1 TIMOTEO 6

1Kɛnɛ kĩ bi batɛ badonɛ a kĩ bɛnyɛ basumunɛ a kĩ bɛkɔa obu bɛkpa be balate ayekĩ odima lɛláalɛ tuwuli kpa nɛ Baguma dĩ mɔ boe fɔtsa katsa a akũ. 2Ade kɛtáfɛta kĩ basumunɛ a kĩ be balate nyɛ batɛ badonɛ bɛkɔa be katɛkado kamɛ ɔmɔa kakɛna sũ bisupa be balate a. Mbom kɛnɛ kĩ bisum be kasum wĩ bɛba, kitonɛkĩ balate a kĩ bana be akũ nfasɔ a nyɛ be batɛ badonɛ mɔ bawɛnɛ. Kɛnɛ kĩ atsa be ɔnɔkɔali fɔlɛtsa kĩĩ lɔkɔa odo be fi bɛkɛna nɛ foe akũ.

Misĩ Fɔvã Fɔtsa Katsa Mitomɔ Baguma Liti.

3-4Odi nyɛ odi kĩ yatsa fɔtsa kĩ fɔtáketi mɔ boe Ɔlate Yesu Kristo ɔnɔkɔali fɔlɛtsa, mɔ boe katɛkado fɔtsa katsa a ni, oti a naa dɛla ye akũ nɛ ode, ade enyína lɛtsama a. Edeĩ ɔdɔ nɛ fɔlɛtsa kavɛlɛ mɔ ɔdzɛ kakɛna mɔ bati akũ. Fukĩĩ ayamɛna lineke kanɔ, ɔdzɛ kakɛna, bati kavũna mɔ adzuni kpa kakɔna nɛ oti akũ. 5Foe lɛmɛ fɔayamɛna fɔlɛtsa kavɛlɛ mɔatsɛ mɔatsɛ. Bati kĩĩ be lɔlɔ kamɛ lɛ́waa yedede ade bɛyɛla ɔnɔkɔali kalɛ a lɛmɛ a. Bakɔna kĩ Baguma ɔsum nyɛ akũ kana fɔtsa osi odi.

6Fɔnyɛ ɔnɔkɔali kĩ ntɛ oti yɔɔla anɛ nɛ Baguma liti katomɛna akũ, mɔ fɔtsa a kĩ edeĩ a fuwo ye anɛ ni, ɛdani osikani, 7kitonɛkĩ awɛ pupulidza bɔkɔa bɔya nɛ katinya kamɛ, ade bɔ́adzakũ mɔ awɛ pupulidza a. 8Foesũ ntɛ budeĩ tilima mɔ funitsã ni, mifɔ̃ fuwo boe anɛ. 9Lɛmɛ bati a kĩ anɛ ayɔɔla be nɛ akũ kana fɔtsa akũ ni, bawo nɛ sɔhuiɛ kamɛ ade batɔ a. Fɔkɔasiatsa mɔ fɔwɛtsa kpa tɔwɛ̃ pini be fɔavɛlɛ be kanamɛna lubo kamɔ mɔ kawɔ kamɛ. 10Kitonɛkĩ sika anɛngbã kamɛ tɔkpa kumɛkumɛ flee anɛ kato. Badi tomɔ sika kawɛ liti limii kĩ bɛyɛla katɛkado a, ade biwo nɛ ayɔlɔhɔ pii kĩ ɛfɔ̃ be tɔwɔlɛ tɛ kaakpa kamɛ a.

Dza Pintii Nɛ Katɛkado Adzuma a Akũ.

11Lɛmɛ Timoteo, Baguma oti anɛ sũ vɛlɛ nɔ akũ nɛ fɔlɛtsa kpa kĩĩ flee ɔwɛ̃. Pili kakpa tuwĩ kakɛna, katomɔ Baguma liti nɛ katɛkado, ɔdɔ mɔ ɔwɔlɛ kado, mɔ akũ kadɔla kamɛ. 12Pili kɔɔba kanya nkpã kĩ ɛla kawũna a kakpa nɔ akũ. Ade nkpã kĩĩ sũ Baguma pau nɔ nɛ lɔkɔ a kĩ ɔnyɛ nɔ katɛkado ɔtsa pefee nɛ adansifɔ pii anɛ a. 13Ade makpa nɔ mbla kĩĩ nɛ Baguma kĩ yakpa lɛtsa nyɛ lɛtsa nkpã, mɔ Kristo Yesu kĩ ɛnyɛ ye katɛkado ɛtsa pefee nɛ Pontio Pilato anɛ kamɛ a dĩ akũ kĩ, 14pi fɔlɛtsa kĩĩ kadomɔ akũ pɛpɛɛpɛ ayekĩ odima lɛláamɔ tɔkpa nɛ nɔ akũ, kɛnaawo Luwi a kĩ boe Ɔlate Yesu Kristo aabuki ɛya. 15Baguma fɛta ɛkpa obu, yanya lɛtsa nyɛ lɛtsa akũ, ɛnyɛ fɔgã flee Lɛgã. Lɛtsa nyɛ lɛtsa avɛ ye kĩ Baguma Kpale. Ade ye aanyɛ Kristo kanya nɛ lɔkɔ wĩ a kĩ eyi ɛkpa a kamɛ a. 16Ye odi keĩ dzi nkpã kĩ ɛlá kawũna dadaada, edzi nɛ ɔhaĩ kĩ odima lɛláapuli efuã ɛdã ye a kamɛ. Odima támɔ tɔ̃ ye ade odima lɛláapuli ɛmɔ́ ye da. Ye fude nyɛ kamu, obu mɔ otumi daa. Fɔya lɔmɔ.

17Dɛ bikĩ bideĩ katinya kamɛ akũ fɔtsa kĩ bɛtapia be akũ, ade bɛtakɔa anɛ bite nɛ akũ kana fɔtsa a kĩ fɔláawa daa akũ, mbom bɛkɔa anɛ bite nɛ Baguma kĩ ye akpa boe lɛtsa nyɛ lɛtsa mɔ sɛmɛ kalɛ ayekĩ bɔ́amɔ kawɔlɛ a akũ. 18Bi be kĩ bɛkakɛna tuwĩ bɛnya asikafɔ nɛ tudzuma wĩ kakɛna kamɛ, bɛkɛna sɛmɛ kalɛ, bɛkaate ahiãfɔ fɔtsa faa. 19Ntɛ bɛkɛna foe lɔmɔ ni, baakpɔta fɔtsa kĩ fɔáwɔ biyi bɛkpa be akũ nɛ kunya kamɛ, lɔkɔa be awɛ aata nkpã wĩ a.

20Timoteo, dã fɔtsa a kĩ Baguma kɔa edo nɔ nɛ awɛ a akũ kadã wĩ. Tado akũ nɛ kɔlɔmɛna pupulidza mɔ fɔkɔasiatsa kavɛlɛ kamɛ. Ade fukĩĩ badi nɛɛ bakɛ bati kĩ kadikanyi fɔlɛtsa fɔanɛ a. 21Kitonɛkĩ badi bɔɛ be akũ kĩ binyina fukĩna bamɛ, lɛmɛ fɔtsɛ̃ foe akũ bɛyɛla katɛkado osi a.

Mawã Baguma kĩ ɛmɔ mi kɔnya.

Currently Selected:

1 TIMOTEO 6: bov

Highlight

Copy

Compare