1 YOHANES 1

Baguma Kalɛ a Akpa Nkpã.

1Bɔtsɛlɛ ovoli kĩĩ bɔamɛna mi nɛ Baguma kalɛ a kĩ kakpa nkpã, kĩ kideĩ anɛ kayɔkayi a akũ. Bunu kalɛ kĩĩ, bɔmɔ́ ke mɔ anɛ, nɛ ɔnɔkɔali kamɛ ni, bɔmɔ́ ke, ade bɔta ke mɔ awɛ lɛmɛ a. 2Kĩ nkpã kĩĩ nyɛ ye akũ kanya a, bɔmɔ́ ye, foesũ bɔlɛ fɔlɛtsa nɛ ye akũ, ade bude lɛtsã nɛ nkpã kĩ ɛlá kawũna a, kĩ edeĩ nɛ Ɔlɛga a sɛkɛ̃ kĩ Baguma nyɛ ɛtsa boe malo akũ a, bɔkpa mi. 3Lɛtsa a kĩ bɔmɔ́, bunu a, ade de bɔabi mi malo a, ayekĩ míayabumɔ boe nɛ ɔmɔa a kĩ bɔkɛna mɔ Ɔlɛga a mɔ ye Obi Yesu Kristo. 4Bɔtsɛlɛ ovoli kĩĩ katsɛlɛ bɔama mi, ayekĩ boe kawɔlɛkamɔ a aakpɔla.

Baguma Nyɛ Ɔhaĩ.

5Finyaa ni, ɔlɛdo a kĩ bunu butomɛna ye Obi sɛkɛ̃ a, kĩ bɔkɔa bɔade lɛtsã nɛ ye akũ bɔkpa mi a nyɛ Baguma nyɛ ɔhaĩ, ade ɔtũ odima lɛláa ye kamɛ a. 6Foesũ ntɛ bɔlɛ kĩ budeĩ nɛ ɔmɔa kakɛna kamɛ mɔ ye mɔ bubuki bɔtsɛ̃ nɛ ɔtũ kamɛ ni, kekɔ̃ bɔama fɔvã nɛ boe kɔdzɛla kalɛ mɔ boe fɔkɛlatsa kamɛ. 7Lɛmɛ ntɛ budeĩ nɛ ɔhaĩ kamɛ ndɛ ayekĩ ye malo edeĩ nɛ ɔhaĩ a kamɛ ni, kekɔ̃ bɔakɛna ɔmɔa mɔ boe akũ akũ, ade ye Obi Yesu babɔanɛ a vɔlɛ tɔkpa tidi nyɛ tidi nɛ boe akũ a.

8Ntɛ bɔlɛ kĩ tɔkpa lɛláa boe akũ ni, kakɛ bɔakɛ boe akũ, ade ɔnɔkɔali a lɛláa boe kamɛ a. 9Lɛmɛ ntɛ bubinya boe tɔkpa kamɛ bɔtsa Baguma ni, ɛnyɛ ɔnɔkɔalini mɔ oti kpĩĩ kĩ yaakɔa boe tɔkpa ete boe, ɛvɔlɛ efĩĩ adi nyɛ adi nɛ boe akũ. 10Lɛmɛ ntɛ bɔlɛ kĩ bɔtákɛna tɔkpa ni, bute Baguma fɔvã, ade ke ye kalɛ a lɛmɛ lɛláa boe kamɛ a.

Currently Selected:

1 YOHANES 1: bov

Highlight

Copy

Compare