Kufuma 11
11
Mose walanda imfwa ya mayeli
1Nupya Yawe anena Mose ati, “Lyene ndalenga kuti kuye uvunuko onga sile uwakusyalikizya pali Falao na pa ina Eguputo yonsi. Pacisila cakwe cii alamuta mupite. Kulanda mucumi, wene alamuzinga mwensi pyu muno mpanga. 2Lyene ndakai vwanga na ina Izlaeli uyanene kuti yanene ainipamba aina Eguputo yayapeele viyembelo vino vyapangilwa na zaabu na siluva.” 3Lyene Yawe alenga kuti aina Eguputo yacindike aina Izlaeli. Mucumi, inkombe zyakwe Falao pamwi na antu aina Eguputo yaweni ukuti Mose umuntu umwi mucindame cuze.
4Nupya Mose anena Falao ati, “Yawe wavwanga wati, ‘Usiku, manye pakasi, namasalala mu Eguputo monsi. 5Nga nu mwana umonsi iyeli lya mwina Eguputo ali wensi amaiza afwe, kutandikila kwi yeli lyakwe Falao wino wali nu kupyana pa cilimba ca wene kufika nu kwi yeli umonsi umwana wa mwanaci muzya wino akasya usu. Iyeli lya citeekwa icili consi limaiza lifwe nalyo kwene. 6Mu Eguputo monsi mulaya impoma ya kulosya ino itatala yacitika mwenemo nupya ino italatala icitike. 7Lelo uku kaikala aina Izlaeli kutaluvwika nanti kuwata kwakwe simbwa nanti kulila kwa viteekwa vyao. Lyene alino mulamanya ukuti Nene ne Yawe, napaatula aina Eguputo ukufuma ku ina Izlaeli.’ ” 8Pakusyalikizya Mose avwanga ati, “Yacilolo yako yonsi yaliza kunondi nu kumfukamila. Nga yalampapatila kuti nsende antu yane twapita. Alino pacisila cakwe cico ndapita.” Lyene Mose afuma kuli Falao ala umusoke cuze.
9Lyene Yawe anena Mose ati, “Falao amatwalilila kukana uvwa amazwi yako, pakuti ningacita vizungusyo navyuze mu mpanga ya Eguputo.” 10Mose na Aaloni iyacita vizungusyo vyonsi pa manso yakwe Falao, lelo Yawe alenga Falao kuti akome umwenzo. Caleka atazumilizye aina Izlaeli kuti yafume mu mpanga yakwe
Currently Selected:
Kufuma 11: MamL13
Highlight
Copy
Compare
Share
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
