2 Kɔrintian 11

Faŋ kaꞌ vɨɨ ntɔŋ Kristo vəkwalə kee shɔ̀ɔ Pɔɔl me

1Ŋkə bàw laa viŋ taa meꞌtə mə, faŋ mə kɔlə gi nu vəmfaw, viŋ meꞌtə mə. 2Mə weꞌ maa nu kiŋ, buꞌ laa yɨsə Nwi laa mə weꞌ maa nu kiŋ. Viŋ lùu yaa wee-wəzwi faŋ ŋwə kee ta kɨ̀ɨ nə wəndɔŋ me, faŋ mə ŋìi məndaa wi maa məkɔ tɨ́ wə mɔ́ꞌ, wə ghɔ́ lùu Kristo. 3Nɨniŋ, mə fɨfee laa vɨ taa buulə fwi yiŋ nɨzi, viŋ kee baa kàw Kristo nə fwi yimuꞌ yiley me, sheꞌ faŋ zɔ yì nə bwèꞌsə Eva nə mənay wi. 4Wə mɔ́ꞌ jwi, dèesə nu kɔ̀ŋ Yeso day, kee dèesə nu Yeso ŋgwə faŋ yia nəə deesə nu ki nə me, buu viŋ biŋ ŋwə nə məŋaytə. Vɨ kɔ̀ zwitə kəday tɨ́ viŋ, faŋ kee luu zwitə ŋkɨə faŋ viŋ nə fì yighee vɨsɨ nə me, tɨꞌnə me, fɨꞌtə ntɔŋ yijəə yiday, faŋ viŋ nə kee yizɔ yighee vɨsɨ me, buu viŋ bìŋ nə məŋaytə. Ŋkə kee baw me. 5Mə bɨꞌtə laa vɨɨ mbɨə faŋ viŋ tii vəŋ nə vɨɨ ntɔŋ Yeso vəkwalə nə, kee shɔ̀ɔ mə nə nu kəmuꞌ me. 6Mə kɔlə lùu bwə maa məgi, kee bə̀ə tɔ ley maa məkɨɨ nə nu Nwi me, faŋ yia duꞌtə yia yɨsə ŋkə ley tɨ́ viŋ maa vənu vənshə maa jɨɨsə sənshə.

