Romebi 9

Ebɔrɛ nɛ mbe basa laraso be asheŋ

1Asɔ nɛ n wɔ Kristo to a kaŋɛ ere la kashenteŋ nna, m maa fule nna nɛ Kiyoyu Cheeŋ na malɛ bee ŋini ma ashi ma kagbene to fanɛ m maa fule nna. 2Asɔ nɛ mee kaŋɛ na nde: Kagbenejija damta nɛ ebesa nɛ k maŋ kɔ ekar e bɔlɔ ma to ŋkpal ma basa so. 3Nɛ Ebɔrɛ daŋ kpal bumo so, ma yiri to ebi gbagba nɛ n de na, n so ma gbagba kɔnɔ nseŋ lara ma ashi Kristo be kebaawɔtɔ to gba, n daa beeŋ baa sha loŋ. 4Ma basa Israɛlebi nɛ n de na. Bumo nɛ Ebɔrɛ ta ŋ ki mbe mbia n shin nɛ b nya mbe kemaŋkura na n ti so. E nase kebaawɔtɔ koŋwuleso be kɔnɔ n sa bumo nseŋ sa bumo mbra na nɛ bɔrɛlambu na to be kabɔrɛshuŋ na nɛ b nya Ebɔrɛ be nnɔ naseso n ti so. 5B shi benananyɛngboŋana na be kanaŋ to nna. Dimɛdi malɛ be kaplɛa so Kristo na shi bumo to nna. Epaŋ be kedi e baa la Ebɔrɛ nɛ e chɔ kusɔ kama kuwura na peya. Amɛn.

6Kede maa ŋini fanɛ Ebɔrɛ be kɔnɔ naseso na maŋ tiŋ m bɔla ekpa nna, ŋkpal manɛ so, mannɛ Israɛl be efuli so ebi kikɛ e la Ebɔrɛ be basa laraso. 7Kumo alɛ maŋ naa ŋini fanɛ ŋkpal b ka la Eebraham mo nanabiana so bumo kikɛ la Ebɔrɛ be mbia nna. Ayai, kusɔ nɛ Ebɔrɛ kaŋɛ Eebraham e la: “Aizek be kaman to ebi nawule e naaŋ ba ki feya.” 8To, kede e naa ŋini fanɛ mannɛ eyur ere to be kakurge e naa ta basa a ki Ebɔrɛ be mbia she bumo nɛ b bɔla Ebɔrɛ be kɔnɔ naseso na to n nya kakurge na nawule e la Eebraham be kaman to ebi kashenteŋto. 9Ŋkpal manɛ so, le nɛ Ebɔrɛ daŋ nase kɔnɔ n sa Eebraham ŋ kaŋɛ: “Jemanɛ na gbagba kaŋ fo, meeŋ bɛta m ba nɛ Sɛɛra e nya ebinyɛn.” 10Kede malɛ be kaman Rebɛka gba be mbinyɛnbi anyɔ na gba daa kɔ etuto koŋwule nna, mo e la an nananyɛn Aizek na. 11Ama pɔɛŋ nɛ b kurge mbia na nɛ b wora kelela ŋko kulubi Ebɔrɛ daŋ kaŋɛ Rebɛka nna le: 12“Enimuso beeŋ ba shuŋ ebibiso na.” Loŋ e naaŋ tiŋ ŋ ŋini kusɔ nɛ Ebɔrɛ yili na fanɛ mbe kelara bumo be eko na daŋ shi mbe keparso be ketre to nna, mannɛ ŋkpal kusɔ nɛ b daŋ wora so. 13Loŋ malɛ nɛ abɔrɛsibɛ na bee kaŋɛ na fanɛ Ebɔrɛ yɛ: “N lara Jeekɔb nna nseŋ kini Isɔɔ.”

14To, nuso nɛ anyeeŋ kaŋɛ naniere? Fanɛ Ebɔrɛ maa ji asheŋ nɛ amo be ekpa so ŋko? Kaarɛ gba! 15Ŋkpal manɛ so, le nɛ e daŋ kaŋɛ anebi Mosis: “Esa nɛ mee sha kewu kuwɔr, nɛ mee wu kuwɔr nsaa shu a sa esa nɛ mee shu a sa.” 16Amoso, k maŋ la kusɔ nɛ k bee wora ŋkpal nyiŋgbasa be kusɔ nɛ e bee sha so ŋko mbe ashuŋ shunso so, k la Ebɔrɛ be kuwɔr nna. 17Ŋkpal manɛ so, le nɛ abɔrɛsibɛ na bee kaŋɛ fanɛ Ebɔrɛ kaŋɛ ewura Fɛɛro: “M maŋ fo so nna ŋkpal le so nɛ m bɔla fo so ŋ ŋini ma eleŋ nseŋ shin nɛ durnya kikɛ e pin ma asheŋ.” 18Amoso, nɛ Ebɔrɛ baa sha kewu esa kuwɔr, e beeŋ wu mo kuwɔr nɛ e naa sha keshin nɛ esa be kumu e baa du kpakpa, e beeŋ shin nɛ k baa du loŋ.

