Matiu 25
25
Besuŋgurbi kudu be keŋasa be asheŋ
1Nɛ Yesu naŋ bɔ keŋasa ko ŋ kaŋɛ: “Ebɔrɛso be kuwura na to beeŋ naŋ ba kaa du fanɛ besuŋgurbi kudu ko ka daŋ ta bumo be efitila nna n yɔ nɛ b ya shɛr kejafɔ mo kul to. 2Bumo be benu daa la bewulpo nna nɛ benu malɛ la benyiashempo. 3Bewulpo na daŋ ta bumo be efitila, ama b maŋ ta keresin n ti so. 4Ama benyiashempo na bre daŋ ta keresin n wɔtɔ ekɔlba to n ti bumo be efitila so. 5Kijafɔ mo kul na daŋ chɛr ga nɛ edi pɛ bumo kikɛ nɛ b fara a di. 6Kiidiso ka ya fo nɛ b nu basa ka bee tre a kaŋɛ: ‘Kijafɔ mo kul na nde. Men baa ba m ba tu mo.’ 7Ndoŋ nna nɛ besuŋgurbi na kikɛ koso n lɔŋɛ bumo be efitila to. 8Nɛ bewulpo na kaŋɛ benyiashempo na le: ‘Men sa anyi menyi be ekeresin ere be ako, ŋkpal manɛ so, anyi be efitila bee duŋ nna na.’ 9Nɛ benyiashempo na malɛ kaŋɛ bumo le: ‘Ayai, anyi maaŋ tiŋ n sa menyi, ŋkpal manɛ so, shere a maaŋ fo anyi nɛ menyi kikɛ. Kusɔ nɛ k daga men ka wora e la fanɛ men yɔ keresinfapoana na kutɔ n ya tɔ ako.’ 10B ka wɔ ekpa to a yɔ nɛ b ya tɔ keresin na nɛ kejafɔ mo kul na malɛ ba. Ndoŋ nna nɛ bumo nɛ b daŋ wora shiriya na tu kejafɔ mo kul na n luri nɛ b ya ji kejafɔ to be kejigboŋ na. Kumo be kaman nɛ b ti ebu na be kabuna. 11Kumo alɛ be kaman nɛ besuŋgurbi wulpoana na malɛ ba m ba kaa kaŋɛ le: ‘Enyɛnpe, Enyɛnpe, bugi anyi.’ 12Nɛ mo alɛ kaŋɛ: ‘Ma e kaŋɛ menyi kashenteŋto na fanɛ m maŋ nyi menyi.’ 13To, men baa da so, ŋkpal manɛ so, kumo be kifito e la fanɛ men maŋ nyi kachɛ ŋko saŋɛ nɛ ma, Nyiŋgbasa Pibinyɛn na be keba na beeŋ fo.”
Kakɛ be eyiri be keŋasa be asheŋ
(Luuk 19:11-27)
14Nɛ Yesu naŋ bɔ keŋasa ere ŋ kaŋɛ: “Ebɔrɛso be kuwura na kraŋ naa du fanɛ kanyɛn ko ka daa yɔ kakpa ko nna nseŋ tre mbe anya n ta mbe asɔ m bɔɔ bumo enɔ. 15E daŋ ta amansherbi ebɔtɛ anu nna n sa bumo be eko nseŋ ta ebɔtɛ anyɔ n sa ede nseŋ ta bɔtɛ koŋwule n sa ede malɛ. Kananɛ ekama beeŋ tiŋ ŋ keni so nɛ e daŋ sa mo. Kumo be kaman nɛ e pɛ mbe enite na to be ekpa. 16Kenya nɛ e daŋ nya ebɔtɛ anu na ya fara epul na to n ta mbe amansherbi na a ji yawu n naŋ nya ebɔtɛ anu be tɔnɔ n ti so. 17Loŋ koŋwule nɛ emo nɛ e daŋ nya ebɔtɛ anyɔ na