Faŋ Pɔɔl nə fɨ̀ꞌtə nu Nwi tɨ́ vɨɨ Kɔrint, kee biŋ laa vəŋ ndɔꞌ ŋwə shɔ me

7Mə nə kee bìtə fa fɨ ghɔ viŋ me, faŋ mə nəə fɨꞌtə ntɔŋ yijəə Nwi tɨ́ viŋ me. Mə nə bwàsə ŋwaa ŋwaa nsi maa məyɨsə laa viŋ luu ŋkee vɨɨ. Nə luu nu gù mu? 8Faŋ mə nəə faꞌ tɨ́ viŋ nə, ndɔꞌ nshəŋtə vɨɨ Nwi vəday ndɔꞌ mə. Mə nəə fi fɨ ghɔ vəŋ maa məfaꞌ tɨ́ viŋ. 9Yighee njyə faŋ nsiŋ nə luu mɔ́ꞌ nə, mə nəə kee kɔ ŋɨꞌ tɨ́ viŋ, faŋ mə nə bəə ka me. Nə gaŋtə vaŋ-nshwi vaŋ faŋ vəŋ nə jwì fɨ Makedonia gàŋtə mə nə vətɔ vənshə faŋ mə nə bəə mbə. Mə nə tòꞌ nɨniŋ maa vənu vənshə, laa kɨ mə kɔ ŋɨꞌ tɨ́ wə fɨ wiŋ me. Mə ndɔ baa kɨ toꞌ sheꞌ nɨniŋ taa ŋwaa viŋ. 10Mə gì ntee buꞌ yinsəŋ Kristo fɨ taa fwi mə laa, kaꞌ wə kee fə̀ŋ mə fɨ maa nu kɔ́ fɨ nsi Akaya me, fɔnə faŋ mə faꞌ tɨ́ viŋ, kee ndeynə vəndɔꞌnə me, faŋ lùu nu məŋaytə shee. 11Mə sii yɨ nɨniŋ buꞌ kə? Ŋkə lùu laa mə kee kàw viŋ yimu? Bey, Nwi kɔꞌ kɨɨ laa mə kàw viŋ. 12Nu ŋkɨə faŋ mə yɨsə, mə ndɔ kɨ yɨsə, tɨ́ kaꞌ mə shìa jɨɨ fɨ ghɔ vɨɨ mbɨə faŋ vəŋ kəə jɨɨ, shɔɔ fuŋ, laa vəŋ kɨ bəŋsə yiŋwaa vəŋ, laa vəŋ luu sheꞌ yuu yia. 13Vɨɨ vɔ́ sɨɨ ba laa vəŋ lùu vɨɨ ntɔŋ Kristo. Vəŋ lùu vɨɨ faꞌ bwənə, kwìinə yiŋwaa vəŋ maa məkəꞌ yaa ŋkee vɨɨ ntɔŋ Kristo. 14Nu kɔ́ kee lùu nu shuu yɔŋ me, buꞌ laa nshɨ-tɔ Satan kwìinə ŋwaa wi laa ŋwə kəꞌ yuu nshiiŋii Nwi. 15Faŋ ŋkə lùu nɨniŋ, vɨɨ faꞌ Satan kwìinə ŋwaa vəŋ maa məfɨnə vɨɨ faꞌ nu yinsəŋ, buu kee lùu nu kwalə me, vəndwə vəvəŋ ndɔ luu sheꞌ yaa njɨɨnə vəŋ.

Nu məbuꞌ dɨŋ lùu nu vəmfaw

16Mə baa gì laa kɨ viŋ bɨꞌtə laa mə luu ŋkɔmə me. Viŋ kɔlə bɨꞌtə nɨniŋ, viŋ bìŋ mə, faŋ mə luu ŋkɔmə wə nə, tɨ́ kaꞌ mə bə̀ŋsə ŋwaa ŋwaa tɨtiꞌ. 17Nu ŋkɨə faŋ mə kəə gi ndwə, mə kee gi maa jɨɨ tɨta Yeso me, mə gì sheꞌ yaa ŋkɔmə wə, buꞌ vɨɨ mbɨə faŋ vəŋ nùŋ fwisə vəŋ maa nu məbəŋsə yiŋwaa nə. 18Nɨniŋ, faŋ vɨɨ vəyaŋ lùu shɔ faŋ vəŋ koꞌsə yiŋwaa buꞌ nu wə mənsaw nə, mə taa yɨ sheꞌ nɨniŋ, 19buꞌ laa viŋ yaa kɨ ŋaytə maa vəmfaw, faŋ viŋ kɨ̀ꞌ yaa vɨɨ tɔ ley. 20Maa viŋ bìŋ faŋ wə mɔ́ꞌ ndɨ̀ viŋ yaa vəbuꞌ vi, tɨꞌnə me kùŋ viŋ, tɨꞌnə me jìa viŋ, tɨꞌnə me kɔ̀ꞌsə viŋ, tɨꞌnə me sàŋ viŋ. 21Nu kɔ́ lùu nu tɔ dɨɨ tɨ́ yia. Yinsəŋ, yia kee bee kùꞌnə maa məyɨ kəŋ nu ghɔ́ me.

