Efesɔs 1

Faŋ Pɔɔl nə shɔ̀ꞌtə vɨɨ Nwi fɨ shɨ Efesɔs

1Lùu mə, Pɔɔl, faŋ mə tɔ̀ŋ ŋwaꞌlə ŋwə̀ tɨ́ vɨɨ Kristo fɨ shɨ Efesɔs, faŋ vəŋ nùŋ fwisə vəŋ maa Yeso Kristo. Nə shòꞌ Nwi shòꞌ mə, yɨ̀ laa mə kiasə gù wuu ntɔŋ Kristo. 2Nwi, Tii ŋwaa-nsiŋ, nə tɨta Yeso Kristo, tu mənɔŋ-bwaŋnə tɔ viŋ, kɔ viŋ nə məduꞌ-nyɔŋ!

Faŋ bàw laa nsiŋ kɨ bəŋsə Nwi buꞌ gəŋsə si, faŋ ŋwə nə bwèysə nsiŋ maa yizii Kristo

3Nsiŋ kɨ bəŋsə Nwi, tɨɨ tɨta ŋwaa-nsiŋ Yeso Kristo, faŋ ŋwə nə kɔ̀ ŋgwisə mənɔŋ-bwaŋnə yinshə tɨ́ nsiŋ, kɔ vənu və Zwitə Ley Nwi faŋ mbə lùu taa yizɔ tɨ́ nsiŋ fɨ jɨŋ Kristo. 4Ŋwə nə shòꞌ nsiŋ buꞌ Yeso Kristo ŋkee maa yighee njyə faŋ ŋwə nə kee ta tey kɨ bɔŋ mbi me, laa nsiŋ ndɔ baw fɨ̀nə ŋwə, laa tuu ŋkee wee-ndoꞌ kee lùu maa nsiŋ yikəꞌ ŋwə me. Ŋwə nə kàw nsiŋ dɨdɨꞌ, 5shòꞌ nsiŋ shù fɨshi, laa nsiŋ ndɔ luu ŋkee vaŋ vi fɨ yiba jɨŋ Yeso Kristo. Ŋkə nə bàw tɨ́ ŋwə maa məyɨsə nɨniŋ, 6laa nsiŋ kɨ bəŋsə nu ŋkɨə faŋ Nwi gaŋtə nsiŋ shɔ nə, faŋ ŋkə bàw shɨlə nə. Ŋwə nə kèe gəŋ saŋ-nsiŋ buꞌ ŋwiŋ wi faŋ ŋwə kaw ŋwə dɨdɨꞌ. 7Ŋwiŋ wi ghɔ́ nə kù tɔ nsiŋ, yɨ laa nsiŋ fuu fɨ taa nsɔꞌ Nwi buꞌ mənshi mi. Nwi ndenə yibɨsə nyaa-nsiŋ, buꞌ faŋ ŋwə kèe gəŋ saŋ-nsiŋ dɨdɨꞌ. 8Ŋwə nə gaŋtə nsiŋ shɔ̀ɔ ki, kɔ̀ ŋgwisə yitɔfə tɨ́ nsiŋ, ŋàꞌsə sɨ ŋaa-nsiŋ, 9tɨ́ kaꞌ nsiŋ kɔꞌ kɨɨ nə nu ŋkɨə faŋ ŋkə lùu taa ŋkɨɨ Nwi, faŋ ŋkə nə ndènə fɨ yikəꞌ vɨɨ nə. Nu kɔ́ nə bàw tɨ́ ŋwə maa məyɨ nɨniŋ, 10faŋ yighee ndɔ kɨ kuꞌ nə. Maa yighee yɔ́ ŋwə nə tɔ̀ŋ Kristo laa ŋwə baytə vətɔ vənshə faŋ mbə lùu yizɔ, nə mbɨə faŋ mbə lùu nsi, laa Kristo ndɔ sɔꞌ mbə vənshə. 11Nwi, faŋ ŋwə yɨsə vənu vənshə faŋ ŋwə nə gì fɨ taa fwi ŋwə, baa shòꞌ nsiŋ maa mbii vɨɨ fɨ yiba jɨŋ Kristo, buꞌ ŋkitə Nwi maa nu ŋkɨə faŋ ŋwə nə nùŋ, shù fɨ maa vənzi. 12Nɨniŋ laa vɨɨ kɨ bəŋsə yikwalə Nwi buꞌ nsiŋ. Lùu nɨniŋ tɨ́ yia faŋ yia nə duꞌtə yia nuŋ fwi sia maa Kristo maa yighee vɨsɨ. 13Gə fɨ maa viŋ, faŋ viŋ nə zɔ̀ nu yinsəŋ Nwi sheꞌ fɨ yiba, viŋ zɔ̀ ntɔŋ yijəə Nwi nɨzi, faŋ nyə bweysə viŋ nɨzi. Viŋ kɨ nii nùŋ fwi siŋ maa Kristo nɨzi. Nwi kɔ viŋ nə Zwitə Ley ki, faŋ ŋwə nə kɔ̀ꞌnə maa məkɔ tɨ́ vɨɨ nə. Zwitə Ley Nwi kɔ́ lùu shwenə ki mbɨɨ ŋwaa viŋ, 14baa luu mfɔŋsə vətɔ faŋ nsiŋ ndɔ zɨ. Zwitə Ley kɔ́ baa luu shwenə faŋ ŋkə də̀ laa Nwi ndɔ yweysə nwaa vɨɨ vi, tɨ́ la vɨ kɨ bəŋsə yikwalə Nwi.