Ebɔrɛ be agbo nɛ mbe kuwɔr be asheŋ

19Nɛ kenya la loŋ nna, menyi be eko beeŋ tiŋ m bishi ma le: “To, nɛ Ebɔrɛ e la esa nɛ e bee wora loŋ, manɛ e ba nɛ e naa wu anyi kulubi, ŋkpal manɛ so, wanɛ e naaŋ tiŋ n ji kusɔ nɛ Ebɔrɛ bee sha emɔrɔ?” 20Ama fo alɛ dimɛdi e la wanɛ nɛ fo tiŋ m malga n ji Ebɔrɛ emɔrɔ le? Kusɔ pɔrso beeŋ tiŋ ŋ kaŋɛ kumo be epɔrpo le: “Manɛ e ba nɛ fo pɔr ma le” a? 21Mannɛ epɔrpo e kɔ mbe ebɔ be eleŋ nɛ e tiŋ ŋ ku ebɔ na be ako m pɔr nchɛgboŋ be kusɔ jiso to be kusɔ nseŋ naŋ tiŋ n ta ebɔ na be ako malɛ m pɔr kachɛ kama malɛ be kusɔ jiso to be kusɔ a? 22To, loŋ koŋwule na nɛ Ebɔrɛ wora. Mbe demuso be agbo nɛ mbe eleŋ nɛ e daa sha kelara ŋ ŋini basa. Ama e daŋ ji basa nɛ mbe demuso be agbo daa wɔ bumo so nɛ b daga kasogberge na kanyiti. 23Mo alɛ daa sha nna nɛ basa e wu mbe kemaŋkuragboŋ nɛ e shin nɛ k ba anyi nɛ mbe kuwɔr na chɛr a ba anyi so so nna. Anyi nɛ e bela ase n yili nɛ an nya mbe kemaŋkura na. 24Anyi nɛ e tre na, ama mannɛ ashi Juwebi nawule to, e tre basa ko ashi nnyamase gba to. 25Le nɛ Ebɔrɛ daŋ bɔla anebi Hoziya so ŋ kaŋɛ:

“Basa nɛ b daa maŋ la meya na, naniere meeŋ tre bumo ma basa.

Efuli nɛ n daa maa sha na, naniere meeŋ tre kumo ma eshapo.”

26“Kakpa nɛ ma Ebɔrɛ daŋ kaŋɛ bumo le: ‘Mannɛ ma basa e la menyi’ na koŋwule na

nɛ meeŋ naŋ tre bumo ma, Ebɔrɛ nɛ n wɔ ŋkpa to na be mbia.”

27Le nɛ anebi Aizaaya bee kaŋɛ Israɛlebi be asheŋ awɔrso:

“Nɛ Israɛlebi baa shi fanɛ teku ase be ajembubi gba,

bumo to be gbrɛbi e naaŋ nya kumɔlga.

28Ŋkpal manɛ so, Ebɔrɛ maaŋ chɛr nseŋ ji durnya ere demu nɛ asheŋ e loge.”

29Kumo alɛ baa du fanɛ kananɛ Aizaaya daŋ chɛr ŋ kaŋɛ le nna:

“Nɛ Enyɛnpetale daa maŋ yige kaman to ebi ko nna n sa anyi,

anyi daa beeŋ ki fanɛ kananɛ Sodɔm nɛ Gomɔra be nde daŋ ki na.”

Israɛl be baru lela be asheŋ

30To, naniere, nuso nɛ anyeeŋ kaŋɛ? Kumo kikɛ nde fanɛ saŋɛ na nnyamase daa maa fin bumo nɛ Ebɔrɛ be nferinto be kelela, ama naniere bre b bɔla yirda so n nya loŋ be kebaawɔtɔ. 31Ama Israɛlebi nɛ b daŋ fara a bɛ mbra nɛ k bee bar le be kelela so na a fin kumo na bre maŋ nya kumo. 32To, nɛ manɛ e ba nɛ bumo alɛ maŋ nya loŋ be kebaawɔtɔ na? Kusɔ nɛ k ba e la fanɛ b daa maŋ ta yirda n fin bumo nɛ Ebɔrɛ be nferinto be kelela na, b daŋ ta ashuŋ shunso nna a fin kumo. Amoso, b daŋ fiti kejembu nɛ basa bee fiti kumo so na nna. 33Kumo be asheŋ nɛ abɔrɛsibɛ na bee kaŋɛ fanɛ Ebɔrɛ kaŋɛ le na:

“Men keni, kejembu nɛ n ta n nase Zayɔn

nɛ k bee shin nɛ basa bee fiti kumo na,

kumo e la fanɛ kefalta nɛ baaŋ fiti n tɔr na.

Ama ekama nɛ e yirda mo Yesu na bre maaŋ ji anishinyɔr kikɛ.”

Currently Selected:

Romebi 9: GJNb

Highlight

Copy

Compare