Levitikɔs 9

Ɛɛrɔn be sososo be sarga be kelara be asheŋ

1B ka wora bɔrɛmatapoana be kebuu be kesheŋ wora na n loge be kachɛ burwasopo na nɛ Mosis tre Ɛɛrɔn nɛ mbe mbinyɛnsobi nɛ Israɛl be benimuana na m ba shɛr 2nɛ e kaŋɛ Ɛɛrɔn le: “Fin gbolu fɔlbi nɛ kpakpa nɛ a maŋ kɔ ndulgi nseŋ ta gbolu fɔlbi na n lara kulubi be sarga, n ta kpakpa na malɛ n lara sarga chɔɔso n sa Enyɛnpe Ebɔrɛ na. 3Kumo be kaman nɛ fo kaŋɛ Israɛlebi na fanɛ b ta kaboenyɛn n lara kulubi be sarga nseŋ ta gbolu fɔlbi nɛ kpakpafɔlbi nɛ a ji nfɛ koko nsaa maa kɔ ndulgi kikɛ na n lara sarga chɔɔso n sa Enyɛnpe Ebɔrɛ na 4nseŋ naŋ ta gbolu nɛ kpakpa n lara kɔnɔkoŋwule be sarga. A daga b ta amo n ti ayu be sargajibi nɛ b ta ŋku m baga amo n lara kɔnɔkoŋwule be sarga n sa Enyɛnpe Ebɔrɛ na. A daga b ka wora loŋ, ŋkpal manɛ so, Enyɛnpe Ebɔrɛ na beeŋ lar bumo so kabre.”

5Ndoŋ nna nɛ b bar asɔ nɛ Mosis kaŋɛ fanɛ b bar na kikɛ ashi wajɛbu na be anishito nɛ basa na kikɛ shɛr ndoŋ nɛ b bunyaŋ Enyɛnpe Ebɔrɛ na. 6Nɛ Mosis kaŋɛ: “Kusɔ nɛ Enyɛnpe Ebɔrɛ na yili fanɛ men wora nna na, saŋɛ na so mbe kemaŋkura beeŋ lar menyi so.”

7Kumo be kaman nɛ Mosis naŋ kaŋɛ Ɛɛrɔn le: “Yɔ bɔrɛsure na ase n ya lara fo kumu so be sarga chɔɔso pɔɛŋ nseŋ lara kulubi be esarga ŋ kule fo nɛ basa na kikɛ be alubi be ketampaŋ fanɛ kananɛ Enyɛnpe Ebɔrɛ na yili kumo na.”

8Ndoŋ nna nɛ Ɛɛrɔn yɔ bɔrɛsure na ase n ya mɔ gbolu fɔlbi na n lara mbe kumu so be kulubi be sarga. 9Nɛ mbe mbinyɛnsobi na suse kumo be ŋklaŋ m bar mo nɛ e ta keshilbi n nyɔ amo to ŋ gbiti bɔrɛsure na be alambɛ ana na be nnɔso nseŋ chulgi ŋklaŋ nɛ a ka na n wurge bɔrɛsure na be kaseto. 10Kede be kaman nɛ e ta kumo be nfɔ na nɛ achɛbi anyɔ na nɛ kegberche na be alela akpa n deŋi bɔrɛsure na so n chɔɔ fanɛ kananɛ Enyɛnpe Ebɔrɛ na yili n sa Mosis na. 11Ama eblaŋ na nɛ kawɔl na bre, e ta amo nna n lar keeyi na be ekarso n ya chɔɔ.

12Kede be kaman nɛ e mɔ mbe sarga chɔɔso be kusɔbɔya na. Nɛ mbe mbinyɛnsobi na suse kumo be ŋklaŋ n sa mo nɛ e wora amo ŋ ŋmenyaŋ ŋ ŋmenyaŋ bɔrɛsure na be mba ana na kikɛ so. 13Kumo be kaman nɛ b bela kusɔbɔya na be kumu nɛ eblaŋ kikɛ m bar mo nɛ e chɔɔ amo bɔrɛsure na so 14nseŋ ta nchu n fɔr kumo be apuntosɔ nɛ kaman be ayawɔrta so m bela amo n ti eblaŋ na so n chɔɔ bɔrɛsure na so.

15Ɛɛrɔn ka wora loŋ n loge nɛ e bar basa na malɛ be esarga be asɔbɔya m ba mɔ kulubi be sarga be kaboe na n lara kulubi be sarga, fanɛ kananɛ e daŋ wora mo gba peya na.

16E daŋ bar basa na be sarga chɔɔso be kusɔbɔya na nna m ba lara sarga fanɛ kananɛ mbra bee ŋini na. 17E daŋ bar ayu be sargajibi gba nna nseŋ jɔ nyifu na enɔ be bɔlɔ n ti kachipurso be sarga chɔɔso na so n chɔɔ bɔrɛsure na so.

18Kumo be lalaloge nɛ e mɔ gbolu nɛ kpakpa na n lara basa na be kɔnɔkoŋwule be sarga na. Nɛ mbe mbinyɛnsobi na suse ŋklaŋ na m ba sa mo nɛ e wora amo ŋ ŋmenyaŋ bɔrɛsure na be mba ana na so. 19Kumo be kaman nɛ Ɛɛrɔn ta eblaŋ be nfɔ ekpa fanɛ kpandu na nɛ apuntosɔ nɛ achɛbi nɛ agbirche na be alela akpa kikɛ 20n ti ŋgbeneana na so n ta amo kikɛ n yɔ bɔrɛsure na ase n ya chɔɔ nfɔ na bɔrɛsure na so. 21Kumo be kaman nɛ e ta ŋgbene na nɛ jiso be ebɛaŋ nɛ a la Enyɛnpe Ebɔrɛ na be kakɛgboŋ nɛ k bee yɔ bɔrɛmatapoana na kutɔ fanɛ kananɛ Enyɛnpe Ebɔrɛ na yili n sa Mosis na.

22Ɛɛrɔn ka lara esarga na kikɛ n loge nɛ e maŋ mbe enɔana so n shoŋi basa na nseŋ nɛfa bumo pɔɛŋ nseŋ shi bɔrɛsure na ase ŋ gbelge m ba. 23Kumo be kaman nɛ Mosis nɛ Ɛɛrɔn luri wajɛbu na to. B ka lar m ba nɛ b nɛfa basa na nɛ Enyɛnpe Ebɔrɛ na be kemaŋkura fulto ndoŋ nɛ basa na kikɛ wu kumo. 24Epul na to nɛ Enyɛnpe Ebɔrɛ na shin nɛ edɛ ba buu sarga chɔɔso na nɛ nfɔ na kikɛ so bɔrɛsure na so n chɔɔ amo m mur. Basa na kikɛ ka wu loŋ nɛ b boŋ to kagbenefuliso n ta enɔana m buu bumo be anishi so nseŋ kur amu n yuu to.

Currently Selected:

Levitikɔs 9: GJNb

Highlight

Copy

Compare