1 Kɔrintian 16

Ntɨ kɔ̀ŋ ka faŋ vɨɨ Nwi fɨ shɨ Kɔrint bàytə maa məgaŋtə vɨɨ Nwi shɔ fɨ shɨ Jerusalem

1Gə fɨ maa ka ŋgwə faŋ vɨ baytə maa məgaŋtə vɨɨ Nwi shɔ fɨ shɨ Jerusalem, bàw viŋ kɨ yɨ sheꞌ maa jɨɨ njyə faŋ mə nə tɨ̀ vəməshəŋtə və vɨɨ Nwi fɨ shɨ Galatia shɔ nə. 2Bàw laa yiwiŋ tɨ̀ me yiwiŋ, maa mfɔŋ shi fɨ taa yiwiŋ, bàw wə tɨ̀ me wə nuŋsə fa ŋkɨə faŋ ŋkə lùu kəjəə tɨ́ ŋwə. Kee bàw laa viŋ ndɔ tey kɨ baytə ka sheꞌ maa yighee njyə faŋ mə ndɔ luu yɨ viŋ nə me. 3Yighee njyə faŋ mə ndɔ jwi yɨ viŋ, viŋ taa shoꞌ vɨɨ, vəŋ ndɨ vətɔ mbɨə faŋ viŋ baytə̀ nə, gə̀ nə mbə Jerusalem. Faŋ vəŋ taa kii gə, mə nyɔꞌ vəŋwaꞌlə, kɔ̀ tɨ́ vəŋ, vəŋ gə nə vəŋwaꞌlə vɔ́, baa nə vətɔ mbɨə faŋ viŋ baytə̀ nə. 4Kɨ luu viŋ bɨꞌtə laa yia vɨ vəŋ gə Jerusalem mɔ́ꞌ, buu kee luu nsɔꞌ me.

Faŋ Pɔɔl nə kɔ̀ꞌnə maa məgə yè vɨɨ Nwi fɨ shɨ Kɔrint

5Mə bɨꞌtə laa mə taa toꞌ fɨ kwiŋ Makedonia, kee bɨ̀sə yighee shɔ me, ndɔ̀ fɨ fuŋ, jwì yɨ viŋ, ndèynə viŋ. 6Nɨniŋ, mə ndɔ kii yighee, tɨ́ kaꞌ nsiŋ shì mɔ́ꞌ tày. Yighee mɔ́ꞌ mə ndɔ tay yɨ viŋ maa yighee gwə yinshə, tɨ́ kaꞌ viŋ taa gaŋtə mə yighee njyə faŋ mə ndɔ meꞌtə viŋ, gə vəshəŋ vədayvə. 7Mə kee kəə laa mə ndɔ yasə meꞌtə viŋ me. Mbɨꞌtə nyaa lùu laa nsiŋ taa shi yaa təwiŋ təmɔ́ꞌ faŋ tɨta Yeso bìŋ. 8Mə taa goꞌ feenə shɨ Efesɔs, zìꞌ maa shi Pentekos, 9buꞌ laa Nwi ŋàꞌsə jɨɨ shee feenə, tɨ́ kaꞌ mə fàꞌ faꞌ Nwi ŋkee jəə. Ŋwə baa fùu jəə, faŋ vɨɨ kɔlə lùu shɔ, faŋ vəŋ kəə bɨsə faꞌ ŋwaa ghɔ́ nə.

