Kaŋinichiŋgeliŋ 10

1Kananɛ ashushombi bee wu a wɔtɔ tulale to nɛ amo be efɛa bee chɛrga na, aloŋ nɛ kawuli fimbi kikɛ bee jija esa be kanyiasheŋ nɛ kemaŋkura.

2Enyiashempo be kagbene bee laŋɛ kusɔ nɛ k daga be kewora so nna, ama ewulpo bre be kagbene bee laŋɛ asheŋ nɛ a gbɛto so nna. 3Ewulpo baa bɔ ekpa a nite gba, ekama bee pin fanɛ e maŋ kɔ nfɛra nɛ kanyiasheŋ kikɛ maŋ wɔ mo to.

4Hale ewurjipo nya agbo n wɔtɔ fo gba, sa maŋ kaŋ kini kushuŋ nɛ fee shuŋ a sa mo na. Fo kewushi kagbene m bar fo kumu kaseto beeŋ tiŋ n shin nɛ e ta fo kewora n jija na m paŋ fo.

5N wu kulubi ko ashi durnya to, kumo e la bewurjipo ka maa ji asheŋ nɛ amo be ekpa so. 6Baa ta bewulpo nna a yili eyilikpagboŋ a sa bumo bunyaŋ nsaa keni damawuraana jiga. 7Ma ere wu anya ka chena egbaŋɛ so nɛ bewurbi bee nite aya so fanɛ anya.

8Esa kama nɛ e kur kemaŋ n nase nsaa maŋ de so mo gbagba e naŋ tɔr kumo to. Esa kama malɛ nɛ e bure egbal dra n lɛ nsaa maa de so kana e naaŋ duŋ mo. 9Esa kama nɛ e bee bure afalta ŋko a baŋɛ ndishaŋ to beeŋ tiŋ n doro mbe kumu. 10Nɛ fo kekpanfu baa maa ji nɛ fo alɛ maŋ yee kumo, kumo ere eleŋ fuful nɛ feeŋ baa kɔ a ku kusɔ. Kenyi bre bee shin nɛ asheŋ bee nite nɛnɛ nsaa loge to nɛnɛ nna. 11Kuwɔ be keduŋ esa m mɔ pɔɛŋ nɛ edurpo e ba wora kudur m mɔ kuwɔ na maŋ kɔ kechɛto kikɛ. 12Enyiashempo be mmalga bee bar mo kemaŋkura nna, ama ewulpo bre be kɔnɔ to be mmalga e naa mur mo. 13Ewulpo bee fara kawulisheŋ be mmalga nna, kumo be lalaloge nɛ a ya bar kebagato. 14Mbe mmalga malɛ maa loge kikɛ, e baa bela amo a biti abar so nna.

Esa kikɛ maŋ nyi kusɔ nɛ k beeŋ naŋ wora. Esa kikɛ malɛ maaŋ tiŋ ŋ kaŋɛ anyi kusɔ nɛ k beeŋ wora luwu be kaman.

15Ewulpo e naa shuŋ a gben a chul to nsaa maŋ naa nyi kananɛ e beeŋ naaŋ wora n yɔ epe.

16Asheŋ maaŋ nyalɛ n sa efuli kama nɛ kumo be ewura la kebia nɛ kumo be bejuŋkparpoana malɛ wɔtɔ a ji kejigboŋ karechɛ kikɛ. 17Ama efuli kama nɛ kumo be ewura bee ta mo gbagba be nfɛra a wora asheŋ nɛ kumo be bejuŋkparpo malɛ bee ji jemanɛ k daga nsaa tiŋ a keta bumo be amu a maa boo nsa bre wora kumulela.

18Etɔlpo be ebu be larbeŋ e naa bu a tɔr to nɛ ebu na bee dul mo so, kumo be lalaloge nɛ kowu na e tɔr kuraa.

19Kebaa ji nsaa nuu bee shin nɛ esa be kagbene bee fuli mo nna, ama amansherbi nɛ e beeŋ nya pɔɛŋ tiŋ n wora amo kikɛ.

20Sa maŋ kaŋ malga ŋ gbiti ewura ŋko n shoduu damawura, hale fo nfɛra to ŋko ashi fo ebu deseso to gba. Ŋkpal manɛ so, kabuibi ko beeŋ tiŋ n nu nseŋ ya kaŋɛ bumo kusɔ nɛ fo malga na kikɛ.

Currently Selected:

Kaŋinichiŋgeliŋ 10: GJNb

Highlight

Compare

Copy