gba daŋ wora n nya ebɔtɛ anyɔ n ti so. 18Ama emo nɛ e daŋ nya bɔtɛ koŋwule na daŋ ya ta mo peya nna ŋ kur kemaŋ n ta mo nyɛnpe be amansherbi na m puli. 19Saŋko ka ya fo nɛ anya na bumo nyɛnpe ya bɛta m ba nseŋ ba fara nɛ mo nɛ mbe anya na e keni kusɔ nɛ b ta amansherbi na n wora. 20Ndoŋ nna nɛ emo nɛ e daŋ nya ebɔtɛ anu na lar m bar ebɔtɛ anu n ti so nseŋ ba kaŋɛ mo le: ‘Enyɛnpe, ebɔtɛ anu nɛ fo daŋ ta m bɔɔ ma enɔ. Keni, n naŋ nya ebɔtɛ anu n ti so.’ 21Nɛ mo nyɛnpe kaŋɛ mo le: ‘Mbo, kenya lela nɛ meeŋ tiŋ n yirda. Fo ka baŋ ta gbrɛbi ere n shuŋ le ere nɛ m pin fanɛ meeŋ tiŋ n yirda fo. Amoso, naniere meeŋ ta asɔ damta m bɔɔ fo enɔ. Ba tu ma, fo nyɛnpe a nu ma kuwura to be ebel.’ 22Ndoŋ nna nɛ emo nɛ e daŋ nya ebɔtɛ anyɔ na malɛ lar m ba kaŋɛ: ‘Enyɛnpe, ebɔtɛ anyɔ nɛ fo ta m bɔɔ ma enɔ. Keni, n naŋ nya ebɔtɛ anyɔ n ti so.’ 23Nɛ mo nyɛnpe na kaŋɛ mo le: ‘Mbo, kenya lela nɛ meeŋ tiŋ n yirda. Fo ka baŋ ta gbrɛbi ere n shuŋ le ere nɛ m pin fanɛ meeŋ tiŋ n yirda fo. Amoso, meeŋ ta asɔ damta m bɔɔ fo enɔ. Ba tu ma, fo nyɛnpe n nu ma kuwura to be ebel.’ 24Ndoŋ nna nɛ emo nɛ e daŋ nya bɔtɛ koŋwule na malɛ ba lar m ba kaŋɛ le: ‘Enyɛnpe, n nyi kananɛ fo la kumukpakpasowura, kakpa nɛ fo maŋ duu, ndoŋ nɛ fee teŋi nsaa tise asɔ kakpa nɛ fo maŋ chela amo. 25Amoso, n daa lɔ kufu nna nseŋ ta fo bɔtɛ koŋwule na n lar n ya ŋana kasawule to. Amoso, keni, fo kusɔ nde.’ 26Ndoŋ, nna nɛ mo nyɛnpe na kaŋɛ mo le: ‘Kenya lubi tɔlpo ere, fo kaŋɛ fo nyi ŋ ka bee teŋi asɔ kakpa nɛ m maŋ duu nsaa tise asɔ kakpa nɛ m maŋ chela amo ŋko? 27To, nɛ manɛ e ba nɛ fo daa maŋ ta ma amansherbi na n ya yili amansherbi be eyilikpa nɛ n daŋ ba m ba nya nchu n ti so?’ 28Kumo be kaman nɛ e kilgi ŋ kaŋɛ anya nɛ b daa yil ndoŋ na le: ‘Men sɔ bɔtɛ koŋwule na mo kutɔ n sa emo nɛ e nya ebɔtɛ kudu na. 29Ŋkpal manɛ so, ekama nɛ e kɔ beeŋ naŋ nya ga n ti so, ama ekama nɛ e maŋ kɔ, gbrɛ nɛ e kɔ na gba baaŋ sɔ mo kutɔ. 30To, men pɛ kenya jiga ere n lar n ya lɛ tentembiri to plɔ. Ndoŋ nɛ basa wɔtɔ a shu nsaa we anyi to na.’ ”
Kananɛ Nyiŋgbasa Pibinyɛn beeŋ ji basa demu be asheŋ