Sɔꞌkə kɔ̀ŋ Timoti nə Apɔlɔs

10Timoti taa kɨ jwi yɨ viŋ, kɨ viŋ shiasə ŋwə me. Viŋ jia ŋwə jəə, tɨ́ kaꞌ fwi yi bàw, ŋwə kee fee maa məfaꞌ faꞌ Nwi me, buꞌ laa ŋwə nɨzi faꞌ tɨ́ tɨta Yeso Kristo sheꞌ faŋ mə faꞌ nə. 11Kɨ tuu wə muꞌ shiasə ŋwə me. Yighee njyə faŋ ŋwə ndɔ baa kɨ gə, viŋ gaŋtə ŋwə, twey ŋwə jɨɨ jəə jəə, tɨ́ kaꞌ ŋwə jwi yɨ mə. Yia vɨ vɨɨ Nwi fɨ feenə kɨꞌ ŋwə. 12Gə fɨ maa weenshu ŋwaa-nsiŋ Apɔlɔs, mə nəə buꞌ ghɔ tɨ́ ŋwə ghee yaŋ, laa ŋwə beꞌsə vaŋ-nshwi vəmɔ́ꞌ, jwì yɨ viŋ, ndèynə viŋ. Luu nə, ŋkə nə kee lùu taa ŋkɨɨ Nwi laa ŋwə jwi maa yighee nyə̀ me. Ŋwə taa kii yighee, buu jwi yɨ viŋ.

Vaŋ-ntɨsə tɨ́ vɨɨ Nwi fɨ shɨ Kɔrint

13Viŋ kɨ kɨɨ buꞌ viŋ gu nu me! Viŋ nuŋ fwi siŋ maa Yeso Kristo, wèꞌ shɔ. Viŋ kii fwisə weꞌsə, tɨ̀ŋnə weꞌ. 14Maa vənu vənshə faŋ viŋ yɨsə, viŋ kii ŋkawnə taa ŋwaa viŋ.

15Vaŋ-nshwi vaŋ, gə̀ fɨ maa Stefanas, viŋ kɔꞌ kɨɨ laa ŋwə nə luu mfɔŋ wə fɨ nsi Akaya faŋ ŋwə nə bìŋ nu Nwi. Ŋwə baa luu tweꞌ ghɔ vɨ vɨɨ vi laa vəŋ taa faꞌ maa məgaŋtə vɨɨ Nwi. 16Mə bùꞌ ghɔ tɨ́ viŋ laa viŋ kɨ kɔ feenə tɨ́ vɨɨ yaa vəŋ. Viŋ baa kɔ feenə tɨ́ vɨɨ vənshə faŋ ghɔ vɨ vəŋ faꞌ faꞌ Nwi mɔ́ꞌ. 17Mə ŋàytə ŋkee dɨdɨꞌ buꞌ laa Stefanas nə Fɔrtunatɔs nə Akaykɔs jwì yɨ mə feenə. Faŋ mə nə ye vəŋ nə, ŋkə ghɨɨ yaa mə yè viŋ nɨzi. 18Vəŋ yɨ fwi nyaa zutə, baa yɨsə fwi siŋ zutə nɨzi. Bàw vɨ kɨ kɔ feenə tɨ́ kəŋ vɨɨ vɔ́.

Shɔꞌtə fɨ ghɔ Pɔɔl tɨ́ vɨɨ Nwi fɨ shɨ Kɔrint

19Vəməshəŋtə və vɨɨ Nwi vənshə fɨ kwiŋ Asia shɔꞌtə viŋ. Akwila nə Prisila nə nshəŋtə vɨɨ Nwi faŋ vəŋ fàynə taa ŋii vəŋ, shɔꞌtə viŋ ŋkee jəə, fɔnə viŋ vɨ vəŋ lùu fa kəmuꞌ taa ŋwaa tɨta Yeso. 20Vɨɨ Nwi fɨ feenə vənshə shɔꞌtə viŋ nɨzi. Viŋ kɨ shɔꞌtə yiŋwaa yiŋ, ndɔ baynə yiŋwaa yiŋ maa yizii Nwi.

21Shɔꞌtə ŋwə̀ fɨ feenə nyɔ̀ꞌ mə Pɔɔl nə ghɔ kaŋ. 22Kɨ luu wə kee kaw tɨta Yeso me, ndwaŋ tɔ ŋwə. «Maranata! Tɨta Yeso jwi!» 23Tɨta Yeso Kristo tu mənɔŋ-bwaŋnə tɔ viŋ. 24Mə nùŋsə viŋ vənshə taa fwi mə, buꞌ laa nsiŋ vənshə lùu fa kəmuꞌ, nsiŋ vɨ Yeso Kristo.

Currently Selected:

1 Kɔrintian 16: bav

Highlight

Copy

Compare