1 Kɔrintian 11

1Bàw viŋ kɨ faꞌ sheꞌ faŋ mə faꞌ, buꞌ faŋ mə baa luu fàꞌ sheꞌ yaa Kristo.

Nshinə njyə faŋ nyə kùꞌnə taa nshəŋtə vɨɨ Nwi

2Mə bəŋsə viŋ dɨdɨꞌ, buꞌ laa viŋ lumə yigisə nyaa yinshə, baa bèꞌsə vənu mbɨə faŋ mə nə dèesə viŋ shɔ nə. 3Luu nə, nu mɔ́ꞌ lùu shɔ faŋ mə kəə tɨ viŋ, laa Kristo lùu tɔ tɨ́ vəndɔŋ vənshə, wəndɔŋ luu tɔ tɨ́ wəzwi; Nwi lùu tɔ tɨ́ Kristo. 4Wəndɔŋ faŋ ŋwə shɔꞌtə Nwi, baa nə faŋ ŋwə gi yigi faŋ nyə ndɔ̀ fɨ ghɔ Nwi, kɨ ŋwə shitə tɔ ki me, buꞌ ŋwə kee kɨ kɔ feenə tɨ́ Kristo faŋ lùu tɔ ki nə me. 5Gə fɨ maa wəzwi, ŋkə bàw laa wəzwi ka tɔ ki faŋ ŋwə fɨꞌtə nu Nwi, tɨꞌnə me shɔꞌtə Nwi. Ŋkə kee lùu nɨniŋ me, buu ŋkə lùu laa ŋwə kee zɔnə ndəə wi faŋ lùu tɔ ki nə me. Wəzwi faŋ ŋwə kee kaw ka tɔ ki me, luu sheꞌ yaa wəzwi faŋ ŋwə kɔ̀ŋ tɔ ki, tòꞌ yaa wəndɔŋ. 6Kɨ luu wəzwi gi laa yi kee taa ka tɔ ki me, bàw ŋwə swey tɔ ki. Nsiŋ kɔꞌ kɨɨ laa lùu nu tɔ dɨɨ tɨ́ wəzwi maa məswey tɔ ki, tɨꞌnə me maa məshetə ŋkə tuŋsə. Nɨniŋ, bàw ŋwə ka tɔ ki nə njwi məka tɔ, shìtə. 7Nu ŋkɨə faŋ ŋkə kee bàw tɨ́ wəndɔŋ maa məshitə tɔ ki me, lùu laa, Nwi nə bɔ̀ŋ wəndɔŋ maa ŋkɨꞌnə Nwi. Nɨniŋ, ŋwə fɨnə Nwi, kìi wutə fɨ ghɔ Nwi. Gə fɨ maa wəzwi, ŋwə kìi yifasə ndəə wi. 8Viŋ kɔꞌ kɨɨ laa, lùu ŋwaa wəndɔŋ faŋ Nwi nə ndɨ̀, bɔ̀ŋ wəzwi shɔ. Nwi nə kee ndɨ̀ fɨ maa ŋwaa wəzwi, buu bɔŋ wəndɔŋ shɔ me. 9Nwi nə bɔ̀ŋ wəzwi buꞌ wəndɔŋ; Nwi nə kee bɔ̀ŋ wəndɔŋ buꞌ wəzwi me. 10Nɨniŋ, ŋkə bàw laa wəzwi kɨ shitə tɔ ki maa mədə tɨ́ nshiisə-ŋiisə Nwi laa ŋwə lùu ŋiꞌ wəndɔŋ.