31Nɛ Yesu naŋ kaŋɛ: “Saŋɛ nɛ ma, Nyiŋgbasa Pibinyɛn beeŋ shi ma kemaŋkura to nɛ emalaika kikɛ e ba na, meeŋ ba chena ma kemaŋkura be kuwurputi na so. 32Baaŋ shɛr efuliana kikɛ nyam ma anishito nɛ m barga basa ko ashi beko to fanɛ kananɛ mbolpɔkpapo bee barga mbolpɔ ashi mboe to na. 33Meeŋ ta mbolpɔ na n yili ma jisoso nseŋ ta mboe na malɛ n yili ma bena so. 34Kumo be kaman nɛ ma, Ewura na e kaŋɛ basa lela nɛ b wɔ ma jisoso na le: ‘Menyi nɛ n Tuto nɛfa na, men ba luri kuwura nɛ b lɔŋɛ n yili menyi kasɔto be jemanɛ na kikɛ na to. 35Ŋkpal manɛ so, akoŋ daa kɔ ma nna nɛ men sa ma ajibi, achukoŋ daa kɔ ma nna nɛ men sa ma kusɔnuuso, n daa la efɔ nna nɛ men sɔ ma. 36N daa maa kɔ asɔbuuso nɛ men buu ma, n daa lɔ nna nɛ men keni ma so, n daa wɔ kabuti to nɛ men ba chɔrɔ ma.’ 37Nɛ basa lela na e bishi ma: ‘Enyɛnpe, saŋɛ mo nɛ an wu fo nɛ akoŋ nseŋ sa fo ajibi ŋko saŋɛ mo nɛ an wu fo nɛ achukoŋ nseŋ sa fo kusɔnuuso? 38Saŋɛ mo nɛ an wu fo ka la efɔ nseŋ sɔ fo ŋko saŋɛ mo nɛ an wu fo ka maŋ kɔ asɔbuuso nseŋ buu fo? 39Saŋɛ mo nɛ an wu fo ka bee lɔ ŋko a wɔ kabuti to nseŋ ya chɔrɔ fo?’ 40Nɛ ma, Ewura na e kaŋɛ le: ‘Ma e kaŋɛ menyi kashenteŋto na fanɛ, kusɔ kama nɛ men daŋ wora n sa ŋ kurgepobi ere be ekama, ma nɛ men daŋ wora n sa na.’ 41Ade be kaman nɛ ŋ kaŋɛ bumo nɛ b wɔ ma bena so na le: ‘Basa lubi ere, men shile ma so n yɔ edɛ nɛ b puga n yili Setani nɛ mbe emalaika na to. Edɛ na maa duŋ kikɛ. 42Ŋkpal manɛ so, akoŋ daŋ pɛ ma nɛ men maŋ sa ma shɛŋ nɛ n ji, achukoŋ daŋ pɛ ma nɛ men maŋ sa ma shɛŋ nɛ n nuu. 43N daa la efɔ nɛ men maŋ sɔ ma, n daa maa kɔ asɔbuuso, ama menyi alɛ maŋ buu ma, n daa lɔ nseŋ daa naa wɔ kabuti to nɛ men maŋ ba chɔrɔ ma.’ 44Nɛ bumo alɛ e bishi ma le: ‘Enyɛnpe, saŋɛ mo nɛ an wu akoŋ ka kɔ fo ŋko achukoŋ ka kɔ fo ŋko saŋɛ mo nɛ an wu fo ka la efɔ ŋko saŋɛ mo nɛ fo maŋ kɔ asɔbuuso ŋko saŋɛ mo nɛ fee lɔ ŋko saŋɛ mo nɛ fo wɔ kabuti to nɛ an maŋ chɛ fo to?’ 45Nɛ ŋ kaŋɛ bumo le: ‘Ma e kaŋɛ menyi kashenteŋto na fanɛ kusɔ kama nɛ men baŋ maŋ wora n sa bekarkarsobi ere be ekama, ma nɛ men maŋ wora kumo n sa na.’ 46Kumo be kaman nɛ b yɔ kasogberge nɛ k maŋ kɔ ekar na to nɛ basa lela na malɛ e yɔ ŋkpa nɛ k maŋ kɔ ekar na to.”
