HEBRIFƆ 3

Yesu Bɛ̃ Mose.

1Nwaɛ̃ amɛ Kristofɔ, kĩ Baguma vɛ etomɛna ode lɛmɛ a, mikɔna Yesu a kĩ Baguma do kĩ ɛnya Ɔsɔfɔnɔkɔɛ̃ Flee nɛ katɛkado a kĩ bɔnɛɛ a midã. 2Edi ɔnɔkɔali ɛkpa Baguma a kĩ ye lɛpau ye kĩ ɛkɛna adzuma kĩĩ, ndɛ ayekĩ Mose lɛmɛ di ɔnɔkɔali ɛkɛna adzuma nɛ Baguma tɔtɔ kamɛ a. 3Ndɛ ayekĩ babu kɔla okenɛ kaba kɔla mɔawɛ a ni, ade aye kɛfɛta kĩ Yesu ɛna obu baũ ɛba Mose a. 4Kɔla nyɛ kɔla ni, oti ake koe. Lɛmɛ nɛ ɔnɔkɔali kamɛ ni, Baguma nyɛ oti a kĩ eke fɔtsa a flee. 5Mose di ɔnɔkɔali ndɛ ɔsumunɛ aye nɛ Baguma tɔtɔ kamɛ, ade edi adansiɛ nɛ fɔlɛtsa a kĩ Baguma aanyɛ ɛtsa nɛ kunya kamɛ a akũ a. 6Lɛmɛ Kristo kɔ̃ dã Baguma tɔtɔ akũ nɛ ɔnɔkɔali kamɛ ndɛ Obi aye. Boe nyɛ ye kɔla a, ntɛ budo ɔwɔlɛ, bɔna katɛkado nɛ lɛtsa a kĩ boe anɛ teĩ nɛ de akũ a akũ.

Kawɛyakɔ̃ Deĩ Kɛkpa Baguma Bade a.

7Nɛ foesũ ndɛ ayekĩ Hũhũ Kpalɛwa a lɛ a,

“Ntɛ minu Baguma odo nɛ nviã ni,

8mitakɛna atɔ ɔsĩ,

ndɛ ayekĩ mi bawanyɔ kɛna a,

kĩ biyidza bɛdza nɛ Baguma akũ luwi a nɛ kɔsa kamɛ, bɛsɔ ye bɛdã a.

9Ade bɛsɔ yĩ bɛdã nɛ awã bɛwɛ fɔlɛtsa lɛmɛ nɛ yĩ akũ,

titɔ kĩ bɛmɔ́ fɔtsa a kĩ nkɛna nɛ futeli tɛna kamɛ a malo.

10Nɛ foesũ nna kalɔkpa nɛ bati a akũ ade nlɛ kĩ,

‘Bafum ade bayɛla osi a,

ade bisĩ baákɛna nɛ yĩ mbla a akũ a.’

11Nna kalɔkpa ade nlɔ fubo nlɛ kĩ,

‘Bɛláake kɔbɔa nɛ tite a kĩ kufɛ maakpa be kawɛya a akũ da!’ ”

12Nwaɛ̃ amɛ batɛ badonɛ, midã kadã wĩ kĩ mi kamɛ odima ɛtana ɔwɔlɛ kpa mɔ katatɛkado lɔkɔa emuniki nɛ Baguma a kĩ edzi nkpã a liti. 13Mbom mikaabumɛna akũ akũ luwi nyɛ luwi, kĩ nviã nɛ Baguma fɔlɛtsa kamɛ a tsɛla boe akũ, ayekĩ tɔkpa lɛláakɛ mi, ĩye mina atɔ ɔsĩ. Tsɛla boe akũ.

14Kitonɛkĩ boe flee budeĩ tsɛfã mɔ Kristo ntɛ bupini boe katɛkado mɔ ɔsĩ kɛnawo kawũna a, ndɛ ayekĩ buyi kayɔ a. 15Bɛlɛ nɛ Katsɛlɛ Kpalɛwa a kamɛ kĩ,

“Ntɛ minu Baguma odo nviã ni,

mitakɛna atɔ ɔsĩ

ndɛ ayekĩ mi bawanyɔ kɛna a,

kĩ biyidza bɛdza nɛ Baguma akũ a.”

16Bawei linu Baguma odo mɔ biyidza bɛdza nɛ ye akũ a? Ade be nyɛ bati flee a kĩ Mose kpã etomɛna Egipte tite akũ a.

17Bawei akũ mɔ Baguma na kalɔkpa futeli tɛna flee? Ade be nyɛ bati a kĩ bɛkɛna tɔkpa kĩ biku bɛkahɔ nɛ kɔsa kamɛ a. 18Bawei akũ Baguma lɔ fubo ɛlɛ kĩ, “Bɛláake kɔbɔa nɛ tite a kĩ kufɛ maakpa be kawɛya a akũ da”? Ade bati a kĩ biyidza bɛdza nɛ Baguma akũ a. 19Foesũ bɔmɔ́ kĩ bɛtápuli biwo tite akũ, kitonɛkĩ bɛtátɛ Baguma bido.

Currently Selected:

HEBRIFƆ 3: bov

Highlight

Copy

Compare