Faŋ Pɔɔl nə yè ŋɨꞌ yiyaŋ buꞌ nu Nwi

Luu nə, nu ŋkɨə faŋ wə mɔ́ꞌ buꞌ dɨŋ wi shɔ, kaꞌ mə bùꞌ dɨŋ ŋwaa shɔ nɨzi. Maa lùu yigisə vəmfaw faŋ mə gì nɨniŋ nə. 22Vəŋ lùu vɨɨ Hibru lee? Mə lùu wuu Hibru nɨzi. Vəŋ lùu vɨɨ Isirayl mu? Mə lùu wuu Isirayl nɨzi. Vəŋ lùu vɨɨ ŋiinə Abraham mu? Mə lùu wuu ŋiinə Abraham nɨzi. 23Vəŋ lùu vɨɨ faꞌ Kristo mu? Mə lùu wuu faꞌ Kristo nɨzi. Mə gisə yuu wuu ŋgienə, mə lùu wuu faꞌ Kristo shɔ̀ɔ vəŋ. Mə nə sàŋ ŋwaa ŋwaa maa faꞌ shɔ̀ɔ vəŋ. Mə nə ŋìi mfiŋ shɔ̀ɔ vəŋ. Vɨ nə sàŋ mə nə vəmfa shɔ̀ɔ ki. Mə nə shɔ̀ɔ fɨ shuu yiku ghee yaŋ. 24Vɨɨ Jus nə sàŋ mə vəshiŋ tee, nə gòꞌ yighee mfa yimuꞌ yimuꞌ buu lùu ghee vəmfa muu-yinshwe, muu-yinshwe. 25Vɨ nə sàŋ mə nə mbay bwey maa vəshəŋ vətia, tumə mə nə ŋoꞌsə yighee muꞌ. Vəbay faŋ mə nə ŋìi shɔ, tòꞌ fɨ fuu mamuu, senə vətia, mə shi taa mamuu shi ŋkwəŋ. 26Ghee yaŋ faŋ mə toꞌ yitoꞌ nyaa, mə nə kii ŋɨꞌ fɨ ghɔ muu, faŋ mbə fùu, baa nə fɨ ghɔ vəndɔꞌ, baa lùu taa ŋɨꞌ fɨ ghɔ vɨɨ Jus nə fɨ ghɔ vɨɨ tɔŋmə day. Mə nə yè ŋɨꞌ taa məshɨ, nə taa vəshəŋ və nɔŋ-nɔŋ, nə taa mamuu, nə taa ŋwaa vɨɨ mənay. 27Mə nə nùꞌ ŋwaa ŋwaa maa faꞌ weꞌ, shi nə yikɨꞌ ghee yaŋ. Jɨŋ za mə, too ŋwaa yɔŋ. Mə zwisə nə jɨŋ ghee yaŋ. Gwə koo mə, mə kee kìi fa kusə me.

28Vənu vəmɔ́ꞌ kɨ bii maa məbaa gì. Vɨɨ jwì ghàysə mə vəshi vənshə. Mə bɨꞌtə vənu və nshəŋtə vɨɨ Nwi taa fwi mə. 29Sii bwà ndə, mə kee bwa me? Kɔ̀ ndə kɔ̀ nu məbuulə, fwi nyaa kee za me? 30Kɨ ghaŋ mə nə koꞌsə ŋwaa, buu mə koꞌsə maa vənu və lɨloo. 31Nshɨ-tɔ Nwi, tɨɨ Yeso Kristo, kɨɨ laa mə kee sɨɨ ba me. Mə kɨ bəŋsə ŋwə ghee nshə. 32Yighee njyə faŋ mə nə luu shɨ Damaskɔs, goməna fwàŋ Aretas nə gutə shɨ Damaskɔs maa məjia mə. 33Luu nə, vɨ kwaŋ mə taa nyəə, shàꞌsə shɔ̀ɔsə mə fɨ maa ŋɔŋ ŋkɔꞌ, faŋ vɨ nə bɨbɔŋ kìa shɨ Damaskɔs, mə nyɨŋ fɨ ghɔ ŋwə.

Currently Selected:

2 Kɔrintian 11: bav

Highlight

Copy

Compare