Currently Selected:
Matiu 25: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
Matiu 25
25
Besuŋgurbi kudu be keŋasa be asheŋ
1Nɛ Yesu naŋ bɔ keŋasa ko ŋ kaŋɛ: “Ebɔrɛso be kuwura na to beeŋ naŋ ba kaa du fanɛ besuŋgurbi kudu ko ka daŋ ta bumo be efitila nna n yɔ nɛ b ya shɛr kejafɔ mo kul to. 2Bumo be benu daa la bewulpo nna nɛ benu malɛ la benyiashempo. 3Bewulpo na daŋ ta bumo be efitila, ama b maŋ ta keresin n ti so. 4Ama benyiashempo na bre daŋ ta keresin n wɔtɔ ekɔlba to n ti bumo be efitila so. 5Kijafɔ mo kul na daŋ chɛr ga nɛ edi pɛ bumo kikɛ nɛ b fara a di. 6Kiidiso ka ya fo nɛ b nu basa ka bee tre a kaŋɛ: ‘Kijafɔ mo kul na nde. Men baa ba m ba tu mo.’ 7Ndoŋ nna nɛ besuŋgurbi na kikɛ koso n lɔŋɛ bumo be efitila to. 8Nɛ bewulpo na kaŋɛ benyiashempo na le: ‘Men sa anyi menyi be ekeresin ere be ako, ŋkpal manɛ so, anyi be efitila bee duŋ nna na.’ 9Nɛ benyiashempo na malɛ kaŋɛ bumo le: ‘Ayai, anyi maaŋ tiŋ n sa menyi, ŋkpal manɛ so, shere a maaŋ fo anyi nɛ menyi kikɛ. Kusɔ nɛ k daga men ka wora e la fanɛ men yɔ keresinfapoana na kutɔ n ya tɔ ako.’ 10B ka wɔ ekpa to a yɔ nɛ b ya tɔ keresin na nɛ kejafɔ mo kul na malɛ ba. Ndoŋ nna nɛ bumo nɛ b daŋ wora shiriya na tu kejafɔ mo kul na n luri nɛ b ya ji kejafɔ to be kejigboŋ na. Kumo be kaman nɛ b ti ebu na be kabuna. 11Kumo alɛ be kaman nɛ besuŋgurbi wulpoana na malɛ ba m ba kaa kaŋɛ le: ‘Enyɛnpe, Enyɛnpe, bugi anyi.’ 12Nɛ mo alɛ kaŋɛ: ‘Ma e kaŋɛ menyi kashenteŋto na fanɛ m maŋ nyi menyi.’ 13To, men baa da so, ŋkpal manɛ so, kumo be kifito e la fanɛ men maŋ nyi kachɛ ŋko saŋɛ nɛ ma, Nyiŋgbasa Pibinyɛn na be keba na beeŋ fo.”
Kakɛ be eyiri be keŋasa be asheŋ
(Luuk 19:11-27)
14Nɛ Yesu naŋ bɔ keŋasa ere ŋ kaŋɛ: “Ebɔrɛso be kuwura na kraŋ naa du fanɛ kanyɛn ko ka daa yɔ kakpa ko nna nseŋ tre mbe anya n ta mbe asɔ m bɔɔ bumo enɔ. 15E daŋ ta amansherbi ebɔtɛ anu nna n sa bumo be eko nseŋ ta ebɔtɛ anyɔ n sa ede nseŋ ta bɔtɛ koŋwule n sa ede malɛ. Kananɛ ekama beeŋ tiŋ ŋ keni so nɛ e daŋ sa mo. Kumo be kaman nɛ e pɛ mbe enite na to be ekpa. 16Kenya nɛ e daŋ nya ebɔtɛ anu na ya fara epul na to n ta mbe amansherbi na a ji yawu n naŋ nya ebɔtɛ anu be tɔnɔ n ti so. 17Loŋ koŋwule