Faŋ Kristo lùu tɨɨ vənu vənshə

15Nɨniŋ, shù fɨ nə faŋ mə nə zɔ laa viŋ nùŋ fwi siŋ maa tɨta Yeso, baa nə laa viŋ kɨ kaw vaŋ-nshwi viŋ vɨɨ Nwi, 16mə kɨ bwaŋ Nwi tɔ viŋ. Mə lumə viŋ tɔ tɔ taa məshɔꞌtə, faŋ mə shɔꞌtə Nwi. 17Mə shɔꞌtə Nwi, tɨɨ tɨta ŋwaa-nsiŋ Yeso Kristo, ŋkee tɨta Nwi faŋ vənu vi bàw shɨlə nə, laa ŋwə kɔ Zwitə ki tɨ́ viŋ. Ŋkə kɨ kɔ viŋ nə yitɔfə, baa twelə ŋiꞌ nu ki tɨ́ viŋ, viŋ kɨɨ nə ŋwə. 18Mə baa buꞌ ghɔ tɨ́ Nwi, laa ŋwə yɨsə sɨ ghiŋ ŋaꞌsə, tɨ́ kaꞌ viŋ kɨ̀ɨ nə ŋiꞌ nu ŋkɨə faŋ ŋwə tìi viŋ shɔ nə, ndɔ kɨɨ laa məbwey vəlwaŋ faŋ ŋwə kɔ̀ꞌnə tɨ́ vɨɨ vi nə, luu ŋkee nu jəə. 19Bàw viŋ kɨɨ nɨzi faŋ ŋwə wèꞌ shɔ̀ɔ ki. Ŋwə faꞌ taa ŋwaa nsiŋ, vɨɨ məbiŋ vi, ŋkee nə wutə ki kəkwalə. 20Ŋwə nə də̀ wutə ki kɔ́ mbɨɨ ŋwaa Kristo, faŋ ŋwə nə ywèysə ŋwə fɨ shɨ yiku, nùŋ ŋwə maa kwiŋ maꞌnə wi taa yizɔ. 21Ŋwə shɔɔ vɨɨ məsɔꞌ mbi vənshə, nə vəwutə vənshə, nə vətɨɨ və vəwutə vənshə. Yizii yi kwalə shɔ̀ɔ təzii tənshə fɨ mbi nyə̀, nə fɨ mbi yifi faŋ nyə ndɔ jwi. 22Nwi nùŋsə mbi yinshə ghɔ Kristo, laa ŋwə sɔꞌ mbi yinshə, baa yɨ̀sə ŋwə luu tɔ vɨɨ məbiŋ Nwi. Kii ŋwə kìi vɨɨ Nwi vənshə, sheꞌ faŋ tɔ wə sɔ̀ꞌ ŋwaa wi nshə. 23Nwaa vɨɨ məbiŋ Kristo luu sheꞌ yaa ŋwaa Kristo. Ŋwə lwàŋ taa fwisə vəŋ vənshə, yɨ̀ laa vənu vənshə faynə maa ŋkɨɨ Nwi.

Currently Selected:

Efesɔs 1: bav

Highlight

Copy

Compare