Daˬyeˬlaˇ 3
3
Shuiˇ mawˇ kawˇ-ahˇ yawˬ gʼaˬ na luꞈ uˬ duˬ ya tahˬ meh lehˇ Neˬbuˬkaˬneˬzaˬ dawˬ biꞈ-euˬ
1Sahˬ paˬ Neˬbuˬkaˬneˬzaˬ-aˬ, yaw goˇ paw koꞈ tseˇ caˆ byah-awˇ, yaw huiˬ paw koꞈ caˆ byah-eu shuiˇ mawˇ kawˇ tiˬ kawˇ jahˇ-awˇ, Baˬbuˇloˬ meuˬ-euˬ gahˬ kaˬ-ahˇ jaˆ-eu Duˇlaˬ deh ga-ahˇ ka tuˇ taˬ-euˬ meh. 2Kʼoeˇ naˇ, sahˬ paˬ-euˬ gaˇ mˇ-eu yaw huiˬ yaw mahˇ deuˬ pyeuꞈ-euˬ sahˬ paˬ zaˬ yo deuˬ, sahˬ paˬ sahˬ ma geuꞈ-eu deuˬ, sahˬ paˬ sahˬ ma deuˬ-euˬ laꞈ oˆ teˬ ni uˆ lahˇ luꞈ-eu deuˬ, sahˬpa-euˬ kuiˇ laꞈ geuꞈ-awˇ gaˇ yaw huiˬ mˇ-eu deuˬ, pyuˇ jeˬ hmˬ-eu deuˬ, yaˇ kʼaˬ daˇ-eu deuˬ, yaˇ kʼaˬ daˇ-eu paw yaw huiˬ yaw mahˇ geuꞈ-eu deuˬ hawˇ-eu, miˇ kʼahˬ doe ni gaˇ yaw huiˬ kʼaˇ mˇ-eu deuˬ dawˬ tawˆ luꞈ-ahˇ, shuiˇ mawˇ kawˇ kʼoeˇ hmˬ a nehˬ-eu bawˬ-iˬ jahˇ gaˇ uiˬ laˇ jiˇ-eu gʼaˇ duˬ, sahˬ paˬ dawˬ biꞈ taˬ-euˬ meh. 3Kʼoeˇ miˇ neh, sahˬ paˬ-euˬ gaˇ mˇ-eu yaw huiˬ yaw mahˇ deuˬ pyeuꞈ-eu, sahˬ paˬ zaˬ yo deuˬ, sahˬ paˬ sahˬ ma geuꞈ-eu deuˬ, sahˬ paˬ sahˬ ma deuˬ-euˬ laꞈ oˆ teˬ ni uˆ lahˇ luꞈ-eu deuˬ, sahˬ paˬ-euˬ kuiˇ laꞈ geuꞈ-awˇ gaˇ yaw huiˬ mˇ luꞈ-eu deuˬ, pyuˇ jeˬ hmˬ-eu deuˬ, yaˇ kʼaˬ daˇ-eu deuˬ, yaˇ kʼaˬ daˇ-eu paw yaw huiˬ yaw mahˇ geuꞈ-eu deuˬ hawˇ-eu, miˇ kʼahˬ doe ni gaˇ yaw huiˬ kʼaˇ mˇ-eu deuˬ dawˬ tawˆ luꞈ, sahˬ paˬ Neˬbuˬkaˬneˬzaˬ neh ka tuˇ-euˬ shuiˇ mawˇ kawˇ a nehˬ-eu bawˬ-iˬ jahˇ gaˇ uiˬ laˇ jiˇ-awˇ, kʼoeˇ-euˬ mehˬ shi yawꞈ luꞈ-eu meh.
