Jɔn 2
2
Nu məndaa ntɨꞌ Nazaret
1Vəshi kɨ ziꞌ vətia, məndaa luu shɔ ntɨꞌ Kana shɨ Galilii. Nshu Yeso nə luu shɔ. 2Vɨ nə kɨ shoꞌ Yeso maa məndaa ghɔ́ nɨzi nə vɨɨ məzwetə nu ki. 3Faŋ məluꞌ nə tey kɨ nduŋ, nshu Yeso gi tɨ́ ŋwə laa, kɨ məluꞌ kee baa lùu shɔ me. 4Yeso gi tɨ́ ŋwə laa, «A sii naysə nu kɔ́ shee buꞌ kə, yaa? Yighee nyaa kee ta yikuꞌnə me.» 5Nshu wi gi tɨ́ vɨɨ faꞌ laa, «Ŋwə taa jwi gì laa kə, viŋ kɨ yɨyɨsə!» 6Vəntɨɨ və muu nə luu yifi ntɔfə, buꞌ laa nə luu ŋgunə vɨɨ Jus maa məsɔ vətɔ vəvəŋ ghee nshə. Vəntɨɨ vɔ́ nə luu ŋkee vəkwalə tɨ́ kaꞌ bɔŋsə məluꞌ səkwalə ŋìi taa ntɨɨ muꞌ yaa tee ghɔ ntɔfə. 7Yeso gi tɨ́ vɨɨ faꞌ vɔ́ laa vəŋ tɔ muu, kwàŋ taa vəntɨɨ vɔ́, mbə lwaŋkə. Vəŋ kwaŋ, mbə lwaŋkə bə̀. 8Yeso gi tɨ́ vəŋ laa vəŋ ŋwia, gə̀ kɔ̀ tɨ́ wuu məgaa fazɨ. Vəŋ ŋwia, gə̀ kɔ̀ tɨ́ wuu məgaa ghɔ́. 9Wuu məgaa ghɔ́ mɔŋ muu mbɔ́, tɨ́ mbə kiasə gù məluꞌ. Ŋwə nə kee kɨ̀ɨ nə shəŋ ŋkɨə faŋ mbə ndɔ̀ fɨ fuŋ me. Kɨɨ sheꞌ vɨɨ mbɨə faŋ vəŋ nə kwàŋ muu mbɔ́ nə. Nɨniŋ, wuu məgaa fazɨ ghɔ́ mɔŋ məluꞌ mbɔ́, tii wuu məndaa, 10gì tɨ́ ŋwə laa, «Vɨɨ vənshə yaa kɨ fɔŋ kɔ məluꞌ məjəəmə tɨ́ vɨɨ, mbə taa kɨ shɔ̀ɔ sɨ vəŋ, buu vɨ kɔ̀ məluꞌ məbwə. Nɨniŋ, məluꞌ mbɨə faŋ a jwì nə mbə sheꞌ ndwə nə, mbə bàw shɔ̀ɔ mbə mənshə.» 11Luu ŋkee mfɔŋ shwenə nu shuu yɔŋ faŋ Yeso nə yɨ̀sə, ntɨꞌ Kana shɨ Galilii. Nɨniŋ, ŋwə tey kɨ də yikwalə yi tɨ́ vɨɨ mbɨə faŋ vəŋ nə yè nu kɔ́ nə. Vɨɨ məzwetə nu ki, biŋ ŋwə, nùŋsə fwisə vəŋ maa ŋwə.
12Yiŋkii kɨ mè, Yeso ndɔ siꞌ gə̀ ntɨꞌ Kapernaum ghɔ nshu wi nə vaŋ-nshwi vi nə vɨɨ məzwetə nu ki, ghɔ vɨ vəŋ duꞌ shɔ maa vaŋ-mbusə vəshi.
