Levitikɔs 17

Keji ŋklaŋ ka maŋ daga be asheŋ

1Nɛ Enyɛnpe Ebɔrɛ na kaŋɛ Mosis le: 2“Kaŋɛ Ɛɛrɔn nɛ mbe mbinyɛnsobi nɛ Israɛlebi na kikɛ kusɔ nɛ mee sha fanɛ b baa wora. 3-4Israɛl be esa kama nɛ e mɔ kena ŋko kubolpɔ ŋko kaboe n lara sarga n sa Enyɛnpe Ebɔrɛ na ashi kaplɛkama nɛ k maŋ la wajɛbu na be kabuna ase, kumo ere amodoŋwura wora n de mbra na so nna na. E shin nɛ ŋklaŋ wurge nna nseŋ daga b lara mo Ebɔrɛ be basa to. 5Mbra ere ba nna nɛ k shin nɛ Israɛlebi e baa bar bumo be asɔbɔya nɛ baa mɔ a lara esarga mboŋ pɔtɛ na, Enyɛnpe Ebɔrɛ na kutɔ. Naniere bɔrɛmatapoana na kutɔ ashi wajɛbu na be kabuna to nɛ baaŋ baa bar amo m ba kaa mɔ amo a lara kɔnɔkoŋwule be esarga. 6Bɔrɛmatapo na beeŋ suse ŋklaŋ na ŋ ŋmenyaŋ bɔrɛsure nɛ k wɔ wajɛbu cheembi na be kabuna to na so nseŋ chɔɔ nfɔ nɛ amo be efɛa bee par Enyɛnpe Ebɔrɛ na. 7Israɛlebi na e sa maa lar Enyɛnpe Ebɔrɛ na kaman n ya kaa mɔ bumo be asɔbɔya a lara esarga a sa agbir nɛ a bee ji mboe ŋko ayoyu lubi ashi bumo be ndɔana to. Mbra ere dese nna n sa bumo nɛ bumo be kaman to ebi kikɛ hale mbaanaayɔ.

8Men baa nyiŋi fanɛ Israɛl be esa kikɛ ŋko efɔ kama nɛ e chena bumo to nseŋ lara sarga chɔɔso ŋko sarga be yiri kikɛ 9n sa Enyɛnpe Ebɔrɛ na ashi kaplɛkama nsaa maŋ bar kumo wajɛbu na be kabuna to, daga fanɛ b lara mo Ebɔrɛ be basa to.

10Israɛl be esa kikɛ ŋko bumo to be efɔ kikɛ baŋ ji eblaŋ nɛ ŋklaŋ kraa wɔ kumo to, Enyɛnpe Ebɔrɛ na beeŋ pal kaman n sa amodoŋwura nseŋ lara mo ashi mbe basa to. 11Kusɔ keniso kikɛ be ŋkpa wɔ kumo be ŋklaŋ to nna, amoso nɛ Enyɛnpe Ebɔrɛ na kaŋɛ fanɛ b baa chulgi asɔbɔya be ŋklaŋ kikɛ a wurge bɔrɛsure na so nɛ a baa kpra basa na be alubi. Ŋklaŋ nɛ a la ŋkpa na a naa kpra alubi. 12Amoso nɛ Enyɛnpe Ebɔrɛ na kaŋɛ Israɛl be basa na fanɛ bumo ŋko befɔ kama nɛ b chena bumo to na e sa maa ji eblaŋ nɛ ŋklaŋ kraa wɔ kumo to na.

13Nɛ Israɛl be esa kikɛ ŋko efɔ kama nɛ e chena bumo to ya ji kekpaŋ m mɔ kusɔbɔya ŋko kabuibi nɛ k daga keji, amodoŋwura e ku kumo be kubɔto n chulgi kumo be ŋklaŋ n wurge kasawule nseŋ wora eshishɛr m buu amo so. 14Kusɔ keniso kikɛ be ŋkpa wɔ kumo be ŋklaŋ to nna, amoso nɛ Enyɛnpe Ebɔrɛ na kaŋɛ Israɛl be basa na fanɛ b sa maŋ kaŋ ji eblaŋ nɛ ŋklaŋ kraa wɔ kumo to na. Esa kama malɛ nɛ e ji loŋ be eblaŋ maŋ naŋ ti mbe basa so.

15Israɛl be esa kikɛ ŋko efɔ kama nɛ e we kusɔbɔya nɛ e wu kpi ŋko kusɔbɔya nɛ kupuŋ to be kusɔ pɛ, daga fanɛ e fɔr mbe asɔbuuso nseŋ bɛr nchu, ama e kraa beeŋ baa wɔ eyurpi to n ya fo kaaseso. 16E kaŋ kini kefɔr mbe asɔbuuso nseŋ bɛr nchu e beeŋ nya kumo be kasogberge.”

Currently Selected:

Levitikɔs 17: GJNb

Highlight

Copy

Compare