1 Kɔrintebi 8

Nlɔŋɛjibiana be asheŋ

1To, naniere men shin nɛ an keni nlɔŋɛjibiana be asheŋ to. An nyi fanɛ an kikɛ kɔ kanyiasheŋ fanɛ kananɛ menyee kaŋɛ na. Kanyiasheŋ malɛ e naa shin nɛ esa bee maŋ mbe kumu so nɛ kasha malɛ bee shin nɛ esa bee yɔ anishito. 2Esa baa fɛ fanɛ e nyi kusɔ ko, kumo ere e maŋ naŋ pin kusɔ na to fanɛ kananɛ k daga fanɛ e baa nyi kumo. 3Ama ekama nɛ e bee sha Ebɔrɛ, kumo ere Ebɔrɛ nyi amodoŋwura.

4To, naniere an keni nlɔŋɛjibiana be asheŋ to. An baa nyi fanɛ kegbir la kusɔ nɛ k maŋ kɔ ŋkpa kumo to nna a wɔtɔ, anyi alɛ nseŋ naa nyi fanɛ Ebɔrɛ koŋwule e wɔtɔ, ekama maŋ naŋ ti mo so. 5Hale nɛ asɔ damta wɔ ebɔrɛso nɛ kasawule nɛ basa bee ta amo fanɛ bumo be ebɔrɛana gba, kumo alɛ la kashenteŋ nna fanɛ le be ebɔrɛ damtaana nɛ benyɛnpe damtaana wɔtɔ, 6ama anyi ere kutɔ Ebɔrɛ koŋwule e baa wɔtɔ, mo e la Etuto mo nɛ kusɔ kikɛ shi mo kutɔ, mo alɛ so nɛ an wɔtɔ na. Enyɛnpe koŋwule, Yesu Kristo na malɛ e wɔtɔ, mo nɛ Ebɔrɛ bɔla mo so n to kusɔ kikɛ mo alɛ nsaa sa anyi ŋkpa na.

7Anyi alɛ nyi le be asheŋ ere, ama mannɛ ekama e kɔ le be kanyiasheŋ ere bre. Hale mbre, agbirshuŋ baŋ luri basa be nfɛra to nna ga nɛ baa fɛ fanɛ nɛ baa ji nlɔŋɛjibi, kegbir gbagba be ajibi nɛ baa ji. Bumo alɛ be nfɛra ka maŋ kɔ eleŋ so a maa dese bumo nsaa wora bumo fanɛ b luri eyurpi to nna na. 8Ama ajibi maaŋ tiŋ n yɛr anyi Ebɔrɛ be anishito. Nɛ an baa maŋ ji, anyi maa paŋ shɛŋ Ebɔrɛ kutɔ nɛ anyi alɛ naŋ ji, anyi maa nya shɛŋ. 9Ama men baa da so nɛ le be kamooji mo nɛ men kɔ ere e sa maŋ shin nɛ bumo nɛ b maŋ kɔ eleŋ yirda na to na e tɔr alubi to. 10Ŋkpal manɛ so, esa nɛ e maŋ kɔ eleŋ baŋ wu fo nɛ fo kɔ le be kanyiasheŋ ere ka tase kegbir ko be lambu to a ji nɛ amodoŋwura na be nfɛra maŋ kɔ eleŋ, kusɔ nɛ e wu na maaŋ leŋ mo to nɛ e baa ji nlɔŋɛjibi a? 11Saŋɛ na so, fo kanyiasheŋ na beeŋ shin nɛ epɔsopo na, fo niopibi mo nɛ Kristo wu n sa na e mur mbe alubi to nna na. 12Nɛ fo alɛ baa wora kulubi a da fo niopibiana so le a doro bumo be ŋgbene pɔsoana, fee wora kulubi nna a da Kristo so nna na. 13Amoso, nɛ ajibi baa la asɔ nɛ a bee shin nɛ n niopibi bee tɔr, kumo ere m maaŋ naŋ we eblaŋ kikɛ, saŋɛ na so m maaŋ shin nɛ n niopibi na e tɔr.

Currently Selected:

1 Kɔrintebi 8: GJNb

Highlight

Copy

Compare