1 Timoti 4

Kɨ ndɨɨnə fɨ ghɔ vɨɨ məbuulə nshəŋtə vɨɨ Nwi

1Zwitə Ley Nwi gì maa yigisə yileynə laa, ndɔ luu maa yighee shə, vɨɨ mɔ́ꞌ meꞌ nu Kristo faŋ nsiŋ nùŋ fwi saŋ-nsiŋ shɔ nə, nùŋsə fwisə vəŋ maa nu vəzwitə mbɨə faŋ mbə bweꞌsə vɨɨ, baa nə maa vənu faŋ vəzwitə vəbwəvə deesə tɨ́ vɨɨ. 2Vɨɨ məsɨɨ təba vəmɔ́ꞌ, boꞌ ŋwaa, bwèꞌsə vɨɨ. Mbɨꞌtə vɨɨ təba vɔ́ kukə, shwenə nu bwə lùu taa fwisə vəŋ, luu sheꞌ yaa vɨ twaŋ nə bwey ndɔŋ. 3Vɨɨ vɔ́ deesə laa lùu nu bwə maa məndaa, baa nə maa məzɨ taŋ fazɨ mɔ́ꞌ, faŋ fazɨ kɔ́ kɔlə lùu fa faŋ Nwi nə bɔ̀ŋ, tɨ́ kaꞌ vɨɨ mbɨə faŋ vəŋ nùŋ fwi vəŋ maa ŋwə, nə vɨɨ faŋ vəŋ kɨɨ nə nu yinsəŋ, kɨ zɨ, bwaŋ Nwi shɔ. 4Fa tɨ̀ me fa faŋ Nwi nə bɔ̀ŋ, lùu kəjəə, fa kee lùu shɔ faŋ Nwi bɔ̀ŋ, faŋ ŋkə lùu kəbwə me. Vətɔ vənshə lùu vəjəə faŋ wə fi, bwàŋ Nwi shɔ. 5Mbə lùu vəjəə, baa lèy tɨ́ Nwi buꞌ yigisə Nwi, baa nə məshɔꞌtə Nwi, faŋ vɨɨ shɔꞌtə Nwi shɔ nə.

Kɨ faꞌ faꞌ Nwi jəə

6A taa kɨ luu kɨ twelə vənu vɔ́ tɨ́ vaŋ-nshwi vaŋ-nsoo, buu a luu wuu faꞌ Yeso Kristo jəə, biasə ŋwaa wə maa nu Kristo faŋ nsiŋ nuŋ fwi saŋ-nsiŋ maa ŋwə nə, baa nə maa vənu vəjəəvə, faŋ nsiŋ deesə tɨ́ vɨɨ nə, faŋ nshɨ-tɔ wə nə zɔ biŋ. 7Wə kɨ luu jwi nə yigi dayday nə mətiitii mədayday mə wə mənsaw, laa lùu yigisə Nwi, a twey. Bàw a mwəsə ŋwaa wə maa nu məbəŋsə Nwi. 8Nu məsaŋ ŋwaa nə məbaŋ vətɔ kee gaŋtə wə dɨdɨꞌ me. Luu nə, nu məbəŋsə Nwi gaŋtə maa vənu vənshə, buꞌ laa ŋkə kii ŋkɔꞌnə maa yighee ndwə, baa nə maa məbwey vəlwaŋ faŋ ŋwə ndɔ jwi nə. 9Ntɨ Nwi lùu nu yinsəŋ; bàw vɨɨ vənshə biŋ. 10Lùu nu ŋkɨə faŋ nsiŋ saŋ yiŋwaa nyaa-nsiŋ shɔ, baa tuŋ yighaw buꞌ nu kɔ́, buꞌ laa nsiŋ nùŋ fwi saŋ-nsiŋ maa Nwi, faŋ lùu Nwi faŋ ŋwə goꞌsə yighee muꞌ, baa lùu mbweysə vɨɨ vənshə, bweysə vɨɨ mbɨə faŋ vəŋ nùŋ fwisə vəŋ maa Kristo nə. 11Tɨsə vɨɨ nə nu kɔ́, vəŋ mwəsə shɔ.

12Kɨ wə shia ghɔ buꞌ faŋ a kɨ bii wuu zawə nə me. Kɨ yɨsə laa a luu mfɨꞌ nu tɨ́ vɨɨ məbiŋ nu Kristo fɨ maa yigisə yə, nə ghuu yitoꞌ kə, nə nu məkaw vɨɨ, nə maa mənuŋ fwi maa Kristo, baa nə maa məyɨsə vənu vəleyvə. 13Kɨ tii ŋwaꞌlə Nwi tɨ́ vɨɨ, tɨsə vɨɨ, twelə ŋiꞌ nu Nwi tɨ́ vəŋ, gə ziꞌ tɨ́ yighee njyə faŋ mə ndɔ jwi. 14Kɨ shiasə nu ŋkɨə faŋ Nwi nə kèy ghɔ shɔ nə me, faŋ nshiisə-ŋii sɔghɔ nə fɨ̀ꞌtə nu buꞌ ghɔ, faŋ vɨɨ taa fɨ taa məshəŋtə vɨɨ Nwi nə mɔꞌ ghɔ vəŋ tɔ ghɔ nə me. 15Kɨ lumə vənu vɔ́, nuŋsə fwi yə shɔ, laa vɨɨ vənshə ye faŋ a gə vɨsɨ. 16Kɨ shiŋnə ŋwaa wə, baa shiŋnə nu Nwi faŋ a deesə nə, gòꞌsə shɔ. A kɨ luu kɨ yɨ nɨniŋ, buu a taa bweysə ŋwaa wə, nə vɨɨ mbɨə faŋ vəŋ zɔ nu ŋkɨə faŋ a gisə.

Currently Selected:

1 Timoti 4: bav

Highlight

Copy

Compare