Danɛl 3
3
Ewura Nebukadneeza be shuwa be kapɔrduli be kebunyaŋ be asheŋ
1Ewura Nebukadneeza daŋ shin nna nɛ b pɔr shuwa be kapɔrduli nɛ kumo be jeŋgreŋ sa fanɛ ayadra adekpanu nɛ kumo be pentren malɛ sa fanɛ ayadra akpanu. E daŋ shin nna nɛ b pɔr kumo n yili Dura be kepreŋsawule so ashi Babilɔn be kade na be ekarso. 2Ndoŋ nna nɛ e kaŋɛ mbe gomena be benimuana, nɛ mbe besoetojipoana nɛ mbe amansherbi kenipoana nɛ demujipoana nɛ benimuana nɛ b ka na kikɛ fanɛ ekama e ba shɛr nɛ b kebugi kapɔrduli nɛ e pɔr na be kasheŋwora. 3Basa na kikɛ ka gbargbar abar m ba yili kapɔrduli na be anishito na, 4nɛ esa nɛ e bee sa kubɔya na koso ŋ kaŋɛ awɔrso le: “Menyi eyiriana nɛ men shi efuliana kikɛ so e nu ewura be mbra ere! 5Men baŋ nu mbel nɛ nlopi nɛ ejaŋjilaŋ nɛ alaŋsɔ kikɛ be kushu, men jɔŋɛ shuwa be kapɔrduli nɛ ewura Nebukadneeza pɔr n yili na ase m bunyaŋ kumo. 6Ekama nɛ e kini k jɔŋɛ m bunyaŋ kumo, baaŋ ta mo epul na to n ya lɛ edɛ be kemaŋ chiŋgeliŋ nɛ edɛ bee chɔ wuloŋ wuloŋ nsaa tushi ga na to.” 7Amoso eyiriana nɛ b shi efuli kikɛ so na ka nu alaŋsɔ be kushu nɛ b jɔŋɛ m bunyaŋ shuwa be kapɔrduli nɛ ewura Nebukadneeza pɔr n yili na.
B ka wu Danɛl nɛ mo teriana besa na kulubi ŋkpal b ka maŋ wora kasonu so be asheŋ
8Ndoŋ nna nɛ Babilɔnebi na be beko bɔla kumo so a wu Juwebi na kulubi. 9Le nɛ b daŋ kaŋɛ ewura Nebukadneeza: “Yiramu, baa kɔ ŋkpa tenteŋ! 10Fo e yili kumo fanɛ esa kama nɛ e baŋ nu alaŋsɔ ka bee shu a daga fanɛ e jɔŋɛ m bunyaŋ fo shuwa be kapɔrduli na. 11Ama esa kama nɛ e kini kejɔŋɛ m bunyaŋ kumo bre daga b ka ta mo nna n ya lɛ edɛ be kemaŋ chiŋgeliŋ nɛ edɛ bee chɔɔ kumo to wuloŋ wuloŋ nsaa tushi ga na to. 12Juw be basa asa nɛ baa tre, Shaadrak nɛ Mɛshaak nɛ Abedneego, nɛ fo lara fanɛ b baa keni Babilɔn be kebonfu so na, bre kini kenu n sa fo. B maa shuŋ fo agbir, ŋko a jɔŋɛ a bunyaŋ kapɔrduli nɛ fo pɔr na.” 13Ndoŋ nna nɛ agbo dii ewura Nebukadneeza alegaiso nɛ e shuŋi fanɛ b ya pɛ mbrantiɛbia asa na m ba. 14B ka bar bumo nɛ e kaŋɛ bumo le: “Shaadrak, Mɛshaak, Abedneego, kashenteŋ nɛ men kini kebunyaŋ ma agbir nɛ kejɔŋɛ shuwa be kapɔrduli nɛ m pɔr n yili na ase a? 15Men kaŋ baŋ nu mbel nɛ nlopi nɛ egoji nɛ ejirgo nɛ ejaŋjilaŋ nɛ alaŋsɔ be yiri kikɛ ka bee shu naniere, men jɔŋɛ m bunyaŋ kapɔrduli na. Men baŋ kini, meeŋ shin nɛ b ta menyi kikɛ n lɛ edɛ be kemaŋ chiŋgeliŋ nɛ edɛ bee chɔɔ kumo to wuloŋ wuloŋ nsaa tushi ga na to, nseŋ keni kegbir mo nɛ k beeŋ tiŋ m mɔlga menyi ashi ma enɔ to.” 16Nɛ Shaadrak nɛ Mɛshaak nɛ Abedneego kaŋɛ le: “Yiramu, anyi maa ba nɛ an malga ŋ kuŋ anyi be amu. 17Hale nɛ b ta anyi n lɛ edɛ to gba, anyi be Ebɔrɛ nɛ anyee shuŋ na beeŋ tiŋ m mɔlga anyi ashi amo to nɛ fo enɔ to. 18Ama, hale nɛ E maŋ mɔlga anyi gba Yiramu, anyi maaŋ shuŋ fo agbir, anyi alɛ maaŋ jɔŋɛ shuwa be kapɔrduli nɛ fo pɔr n yili na gba.” 19Ndoŋ nna nɛ ewura Nebukadneeza nya agbo alegaiso n wɔtɔ Shaadrak nɛ Mɛshaak nɛ Abedneego, nseŋ shin nɛ b foŋ edɛ na to nɛ e bee tushi ale shunu so a chɔ kananɛ a daa du sososo na. 20Nɛ e ponte ŋ kaŋɛ mbe benapo nɛ b kɔ eleŋ ga na fanɛ b kre mbrantiɛbia asa na, n ta bumo n ya lɛ edɛ na to. 21Nɛ b kre bumo nɛ bumo be nle nɛ epiŋi tenteŋ nɛ eneemu n ya lɛ edɛ na to. 22Ŋkpal ewura na ka kaŋɛ kenishipereso fanɛ b lɔŋɛ n foŋ edɛ na to nɛ a baa tushi alegaiso na so, edɛ na be kuwuloŋ daŋ beeŋ benapo nɛ b ta mbrantiɛbia na n ya lɛ amo to na nna m mɔ. 23Nɛ Shaadrak nɛ Mɛshaak nɛ Abedneego nɛ b kre na tɔr edɛ wuloŋ wuloŋ na be kechimbi to. 24Epul na to nɛ ewura Nebukadneeza kpa n niŋi to nseŋ bishi mbe benimuana le: “Mannɛ mbrantiɛbia asa nɛ an daŋ kre n ya lɛ edɛ wuloŋ wuloŋ na to na a?” Nɛ b kaŋɛ le: “Mm! Yiramu, loŋ gbagba nna.” 25Nɛ ewura naŋ kaŋɛ le: “Nɛ manɛ nna nɛ mee wu benyɛn ana ka na edɛ na to nɛ shɛŋ shɛŋ maŋ naŋ kre bumo be eyur, nɛ bumo be eyur malɛ maŋ chɔɔ, nɛ esa nasopo na du fanɛ Ebɔrɛ be malaika?”
B ka lara basa asa na nseŋ sa bumo kenimu be asheŋ
26Ndoŋ nna nɛ ewura Nebukadneeza firgi n taga edɛ wuloŋ wuloŋ na to m boŋ to n tre: “Shaadrak! Mɛshaak! Abedneego! Enyɛnpetale be nyɛrbi, men lar m ba!” Epul to nɛ b dii n lar edɛ be kemaŋ chiŋgeliŋ na to. 27Nɛ ewura na be benimuana na nɛ gomena be benimuana na ba kulti mbrantiɛbia asa na n wɔtɔ, nseŋ wu fanɛ edɛ na daa maŋ wora bumo shɛŋ. Bumo be emin koŋwule gba daa maŋ chɔɔ. Bumo be epiŋi malɛ gba maŋ chɔɔ. Bumo be ekama malɛ daa maa dufɛ edishi gba. 28Ndoŋ nna nɛ ewura Nebukadneeza kaŋɛ le: “Kemaŋkura e baa la Shaadrak nɛ Mɛshaak nɛ Abedneego be Ebɔrɛ na peya! Mo e shuŋi mbe malaika nɛ e ba mɔlga mbe nyɛrbi nɛ b yirda mo na. B kini k nu n sa ma nseŋ ta bumo be amu ŋ kpa kelara ŋ kini kejɔŋɛ m bunyaŋ kegbir kikɛ, she bumo be Ebɔrɛ na nawule. 29Amoso n nase mbra nna na fanɛ efuli kama so ebi nɛ ŋgbar kama to ebi kaŋ pɛl m malga asheŋ kama ŋ gbiti Shaadrak nɛ Mɛshaak nɛ Abedneego be Ebɔrɛ na, b kuya bumo to fanɛ mblaŋkul nseŋ shin nɛ bumo be nwu e ki alambure, ŋkpal manɛ so kegbir kikɛ maŋ wɔtɔ a kɔ eleŋ nsaa beeŋ tiŋ n sa le be kumɔlga.” 30Kumo be kaman nɛ ewura na naŋ daŋɛ Shaadrak nɛ Mɛshaak nɛ Abedneego so kenimu ashi Babilɔn be kebonfu na to.
Currently Selected:
Danɛl 3: GJNb
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
Danɛl 3
3
Ewura Nebukadneeza be shuwa be kapɔrduli be kebunyaŋ be asheŋ
1Ewura Nebukadneeza daŋ shin nna nɛ b pɔr shuwa be kapɔrduli nɛ kumo be jeŋgreŋ sa fanɛ ayadra adekpanu nɛ kumo be pentren malɛ sa fanɛ ayadra akpanu. E daŋ shin nna nɛ b pɔr kumo n yili Dura be kepreŋsawule so ashi Babilɔn be kade na be ekarso. 2Ndoŋ nna nɛ e kaŋɛ mbe gomena be benimuana, nɛ mbe besoetojipoana nɛ mbe amansherbi kenipoana nɛ demujipoana nɛ benimuana nɛ b ka na kikɛ fanɛ ekama e ba shɛr nɛ b kebugi kapɔrduli nɛ e pɔr na be kasheŋwora. 3Basa na kikɛ ka gbargbar abar m ba yili kapɔrduli na be anishito na, 4nɛ esa nɛ e bee sa kubɔya na koso ŋ kaŋɛ awɔrso le: “Menyi eyiriana nɛ men shi efuliana kikɛ so e nu ewura be mbra ere! 5Men baŋ nu mbel nɛ nlopi nɛ ejaŋjilaŋ nɛ alaŋsɔ kikɛ be kushu, men jɔŋɛ shuwa be kapɔrduli nɛ ewura Nebukadneeza pɔr n yili na ase m bunyaŋ kumo. 6Ekama nɛ e kini k jɔŋɛ m bunyaŋ kumo, baaŋ ta mo epul na to n ya lɛ edɛ be kemaŋ chiŋgeliŋ nɛ edɛ bee chɔ wuloŋ wuloŋ nsaa tushi ga na to.” 7Amoso eyiriana nɛ b shi efuli kikɛ so na ka nu alaŋsɔ be kushu nɛ b jɔŋɛ m bunyaŋ shuwa be kapɔrduli nɛ ewura Nebukadneeza pɔr n yili na.
B ka wu Danɛl nɛ mo teriana besa na kulubi ŋkpal b ka maŋ wora kasonu so be asheŋ
8Ndoŋ nna nɛ Babilɔnebi na be beko bɔla kumo so a wu Juwebi na kulubi. 9Le nɛ b daŋ kaŋɛ ewura Nebukadneeza: “Yiramu, baa kɔ ŋkpa tenteŋ! 10Fo e yili kumo fanɛ esa kama nɛ e baŋ nu alaŋsɔ ka bee shu a daga fanɛ e jɔŋɛ m bunyaŋ fo shuwa be kapɔrduli na. 11Ama esa kama nɛ e kini kejɔŋɛ m bunyaŋ kumo bre daga b ka ta mo nna n ya lɛ edɛ be kemaŋ chiŋgeliŋ nɛ edɛ bee chɔɔ kumo to wuloŋ wuloŋ nsaa tushi ga na to. 12Juw be basa asa nɛ baa tre, Shaadrak nɛ Mɛshaak nɛ Abedneego, nɛ fo lara fanɛ b baa keni Babilɔn be kebonfu so na, bre kini kenu n sa fo. B maa shuŋ fo agbir, ŋko a jɔŋɛ a bunyaŋ kapɔrduli nɛ fo pɔr na.” 13Ndoŋ nna nɛ agbo dii ewura Nebukadneeza alegaiso nɛ e shuŋi fanɛ b ya pɛ mbrantiɛbia asa na m ba. 14B ka bar bumo nɛ e kaŋɛ bumo le: “Shaadrak, Mɛshaak, Abedneego, kashenteŋ nɛ men kini kebunyaŋ ma agbir nɛ kejɔŋɛ shuwa be kapɔrduli nɛ m pɔr n yili na ase a? 15Men kaŋ baŋ nu mbel nɛ nlopi nɛ egoji nɛ ejirgo nɛ ejaŋjilaŋ nɛ alaŋsɔ be yiri kikɛ ka bee shu naniere, men jɔŋɛ m bunyaŋ kapɔrduli na. Men baŋ kini, meeŋ shin nɛ b ta menyi kikɛ n lɛ edɛ be kemaŋ chiŋgeliŋ nɛ edɛ bee chɔɔ kumo to wuloŋ wuloŋ nsaa tushi ga na to, nseŋ keni kegbir mo nɛ k beeŋ tiŋ m mɔlga menyi ashi ma enɔ to.” 16Nɛ Shaadrak nɛ Mɛshaak nɛ Abedneego kaŋɛ le: “Yiramu, anyi maa ba nɛ an malga ŋ kuŋ anyi be amu. 17Hale nɛ b ta anyi n lɛ edɛ to gba, anyi be Ebɔrɛ nɛ anyee shuŋ na beeŋ tiŋ m mɔlga anyi ashi amo to nɛ fo enɔ to. 18Ama, hale nɛ E maŋ mɔlga anyi gba Yiramu, anyi maaŋ shuŋ fo agbir, anyi alɛ maaŋ jɔŋɛ shuwa be kapɔrduli nɛ fo pɔr n yili na gba.” 19Ndoŋ nna nɛ ewura Nebukadneeza nya agbo alegaiso n wɔtɔ Shaadrak nɛ Mɛshaak nɛ Abedneego, nseŋ shin nɛ b foŋ edɛ na to nɛ e bee tushi ale shunu so a chɔ kananɛ a daa du sososo na. 20Nɛ e ponte ŋ kaŋɛ mbe benapo nɛ b kɔ eleŋ ga na fanɛ b kre mbrantiɛbia asa na, n ta bumo n ya lɛ edɛ na to. 21Nɛ b kre bumo nɛ bumo be nle nɛ epiŋi tenteŋ nɛ eneemu n ya lɛ edɛ na to. 22Ŋkpal ewura na ka kaŋɛ kenishipereso fanɛ b lɔŋɛ n foŋ edɛ na to nɛ a baa tushi alegaiso na so, edɛ na be kuwuloŋ daŋ beeŋ benapo nɛ b ta mbrantiɛbia na n ya lɛ amo to na nna m mɔ. 23Nɛ Shaadrak nɛ Mɛshaak nɛ Abedneego nɛ b kre na tɔr edɛ wuloŋ wuloŋ na be kechimbi to. 24Epul na to nɛ ewura Nebukadneeza kpa n niŋi to nseŋ bishi mbe benimuana le: “Mannɛ mbrantiɛbia asa nɛ an daŋ kre n ya lɛ edɛ wuloŋ wuloŋ na to na a?” Nɛ b kaŋɛ le: “Mm! Yiramu, loŋ gbagba nna.” 25Nɛ ewura naŋ kaŋɛ le: “Nɛ manɛ nna nɛ mee wu benyɛn ana ka na edɛ na to nɛ shɛŋ shɛŋ maŋ naŋ kre bumo be eyur, nɛ bumo be eyur malɛ maŋ chɔɔ, nɛ esa nasopo na du fanɛ Ebɔrɛ be malaika?”
B ka lara basa asa na nseŋ sa bumo kenimu be asheŋ
26Ndoŋ nna nɛ ewura Nebukadneeza firgi n taga edɛ wuloŋ wuloŋ na to m boŋ to n tre: “Shaadrak! Mɛshaak! Abedneego! Enyɛnpetale be nyɛrbi, men lar m ba!” Epul to nɛ b dii n lar edɛ be kemaŋ chiŋgeliŋ na to. 27Nɛ ewura na be benimuana na nɛ gomena be benimuana na ba kulti mbrantiɛbia asa na n wɔtɔ, nseŋ wu fanɛ edɛ na daa maŋ wora bumo shɛŋ. Bumo be emin koŋwule gba daa maŋ chɔɔ. Bumo be epiŋi malɛ gba maŋ chɔɔ. Bumo be ekama malɛ daa maa dufɛ edishi gba. 28Ndoŋ nna nɛ ewura Nebukadneeza kaŋɛ le: “Kemaŋkura e baa la Shaadrak nɛ Mɛshaak nɛ Abedneego be Ebɔrɛ na peya! Mo e shuŋi mbe malaika nɛ e ba mɔlga mbe nyɛrbi nɛ b yirda mo na. B kini k nu n sa ma nseŋ ta bumo be amu ŋ kpa kelara ŋ kini kejɔŋɛ m bunyaŋ kegbir kikɛ, she bumo be Ebɔrɛ na nawule. 29Amoso n nase mbra nna na fanɛ efuli kama so ebi nɛ ŋgbar kama to ebi kaŋ pɛl m malga asheŋ kama ŋ gbiti Shaadrak nɛ Mɛshaak nɛ Abedneego be Ebɔrɛ na, b kuya bumo to fanɛ mblaŋkul nseŋ shin nɛ bumo be nwu e ki alambure, ŋkpal manɛ so kegbir kikɛ maŋ wɔtɔ a kɔ eleŋ nsaa beeŋ tiŋ n sa le be kumɔlga.” 30Kumo be kaman nɛ ewura na naŋ daŋɛ Shaadrak nɛ Mɛshaak nɛ Abedneego so kenimu ashi Babilɔn be kebonfu na to.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation