yoa 3:12 Lyene uwanda umwi Kaini anena muto wakwe ati, “Tuye tulyatoke ku vyalo.” Nga lino yali ku vyalo Kaini akatukila Abeli muto wakwe, amukoma. 9Lyene Yawe auzya Kaini ati, “Uzye Abeli muto wako ali kwi?”
Nawe aasuka ati, “Ntamanyile. Uzye umulimo wane kulasunga muto wane?”
10 #
Aye 12:24
Alino Yawe amuuzya ati, “Uzye pacani cino wacita icintu cii ciipisye? Uwazi wa munyonko ukulila kunondi ukufuma mu musili, wi zwi ilikulilila cilanduzi. 11Ndakai watipwilwa, nga utalatala ulime musili. Wene watiukowela pa kufipa uwazi wa munyonko wino wakomile. 12Ndi ulezya kulima vilimwa, musili utalakumezezya nanti cimwi. Acino wemo utalatala uye ni teko nupya ulazeuluka sile muno nsi.”
13Alino Kaini anena Yawe ati, “Kuvunuka kuno wacita kuno ndi kwakula ukuluta vino ningazizimizya. 14Lola, watunsukula ku kulima umusili nga nu ku manso yako. Ntalatala nje ni teko, nupya ndazeuluka pano nsi, na wino wensi alankomanya alankoma.”
15Lelo Yawe amunena ati, “Awe, cisi vivyo! Umuntu umwi ndi alakukoma, ndacita cilanduzi panoli ca utazi wa katwe pa antu cinimbali.” Lyene Yawe aika icimanyililo pali Kaini, pakuti umuntu ali wensi wino angamukomenkanya atamukoma. 16Lyene Kaini afuma ku manso yakwe Yawe aya aikala mu mpanga ya Nodi, ku ufumondaka wa calo ca Edeni.
Amu mupanda wakwe Kaini
17Kaini amanya umuci wakwe, nga nawe asenda indilwa avyala Enoki. Lyene Kaini akuula umusumba nga autemela izina pacisila cakutemela umwana wakwe umonsi, Enoki. 18Enoki yamuvyalile umwana umonsi, Iladi. Iladi wali a isi wakwe Mehuyaeli, nga Mehuyaeli wali a isi wakwe Metusyaeli, nga Metusyaeli wali a isi wakwe Lameki. 19Lameki wapalike aci yaili. Kapundu wakwe wali a Ada, nga umuci muze wali a Zila. 20Ada waviile Yabali. Yabali wali cikolwe cakwe yao ali atesi ya viteekwa, aikalanga mu mataalu. 21Umwina kololo wali a yubali, uwali cikolwe cakwe yakalizya ya mapango ni mitolilo. 22Zila waviile Tubali Kaini, uwali a musyanyi#4:22 MUSYANYI: Izina lyuze lyakwe musyanyi antu yakati a coca mapembo. Lelo ukulondolola ningo musyanyi a kasula, nga coca mapembo nawe a simalungu. uwasulanga viombelo vya misango yonsi ukufuma ku mukuwa nu ku vyela. Kaci wakwe Tubali Kaini wali a Naama. 23Lameki anena aci yakwe, ati,
“Ada na Zila, uvwini kunondi.
Mwe aci yane, mutezye amazwi yane.
Natinkoma umuntu pano wali wanguma.
Natinkoma umulumendo wiyo pano wali wancisa.
24Ndi pakukoma Kaini cilanduzi cacitwa pa antu cinimbali,
ale lyene umwi ndi wankoma, cilanduzi cico cilacitwa pa antu amaila amakumi cinimbali na cinimbali.”
Seti na Enosi
25Nupya Adamu amanya umuci wakwe, nga nawe amuvyalila umwana umonsi. Muci amutemela izina ati Seti, nga avwanga ati, “Leza watapeela kunondi umwana umonsi uwakupyanikizya pali Abeli, wino Kaini wakomile.” 26Seti nawe kwene yamuvyalile umwana umonsi, nga amutemela izina ati Enosi. Pa nsita kwene iya alino antu yatandike kupepa Yawe.
Currently Selected:
Utandiko 4: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013