Faŋ Yeso nə də̀ wutə ki taa ŋii Nwi yikwalə
(Matiu 21.12-13; Mark 11.15-17; Lukas 19.45-46)
13Shi Pasa, faŋ nə luu shi kwalə vɨɨ Jus nə, kɨ luu nshənə, Yeso koꞌ gə̀ ntɨꞌ Jerusalem shɨ Judia. 14Faŋ ŋwə nə ziꞌ Jerusalem, gə̀ ŋìi taa ŋii Nwi yikwalə, yè vɨɨ shɔ faŋ vəŋ nəə fiŋ vəmbaw, nə bisə nə vəbɔŋsə shuu ŋii Nwi. Vɨɨ məkwiinə ka nə luu shɔ nɨzi. 15Ŋwə kəə kuu, wìŋ kɔtə shɔ, jɔ̀ŋ vɨɨ vɔ́ shɔ vənshə. Vəŋ fuu nə bisə nə vəmbaw. Ŋwə tu ka vɨɨ məkwiinə ka nsi, kwàsə vəteybələ vəvəŋ, mbə gukə. 16Ŋwə gi tɨ́ vɨɨ məfiŋtə vəbɔŋsə laa, «Viŋ shaꞌsə vətɔ və̀, gə̀ nə mbə. Kɨ viŋ ndi ŋii Tii ŋwaa, nyə gu ŋii yiwiŋ me.» 17Vɨɨ məzwetə nu ki ye, lùmə laa vɨ nə nyɔ̀ꞌ taa ŋwaꞌlə Nwi laa, «Mə kaw ŋii yə mɔɔ, Nwi. Ŋkawnə nyaa yɔ́ weꞌ dɨdɨꞌ, tɨ́ kaꞌ nyə zwì mə.» #Sam 69.10. 18Vɨɨ kwalə vɨɨ Jus gi tɨ́ Yeso laa, «A də̀ shwenə nu shuu yɔŋ ŋkɨə tɨ́ yia, faŋ ŋkə də laa a kii wutə maa məyɨ̀ tɨ́ nee?» 19Yeso bəŋsə tɨ́ vəŋ laa, «Viŋ sɔꞌ ŋii Nwi nyə̀, mə taa fianə maa vəshi vətia.» 20Vɨɨ Jus bəŋsə tɨ́ ŋwə laa, «Vɨ nə fìanə ŋii Nwi nyə̀ maa ŋuꞌ njɔsə-ntɔfə muu-yinshwe, kaꞌ a baa fìanə maa vəshi vətia kɨkə?» 21Luu nə, ŋwə nə gì maa ghaŋ tii kɔ̀ŋ nshɨ-tɔ wi, faŋ ŋwə ndɔ luu yuu ŋii Nwi yɔ́. 22Yighee njyə faŋ Yeso nə ywèy fɨ shɨ yiku, vɨɨ məzwetə nu ki lumə laa ŋwə nə gì nu kɔ́ nə. Nɨniŋ, vəŋ biŋ nu ŋkɨə faŋ ŋkə lùu taa ŋwaꞌlə Nwi, baa nə nu ŋkɨə faŋ Yeso nə gì nə.
Faŋ Yeso nə kɨ̀ɨ nə fwisə vɨɨ
23Yiŋkii kɨ shɔɔ, Yeso duꞌ ntɨꞌ Jerusalem maa vəshi və Pasa. Vɨɨ vəyaŋ nuŋ fwisə vəŋ maa ŋwə buꞌ faŋ vəŋ yè vənu və shuu yɔŋvə faŋ ŋwə nə yɨ̀. 24Luu nə, Yeso kee nùŋsə fwi yi maa vəŋ me, buꞌ laa ŋwə nə kɔꞌ kɨɨ nə vəŋ. 25Nu nə kee ghɔ̀ꞌ ŋwə laa wə twelə ŋiꞌ wə tɨ́ ŋwə me. Ŋwə nə kɨ̀ɨ nə vənu vənshə faŋ mbə lùu taa fwi wə maa nshɨ-tɔ wi.
Currently Selected:
Jɔn 2: bav
Highlight
Share
Copy
Want to have your highlights saved across all your devices? Sign up or sign in
© 1993, Wycliffe Bible Translators, Inc. All rights reserved.