nɛ emo nɛ e daŋ nya ebɔtɛ anyɔ na gba daŋ wora n nya ebɔtɛ anyɔ n ti so. 18Ama emo nɛ e daŋ nya bɔtɛ koŋwule na daŋ ya ta mo peya nna ŋ kur kemaŋ n ta mo nyɛnpe be amansherbi na m puli. 19Saŋko ka ya fo nɛ anya na bumo nyɛnpe ya bɛta m ba nseŋ ba fara nɛ mo nɛ mbe anya na e keni kusɔ nɛ b ta amansherbi na n wora. 20Ndoŋ nna nɛ emo nɛ e daŋ nya ebɔtɛ anu na lar m bar ebɔtɛ anu n ti so nseŋ ba kaŋɛ mo le: ‘Enyɛnpe, ebɔtɛ anu nɛ fo daŋ ta m bɔɔ ma enɔ. Keni, n naŋ nya ebɔtɛ anu n ti so.’ 21Nɛ mo nyɛnpe kaŋɛ mo le: ‘Mbo, kenya lela nɛ meeŋ tiŋ n yirda. Fo ka baŋ ta gbrɛbi ere n shuŋ le ere nɛ m pin fanɛ meeŋ tiŋ n yirda fo. Amoso, naniere meeŋ ta asɔ damta m bɔɔ fo enɔ. Ba tu ma, fo nyɛnpe a nu ma kuwura to be ebel.’ 22Ndoŋ nna nɛ emo nɛ e daŋ nya ebɔtɛ anyɔ na malɛ lar m ba kaŋɛ: ‘Enyɛnpe, ebɔtɛ anyɔ nɛ fo ta m bɔɔ ma enɔ. Keni, n naŋ nya ebɔtɛ anyɔ n ti so.’ 23Nɛ mo nyɛnpe na kaŋɛ mo le: ‘Mbo, kenya lela nɛ meeŋ tiŋ n yirda. Fo ka baŋ ta gbrɛbi ere n shuŋ le ere nɛ m pin fanɛ meeŋ tiŋ n yirda fo. Amoso, meeŋ ta asɔ damta m bɔɔ fo enɔ. Ba tu ma, fo nyɛnpe n nu ma kuwura to be ebel.’ 24Ndoŋ nna nɛ emo nɛ e daŋ nya bɔtɛ koŋwule na malɛ ba lar m ba kaŋɛ le: ‘Enyɛnpe, n nyi kananɛ fo la kumukpakpasowura, kakpa nɛ fo maŋ duu, ndoŋ nɛ fee teŋi nsaa tise asɔ kakpa nɛ fo maŋ chela amo. 25Amoso, n daa lɔ kufu nna nseŋ ta fo bɔtɛ koŋwule na n lar n ya ŋana kasawule to. Amoso, keni, fo kusɔ nde.’ 26Ndoŋ, nna nɛ mo nyɛnpe na kaŋɛ mo le: ‘Kenya lubi tɔlpo ere, fo kaŋɛ fo nyi ŋ ka bee teŋi asɔ kakpa nɛ m maŋ duu nsaa tise asɔ kakpa nɛ m maŋ chela amo ŋko? 27To, nɛ manɛ e ba nɛ fo daa maŋ ta ma amansherbi na n ya yili amansherbi be eyilikpa nɛ n daŋ ba m ba nya nchu n ti so?’ 28Kumo be kaman nɛ e kilgi ŋ kaŋɛ anya nɛ b daa yil ndoŋ na le: ‘Men sɔ bɔtɛ koŋwule na mo kutɔ n sa emo nɛ e nya ebɔtɛ kudu na. 29Ŋkpal manɛ so, ekama nɛ e kɔ beeŋ naŋ nya ga n ti so, ama ekama nɛ e maŋ kɔ, gbrɛ nɛ e kɔ na gba baaŋ sɔ mo kutɔ. 30To, men pɛ kenya jiga ere n lar n ya lɛ tentembiri to plɔ. Ndoŋ nɛ basa wɔtɔ a shu nsaa we anyi to na.’ ”
Kananɛ Nyiŋgbasa Pibinyɛn beeŋ ji basa demu be asheŋ
