2 Kɔrintian 6
6
Faŋ Pɔɔl nə də̀ laa ŋwə lùu wuu faꞌ Nwi yinsəŋ fɨ maa nshinə yi
1Faŋ yia gaŋtə maa faꞌ Nwi nə, yia tɨsə viŋ laa viŋ ndɨɨnə laa gəŋsə Nwi, faŋ Nwi kèe gəŋ saŋ-nsiŋ nə, kee gù nu dayday tɨ́ viŋ me. 2Taa ŋwaꞌlə Nwi, vɨ nyɔ̀ꞌ laa,
«Mə Nwi yɨ̀ nu ŋkɨə faŋ a nə bùꞌ ghɔ tɨ́ mə nə,
maa yighee njyə faŋ nyə kùꞌnə.
Mə gaŋtə ghɔ maa shi ŋkɨə
faŋ mə kɔ məbwey tɨ́ vɨɨ.» #Aysaya 49.8. Viŋ zɔ! Yigisə Nwi yɔ́ fàynə ndwə. Lùu yighee njyə faŋ nyə kùꞌnə tɨ́ Nwi ndwə. Shi ŋkɨə faŋ Nwi kɔ məbwey tɨ́ vɨɨ nə, lùu ndee.
3Yia kee yɨ tuu nu, faŋ kaꞌ ŋkə yɨ̀sə wə gù me, laa kɨ tɔ dɨɨ fùu maa faꞌ wia me. 4Maa vənu vənshə faŋ yia yɨsə, kaꞌ vɨ ye laa yia lùu vɨɨ faꞌ Nwi, jia fwi sia dɨdɨꞌ maa yighee njyə faŋ yia ye ŋɨꞌ tɨ̀ me ŋɨꞌ. 5Yia jìa fwi sia faŋ vɨ saŋ yia, tɨꞌnə me kwàŋ yia taa ŋii mfiŋ, tɨꞌnə me bùulə shɨ buꞌ yia, tɨꞌnə me faŋ yia ye ŋɨꞌ, tɨꞌnə me shi vətuꞌ, kee bwey me, tɨꞌnə me shi nə jɨŋ. 6Yia toꞌ nə nshinə yijəə, kwaꞌtə nu Nwi, jia fwi sia, toꞌ fɨ taa bwaŋnə taa ŋwaa vɨɨ. Zwitə Ley Nwi shiŋnə yia. Yia kaw vɨɨ nə fwi yiley, 7gisə yigi yibinə, weꞌ nə wutə Nwi, nywenə maa nu ŋkɨə faŋ ŋkə lùu kəloomə ŋkee nə wutə, yuu wuu yighaw faŋ ŋwə jia vətɔ və yighaw maa kwiŋ maꞌnə nə kwiŋ ŋkwii nɨzi. 8Yia toꞌ nɨniŋ faŋ vɨɨ kɔ feenə tɨ́ yia, tɨꞌnə me kwaŋ tɔ dɨɨ maa yia, faŋ vɨɨ gisə vənu vəbwəvə tɔ yia, tɨꞌnə me vənu vəjəəvə. Faŋ vɨɨ kɔlə gi laa yia fɨnə vɨɨ məbweꞌsə vɨɨ, yia lùu vɨɨ yinsəŋ. 9Faŋ vɨ kɔlə kee kɨ̀ɨ nə yia nə me, vɨɨ kɔꞌ kɨɨ nə yia. Faŋ yia kɔlə kɨkukə, yia lùu vəbwey. Faŋ vɨ kɔlə kwàŋ nsɔꞌ tɔ yia, vɨ kee zwìlə yia me. 10Faŋ yia kɔlə kìi məluŋ, yia kɨ ŋɨŋaytə. Faŋ yia kɔlə lùu mbəəsə, yɨsə vɨɨ vəyaŋ gu mfuꞌsə maa vənu vənshə. Faŋ yia kɔlə kee kìi fa me, yia kìi vətɔ vənshə.
Faŋ Pɔɔl nə bùꞌ ghɔ tɨ́ vɨɨ Kɔrint laa vəŋ ŋaꞌsə fwisə vəŋ tɨ́ ŋwə
11Yia ŋaꞌ shuu wia kɨ gisə tɨ́ viŋ, vɨɨ Kɔrint, laa ŋkawnə yia maa viŋ yàŋ taa fwisə yia. 12Shəŋ kiŋ kee bə̀ə fɨ taa fwisə yia me; shəŋ bəə sheꞌ fɨ taa fwisə viŋ. 13Viŋ zɔ! Mə gisə tɨ́ viŋ yaa vaŋ vaŋ laa, viŋ ŋaꞌsə fwi siŋ, sheꞌ faŋ yia ŋaꞌsə fwi sia nə.
Bàw nsiŋ kiasə yiŋwaa fɨ maa nu bwə tɨ̀ me nu bwə
14Kɨ viŋ ka ŋoo, viŋ vɨ vɨɨ məmanə Nwi me. Sii kaꞌ nu mbuulə dùꞌ shəŋ muꞌ ghɔ nu loomə kɨkə? Sii kaꞌ shəŋ ley faynə ghɔ shəŋ mfiŋsə kɨkə? 15Sii kaꞌ Kristo kìi ŋoo ghɔ Satan kɨkə? Kaꞌ wuu məbiŋ Yeso kìi nu kəmuꞌ ghɔ wuu mətwey Kristo kɨkə? 16Sii kaꞌ nwi dayday dùꞌ taa ŋii Nwi kɨkə? Maa nsiŋ lùu ŋii Nwi, faŋ Nwi nə gì laa,
«Mə taa kɨ shi taa ŋwaa vəŋ, toꞌ yia vəŋ.
Mə taa luu Nwi vəŋ,
vəŋ luu vɨɨ ŋiinə vaŋ.» #Levitikɔs 26.11-12.
17Nɨniŋ, Mɔꞌmbi baa gì laa,
«Viŋ fuu fɨ taa ŋwaa vɨɨ məmanə Nwi vɔ́,
gaasə viŋ vɨ vəŋ,
kee kɔ̀ŋ fa faŋ ŋkə kee lùu kəley me,
buu mə ndɨ viŋ. #Aysaya 52.11.
18Mə kɨ nii lùu tii wiŋ, viŋ luu vaŋ vaŋ.» #2 Samuel 7.14. Lùu yigisə Mɔꞌmbi faŋ ŋwə sɔꞌ mbi yinshə.
Currently Selected:
2 Kɔrintian 6: bav
Highlight
Copy
Compare
Share
Want to have your highlights saved across all your devices? Sign up or sign in
© 1993, Wycliffe Bible Translators, Inc. All rights reserved.