4Kʼoeˇ ngeh, dawˬ tsaꞈ dawˬ dzawˇ mˇ-eu gʼaˬ yaw kʼaˆ-ehˇ guˇ-awˇ, “Miˇ kʼahˬ gʼawˬ mya kʼahˬ hawˇ-eu, tsawˇ jeuˬ gʼawˬ mya jeuˬ laꞈ kʼoeˇ neh uiˬ laˇ bymˇ laˇ taˬ-euˬ tsawˇ haˬ deuˬ-oˇ, 5daˇ heh baw-awˇ, bawˬ law baw, deuˇ-mˬ diˬ-eu teˇ saˇ naw maꞈ ya gaˬ tehꞈ-a. Kʼoeˇ naˇ, caˇ dawˬ caˇ gaˇ diˬ-eu baw-eu keu ka dawˬ tawˆ luꞈ diˬ-eu baw-eu teˇ saˇ mahˇ doˆ laˇ tehꞈ-a. Kʼoeˇ loꞈ-ehˇ mahˇ doˆ laˇ-eu nehˬ-ehˇ, naw maꞈ dawˬ tawˆ luꞈ awˆ byaˆ-awˇ, sahˬ paˬ Neˬbuˬkaˬneˬzaˬ neh ka tuˇ-euˬ shuiˇ mawˇ kawˇ-ahˇ uˬ duˬ ya tahˬ meh. 6Awˆ byaˆ-awˇ uˬ duˬ maˬ tahˬ-eu tsawˇ haˬ aˬ geu gʼaˬ maˬ kaˬ, miˬ dzaˬ doꞈ luꞈ-eu tsawˬ bu bu ma-ahˇ biˬ ahˇ nehˬ gaˇ ya daˬ tehꞈ-a.” 7Kʼoeˇ naˇ, caˇ dawˬ caˇ gaˇ diˬ-eu baw-eu keu ka deuˬ-euˬ teˇ saˇ mahˇ doˆ laˇ-euˬ nehˬ-ehˇ, miˇ kʼahˬ dawˬ tawˆ luꞈ-ahˇ neh kʼaˇ uiˬ laˇ taˬ-euˬ tsawˇ jeuˬ dawˬ tawˆ luꞈ, sahˬ paˬ Neˬbuˬkaˬneˬza neh ka tuˇ taˬ-euˬ shuiˇ mawˇ kawˇ-ahˇ awˆ byaˆ-awˇ uˬ duˬ tahˬ-euˬ meh.
Daˬyeˬlaˇ-euˬ cawˬ smˇ gʼaˬ sahˬ paˬ ehˇ dawˬ-ahˇ maˬ naˇ haˬ geuꞈ-euˬ
8Kʼoeˇ ngeh, Baˬbuˇloˬ tsawˇ haˬ tiˬ paˆ na deuˬ Yuˇdaˆ tsawˇ haˬ deuˬ-ahˇ laˆ shaˬ-eu jeˬ jahˇ-euˬ meh. 9Sahˬ paˬ Neˬbuˬkaˬneˬzaˬ-ahˇ aˬ yawꞈ maꞈ heu loꞈ-ehˇ ehˇ nehˬ-euˬ meh. “Sahˬ paˬ ziˇ baw ziˇ za luꞈ-uˇ. 10Caˇ dawˬ caˇ ngeh diˬ-eu baw-eu keu ka deuˬ-euˬ teˇ saˇ mahˇ doˆ laˇ-eu nehˬ-ehˇ tiˬ poˆ tehꞈ-ehˇ, yawˬ gʼaˬ na luꞈ awˆ byaˆ-awˇ shuiˇ mawˇ kawˇ kʼoeˇ kawˇ-ahˇ uˬ duˬ ya tahˬ meh lehˇ, sahˬ paˬ nawˇ dawˬ biꞈ taˬ-euˬ meh. 11Awˆ byaˆ-awˇ uˬ duˬ maˬ kʼaˇ tahˬ-eu tsawˇ haˬ-ahˇ miˬ dzaˬ doꞈ luꞈ-eu tsawˬ bu-ahˇ biˬ ahˇ ma lehˇ nawˇ dawˬ biꞈ-euˬ meh. 12Nawˬ neh Baˬbuˇloˬ meuˬ-euˬ gahˬ kaˬ-ahˇ bi haw bi pyaˆ-eu Yuˇdaˆ tsawˇ haˬ deuˬ pyeuꞈ-eu, Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha maꞈ, nawˬ neh dawˬ biꞈ-euˬ gaˇ maˬ naˇ haˬ-a. Nawˬ-euˬ miˬ yehˇ-ahˇ aˬ yawꞈ maꞈ uˬ duˬ maˬ tahˬ-eu uˬ taꞈ, nawˬ neh ka tuˇ-euˬ mawˇ kawˇ mehˬ shi maˬ awˆ byaˆ-a.”