31Nɛ Yesu naŋ kaŋɛ: “Saŋɛ nɛ ma, Nyiŋgbasa Pibinyɛn beeŋ shi ma kemaŋkura to nɛ emalaika kikɛ e ba na, meeŋ ba chena ma kemaŋkura be kuwurputi na so. 32Baaŋ shɛr efuliana kikɛ nyam ma anishito nɛ m barga basa ko ashi beko to fanɛ kananɛ mbolpɔkpapo bee barga mbolpɔ ashi mboe to na. 33Meeŋ ta mbolpɔ na n yili ma jisoso nseŋ ta mboe na malɛ n yili ma bena so. 34Kumo be kaman nɛ ma, Ewura na e kaŋɛ basa lela nɛ b wɔ ma jisoso na le: ‘Menyi nɛ n Tuto nɛfa na, men ba luri kuwura nɛ b lɔŋɛ n yili menyi kasɔto be jemanɛ na kikɛ na to. 35Ŋkpal manɛ so, akoŋ daa kɔ ma nna nɛ men sa ma ajibi, achukoŋ daa kɔ ma nna nɛ men sa ma kusɔnuuso, n daa la efɔ nna nɛ men sɔ ma. 36N daa maa kɔ asɔbuuso nɛ men buu ma, n daa lɔ nna nɛ men keni ma so, n daa wɔ kabuti to nɛ men ba chɔrɔ ma.’ 37Nɛ basa lela na e bishi ma: ‘Enyɛnpe, saŋɛ mo nɛ an wu fo nɛ akoŋ nseŋ sa fo ajibi ŋko saŋɛ mo nɛ an wu fo nɛ achukoŋ nseŋ sa fo kusɔnuuso? 38Saŋɛ mo nɛ an wu fo ka la efɔ nseŋ sɔ fo ŋko saŋɛ mo nɛ an wu fo ka maŋ kɔ asɔbuuso nseŋ buu fo? 39Saŋɛ mo nɛ an wu fo ka bee lɔ ŋko a wɔ kabuti to nseŋ ya chɔrɔ fo?’ 40Nɛ ma, Ewura na e kaŋɛ le: ‘Ma e kaŋɛ menyi kashenteŋto na fanɛ, kusɔ kama nɛ men daŋ wora n sa ŋ kurgepobi ere be ekama, ma nɛ men daŋ wora n sa na.’ 41Ade be kaman nɛ ŋ kaŋɛ bumo nɛ b wɔ ma bena so na le: ‘Basa lubi ere, men shile ma so n yɔ edɛ nɛ b puga n yili Setani nɛ mbe emalaika na to. Edɛ na maa duŋ kikɛ. 42Ŋkpal manɛ so, akoŋ daŋ pɛ ma nɛ men maŋ sa ma shɛŋ nɛ n ji, achukoŋ daŋ pɛ ma nɛ men maŋ sa ma shɛŋ nɛ n nuu. 43N daa la efɔ nɛ men maŋ sɔ ma, n daa maa kɔ asɔbuuso, ama menyi alɛ maŋ buu ma, n daa lɔ nseŋ daa naa wɔ kabuti to nɛ men maŋ ba chɔrɔ ma.’ 44Nɛ bumo alɛ e bishi ma le: ‘Enyɛnpe, saŋɛ mo nɛ an wu akoŋ ka kɔ fo ŋko achukoŋ ka kɔ fo ŋko saŋɛ mo nɛ an wu fo ka la efɔ ŋko saŋɛ mo nɛ fo maŋ kɔ asɔbuuso ŋko saŋɛ mo nɛ fee lɔ ŋko saŋɛ mo nɛ fo wɔ kabuti to nɛ an maŋ chɛ fo to?’ 45Nɛ ŋ kaŋɛ bumo le: ‘Ma e kaŋɛ menyi kashenteŋto na fanɛ kusɔ kama nɛ men baŋ maŋ wora n sa bekarkarsobi ere be ekama, ma nɛ men maŋ wora kumo n sa na.’ 46Kumo be kaman nɛ b yɔ kasogberge nɛ k maŋ kɔ ekar na to nɛ basa lela na malɛ e yɔ ŋkpa nɛ k maŋ kɔ ekar na to.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation