ໂກໂລຊາຍ 3
3
1ຖ້າເຈົ້າທັງຫລາຍຮັບການຊົງບັນດານໃຫ້ຄືນມາດ້ວຍກັນກັບພຣະຄຣິດແລ້ວ ກໍຈົ່ງສະແຫວງຫາສິ່ງຊຶ່ງຢູ່ເບື້ອງເທິງ ຄືບ່ອນທີ່ພຣະຄຣິດຊົງສະຖິດຢູ່ ຊົງປະທັບເບື້ອງຂວາຂອງພຣະເຈົ້າ. 2ຈົ່ງເອົາໃຈໃສ່ສິ່ງທີ່ຢູ່ເບື້ອງເທິງ ບໍ່ແມ່ນສິ່ງທີ່ຢູ່ແຜ່ນດິນໂລກນີ້. 3ດ້ວຍວ່າ, ພວກເຈົ້າໄດ້ຕາຍແລ້ວ ແລະຊີວິດຂອງພວກເຈົ້າ ກໍຖືກເຊື່ອງຊ້ອນບັງໄວ້ດ້ວຍກັນກັບພຣະຄຣິດໃນພຣະເຈົ້າ. 4ຊີວິດທີ່ແທ້ຈິງຂອງພວກເຈົ້າຄືພຣະຄຣິດ ແລະເມື່ອໃດພຣະອົງສະເດັດມາປາກົດ ເມື່ອນັ້ນແຫຼະ ພວກເຈົ້າກໍຈະໄດ້ມາປາກົດກັບພຣະອົງ ແລະຮ່ວມໃນສະຫງ່າຣາສີຂອງພຣະອົງ.
ຊີວິດເກົ່າ ແລະ ຊີວິດໃໝ່
5ເຫດສະນັ້ນ ພວກເຈົ້າຕ້ອງປະຫານຕັນຫາຝ່າຍໂລກນີ້ ທີ່ດຳເນີນການຢູ່ໃນພວກເຈົ້າເຊັ່ນ: ການຜິດສິນທຳທາງເພດ, ການຊົ່ວຮ້າຍ, ຣາຄະຕັນຫາ, ຄວາມປາຖະໜາໃນທາງຊົ່ວຮ້າຍ ແລະຄວາມໂລບ ຊຶ່ງເປັນການຂາບໄຫວ້ຮູບເຄົາຣົບ. 6ເພາະສິ່ງເຫຼົ່ານີ້ ຄວາມໂກດຮ້າຍຂອງພຣະເຈົ້າຈະມາຖືກຄົນທັງຫລາຍທີ່ບໍ່ເຊື່ອຟັງພຣະອົງ. 7ແຕ່ກ່ອນພວກເຈົ້າເຄີຍດຳເນີນຊີວິດຕາມຕັນຫາຢ່າງນັ້ນ ເມື່ອຊີວິດຂອງພວກເຈົ້າໄດ້ຖືກຄອບງຳໂດຍສິ່ງເຫຼົ່ານີ້.
8ແຕ່ບັດນີ້ ຈົ່ງກຳຈັດສິ່ງເຫຼົ່ານັ້ນທັງໝົດຖິ້ມເສຍ ເຊັ່ນວ່າ: ຄວາມຄຽດຮ້າຍ, ຄວາມຂັດເຄືອງໃຈແລະການຄິດປອງຮ້າຍ, ຄຳສຽດສີແລະຄຳຊົ່ວຊ້າລາມົກ ຢ່າໃຫ້ອອກຈາກປາກຂອງພວກເຈົ້າຈັກເທື່ອ. 9ຢ່າເວົ້າຕົວະຕໍ່ກັນແລະກັນ ດ້ວຍວ່າ ພວກເຈົ້າໄດ້ຖອດຖິ້ມສະພາບມະນຸດເກົ່າກັບຄວາມປະພຶດແບບເກົ່ານັ້ນແລ້ວ. 10ແລະສວມສະພາບມະນຸດຄົນໃໝ່ແລ້ວ ໄດ້ຖືກຊົງສ້າງຂຶ້ນໃຫ້ເປັນຄົນໃໝ່ຢູ່ສະເໝີ ໄດ້ເຮັດໃຫ້ພວກເຈົ້າເປັນເໝືອນພຣະອົງຫລາຍຂຶ້ນ ເພື່ອໃຫ້ຮູ້ຈັກພຣະອົງຢ່າງຄົບຖ້ວນບໍລິບູນ. 11ດັ່ງນັ້ນ ຈຶ່ງບໍ່ມີຄວາມແຕກຕ່າງກັນອີກຕໍ່ໄປ ລະຫວ່າງຄົນຕ່າງຊາດກັບຄົນຢິວ, ຄົນຮັບພິທີຕັດກັບຄົນບໍ່ຮັບພິທີຕັດ, ຄົນສີວິໄລ, ຄົນປ່າເຖື່ອນ, ເປັນທາດຮັບໃຊ້ ຫລືເປັນອິດສະຫລະ ແຕ່ພຣະຄຣິດເປັນເຈົ້າຂອງສັບພະທຸກສິ່ງ ແລະຊົງສະຖິດຢູ່ໃນພວກເຈົ້າທຸກຄົນ.
12ເຫດສະນັ້ນ ໃນຖານະທີ່ເປັນພວກ ຊຶ່ງພຣະເຈົ້າຊົງຮັກແລະຊົງເລືອກໄວ້ ໃຫ້ເປັນໄພ່ພົນຂອງພຣະອົງ ຈົ່ງສວມໃຈເມດຕາ, ໃຈປານີ, ໃຈຖ່ອມລົງ, ໃຈອ່ອນສຸພາບ, ໃຈອົດທົນດົນນານ. 13ຈົ່ງຜ່ອນໜັກຜ່ອນເບົາຊຶ່ງກັນແລະກັນ ແລະຖ້າແມ່ນຜູ້ໃດມີເລື່ອງຕໍ່ກັນ ກໍຈົ່ງຍົກໂທດໃຫ້ກັນແລະກັນ ອົງພຣະຜູ້ເປັນເຈົ້າໄດ້ຊົງໂຜດຍົກໂທດໃຫ້ເຈົ້າທັງຫລາຍຢ່າງໃດ ພວກເຈົ້າກໍຈົ່ງຍົກໂທດໃຫ້ກັນແລະກັນຢ່າງນັ້ນດ້ວຍ. 14ແລ້ວນອກຈາກສິ່ງທັງປວງນີ້ ຈົ່ງເອົາຄວາມຮັກເປັນສາຍຜູກມັດທຸກສິ່ງໄວ້ ໃຫ້ເຖິງຄວາມຄົບຖ້ວນ. 15ແລະຈົ່ງໃຫ້ສັນຕິສຸກທີ່ມາຈາກພຣະຄຣິດຄຸ້ມຄອງຈິດໃຈຂອງເຈົ້າທັງຫລາຍ ພຣະເຈົ້າໄດ້ຊົງເອີ້ນເຈົ້າທັງຫລາຍໄວ້ໃຫ້ເປັນກາຍອັນດຽວ ກໍເພື່ອສັນຕິສຸກນັ້ນ ແລະພວກເຈົ້າຈົ່ງມີໃຈກະຕັນຍູ. 16ຈົ່ງໃຫ້ພຣະທຳຂອງພຣະຄຣິດສະຖິດຢູ່ໃນໃຈຂອງພວກເຈົ້າຢ່າງບໍຣິບູນ ຈົ່ງສັ່ງສອນແລະເຕືອນສະຕິກັນແລະກັນ ດ້ວຍປັນຍາທຸກຢ່າງ ຈົ່ງຮ້ອງເພງດ້ວຍເພງຍ້ອງຍໍສັນລະເສີນ, ເພງນະມັດສະການ ແລະເພງຍ້ອງຍໍສັນລະເສີນຝ່າຍພຣະວິນຍານ ຄືຈົ່ງຮ້ອງເພງຖວາຍແດ່ພຣະເຈົ້າດ້ວຍໃຈໂມທະນາຂອບພຣະຄຸນ. 17ແລະເມື່ອເຈົ້າທັງຫລາຍຈະເຮັດສິ່ງໃດດ້ວຍວາຈາ ຫລືດ້ວຍການກະທຳກໍຕາມ, ຈົ່ງເຮັດທຸກສິ່ງໃນພຣະນາມຂອງອົງພຣະເຢຊູເຈົ້າ ແລະຂອບພຣະຄຸນພຣະບິດາເຈົ້າໂດຍພຣະອົງນັ້ນ.
