2 Kɔrintian 3

Nu Kristo nə faꞌ vɨɨ ntɔŋ Kristo bàw shɔ̀ɔ

1Yia gi nɨniŋ buu yia bəŋsə jəə wia mu? Viŋ bɨꞌtə laa yia bə̀ə ŋwaꞌlə faŋ ŋwə dəsə jəə wia tɨ́ viŋ mu, tɨꞌnə me laa yia kəə fi kəŋ ŋwaꞌlə ghɔ́ fɨ ghɔ viŋ, faŋ ŋwə dəsə jəə wia tɨ́ vɨɨ vəmɔ́ꞌ mu? Bey, yia kee kəə kəŋ nu ghɔ́ me, faŋ vɨɨ mɔ́ꞌ kɔlə toꞌ nə kəŋ vəŋwaꞌlə vɔ́ nə. 2Nshɨ-tɔ wiŋ lùu ŋwaꞌlə mədəsə jəə wia, faŋ vɨ nə ŋwàꞌlə taa fwisə yia, vɨɨ vənshə kɨɨ, kɨ tii. 3Ŋkə lùu kəley laa viŋ luu ŋwaꞌlə Kristo faŋ nyɔ̀ꞌ yia, buꞌ faŋ yia nə faꞌ faꞌ Nwi nə. Vɨ nə kee nyɔ̀ꞌ ŋwaꞌlə ghɔ́ nə muu mə ŋwaꞌlə me; vɨ nyɔ̀ꞌ nə Zwitə Nwi faŋ ŋkə kɔ məbwey. Vɨ nə kee nyɔ̀ꞌ fuu waytə bɨlaŋ me, vɨ nyɔ̀ꞌ fuu fənyway fə fwisə vɨɨ. 4Lùu nu ŋkɨə faŋ yia kìi fwi yizutə shɔ vɨsɨ Nwi buꞌ Yeso Kristo.

5Ŋkə kee lùu laa yia kùꞌnə, tɨ́ kaꞌ yia gì laa nu mɔ́ꞌ ndɔ̀ fɨ ghɔ yia me. Məkuꞌnə wia ndɔ fɨ ghɔ Nwi, 6faŋ ŋwə yɨ̀sə laa yia kuꞌnə yaa vɨɨ faꞌ maa məkee məfimə. Məkee məfimə mbɔ́ vɨ nə kee nyɔ̀ꞌ nə ghɔ taa ŋwaꞌlə me. Nə gwìa Zwitə Nwi gwìa məkee mbɔ́. Nu ŋkɨə faŋ vɨ nyɔ̀ꞌ nə ghɔ taa ŋwaꞌlə, lùu ntɨsə Nwi faŋ nsə yuu kɨ jwi nə yiku. Luu nə, Zwitə Nwi kɔ́ kɔ məbwey tɨ́ vɨɨ. 7Viŋ lumə nu kɔ́ŋ faꞌ ntɨsə Nwi. Yighee njyə faŋ Nwi nə kɔ̀ ŋwaꞌlə ntɨsə, faŋ vɨ nə nyɔ̀ꞌ fuu ŋoꞌ nə, tɨ́ Mose, yikəꞌ Mose nə ndwaꞌlə, tɨ́ kaꞌ vɨɨ Isirayl kee ndeynə yikəꞌ yi me, faŋ məndwaꞌlə wi ghɔ́ nə kɔlə kee lùu nu faŋ ŋkə taa tay me. Nɨniŋ, ntɨsə Nwi sɔ́ nə luu nu məley, faŋ nsə nə kɔlə jwi nə yiku tɨ́ vɨɨ nə. 8Faŋ ŋkə lùu nɨniŋ, buu faꞌ Zwitə Nwi taa luu kɨkə? Maa ŋkə bàw shɔ̀ɔ yiŋkii. 9Faŋ faꞌ ŋgwə faŋ ŋwə nə yɨ̀ vɨɨ gu nsɔꞌ Nwi nə, nə jwì nə məley nə, buu faꞌ ŋgwə faŋ ŋwə yɨ vɨɨ kiasə baa tɨ̀ŋnə jəə nə, bàw shɔ̀ɔ yiŋgwii ŋkee ghee yaŋ. 10Kɨ luu a fɨꞌnə nɨniŋ, buu nu məkee məmwamə faŋ ŋkə nə bàw dɨdɨꞌ nə, kee baa yibaw me, buꞌ nu ntɔŋ yijəə Nwi faŋ ŋkə bàw shɔ̀ɔ nə. 11Faŋ nu ŋkɨə faŋ ŋkə ndɔ ndi nə, bàw dɨdɨꞌ nə, buu nu ŋkɨə faŋ ŋkə goꞌ, bàw shɔ̀ɔ yiŋkii ŋkee ghee yaŋ.

Nu vɨɨ Kristo bàw shɔ̀ɔ nu ntɨsə Mose

12Faŋ yia nùŋ fwi sia maa ntɔŋ yijəə yɔ́ nee nə, yia jia fwi ŋkee dɨdɨꞌ maa mətɨŋnə, fɨꞌtə nu Nwi. 13Yia kee yɨsə yaa Mose faŋ ŋwə nə shìtə yikəꞌ yi nə njwi, laa kɨ vɨɨ Isirayl kee ye məme faŋ məndwaꞌlə wi ghɔ́ taa kɨ mè fɨ taa yikəꞌ ŋwə me. 14Nɨniŋ, fwisə vəŋ luu səshii. Njwi yɔ́ kɨ bii sɨ vəŋ, kɔ tɔ və-ndee maa yighee njyə faŋ vɨ tii ŋwaꞌlə Nwi kɔ̀ŋ məkee məmwamə mbɔ́. Vɨ kee bàꞌsə njwi yɔ́ me, buꞌ laa Nwi bàꞌsə sheꞌ tɨ́ wə ntɨə faŋ ŋwə nùŋ fwi yi maa Kristo. 15Yighee tɨ̀ me yighee faŋ vɨ tii ŋwaꞌlə Mose, njwi yɔ́ shitə fwisə vəŋ, kɔ tɔ və-ndee. 16Luu nə, yighee njyə faŋ vɨɨ Isirayl ndɔ kwiinə fwisə vəŋ, nùŋ maa tɨta Kristo, buu njwi yɔ́ taa ndɔ, vɨ baꞌsə. 17Tɨta Kristo lùu Zwitə Nwi. Wə ntɨə faŋ Zwitə tɨta Kristo ŋìi taa fwi ŋwə, buu ŋwə dùꞌ tɔ ŋwə. 18Nɨniŋ, nsiŋ vənshə kee baa kìi njwi yɔ́ yikəꞌ nsiŋ me. Mɔꞌmbi, faŋ ŋwə bàw shɨlə nə, bee yikəꞌ nsiŋ, nsiŋ kiasə gù yuu ŋkɨꞌnə yi, bàw, gə̀ vɨsɨ vɨsɨ, buꞌ laa yɨ̀sə Zwitə Mɔꞌmbi nɨniŋ. Nɨniŋ, nsiŋ lùu yaa ŋwaꞌlə məye sɨ faŋ vɨɨ ye məbaw Nwi fɨ fuŋ.

Currently Selected:

2 Kɔrintian 3: bav

Highlight

Copy

Compare