Ɛsta 6

Ewura na ka sa Mɔdikaya bunyaŋ be asheŋ

1Kanyɛ ka biri nɛ ewura na di ŋ gben, nseŋ shin nɛ b bar mbe efuli na so be asheŋ nɛ a wora mbe kuwurji be jemanɛ so nɛ b sibɛ amo n wɔtɔ nwɔl to na kikɛ, m baa kaa kraŋ a ŋini mo. 2B ka bee kraŋ na, nɛ b ya lar kananɛ Mɔdikaya daŋ pin Bigtana nɛ Tɛrɛsh nɛ b daŋ fɛl nɛ baa yili a kuŋ ewura be ebu be kabuna to na, ka daa kre ewura be kemɔ ŋgblaŋto be asheŋ nseŋ kaŋɛ ewura na. 3Nɛ ewura na bishi bumo le: “Mɔdikaya ka wora le ere bre, manɛ be kakɔka nɛ kemaŋkura bre nɛ an sa mo n tal to?” Nɛ mbe nyɛrbi na yɛ: “B maŋ wora shɛŋ n sa mo.” 4Loŋ be jemanɛ so nɛ Heman baŋ ba luri ewurkpa nɛ e ba kule ewura ekpa n ya shin nɛ b chɛ Mɔdikaya efɔl n shiga kedibi nɛ e yuu na so. Nɛ ewura bishi le: “Wanɛ e wɔ lambu to ere?” 5Ndoŋ nna nɛ mbe nyɛrbi na kaŋɛ: “Heman nna.” Nɛ ewura na kaŋɛ: “Men shin nɛ e baa luri.” 6Heman ka luri nɛ ewura na bishi mo le: “Manɛ e daga ŋ ka wora n sa esa nɛ mee sha keta n yili bunyaŋ be eyilikpa?” Nɛ Heman fɛ le: “M baa nyi geeŋ fanɛ ma nɛ ewura bee sha kewora le be kusɔ ere n sa na.” 7Ndoŋ nna nɛ e kaŋɛ ewura na le: 8“Shin nɛ b ta fo piŋi tenteŋ nɛ fo buu ere be kuko m buu esa kama nɛ e daga le be bunyaŋ ere nseŋ shin nɛ b mɛa fo gbagba be egbaŋɛ ere be eko to, 9nseŋ shin nɛ fo benimuana na be eko e ta esa na n chena gbaŋɛ na so ŋ keta mo ŋ kulti kade ere be abɔrbi kikɛ so a kaŋɛ awɔrso le: ‘Men keni, kananɛ ewura bee ta esa a yili bunyaŋ be eyilikpa nna!.’ ” 10Ndoŋ nna nɛ ewura na kaŋɛ Heman le: “Kumo ere wora manaŋ n ya fin piŋi na nɛ gbaŋɛ na m ba wora kusɔ nɛ fo kaŋɛ ere gbagba n sa Mɔdikaya nɛ e la Juw na. Mo e naa chena ewurkpa be kabunagboŋ na ase na. Nyiŋi n wora kusɔ kama nɛ fo kaŋɛ ere n sa mo nsaa maaŋ teŋ shɛŋ so.” 11Ndoŋ nna nɛ Heman ta ewura be piŋi m buu Mɔdikaya nseŋ shin nɛ e chena gbaŋɛ nɛ b mɛa to fanɛ ewura peya na so nɛ e juŋkpar a nite a gberge Mɔdikaya nɛ gbaŋɛ na a kulti kade na to a kaŋɛ awɔrso le: “Men keni kananɛ ewura bee ta esa a yili bunyaŋ be eyilikpa!” 12B ka kilgi to n loge, nɛ Mɔdikaya bɛta n ya chena ewurkpa be kabunagboŋ na ase, nɛ Heman malɛ ta anishinyɔr gboŋgboŋi n jɔto n yɔ epe, 13n ya kaŋɛ mbe eche nɛ mo teriana kusɔ nɛ k nya mo kikɛ. Ndoŋ nna nɛ mbe eche nɛ mo teriana na kaŋɛ mo le: “Mɔdikaya ka la Juw be esa ere bre fo maaŋ tiŋ m pɔɔ mo so kikɛ. Baa nyi fanɛ fo eleŋ baa fo ekar nna na. Feeŋ ki esa fuloŋ.” 14B kraa malga nna nɛ ewura be nyɛrbi ba shin nɛ Heman wora manaŋ nɛ b yɔ Ɛsta be kejigboŋ nɛ e wora n yili na to.

Currently Selected:

Ɛsta 6: GJNb

Highlight

Copy