13Kʼoeˇ ngeh, sahˬ paˬ nui ma pehˇ laˇ-awˇ, tsawˇ haˬ kʼoeˇ smˇ gʼaˬ-ahˇ aˬ yawꞈ mehˬ shi bi sheuˬ laꞈ-eu gʼaˇ duˬ dawˬ biꞈ-euˬ meh. 14Aˬ ha smˇ gʼaˬ-ahˇ sahˬ paˬ ehˇ nehˬ-eu, “Shaˬdaˬlaˆ, Meˬshaˆ hawˇ-eu Aˬbeˬdaˬneˬgoˬ-oˇ, nawˬ ha smˇ gʼaˬ ngaˬ-euˬ miˬ yehˇ-ahˇ uˬ duˬ maˬ tahˬ-ehˇ, ngaˬ neh ka tuˇ taˬ-euˬ shuiˇ mawˇ kawˇ-ahˇ uˬ duˬ maˬ tahˬ-aˬ lehˇ ehˇ-eu ngeuˇ meh loˇ. 15Nymˬ-mˇ poˆ jawˇ, daˇ heh baw, bawˬ law baw, deuˇ-mˬ diˬ-eu teˇ saˇ hawˇ-eu, caˇ dawˬ caˇ gaˇ zmˬ-eu keu ka nui deuˬ-euˬ teˇ saˇ mahˇ doˆ laˇ gaˇ naw maꞈ ya gaˬ-eu nehˬ-ehˇ, shuiˇ mawˇ kawˇ kʼoeˇ kawˇ mehˬ shi awˆ byaˆ-awˇ uˬ duˬ tahˬ-awˬ. Naw maꞈ uˬ duˬ maˬ tahˬ de leˇ ngeuˇ naˇ, tiˬ poˆ tehꞈ-ehˇ miˬ dzaˬ doꞈ luꞈ-eu tsawˬ bu-ahˇ biˬ ahˇ ma. Naw maꞈ-ahˇ ka kʼoꞈ nya-eu miˬ yehˇ jawˇ tehꞈ-a lehˇ naw maꞈ noeˬ te loˇ.”
16Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ heu loꞈ-ehˇ ehˇ-eu meh. “Sahˬ paˬ-oˇ, gaˇ kawˆ heu-ahˇ taꞈ leˇ-awˇ, nawˬ-ahˇ nga maꞈ dawˬ poˆ maˬ paˇ poˆ ma. 17Doꞈ luꞈ-eu miˬ dzaˬ tsawˬ bu hawˇ-eu nawˬ-euˬ baoˬ laꞈ kʼoeˇ, nga maꞈ uˬ duˬ tahˬ-eu Miˬyehˇ ngaˬ ha smˇ gʼaˬ-ahˇ ka kʼoꞈ nehˬ laꞈ nya naˇ ka kʼoꞈ nehˬ laꞈ luꞈ-uˇ. 18Aˬ yawꞈ maˬ ka kʼoꞈ nehˬ laꞈ law hawˇ kʼawꞈ, nawˬ-euˬ miˬ yehˇ-ahˇ nga maꞈ uˬ duˬ maˬ tahˬ-ehˇ, nawˬ neh ka tuˇ taˬ-euˬ shuiˇ mawˇ kawˇ mehˬ shi maˬ awˆ byaˆ lehˇ, kʼaˬ duˬ ni nawˬ-ahˇ ehˇ tsehˆ-eu ma.”
Daˬyeˬlaˇ-euˬ cawˬ smˇ gʼaˬ-ahˇ sehꞈ-eu gʼaˇ duˬ sahˬ paˬ dawˬ biꞈ-euˬ
19Kʼoeˇ ngeh, Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ-ahˇ Neˬbuˬkaˬneˬzaˬ nui ma pehˇ dui dui laˇ-awˇ, baˬ ba neˇ tseuˆ ni pyeuꞈ laˇ-euˬ meh. Kʼoeˇ miˇ neh, miˬ dzaˬ tsawˬ bu kʼoeˇ shiꞈ bymˇ lahˇ dzehˬ laˇ ni laˆ nyehˆ-eu gʼaˇ duˬ aˬ yawꞈ dawˬ biꞈ-euˬ meh. 20Kʼoeˇ naˇ, aˬ ha smˇ gʼaˬ-ahˇ paꞈ cuꞈ-awˇ miˬ dzaˬ tsawˬ bu-ahˇ biˬ ahˇ-eu gʼaˇ duˬ, aˬ yawꞈ-euˬ guiˇ maꞈ laꞈ kʼoeˇ gʼaˬ kʼaˆ dui dui-eu tsawˇ haˬ deuˬ-ahˇ aˬ yawꞈ dawˬ biꞈ-euˬ meh. 21Aˬ ha smˇ gʼaˬ-ahˇ aˬ yawꞈ maꞈ paꞈ cuꞈ-awˇ, miˬ dzaˬ doꞈ nyehˆ taˬ-euˬ tsawˬ bu-ahˇ biˬ ahˇ-euˬ meh. Kʼoeˇ loꞈ-ehˇ biˬ ahˇ nehˬ ngeh, mehˬ tsoeˬ tiˬ kahˇ-iˬ maˬ lehˆ doˆ ni, pehˇ kʼahˬ pehˇ nymˇ hawˇ-eu pehˇ kʼahˬ pehˇ mahˇ kʼawꞈ dm luꞈ-awˇ, uˬ kʼoˆ kʼawꞈ kʼoˆ luꞈ-eu meh. 22Sahˬ paˬ neh dawˬ biꞈ-awˇ miˬ dzaˬ aˇ dzehˬ dzeuˇ ni laˆ nyehˆ taˬ-euˬ miˇ neh, aˬ ha smˇ gʼaˬ-ahˇ biˬ ahˇ-euˬ tsawˇ haˬ deuˬ-ahˇ miˬ dzaˬ myawꞈ sehꞈ-euˬ meh. 23Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ-aˬ, bi paꞈ cuꞈ taˬ-awˇ, miˬ dzaˬ tsawˬ bu gʼahˇ ceh nyiˬ paˆ-ehˇ ga ahˇ-iˇ-euˬ meh.
24Neˬbuˬkaˬneˬzaˬ zahˬ leˇ-awˇ, ja pyuˬ ni tsawˬ tuˇ laˇ-euˬ meh. “Tsawˇ haˬ smˇ gʼaˬ-ahˇ paꞈ cuꞈ-awˇ miˬ dzaˬ tsawˬ bu-ahˇ biˬ ahˇ-euˬ maˬ ngeuˇ loˇ” lehˇ, aˬ yawꞈ-euˬ gaˇ mˇ-euˬ yaw huiˬ yaw mahˇ deuˬ-ahˇ aˬ yawꞈ naˇ haˬ ngeh, “Ngeuˇ ma. Tsawˇ haˬ smˇ gʼaˬ paꞈ cuꞈ-awˇ biˬ ahˇ-euˬ ma” lehˇ, yaw huiˬ yaw mahˇ kʼoeˇ deuˬ ehˇ-eu meh.
25“Toˆ-ehˇ ngeuˇ naˇ, aˬ jeˬ miˇ neh miˬ dzaˬ laꞈ kʼoeˇ tsawˇ haˬ oeˬ gʼaˬ cah luꞈ-eu ngaˬ-ahˇ mawˇ laˇ ta. Aˬ yawꞈ maꞈ-ahˇ aˇ caˆ gʼeh maˬ paꞈ taˬ-ehˇ, miˬ dzaˬ lahˇ leˇ gaˇ jiˇ maˬ duˇ nga. Oeˬ gʼaˬ tiˬ gʼaˬ miˬ yehˇ-euˬ aˬ li-ahˇ duˇ nga” lehˇ, aˬ yawꞈ ehˇ-eu meh.
Aˬ ha smˇ gʼaˬ-ahˇ pyehˬ nehˬ-awˇ gaˇ yaw huiˬ bi mˇ-euˬ
26Kʼoeˇ naˇ, miˬ dzaˬ tsawˬ bu nymˇ kʼoeˇ nymˇ-euˬ gʼoˆ kʼehˬ-ahˇ Neˬbuˬkaˬneˬzaˬ le daˆ-awˇ, “Dawˬ tawˆ kʼoeˇ taˆ huiˬ-eu Miˬyehˇ-euˬ zaˬ kʼaˆ deuˬ pyeuꞈ-eu, Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ-oˇ, doˆ laˇ-awˬ” lehˇ guˇ-euˬ meh. 27Sahˬ paˬ zaˬ yo dawˬ tawˆ luꞈ, sahˬ paˬ sahˬ ma dawˬ tawˆ luꞈ, sahˬ paˬ sahˬ ma deuˬ laꞈ oˆ teˬ ni gaˇ mˇ-eu deuˬ dawˬ tawˆ luꞈ hawˇ-eu, yaw huiˬ yaw mahˇ kʼaˇ geuꞈ luꞈ-eu deuˬ dawˬ tawˆ luꞈ laˇ-awˇ, aˬ ha smˇ gʼaˬ miˬ dzaˬ maˬ lahˇ ni jawˇ luꞈ gaˇ haw laˇ-euˬ meh. Aˬ ha smˇ gʼaˬ-euˬ uˬ duˬ tsehˇ kahˇ miˬ dzaˬ maˬ myawꞈ-ehˇ, mehˬ tsoeˬ maˬ puiˆ dzaˬ-euˬ uˬ taꞈ, miˬ shmˇ kʼawꞈ maˬ behꞈ laꞈ-a.
28Kʼoeˇ ngeh, sahˬ paˬ heu loꞈ-ehˇ ehˇ-eu meh. “Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ-euˬ Miˬyehˇ-ahˇ ja ceuˬ-awˬ. Aˬ yawꞈ-ahˇ gʼoe-awˇ aˬ yawꞈ-euˬ nui kʼahˇ mˇ-eu tsawˇ haˬ heu smˇ gʼaˬ-ahˇ, aˬ yawꞈ-euˬ mˬ taˆ gʼaˬ kʼehˇ pyehˬ leꞈ-awˇ bi ka kʼoꞈ le-euˬ meh. Aˬ yawꞈ maꞈ-euˬ Miˬyehˇ-ahˇ maˬ ngeuˇ naˇ miˬ yehˇ nui gʼaˬ-ahˇ uˬ duˬ maˬ tahˬ lehˇ, shiˇ gaˇ maˬ guˆ ni ngaˬ-euˬ ehˇ dawˬ-ahˇ puiˬ-euˬ meh.
29“Nymˬ-mˇ ngaˇ heu loꞈ-ehˇ dawˬ biꞈ-eu ma. Miˇ kʼahˬ aˬ geu kʼahˬ-ahˇ jawˇ-eu tsawˇ jeuˬ aˬ geu jeuˬ maˬ kaˬ, Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ-euˬ Miˬyehˇ-ahˇ yaw zeu maˬ baw-eu dawˬ ngehˬ naˇ, gʼawˇ mawˇ deuˆ tm deuˆ tmˇ-awˇ, nymˇ deh pyaˆ nehˬ gaˇ bi daˬ ma. Aˬ jeˬ miˇ neh ehˇ naˇ, heu loꞈ-ehˇ ka kʼoꞈ nehˬ nya-eu miˬ yehˇ nui gʼaˬ maˬ jawˇ-a.”
30Kʼoeˇ naˇ, Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ-ahˇ, Baˬbuˇloˬ meuˬ-euˬ gahˬ kaˬ laꞈ kʼoeˇ, huiˬ dzehˬ goˇ dzehˬ-eu gaˇ paