1 Kɔrintebi 3

Kebarga to ashi asɔri to be asheŋ

1Ŋ kurgepoana, n daa maŋ tiŋ m malga menyi kutɔ fanɛ basa nɛ Ebɔrɛ be Kiyoyu bee juŋkpar na. N daa malga menyi kutɔ nna fanɛ durnya ere to be basa nɛ baa bɛ bumo gbagba be aparsheŋ so. N daa malga menyi kutɔ nna fanɛ bumo nɛ b la mbia ashi Kristo be asheŋ to. 2Kusɔ nɛ n daŋ sa menyi na daa du fanɛ kenyipo nna, mannɛ ajibi nyiŋgriŋ e daa la, ŋkpal manɛ so, men daa maŋ naŋ fo loŋ be ajibi na, hale mbre gba men maŋ naŋ fo amo. 3Ŋkpal manɛ so, men kraa wɔtɔ nna fanɛ eyur to be basa a wora abar kayurbesa be asheŋ nsaa bile. To, men maŋ nyi fanɛ nɛ men baa wɔtɔ a wora loŋ men kraa du fanɛ eyur ere to be basa nna nsaa wɔtɔ a wora asheŋ fanɛ basa fuloŋ a? 4Nɛ men wɔtɔ a kaŋɛ abar fanɛ: “Pɔɔl nɛ ma ere bee bɛ so,” nɛ ede malɛ e kaŋɛ: “Apɔlɔs nɛ ma ere bee bɛ so,” loŋ maa ŋini fanɛ basa fuloŋ e baa la menyi ere a? 5Manɛ e la Apɔlɔs ŋko manɛ e la ma Pɔɔl? Anyi maŋ la shɛŋ, an baa la beshumpo mo nɛ men bɔla anyi so nna m ba yirda. An be ekama daŋ baa wora kushuŋ mo nɛ Ebɔrɛ ta m bɔɔ mo enɔ na nna. 6An baa du fanɛ basa nɛ b wɔ ndɔ to a shuŋ nna. Ma e duu asɔ duuso nɛ Apɔlɔs wora nchu n wurge amo so, ama Ebɔrɛ e shin nɛ a daŋ. 7Amoso, esa nɛ e bee duu asɔ nɛ emo nɛ e bee wurge so nchu kikɛ maŋ la shɛŋ, Ebɔrɛ nawule e la kusɔ ko, ŋkpal manɛ so, mo e naa tiŋ a shin nɛ asɔ bee daŋ. 8Esa nɛ e bee duu nɛ emo nɛ e bee wurge so nchu na kikɛ sasa nna. Kananɛ ekama malɛ bee shuŋ mbe kushuŋ so nɛ baaŋ yili ŋ ka mo kukɔ. 9Ebɔrɛ mo braana beshumpo e la anyi nɛ menyi alɛ du fanɛ mbe kasawule nseŋ naa du fanɛ mbe ebu nɛ e bee pɔr.

10Ebɔrɛ be kuwɔr be kakɛ mo nɛ e sa ma na e shin nɛ n tiŋ n nase ebu na be gbaltɔlase na fanɛ epɔrpo nyipo na n sa basa nɛ baa pɔr a yili so. Ama a daga fanɛ ekama e baa de kananɛ e bee pɔr kumo so. 11Ŋkpal manɛ so, esa kama maaŋ naŋ tiŋ n nase gbaltɔlase kama n naŋ ti kumo nɛ Ebɔrɛ teŋ ta Yesu Kristo n nase na so. 12Beko bee ta shuwa ŋko gbiti ŋko ajembu mo nɛ amo be yawu du kpakpa nna a pɔr a yili gbaltɔlase na so nɛ beko malɛ bee ta ndibi ŋko afitiri ŋko atuweklaŋ a pɔr a yili gbaltɔlase na so. 13Kachako kanaŋkamaso nɛ ekama be kushuŋ du, k beeŋ lar efuli. Kumo be kamɔnchɛ na e naaŋ ŋini kusɔ kama, ŋkpal manɛ so, edɛ e naaŋ wora kusɔ kama ŋ keni nɛ ekama e pin ekama be kushuŋ to. 14Nɛ edɛ na maŋ tiŋ n ji kusɔ nɛ amodoŋwura pɔr n yili egbaltɔlase na so na, kumo ere e beeŋ nya mbe tɔnɔ. 15Ama nɛ fanɛ kusɔ na baŋ chɔɔ bre, e beeŋ tɔr. Mo ere gbagba beeŋ nya kumɔlga, ama kumo alɛ beeŋ baa du fanɛ esa nɛ e bɔla edɛ to nna n shile n lar n nya mbe kumu.

16Men maŋ nyi fanɛ men la Ebɔrɛ be lambu nna nɛ Ebɔrɛ be Kiyoyu wɔ menyi to a? 17Ekama nɛ e jija Ebɔrɛ be lambu, Ebɔrɛ beeŋ jija amodoŋwura gba, ŋkpal manɛ so, Ebɔrɛ be lambu la lambu cheembi nna, menyi alɛ e la loŋ be lambu na.

18Ekama e sa maŋ kaa fule mbe kumu, menyi to be ekama nɛ e bee fɛ mbe kumu to fanɛ e la enyiashempo nna durnya ere be kaplɛa so, e ki ewulpo, saŋɛ na so e beeŋ ki enyiashempo. 19Ŋkpal manɛ so, durnya ere to be kanyiasheŋ la kawulisheŋ nna ashi Ebɔrɛ be anishito. Loŋ nɛ abɔrɛsibɛ na malɛ bee kaŋɛ na fanɛ:

“Ebɔrɛ bee kaa ta benyiashempo gbagba

be kanyiasheŋ be aworbiana nna a pɛ bumo.”

20Abɔrɛsibɛ na kraŋ naa kaŋɛ kaboŋ ko fanɛ:

“Enyɛnpe na nyi benyiashempo be nfɛra ka la nfɛra fuloŋ.”

21Amoso, ekama e sa maa puchi edimɛdi so, ŋkpal manɛ so, kusɔ kikɛ nyam la menyeya nna. 22Pɔɔl ŋko Apɔlɔs ŋko Sifas ŋko durnya ŋko ŋkpa ŋko luwu ŋko asheŋ nɛ a bee wora naniere ŋko amo nɛ a beeŋ wora echefoso kikɛ nyam la menyeya nna. 23Nɛ menyi alɛ la Kristo peya nɛ Kristo malɛ la Ebɔrɛ peya.

Currently Selected:

1 Kɔrintebi 3: GJNb

Highlight

Copy

Compare