Mateo 1
GNWPB

Mateo 1

1
Jesucristo iyɨpɨ reta jee
(Lucas 3.23-38)
1Yambɨpɨ kuärái kua tupapire pe tee reta. Kua tee reta jae ko Jesucristo iyɨpɨ reta. Jesucristo ko jae David iñemoñaa pewa jare Abraham iñemoñaa pewa wi.
2Echa’ä Abraham taɨ jae ko Isaac,
jare Isaac jae ko Jacob tu,
jare Jacob taɨ reta jae ko Judá jare tɨkeɨ reta jare tɨwɨ reta wi.
3Jare Judá jare jembireko Tamar isambiaɨ reta ko jae Fares jare Zara.
Jare Fares taɨ ko jae Esrom,
jare Esrom taɨ ko jae Aram.
4Jare Aram taɨ ko jae Aminadab,
jare Aminadab taɨ ko jae Naasón, jare Naasón taɨ ko jae Salmón.
5Jare Salmón jare jembireko Rahab isambiaɨ ko jae Booz.
Jare Booz jare jembireko Rut isambiaɨ ko jae Obed.
Jare Obed taɨ ko jae Isaí.
6Jare Isaí taɨ ko jae David. Kua David ko jae Israel pewa reta imburuwicha wasurä arakaete ikose wae. Jokua ko jae Jesús iyɨpɨ reta Abraham wiwe David rewa.
Jare joko wi mburuwicha wasu David taɨ jae ko Salomón. Salomón ichɨ jae ko Urías jembirekokue.
7Jare Salomón taɨ ko jae Roboam,
jare Roboam taɨ ko jae Abías,
jare Abías taɨ ko jae Asa.
8Jare Asa taɨ ko jae Josafat,
jare Josafat taɨ ko jae Joram,
jare Joram taɨ ko jae Uzías.
9Jare Uzías taɨ ko jae Jotam,
jare Jotam taɨ ko jae Acaz,
jare Acaz taɨ ko jae Ezequías.
10Jare Ezequías taɨ ko jae Manasés,
jare Manasés taɨ ko jae Amón,
jare Amón taɨ ko jae Josías.
11Jare Josías taɨ reta ko jae Jeconías jare tɨwɨ reta.
Jare Jeconías iko rambuewe, ɨwɨ Babilonia pewa reta opa seri wɨraa Israel pewa reta Babilonia pe.
12Jare judío#1.12 Judío ko jae kía Israel iñemoñaa pewa. reta opa uyereraa Babilonia pe yawe, Jeconías taɨ ko jae Salatiel,
jare Salatiel taɨ ko jae Zorobabel.
13Jare Zorobabel taɨ ko jae Abiud,
jare Abiud taɨ ko jae Eliaquim,
jare Eliaquim taɨ ko jae Azor.
14Jare Azor taɨ ko jae Sadoc,
jare Sadoc taɨ ko jae Aquim,
jare Aquim taɨ ko jae Eliud.
15Jare Eliud taɨ ko jae Eleazar,
jare Eleazar taɨ ko jae Matán,
jare Matán taɨ ko jae Jacob.
16Jare Jacob taɨ ko jae José. Kua José ko jae María ime. Jare María imembɨ ko jae Jesús. Jae ko Cristo yae chupe wae – jokua Upuruepɨ wae Tumpa ombou wae.
17Jayawe Abraham wiwe oo David pe uwäe rewa uyepapa catorce ñemoñaa reta. Jukuärái wi David wiwe Jeconías rewa uyepapa wi catorce ñemoñaa reta. Joko wi Babilonia pewa reta wɨraa Israel pewa reta iɨwɨ pe. Jare jukuärái wi Jeconías wi uyepapa catorce ñemoñaa reta Cristo rewa.
Jesucristo oa wae rewa
(Lucas 2.1-7)
18Añawe tamɨmbeu Jesucristo oa wae rewa. Jae ichɨ María jee wae José ndiwe jei umendata. Erëi ndei uyereroke reta mbowe, uyekuaa María ipurúa ma oï. Kua uyeyapo chupe Espíritu Santo imbaepuere rupi. 19Jayawe José uikuaa yawe jembirekorä wae ipurúa ma yepe oï, uyemɨngeta tëi ipɨa pe omombo waerä. Echa’ä jae ko kuimbae jupi wae. Erëi uipota tëi omombo wɨari María awɨye waerä umɨmaraka opaete wae reta jowake.
20Jukuärái José uyemɨngeta iko tëi ipɨa pe. Erëi pëti pɨare, José oke iko rambuewe, pëti araɨwa Tumpa ombou wae uyekuaa chupe ipau pe jare jei chupe: “José, David iñemoñaa pewa,” jei chupe. “Nde ndepuere nemenda ndepɨawiwe rewe María ndiwe, echa’ä jae mbaetɨ ko ipurúa oï kuimbae pewarä. Jae ipurúa ko oï Espíritu Santo imbaepuere rupi etei,” jei chupe. 21“María imembɨta oï pëti kuimbae jare nde nembɨjeeta jokua sambiaɨ Jesús.#1.21 Tee Jesús uipota jei jae reta iñee pe “yandeYa upuruepɨ.” Echa’ä yepe tëi opaete wae uyawɨ Tumpa kotɨ jare ime onoi reta teko Tumpa jowai, erëi Jesús uepɨta oï kía kía jae imaerä iko wae reta,” jei araɨwa José pe.
22Jukuärái opaete kua mbaembae uasa uyeyapo waerä kërái arakaete Tumpa jei wae rupi. Echa’ä jae jei iñee umɨmbeu wae Isaías jee wae rupi kuärái:
23“Mase, pëti kuñatái oroke’ä etei kuimbae wae ipuruata oï jare imembɨta oï pëti kuimbae.
Jare jeita chupe reta Emanuel.”#Isaías 7.14
Jukuärái jei Tumpa arakaete. Kua tee Emanuel uipota jei, “Tumpa yande ndiwe oï.”
24Jayawe José usareko jare uyapo kërái Tumpa iaraɨwa jei chupe wae rupi jare umenda María ndiwe. 25Erëi uyereroke’ä reta María imembɨrɨpɨ oa rewa. Jare oa María imembɨ pëti kuimbae mii jare José oñono sambiaɨ jeerä Jesús.

© 2017, Ethnos360 (New Tribes Mission). All rights reserved.


Learn More About Biblia

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.