Jɔn 14
14
Yesu ka la ekpa nɛ k bee yɔ Etuto na kutɔ be asheŋ
1Yesu yɛ: “Men sa maŋ shin nɛ men be ŋgbene e baa jija menyi. Men yirda n Tuto Ebɔrɛ, men baa yirda ma alɛ gba. 2Ebu damtaana wɔ n Tuto na pe, nɛ mannɛ aloŋ e daa la, n daŋ kaŋɛ menyi. Ma alɛ bee yɔ ndoŋ nna na nɛ n ya kaa lɔŋɛ kaboŋ a yili menyi. 3Ma alɛ kaŋ yɔ n ya lɔŋɛ kaboŋ na n yili menyi n loge, meeŋ naŋ bɛta m ba keta menyi n yɔ ŋ kutɔ, saŋɛ na so kakpa nɛ n wɔ, menyi alɛ gba beeŋ ya kaa wɔ ndoŋ. 4Men nyi kakpa nɛ mee yɔ na be ekpa.” 5Ndoŋ nna nɛ Tɔmas bishi mo: “Enyɛnpe, anyi maŋ nyi kakpa nɛ fee yɔ na nɛ nuso nɛ anyeeŋ wora m pin ekpa na?” 6Nɛ Yesu kaŋɛ mo: “Ma e la ekpa na nɛ kashenteŋ nɛ ŋkpa na, esa kama maaŋ tiŋ n yɔ Etuto na kutɔ ama e bɔla ma so nna.” 7Nɛ e naŋ kaŋɛ bumo le: “Nɛ men daa nyi ma nna, menyi daa beeŋ baa nyi n Tuto na gba. Baŋ yili kabre a yɔ menyi alɛ tea nyi mo hale n teŋ wu mo gba.”
8Ndoŋ nna nɛ Filip kaŋɛ mo le: “Enyɛnpe, ŋini anyi Etuto na nɛ kusɔ kama e kukwe anyi.” 9Nɛ Yesu bishi mo: “Filip, fo maŋ nyi ma a? Ma nɛ menyi kikɛ e baa wɔtɔ n chɛr le nɛ fo maŋ nyi ma a? Esa kama nɛ e wu ma, wu Etuto na nna na nɛ manɛ e ba nɛ fo kaŋɛ fanɛ: ‘Ŋini anyi Etuto na’? 10Fo maŋ nyi fanɛ n wɔ Etuto na to nna nɛ Etuto na malɛ gba wɔ ma to a? Men baa nyi fanɛ mmalga nɛ mee malga ere maŋ la ŋ gbagba peya, Etuto nɛ e wɔ ma to na e naa shuŋ mbe kushuŋ. 11Ŋ ka kaŋɛ fanɛ n wɔ Etuto na to nɛ Etuto na malɛ gba wɔ ma to ere, men yirda ma, nɛ mannɛ aloŋ gba nna, men keni emamachisheŋ nɛ mee wora so n yirda fanɛ kashenteŋ nɛ mee ji na. 12Ma e kaŋɛ menyi kashenteŋto na fanɛ esa kama nɛ e ta mbe yirda n deŋi ma so, beeŋ wora asɔ nɛ mee kaa wora ere. E beeŋ wora asɔ nɛ a chɔ ade gba, ŋkpal ŋ ka bee yɔ Etuto na kutɔ so. 13Kusɔ kama malɛ nɛ men ta ma ketre na ŋ kule, meeŋ wora kumo, saŋɛ na so ma, Ebinyɛn na beeŋ bar Etuto na kemaŋkura. 14Kusɔ kama nɛ men ta ma ketre na ŋ kule, meeŋ wora kumo n sa menyi.”
Yesu ka nase kɔnɔ fanɛ Kiyoyu Cheeŋ na beeŋ ba be asheŋ
15Nɛ men baa sha ma, menyeeŋ baa bɛ ma mmalga naseso so. 16Meeŋ kule Etuto na nɛ e naaŋ sa menyi Echɛtopo ko, 17mo e la kashenteŋ be Kiyoyu na, nɛ e ba kaa wɔ menyi kutɔ mbaanaayɔ. Durnya ere to ebi maaŋ tiŋ n sɔ loŋ be Echɛtopo na, ŋkpal manɛ so, b maaŋ tiŋ n wu mo, bumo alɛ maŋ naa nyi mo. Ama menyi ere nyi mo, ŋkpal manɛ so, e beeŋ ba kaa wɔ menyi kutɔ nseŋ naa wɔ menyi be ŋgbeneana to.