11Luu nə, taa ŋwaa vɨɨ Nwi, faŋ nsiŋ fàynə ghɔ vɨ Yeso Kristo, wəndɔŋ kee lùu shɔ nɨnɔŋ wi me, wəzwi kee lùu shɔ nɨnɔŋ wi me. Vəŋ lùu sheꞌ yaa fa kəmuꞌ. 12Ŋkee fɨshi Nwi nə ndɨ̀ ghutə wəndɔŋ, bɔ̀ŋ wəzwi shɔ. Luu nə, bì wəzwi bì wəndɔŋ. Ŋkə lùu laa wəzwi ndɔ̀ fɨ ghɔ wəndɔŋ, wəndɔŋ ndɔ fɨ ghɔ wəzwi. Luu nə, nsiŋ kɨ lumə laa vətɔ vənshə ndɔ fɨ ghɔ Nwi. 13Bàw viŋ shia nu kɔ́ maa nshɨ-tɔ wiŋ. Ŋkə bàw laa wəzwi ndɔ shɔꞌtə Nwi, faŋ ŋwə kee fɔŋ shìtə tɔ ki yimu? 14Maa vɨɨ biŋ laa Nwi nə bɔ̀ŋ vətɔ, wəndɔŋ kɨ luu kìi nyuŋsə sədə, buu lùu nu tɔ dɨɨ. 15Luu nə, gə fɨ maa kwiŋ vəki, nyuŋsə dəsə lùu nu vəlɔꞌ baa lùu nu kwalə tɨ́ wəzwi, buꞌ laa Nwi kɔ̀ nyuŋsə dəsə tɨ́ ŋwə, nsə luu tɨ́ ŋwə yaa njwi məka tɔ. 16Wə lùu shɔ faŋ ŋwə kee bìŋ vənu və̀ me, bàw ŋwə kɨɨ laa, nshinə yia nə nshinə vɨɨ Nwi fɨ vəshəŋ vəshəŋ lùu laa wəzwi kɨ shitə tɔ ki.

Ntɨsə kɔ̀ŋ fazɨ Mbɔŋ

(Matiu 26.26-29; Mark 14.22-25; Lukas 22.15-20)

17Nu mɔ́ꞌ baa lùu shɔ faŋ mə taa tɨ viŋ nə ŋkə. Lùu nu faŋ kaꞌ mə kee bə̀ŋsə viŋ shɔ me. Yighee njyə faŋ viŋ yaa kɨ faynə shəŋ muꞌ maa məshɔꞌtə Nwi, ŋkə yaa kɨ jwi nə nu bwə, shɔ̀ɔ nu jəə. 18Mfɔŋ ŋɨꞌ lùu laa, mə zɔ̀ laa taa məshəŋtə wiŋ faŋ viŋ faynə maa nu Nwi, viŋ kee lùu nə fa kəmuꞌ me. Viŋ gaasə vəway vəway. Way wì lùu shee yaa lùu yigisə yinsəŋ faŋ mə zɔ̀ kɔ̀ŋ viŋ nə. 19Ŋkə bàw faŋ ŋgaasə fuu taa ŋwaa viŋ, tɨ́ kaꞌ vɨ taa ye vɨɨ mbɨə faŋ vəŋ nùŋ fwi maa Yeso Kristo maa yinsəŋ. 20Mə baa zɔ laa yighee njyə faŋ viŋ yaa kɨ baytə shəŋ muꞌ maa məzɨ fazɨ, kee lùu fazɨ Nwi faŋ viŋ zɨ me. 21Mə gì nɨniŋ buꞌ laa, faŋ viŋ zɨ nə, wə mɔ́ꞌ gə vɨsɨ, zɨ̀ ŋkii fazɨ. Buꞌ nɨniŋ jɨŋ kɨ zasə wə muꞌ, tɨ́ wə mɔ́ꞌ nu, mbə shɔɔ sɨ ŋwə. 22Kəŋ nshinə yɔ́ kee yikuꞌnə me. Ndɔꞌ ghiŋ shɔ faŋ kaꞌ viŋ zɨ baa nu. Sii yɨ̀ kə buu viŋ kɨ shiasə ŋii Nwi, baa mɔꞌ tɔ dɨɨ tɔ vɨɨ mbɨə faŋ vəŋ kee kìi fa me? Sii kaꞌ mə gì kə tɨ́ viŋ? Nə kaꞌ mə bəŋsə viŋ mu, faŋ viŋ kìi kəŋ nshinə yɔ́ nee nə mu? Bey, kaꞌ mə kee bəŋsə viŋ me tuu tɨtiꞌ.

23Gə fɨ maa nu fazɨ Mbɔŋ, mə nə kɨ̀ɨ nə ŋkə fɨ ghɔ tɨta Yeso Kristo. Mə baa luu ndɨ̀, kɨ dəsə tɨ́ viŋ. Ŋkə lùu laa, Nə luu vətuꞌ maa shi ŋkɨə faŋ vɨ nə fìŋ tɨta Yeso nə, ŋwə nə ndɨ̀ bee, 24bwàŋ Nwi, bɨꞌ, gì laa, «Lùu ŋwaa ŋwaa nə, faŋ mə kɔ̀ tɨ́ viŋ. Viŋ kɨ yɨsə nee maa məlumə mə!» 25Faŋ vəŋ nə zɨ, tɨta Yeso baa ndɨ̀ ndaw məluꞌ, gì laa, «Ndaw nyə̀ lùu shwenə məkee məfimə faŋ Nwi gwìa tɨ́ vɨɨ buꞌ mənshi maa. Viŋ taa kɨ yɨsə nɨniŋ ghee nshə faŋ viŋ nu məluꞌ mbɔ́ nə. Nɨniŋ maa məlumə mə.» 26Yighee tɨ̀ me yighee faŋ viŋ zɨ bee kɔ́, baa nu məluꞌ mbɔ́, buu viŋ fɨꞌtə tɨ́ vɨɨ laa tɨta Yeso nə kù tɔ nsiŋ. Viŋ yɨ nɨniŋ, kɔ̀ tɨ́ yighee njyə faŋ tɨta Yeso ndɔ bəŋ jwi.

27Buꞌ nɨniŋ, wə kɨ luu zɨ fazɨ Mbɔŋ, ndɔ baa nù məluꞌ faŋ lùu məluꞌ mə tɨta Kristo, yɨsə maa jɨɨ faŋ nyə kee yikuꞌnə me, ŋkə də̀ laa ŋwə shiasə ŋwaa tɨta Kristo nə mənshi mi. 28Nɨniŋ, wə tɨ̀ me wə faŋ ŋwə gì laa yi taa zɨ fazɨ Mbɔŋ, ndɔ nù məluꞌ mə tɨta Kristo, bàw ŋwə bɨ fɔŋ ndèynə ŋwaa wi, buu zɨ fazɨ kɔ́. 29Viŋ kɔꞌ kɨɨ laa wə ntɨə faŋ ŋwə zɨ̀ fazɨ Mbɔŋ, nù fɨ taa ndaw Kristo nə fwi yibwə, buu ŋwə tii nsɔꞌ Nwi tɔ ŋwə, buꞌ laa ŋwə kee kɨ̀ɨ nə ŋiꞌ yiku tɨta Kristo me. 30Lùu ŋiꞌ nu ŋkɨə faŋ ŋkə yɨ̀ laa vɨɨ lùu vəyaŋ taa ŋwaa viŋ faŋ vəŋ zɨzasə, tɨꞌnə me kee kìi wutə me, tɨꞌnə me kukə. 31Nsiŋ kɨ luu ndeynə yiŋwaa nyaa-nsiŋ faŋ nsiŋ dùꞌ, buu zɨ fazɨ kɔ́, buu nsiŋ kee baa gù nsɔꞌ Nwi me. 32Nu ŋkɨə faŋ Nwi yuu kɨ kwaŋ nsiŋ taa nsɔꞌ, lùu laa Nwi kəə də̀ tɨ́ nsiŋ laa nsiŋ gù vənu, tɨ́ kaꞌ nsiŋ kwìinə fwi saŋ-nsiŋ, kee ndɔ baa ŋìi taa nsɔꞌ Nwi maa shi ŋkɨə faŋ Nwi ndɔ kɨ sɔꞌ mbi yinshə, ndìsə vɨɨ bwənə vənshə me.

33Nɨniŋ, vaŋ-nshwi vaŋ, mə naysə tɨ́ viŋ laa, yighee njyə faŋ viŋ taa faynə shəŋ muꞌ maa məzɨ fazɨ, viŋ duꞌ, kɨ̀ꞌ vəliŋ viŋ, buu tey kɨ zɨ. 34Jɨŋ kɨ luu kɨ zasə wə mɔ́ꞌ, bàw ŋwə bɨ zɨ̀ fazɨ taa ŋii ŋwə ŋkəə, buu jwì, tɨ́ kaꞌ məshəŋtə wiŋ kee lùu maa jɨɨ njyə faŋ kaꞌ Nwi kwàŋ viŋ taa nsɔꞌ me. Gə fɨ maa vənu vəmɔ́ꞌ, mə taa tɨ viŋ shɔ faŋ mə taa jwi yɨ viŋ.

Currently Selected:

1 Kɔrintian 11: bav

Highlight

Copy

Compare