Kufuma 9
9
Kufwa kwa nyama
1Lyene Yawe anena Mose ati, “Pita ukanene Falao uti Yawe, Leza wa Ayebulai wavwanga wati, ‘Ta antu yane yapita, pakuti yangampepa. 2Ndi cakuti wakana kuleka antu yapite, watwalilila ukuyalesya, 3ale lyene Yawe alaponya impungo pa nyama zyako zyonsi, imfwalasi, yapunda, ingamila, ing'ombe, imfwele nga ni mbuzi. 4Lelo ndalenga kuti paye upusano pakasi ka nyama zya ina Izlaeli ni nyama zya ina Eguputo, nupya kusi inyama nanti yonga ya ina Izlaeli ino ilafwa. 5Nene ne Yawe natinsonta uwanda wa mutondo kuti uye insita uno indacitila cii.’ ”
6Uwanda uwalondelela Yawe acita wakwe vino wavwanzile, ni nyama zyonsi zya ina Eguputo izifwa, lelo kutali inyama nanti yonga ya ina Izlaeli ino yafwile. 7Lino Falao watuma akuya londelezya, yiiza yamunena ukuti kusi inyama nanti yonga ya ina Izlaeli ino yafwile. Lelo Falao akoma umwenzo. Akana kuta antu yapite.
Vipute
8Nupya Yawe anena Mose na Aaloni ati, “Tapulini itwi lya mwi lungu mu makufi. Mose alisumbe mwi yulu pa manso yakwe Falao. 9Itwi lilasalangana wa lukungu mu mpanga yonsi ya Eguputo. Lilalenga antu ni nyama ukuya ni vipute vino ivikalepuka viya ivilonda.” 10#Umb 16:2 Caleka yatapula itwi nga yaya yimilila pa manso yakwe Falao. Lyene Mose asumba itwi mwi yulu, nga lilyo kwene antu ni nyama yalwala vipute vino vyasangwike viya vilonda. 11Amamanyamano yatakweti maka yakulolekela ku manso yakwe Mose pamulandu wakuti nayo kwene vipute vyali umwili onsi, wakwe vino cali ku ina Eguputo yonsi. 12Lelo Yawe alenga Falao kuti akome umwenzo, wakwe vino Yawe wavwanzile ukuti, Falao ataluvwa ku mazwi yakwe Mose na Aloni.
Imvula ya mawe
13Nupya Yawe anena Mose ati, “Mutondo katondotondo ukalolane na Falao nga umutekezye umwenzo umunene uti Yawe Leza wa Ayebulai wavwanga wati, ‘Ta antu yane yapite, pakuti yangampepa. 14Insita ii ntalavunuka sile yacilolo yako na antu yako lelo nawe kwene ndakuvunuka, pakuti umanye ukuti kusi umwi uwakolana nani mu nsi yonsi. 15Ndi cakuti naomvizye maka yane akuponya impungo pali wewe na antu yako, ngani namonona mwensi. 16#Lom 9:17 Lelo pakuti nkulange maka yane kuti uye umumi pakuti antu munsi yonsi yandumbanye. 17Nomba wemo ucili nu munyambo pa antu yane pakukana yata kuti yapite. 18Acino mutondo pa nsita ndi ikwene ndalenga kuti kuye imvula ya mawe ikulu cuze, ino itatala yatonya mwi landwe lya mpanga ya Eguputo. 19Ndakai upele ilamulo kuti iviteekwa vyako ni vintu vyonsi vino wakwata ivyaya palwalala ukavingizye umwakuuwa. Antu ni nyama zino zilaya palwalala, zyaula kucingililwa zyonsi zilafwa ku mvula ya mawe.’ ”
20Yamwi muli yacilolo yakwe Falao yuvwa intete pa mazwi yano Yawe wavwanzile. Caleka yatoola azya yao ni nyama zyao yaziika umwakuuwa. 21Lelo yamwi yatasakamile kusoka kwakwe Yawe nga yata azya yao ni nyama zyao zyali zili palwalala.
22Nupya Yawe anena Mose ati, “Konzolola ikasa lyako usonte intuwa yako mwi yulu ni mvula ya mawe imatonya mu Eguputo monsi pa antu, pa nyama nga na pa vilimwa vyonsi vyamu vyalo vyamu Eguputo.” 23Caleka Mose akonzolola ikasa lyakwe asonta intuwa yakwe mwi yulu, na Yawe alenga kuti kuye kupangalansya, ni mvula ya mawe, nga ni nkuwa iyapona pa musili. Yawe alenga kuti mu mpanga ya Eguputo muye 24#Umb 8:7; 16:21 imvula ya mawe ikulu cuze, nga nu kumyansya lililili. Amawe ya mvula yali akuvwisya intete cakuti mwi landwe lya mpanga ya Eguputo yatatazile yapone mu musango ndi uu. 25Amawe ya mvula yonona vyonsi vyali pa lwalala kumwi na antu yonsi nga ni nyama zyonsi zyamu Eguputo monsi. Iyonona vilimwa vyonsi vyamu vyalo nu kuvunola imiti yonsi. 26Ku mpanga ya Gosyeni, kuno aina Izlaeli ikalanga, ali cifulo sile cino kutali imvula ya mawe.
27Falao atuma akuya ama Mose na Aaloni nga aiza ayanena ati, “Ndakai nazumila ukuti natinifya. Yawe umololoke. Nene na antu yane sweswe yaponge. 28Imvula ya mawe nu kupangalansya vyaluta muno. Acino pepini kuli Yawe. Nalaya ukuti namamuta mupite, mutakwikala muno mpanga ya Eguputo nupya.”
29Mose anena Falao ati, “Lino namafuma sile muno mu musumba, namaya nkakatusye makasa yane nu kupepa kuli Yawe. Kupangalansya kumata, ni mvula ya mawe kutakuya, pakuti ungamanya ukuti insi iyakwe Yawe. 30Lelo manyile ukuti wewe na yacilolo yako mutacili mutandike koopa Yawe Leza.”
31Fulakisi#9:31 FULAKISI: Icilimwa cino yakalima mu Eguputo cino caya mu mwata wakwe pamba, cino yakapangilako insalu. nga na baale,#9:31 BAALE: Icilimwa cino caya mu mwata wa ngano. vyononwa pamulandu wakuti Baale ala waca na fulakisi nawe ala wafukula. 32Lelo ingano zitononyilwe, pamulandu wakuti zisica zuwa.
33Lyene Mose afumako kuli Falao, afuma mu musumba, nga akatusya makasa yakwe apepa kuli Yawe. Kupangalansya, na mawe ya mvula, nga ni mvula vyonsi vita. 34Lino Falao walola kupangalansya, na mawe ya mvula kuti vyata, akoma umwenzo nupya. Falao na yacilolo yakwe yakomya umwenzo, 35wakwe vino Yawe wasowile kupitila muli Mose ukuti Falao atalata aina Izlaeli kuti yapite.
Currently Selected:
Kufuma 9: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
