Levitikɔs 5

1Nɛ Enyɛnpe Ebɔrɛ na naŋ kaŋɛ: “Nɛ fanɛ esa wu kusɔ ko ŋko n nu kesheŋ ko nɛ a daga e ka ji kumo be shɛda ashi demujikpa nɛ e kini, e wora kulubi nna na nseŋ daga kasogberge.

2Nɛ esa maŋ kute m beta kusɔbɔya wuso ŋko kusɔ ko nɛ k maŋ walɛ so daŋkare be ekpa so gba, amodoŋwura wora eyurpi nseŋ wora n da so nna na.

3Nɛ esa maŋ kute m beta kusɔ kama nɛ k bee shin nɛ dimɛdi bee wora eyurpi daŋkare be ekpa so gba, nseŋ ba pin kumo be loŋ, e wora n da so nna na.

4Nɛ esa baaŋ bɔ ntaŋ alefasha so fanɛ e beeŋ wora kelela ŋko kulubi ko gba, nsaa maŋ wora loŋ, e wora n da so nna na.

5Esa kama nɛ e wora n da so ashi asheŋ ere be kekama to daga e tuba kulubi na to 6nseŋ bar kubolpɔ cheso ŋko kaboeche Enyɛnpe Ebɔrɛ na be anishito m ba lara kulubi be sarga. Bɔrɛmatapo na e naaŋ yili esa na be katelamu to n lara sarga na.

7Nɛ esa na maaŋ tiŋ n nya kubolpɔ ŋko kaboe, e bar elepɔ anyɔ ŋko ali anyɔ Enyɛnpe Ebɔrɛ na be anishito m ba lara mbe kulubi na be sarga. Baaŋ ta mbuibi na be ekoŋwule n lara kulubi be sarga nseŋ ta ekoŋwule malɛ n lara sarga chɔɔso. 8Esa na beeŋ bar mbuibi anyɔ na bɔrɛmatapo kutɔ nɛ e juŋkpar n ta ekoŋwule n lara kulubi be sarga na. E beeŋ kii kabuibi na be kubɔ to m bu ama e maaŋ chuge kumu bre. 9Kumo be kaman nɛ e wora ŋklaŋ na be ako ŋ ŋmenyaŋ danyaŋ be bɔrɛsure na be akel so nseŋ shin nɛ ŋklaŋ nɛ a ka na a chise n wurge bɔrɛsure na be kaseto. Ŋkpal manɛ so, k la kulubi be sarga nna. 10Kumo alɛ be kaman nɛ bɔrɛmatapo na e ta kabuibi nyɔsopo na n lara sarga chɔɔso fanɛ kananɛ kumo be mbra bee ŋini na. Kananɛ bɔrɛmatapo na beeŋ lara sarga nɛ esa na e nya ketampaŋ nna na.

11Ama nɛ fanɛ esa na maŋ kɔ elepɔ anyɔ ŋko ali anyɔ na gba, e bar nyifu nɛ b kɔr nɛ e pe nɛnɛ be kurwa be bɔlɔ m ba lara kulubi be sarga na. E sa maŋ kaŋ ta ɔlif be ŋku m baga amo ŋko n ta duwu n ti amo so, ŋkpal manɛ so, k la kulubi be sarga nna. 12Esa na beeŋ bar nyifu na bɔrɛmatapo na kutɔ nɛ mo alɛ e jɔ amo be enɔ be bɔlɔ shɛda so a ŋini fanɛ amo kikɛ nɛ b ta n lara sarga n sa Enyɛnpe Ebɔrɛ na. Kumo be kaman nɛ e chɔɔ amo nɛ e jɔ na bɔrɛsure na so. Ŋkpal manɛ so, k la kulubi be sarga nna. 13Kananɛ bɔrɛmatapo na beeŋ lara esa na be kulubi be sarga nɛ e nya ketampaŋ nna na. Nyifu nɛ a beeŋ ka na la bɔrɛmatapo na peya nna fanɛ kananɛ ayu be sargajibi be nyifu la mo peya na.”

Kewora n jija be sarga be asheŋ

14Kede be kaman nɛ Enyɛnpe Ebɔrɛ na naŋ yili le be mbra ere n sa Mosis: 15“Nɛ esa maŋ ka asɔ cheembi nɛ a daga e ka n sa Enyɛnpe Ebɔrɛ na ŋkpal e ka maŋ nyi so, e wora n da so nna na. Amodoŋwura beeŋ bar kpakpa nɛ k maŋ kɔ ndulgi kikɛ ŋko bɔrɛmatapo na beeŋ ku kukɔ n sa mo nɛ e ka nɛ b ta n tɔ kakpa na. 16Esa na daga fanɛ e ka kukɔ nɛ b ku n sa mo na, nɛ kumo be ntuŋ nuso to be katuŋ koŋwule n ti so, n sa Enyɛnpe Ebɔrɛ na. Bɔrɛmatapo na nɛ e beeŋ ka amo n sa, nɛ mo alɛ e yili mbe katelamu to n ta kusɔbɔya na n lara kulubi be sarga nɛ e nya ketampaŋ.

17Nɛ esa maŋ nyi nseŋ wora n da Enyɛnpe Ebɔrɛ na be mbraana nɛ e yili na be kekama so, e wora kulubi nna na nseŋ daga fanɛ e lara kumo be sarga. 18Amodoŋwura beeŋ bar kpakpa nɛ k maŋ kɔ ndulgi kikɛ m ba sa bɔrɛmatapo na fanɛ mbe kewora n jija be sarga. Bɔrɛmatapo na e naaŋ ŋini mo kusɔbɔya nɛ k daga fanɛ e bar. Kumo be kaman nɛ bɔrɛmatapo na e ta kusɔbɔya na n lara kulubi be sarga nɛ e nya kulubi nɛ e maŋ nyi nseŋ wora na be ketampaŋ. 19K la kewora n jija be sarga nɛ e lara n sa Enyɛnpe Ebɔrɛ na ŋkpal kulubi nɛ e wora na so nna.”

Currently Selected:

Levitikɔs 5: GJNb

Highlight

Copy

Compare