Kaŋinichiŋgeliŋ 12

1Amoso baa nyiŋi fo etopo jemanɛ nɛ fo kraa la kebifɔlbi ere, pɔɛŋ nɛ asheŋ e baa wora fo so keshi ashi nfɛ nɛ a wɔ fo anishito ere to nɛ fo kaŋɛ le: “Kebaawɔtɔ maŋ naa wora ma ebel.” 2Loŋ be jemanɛ na, epeŋi nɛ kufɔl nɛ achɛkpabi maaŋ naa fuli to nɛnɛ a sa fo, ŋkpal fo anishi ka maa naa wu nɛnɛ so. Nɛ kewora fanɛ bɔrɛwɔlpa ka buu fo so jemanɛ kikɛ na. 3Ndoŋ nna nɛ fo mbre nɛ e bee kuŋ fo na e fara a chicha nɛ fo aya nɛ e kɔ eleŋ kabre ere e paŋ amo be eleŋ. Fo anyii damta na beeŋ gbaŋ n tɔr nseŋ ka gbrɛbi nɛ fo maaŋ naŋ tiŋ ŋ we ajibi to nɛnɛ nɛ fo anishi malɛ maaŋ naa wu nɛnɛ. 4Loŋ be jemanɛ na fo asoe maa naa nu awɔr nɛ a bee chɛ kelɔnɛ so ŋko nshɛ nɛ beche beeŋ baa kɔr asɔ abo so nsaa boŋ na nɛnɛ. Mbuibi be kushu gba beeŋ gal fo edi. 5Feeŋ baa ŋana kedii kakpa jeŋgreŋ ŋko a nite ekpaana to be mboŋ nɛ e bee keta kufu. Fo emin beeŋ kilgi n fuli nɛ enite gba e baa nu fo; shɛŋ malɛ maaŋ naa yɛlga fo.

Loŋ be jemanɛ na bee ŋini fanɛ anyi be ekama bee yɔ epe nɛ k wɔtɔ mbaanaayɔ na nna, nɛ basa e sɔ abɔrbi so a shu nli. 6Amoso baa nyiŋi fo etopo na pɔɛŋ nɛ fo efute nɛ k du fanɛ kajesebi na e tuge to ŋko a du fanɛ kapuya na e bure kuraa. 7Anyi be eyurana ere beeŋ bɛta n yɔ shishɛr nɛ a shi to na to, nɛ Kiyoyu nɛ e bee sa anyi ŋkpa nɛ efute na malɛ e bɛta n yɔ Ebɔrɛ nɛ e ta mo n wɔtɔ anyi to na kutɔ.

8Eŋinipo na yɛ: “Shɛŋ shɛŋ maŋ kɔ kifi to! Shɛŋ maŋ kɔ tɔnɔ! Amo kikɛ la fuloŋ nna.”

Kesa Ebɔrɛ bunyaŋ nseŋ wora mo kasonu be asheŋ

9Ama ŋkpal eŋinipo na ka la enyiashempo so, e kraa ŋini basa asɔ nɛ mo ere nyi nna. E koya aŋasa nna nseŋ mige amo to nɛnɛ m pin amo be kashenteŋ kikɛ. 10E wora ania fanɛ e beeŋ keni to n fin mmalgabi nɛ e bee wushi kagbene. Kusɔ nɛ e sibɛ na malɛ niŋi nna nsaa la kashenteŋ.

11Enyiashempo na be mmalga na du fanɛ mbolpɔkpapo be kekpabi nɛ e kɔ a kpa mbe mbolpɔ nna nɛ aŋasa na malɛ du fanɛ ayir nɛ e gbir nɛnɛ nna. Mmalga na shi Ebɔrɛ nɛ e la anyi kikɛ be ekpapo na kutɔ nna. 12M pibi, baa da so nɛ fo maaŋ naŋ ta shɛŋ n ti mmalga ere so.

Nwɔl be kasibɛ maaŋ kɔ ekar kikɛ, nɛ kekoya be alegai malɛ bee shin nɛ esa bee gben a bɛlɛ.

13Ade kikɛ be kaman, kusɔ koŋwule e ka nɛ ŋ kaŋɛ. Baa ŋana Ebɔrɛ nsaa bɛ mbe mbraana so. Ŋkpal manɛ so, loŋ so nɛ Ebɔrɛ to dimɛdi bomin. 14Ebɔrɛ beeŋ yili kusɔ kama nɛ an wora so n ji anyi demu, hale asheŋ lubi ŋko asheŋ lela nɛ an wora ashiri to gba.

Currently Selected:

Kaŋinichiŋgeliŋ 12: GJNb

Highlight

Compare

Copy