18M maaŋ yige menyi n to fanɛ amunibi. Meeŋ naŋ ba menyi kutɔ. 19A ka gbrɛbi nɛ durnya ere to ebi maaŋ naŋ wu ma, ama menyi ere beeŋ wu ma, ma alɛ ka wɔ ŋkpa to ere, menyi alɛ gba beeŋ baa wɔ ŋkpa to. 20Kachɛ na kaŋ fo, menyeeŋ pin ŋ ka wɔ n Tuto na to nɛ menyi alɛ wɔ ma to nɛ ma alɛ gba wɔ menyi to.
21“Esa kama nɛ e kɔ ma mmalga naseso nsaa wora asɔ nɛ a bee kaŋɛ na e la esa nɛ e bee sha ma. Esa kama malɛ nɛ e bee sha ma, n Tuto gba beeŋ sha mo nɛ ma alɛ gba e sha mo nseŋ lara ma kumu ŋ ŋini mo.” 22Nɛ Judas, mannɛ Judas Iskareɔt, bishi mo: “Enyɛnpe, nuso nɛ feeŋ lara fo kumu ŋ ŋini anyi ŋkaa maaŋ lara fo kumu ŋ ŋini durnya ere to ebi bre?” 23Nɛ Yesu kaŋɛ mo le: “Esa kama nɛ e bee sha ma beeŋ ta ma mmalga n wɔtɔ mbe kagbene to. N Tuto malɛ gba beeŋ baa sha mo nɛ ma nɛ n Tuto na kikɛ e ba mo kutɔ m ba ta mo ŋ ki anyi be kowu. 24Esa kama nɛ e maa sha ma, maa ta ma mmalga a wɔtɔ mbe kagbene to. Mmalga nɛ menyee nu ere malɛ maŋ la meya nna, n Tuto nɛ e shuŋi ma na peya nna.
25Ŋ kraa wɔ menyi kutɔ nna nsaa malga asheŋ ere kikɛ na. 26Ama Echɛtopo na, mo e la Kiyoyu Cheeŋ nɛ n Tuto beeŋ shuŋi ma ketre to na kaŋ ba, e beeŋ ŋini menyi kusɔ kama nseŋ nyiŋi menyi asɔ nɛ ŋ kaŋɛ menyi kikɛ.
27Kagbenewushi nɛ mee yige a sa menyi na, kagbenewushi nɛ k shi ŋ gbagba kutɔ. Kumo alɛ mannɛ fanɛ kananɛ durnya bee sa kumo na nɛ ŋ kɔ kumo a sa menyi. Amoso, men sa maŋ shin nɛ menyi be ŋgbene e baa jija menyi ŋko nɛ kufu e baa kɔ menyi. 28Men teŋ nu ŋ ka kaŋɛ menyi fanɛ: ‘Mee yɔ nna nɛ n naŋ bɛta m ba menyi kutɔ’. Nɛ men daa sha ma nna, k daa beeŋ wora menyi ebel ŋkpal ŋ ka bee yɔ n Tuto na kutɔ so, ŋkpal manɛ so, Etuto na e chɔ ma. 29Ŋ kaŋɛ menyi kesheŋ ere naniere nna na pɔɛŋ nɛ loŋ e ba wora, saŋɛ na so, nɛ k ba wora, menyeeŋ yirda. 30M maaŋ naŋ malga menyi kutɔ n chɛr, ŋkpal manɛ so, durnya ere to be ejuŋkparpo na bee ba. 31E maŋ kɔ eleŋ ma so, ama a daga durnya ere ka pin fanɛ mee sha Etuto na, amoso nɛ mee wora kusɔ nɛ e bee kaŋɛ ma kikɛ na.
Men niŋi to nɛ an koso nfe n choŋ.”
Currently Selected:
Jɔn 14: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation