Milimo 17
17
1Paulo na auze yapita yapuzya mu Amfipolisi nu mu Apoloniya iiza ku Tesalonika, ukwali ng'anda ya mapepo ya Ayuda. 2Lyene ndi vino umwata wakwe wali, Paulo aingila muno yali. Pa Masabata yatatu alanzyanya nao mu malembelo, 3ala akuyalondolwela nu kuyasinila vino calingine kuti Klistu acule nu kuzyukuka kufuma ku afwe. Paulo ayanena ati, “Yesu kwene wii, wino nkukosola kunomuli ali Klistu.” 4Yamwi munoyali yataila mazwi yailundanya kuli Paulo na Sailasi, nga ni umba lya Agiliki yano apepanga Leza, na anaci acindame, nao kwene yailundanya kunoyali.
5Lelo Ayuda yuvwa uzuwa nga yakonganika antu yamwi asilesile amu misolo atali na mulimo wakuomba yapanga iumba lya mpanzela. Yaponya impanzela mu musumba onsi, yazanza ing'anda ya muntu uwi zina lyakwe Yasoni, umukwezya kulonda Paulo na Sailasi yafumiwe panzi ku antu. 6Lelo lino yatayazanyile, yafumizye Yasoni na yano ataile yayatwala ku ntunguluzi zya musumba, yapunda yati, “Antu yaa yacita icimvulunganya mu misumba yonsi! Ndakai yati iiza nu mu musumba witu kwene, 7na Yasoni uwayasunga mu ng'anda yakwe. Onsi yakavuna masunde ya mwene Kesa, pa kunena antu ukuti kwaya sile Mwene muze wino zina lyakwe a Yesu.” 8Pa mazwi yaa, yavulunginye iumba ni ntunguluzi zya musumba yakatusya mpanzela. 9Lelo ntunguluzi zinena Yasoni na auze kuti yalipile ulupiya sile pakuti yasapulwe, yayate yapite.
Ivyacitike mu Belea
10Zuwa lino kwafita, aina yatuma Paulo na Sailasi ku Belea. Lino yafikako, yaya ku ng'anda yamapepo ya Ayuda. 11Antu ya kuku yene yali atekele kuluta aku Tesalonika. Yakutike kwi landwe nu muzonda, na cila wanda yasambililanga amalembelo pa kusininkizya vino Paulo walandanga ndi vya cumi. 12Aingi amuno yali yataila. Na ingi amu anaci acindame Agiliki yataila mu Mwene Yesu. 13Lelo lino Ayuda amu Tesalonika yuvwa ukuti Paulo wakosola mazwi ilandwe lyakwe Leza nu mu Belea kwene, yaya ku kutunkola antu ukuti yapange mpanzela. 14Lilyo kwene aina yatuma Paulo kuti aye kuli yemba, lelo Sailasi na Timoti yasyala mu Belea. 15Antu asukilile Paulo yamufisizye ku Atena. Alino yaswilila ku Belea na mazwi yano Paulo wayatumilizye akuti Sailasi na Timoti nao yaye zuwa kunoli.
Ivyacitike mu Atena
16Paulo walolelanga Sailasi na Timoti mu Atena, cimucuzya mu mwenzo pa kulola vino umusumba wazilemo tuluwi. 17Caleka Paulo wayanga kung'anda yamapepo kukulanzyanya na Ayuda na Akulukuwa yao apepanga Leza wacumi, nga nu mumasokoni kwene wacitanga cili conga manda onsi kuli yano wazanangako.
18Na antu amano asambilizyanga ivya Epikulio na Sitoiki#17:18 Epikulio. Sitoiki: Aina Epikulio, antu alondelanga sile uluzango lwa panonsi. Aina Sitoiki, antu asambilizyanga ukuzifya nu kuzizimizya mu macuzi lelo uku cilumba sile. nao kwene yapazyanya nawe. Yamwi yuzya yati, “Uzye civwangevwange wii umututu amanyile na cino akuvwanga?” Yamwi yazumila yati, “Cikoline kwati akuvwanga pali tuleza twa inamasi.” Yavwanzile cii pano Paulo wakosolanga pamulandu wakwe Yesu na pa kuzyukuka. 19Caleka yasenda Paulo yamutwala kwi tengo lyakulanzyanya ilya Aleopago,#17:19 Aleopago: Aleopago, icilye cikalamba ca ina Atena cakongananga apa kamwamba Aleopago. yamunena yati, “Tungatemwa kumanya pali vino ukusambilizya pano vikuvwika ivipya kunotuli. 20Ivintu vimwi vino tukuvwa ukulanda vikuvwika ivipya, nga tukulonda ukumanya vino vikusenula.” (21Pano onsi aikala mu musumba wa Atena na inamasi atenzimo yatemilwe ukusumba utusita twao tonsi mu kuvwanga nu kuvwa amazwi ya pa vintu vipya.)
22Paulo aimilila pa nkolelo ya cilye ca Aleopago avwanga ati, “Mwe antu amu Atena! Nalola ukuti mwemwe apefi mu musango onsi. 23Pano lino natandalanga mu musumba winu nu kulola mu vifulo vino mukapepelamo, nazanyile akavuwa apalembwa ukuti, ‘Kuli Leza wino atamanyikwa.’ Cico cino mukapepa mu kuntamanya, acino ndakai namamulandila. 24#1Yam 8:27; Eza 42:5 Leza uwaumvile insi na vyonsi ivyayamo, ali mwine wi yulu ni nsi, nupya asyaikala mu ng'anda yakulwa na antu.
25“Nupya asilonda cimwi cino tungaleta kunoli apakumuombela, pano umwisikulu akapeela umi nu muza ni vintu vyonsi kuli onsi. 26Ukufuma ku muntu wenga, waumvileko imitundu yonsi iya antu nu kuleka kuti ikale mu nsi yonsi. Wisile utusita utwalinga na yanande ya vifulo vyao vya kwikalamo. 27Wacisile cii pakuti yamulonda, nanti limwi yamuzane ndi yamumamanta, nanti angala Leza asi kutali naswe; 28ndi vino umwi walanda wati,
‘Pano munoli twakwata umi, tukapita sweswe antu.’
Cili wakwe vino yakalemba inu ya numbo yati,
‘Pano naswe kwene sweswe ana yakwe!’
29“Caleka pano sweswe ana yakwe Leza, tutaelenganya vino umwata wakwe Leza ukoline wa ciluwi cakwe zaabu nanti cakwe siluva nanti iwe, icapangwa nu muntu umulamoke. 30Caleka nsita zyakuntamanya Leza wasulanga kuli vino antu yacitanga. Lelo ndakai watapela ilamulo ku antu yonsi konsikonsi kuti yazenzuke. 31Pano wimika uwanda uno alapingwilapo antu yonsi amu nsi mu wololoke ukupitila muli wino wasola. Wapela icisininkizyo pali wensi pakuzyukula umuntu wilya kufuma ku afwe!” 32Lino yuvwile Paulo akulanda pa kuzyukuka kufuma ku afwe yamwi yamusoweka, lelo yamwi yamunena yati, “Nupya tungatemwa ukuvwa vino walanda.” 33Caleka Paulo afuma mu ukongano. 34Antu yamwi yailundanya kunoli, yataila. Wenga uwa munoyali a Dionisasi, uwali uwamu cilye ca Aleopago. Kwali nu mwanaci uwi zina lyakwe Damalisi, nga na antu yauze.
Ivyacitike mu Kolinto
Currently Selected:
Milimo 17: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