ໜ້າທີ່ທາງສັງຄົມ ແລະ ຊີວິດໃໝ່
18ຝ່າຍເມຍທັງຫລາຍ ຈົ່ງຍອມອ່ອນນ້ອມເຊື່ອຟັງຕໍ່ຜົວຂອງຕົນ ເພາະເປັນສິ່ງສົມຄວນປະພຶດໃນອົງພຣະຜູ້ເປັນເຈົ້າ.
19ຝ່າຍຜົວທັງຫລາຍ ຈົ່ງຮັກເມຍຂອງຕົນ ແລະຢ່າເຮັດຮຸນແຮງຕໍ່ນາງ.
20ຝ່າຍລູກທັງຫລາຍ ແມ່ນໜ້າທີ່ຂອງພວກເຈົ້າ ໃນຖານະທີ່ເປັນຄຣິສຕຽນ ຕ້ອງນົບນ້ອມເຊື່ອຟັງພໍ່ແມ່ຂອງຕົນຢູ່ສະເໝີ ເພາະການປະພຶດຢ່າງນັ້ນ ເປັນທີ່ພໍພຣະໄທຂອງອົງພຣະຜູ້ເປັນເຈົ້າ.
21ຝ່າຍພໍ່ແມ່ທັງຫລາຍ ຢ່າກຸກກວນລູກຂອງຕົນໃຫ້ຂັດເຄືອງໃຈ ເພື່ອວ່າພວກເຂົາຈະບໍ່ທໍ້ຖອຍໃຈ.
22ຝ່າຍບັນດາຜູ້ຮັບໃຊ້ ຈົ່ງຍອມຟັງນາຍຝ່າຍໂລກໃນທຸກສິ່ງ ບໍ່ແມ່ນເມື່ອຢູ່ຕໍ່ໜ້ານາຍເທົ່ານັ້ນ ເພາະຢາກໃຫ້ຖືກໃຈເພິ່ນ, ແຕ່ຈົ່ງເຮັດສິ່ງນັ້ນດ້ວຍນໍ້າໃສໃຈຈິງ ເພາະຄວາມຢຳເກງທີ່ພວກເຈົ້າມີຕໍ່ອົງພຣະຜູ້ເປັນເຈົ້າ. 23ບໍ່ວ່າຈະເຮັດສິ່ງໃດກໍຕາມ ຈົ່ງເຮັດສິ່ງນັ້ນດ້ວຍຄວາມເຕັມໃຈ ເໝືອນເຮັດຖວາຍກຽດແກ່ອົງພຣະຜູ້ເປັນເຈົ້າ ແລະບໍ່ແມ່ນເຮັດສຳລັບມະນຸດເທົ່ານັ້ນ. 24ດ້ວຍຮູ້ແລ້ວວ່າ ອົງພຣະຜູ້ເປັນເຈົ້າຈະຊົງໃຫ້ເຈົ້າທັງຫລາຍ ໄດ້ຮັບມໍຣະດົກເປັນຄ່າບຳເໜັດ ເພາະວ່າຜູ້ທີ່ເຈົ້າທັງຫລາຍໄດ້ຮັບໃຊ້ນັ້ນ ກໍແມ່ນອົງພຣະຄຣິດ. 25ສ່ວນທຸກໆຄົນທີ່ເຮັດການຊົ່ວນັ້ນ ກໍຈະໄດ້ຮັບຜົນກຳ ຕາມກຳຊົ່ວຂອງຕົນ ເພາະພຣະເຈົ້າຕັດສິນທຸກຄົນ ໂດຍບໍ່ເຫັນແກ່ໜ້າຜູ້ໃດ.
Currently Selected:
ໂກໂລຊາຍ 3: ພຄພ
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
@ 2012 United Bible Societies. All Rights Reserved.