Jɔn 2
2
Yesu ka ta nchu ŋ ki yabra belbelso be asheŋ
1Filip nɛ Nataniɛl ka ba Yesu kutɔ be nchɛnnyɔ be kaman nɛ esa ko bee kre kejafɔ ashi Keena be kade to ashi Galili, nɛ Yesu mo nio gba yɔ ndoŋ. 2B daŋ tre Yesu nɛ mbe bebɛsopo gba kejafɔ na to nna nɛ b yɔ. 3B wɔ ndoŋ nna nɛ kejafɔ na to be yabra belbelso ya loge nɛ Yesu mo nio kaŋɛ mo: “Keni, bumo be yabra belbelso na maŋ naa wɔtɔ.” 4Nɛ Yesu kaŋɛ: “Kache manɛ, fee sha keŋini ma asheŋ be kewora nna a? Ma saŋɛ maŋ naŋ fo.” 5Ndoŋ nna nɛ Yesu mo nio kilgi ŋ kaŋɛ laŋ na to be nyɛrbi le: “Kusɔ kama nɛ e yɛ men wora, men wora.” 6Juwebi daa kɔ eyur be kefɔrso be daŋkare be kabɔrɛbɛso ko nna, amoso, mpuya ashe e daa yil ndoŋ. Mpuya na be kekama daa beeŋ tiŋ n sɔ nchu fanɛ egalɔn adunyɔ ŋko adesa. 7Loŋ be mpuya na be asheŋ nɛ Yesu daŋ kaŋɛ nyɛrbi na le: “Men jɔ nchu m bɔlɔ amo felɛlɛ.” Ndoŋ nna nɛ b jɔ nchu na m bɔlɔ amo. 8B ka loge nɛ e kaŋɛ bumo: “To, naniere men jɔ amo be ako n ya sa kejafɔ be kejigboŋ ere to be enimu na.” Nchu na daŋ kilgi yabra belbelso nna. 9B ka jɔ amo n yɔ nɛ enimu na nuu ŋ keni. Nyɛrbi nɛ b daŋ jɔ nchu na daa nyi kakpa nɛ le be yabra belbelso na daŋ shi, ama enimu na bre daa maŋ nyi. Amoso, e daŋ tre kejafɔ mo kul na nna n lar ekarso n ya kaŋɛ mo le: 10“Keni, yabra belbelso lela nɛ ekama yaa fara a bar nɛ basa bee nuu bumo be keparso pɔɛŋ nɛ baa bar amo nɛ a maŋ wɔ ebel fanɛ ade na kaman. Nɛ manɛ e ba nɛ fo ere yaŋ ta alela na n yili loŋ m ba kaa chige amo naniere?”
11Le be mamachi be kesheŋ ere e daa la emamachisheŋ ana nɛ Yesu daŋ wora n wora ana na to be kejuŋkparso ashi Keena, Galili be efuli so. E daŋ wora loŋ nna ŋ ŋini kananɛ mbe kemaŋkura du nɛ mbe bebɛsopo wora mo yirda.
12Ade be kaman nɛ Yesu nɛ mo nio nɛ mo sipoana nɛ mbe bebɛsopoana kikɛ yɔ Kapɛɛniam n ya ji nchɛnnyɔ ndoŋ.
Yesu ka ju yawujipoana ashi bɔrɛlambu na to be asheŋ
(Matiu 21:12-13; Maak 11:15-18; Luuk 19:45-46)
13A ka ba ka gbrɛbi nɛ Juwebi be Kebansonchoŋ be daŋkare be kejigboŋ be saŋɛ e fo nɛ Yesu yɔ Jerusalɛm. 14E ka fo ndoŋ nɛ e yɔ bɔrɛlambu na to nɛ basa ko wɔ kumo to be kelɔnɛ so a fa ana nɛ mbolpɔ nɛ ali nɛ beko malɛ tase bumo be eteebɔl ase a chɛr amansherbi. 15Ndoŋ nna nɛ e ta amamprɔŋ n wora kuchuchɔ n ju basa na kikɛ nɛ mbolpɔ nɛ ana na kikɛ nseŋ melgi eteebɔl na kikɛ m buu nɛ bumo be amansherbiana na tɔr m pesaŋ to. 16Kumo be kaman nɛ e kilgi ŋ kaŋɛ alifapoana na le: “Men ta amo n lar nfe. Men sa maŋ ta n Tuto pe a ki kebɛ.” 17Ndoŋ nna nɛ mbe bebɛsopoana nyiŋi abɔrɛsibɛ na ka bee kaŋɛ fanɛ: “Kasha nɛ fo kɔ a sha fo pe ere shi ma to ga hale a chɔɔ ma to fanɛ edɛ na.” 18Asheŋ ere be kaman nɛ Juwebi be benimuana na ba bishi mo le be kesheŋ bishiso ere, b yɛ: “Manɛ be mamachi be kesheŋ nɛ fo kɔ nɛ fo wora ŋ ŋini anyi nɛ an pin ekpa nɛ fo kɔ a tiŋ a wora le be asheŋ ere kikɛ?” 19Nɛ Yesu kaŋɛ bumo le: “Men jija bɔrɛlambu ere ŋ keni nɛ n naŋ pɔr kumo nchɛ nsa to.” 20Nɛ Juwebi na bishi mo: “B ta nfɛ adena nɛ ashe m pɔr kusɔ nɛ fo ere e tiŋ n ta nchɛ nsa m pɔr kumo a?” 21Ama mannɛ bɔrɛlambu be ebu na gbagba nɛ Yesu daa de. Mbe eyur nɛ e daa de. 22Ebɔrɛ daŋ tiŋi Yesu ashi luwu to nna pɔɛŋ nɛ bebɛsopo na nyiŋi kusɔ nɛ e daŋ kaŋɛ na. Ndoŋ nna nɛ b wora abɔrɛsibɛ na nɛ mmalga nɛ Yesu daŋ malga na yirda.
23Yesu ka daa wɔ Jerusalɛm, Kebansonchoŋ be kejigboŋ be saŋɛ na, basa damta daŋ yirda mo nna ŋkpal emamachi be ashuŋ nɛ b daŋ wu e ka wora so. 24Ama Yesu daa maŋ ta mbe kumu m bɔɔ esa kama enɔ, ŋkpal manɛ so, e nyi dimɛdi kikɛ to nɛnɛ nyam. 25E daa maŋ naa sha dimɛdi kikɛ ka chɛ mo to ŋ ŋini mo kananɛ basa du, ŋkpal manɛ so, e daa nyi kusɔ nɛ k wɔ dimɛdi to.
Currently Selected:
Jɔn 2: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation