1 Kɔrintebi 5

Kesakalea nɛ k wɔ asɔri na to be asheŋ

1Basa wɔtɔ nna a kaŋɛ fanɛ kesakalea be keji wɔ menyi to nna, kesakalea mo nɛ b maa ji bumo nɛ b maŋ nyi Ebɔrɛ gba to, kumo e la fanɛ menyi to be eko kɔ mo tuto be eche nna a sha. 2Le be asheŋ ere e baa wora menyi to nɛ menyee wu menyi be amu ere a? Cha, a daŋ daga fanɛ men be ŋgbene ka jija menyi ga nna nɛ men daŋ lara esa nɛ e bee wora loŋ na menyi to. 3Kashenteŋ nna fanɛ m maŋ wɔ menyi kutɔ ndoŋ, ama menyi to be asheŋ wɔ ma kagbene to paa. Ma alɛ teŋ ji esa nɛ e wora loŋ na demu fanɛ ŋ ka wɔ ndoŋ na ŋ kaŋɛ fanɛ e daga kasogberge. 4Men kaŋ ba shɛr an Nyɛnpe Yesu Kristo be ketre to nɛ ma alɛ wɔ menyi to ashi kiyoyu na to nɛ Yesu Kristo be eleŋ wɔ menyi to na, 5men ta loŋ be esa na m bɔɔ Setani enɔ, saŋɛ na so, mbe eyur beeŋ jija nɛ mbe kiyoyu bre e nya kumɔlga kachɛ nɛ Enyɛnpe beeŋ ba na.

6Kananɛ menyee puchi ere maŋ walɛ kuraa. Men maŋ nyi keŋasa mo nɛ k bee kaŋɛ fanɛ: Yiisi gbrɛbi baŋ luri nyifu to a bee shin nɛ nyifu na kikɛ bee tiŋ fɔŋgrɔŋ nna a? 7To, loŋ nɛ kulubi gba du. Amoso, men lara kulubi kikɛ menyi to nɛ k maaŋ tiŋ n sɔ kaplɛkama. Loŋ e naaŋ shin nɛ men ki basa popɔr. Kashenteŋ malɛ nna fanɛ men la basa cheembi nna, ŋkpal manɛ so, Yesu Kristo wu n sa anyi. Mo e la emo nɛ baa tre Kebansonchoŋ be Kpakpafɔlbi nɛ b ta n lara sarga na. 8Amoso, men shin nɛ an ji Kebansonchoŋ be kejigboŋ na kumo be ekpa so, nɛ kekishi nɛ kulubi kama e sa maa wɔ anyi to, ama kelela nɛ kashenteŋ beeŋ baa wɔ anyi to.

9Kawɔl mo nɛ n daŋ juŋkpar n sibɛ menyi na to, ŋ kaŋɛ menyi fanɛ menyi nɛ basa kama nɛ b kɔ kesakalea be kebaawɔtɔ e sa maa to jina kikɛ. 10Mannɛ basa nɛ b maŋ nyi Kristo nsaa kɔ kesakalea ŋko a la kejimuniwuraana na ŋko beyu ŋko agbirshumpoana nɛ n daa de. Nɛ mannɛ aloŋ nna menyeeŋ lar durnya ere to nna kuraa ai. 11Kusɔ nɛ n daa de e la fanɛ men sa maŋ shin nɛ menyi nɛ esa kama nɛ e bee tre mbe kumu ekurgepo, mo alɛ nsaa wɔ kesakalea be kebaawɔtɔ to ŋko ŋkaa kɔ kejimuni ŋko emo nɛ e wɔtɔ a shuŋ agbir ŋko a na a tege basa ŋko emo nɛ e bee nuu nsa a boo ŋko emo nɛ e la eyu e baa kɔ kɔnɔkoŋwule be kebaawɔtɔ. Menyi nɛ loŋ be esa e sa maŋ bɔ enɔ n wɔtɔ kawie koŋwule to gba n ji. 12Kashenteŋto, m maŋ kɔ ekpa nɛ n ji bumo nɛ b maŋ wɔ asɔri na to demu. Bumo nɛ b wɔ asɔri na to e la bumo nɛ k daga an ka bee keni bumo be asheŋ to. 13Ebɔrɛ e naaŋ ji basa nɛ b maŋ wɔ asɔri na to demu. Kusɔ nɛ abɔrɛsibɛ na bee kaŋɛ e la fanɛ: “Men ju alubiworapo kama ashi menyi to.”

Currently Selected:

1 Kɔrintebi 5: GJNb

Highlight

Copy

Compare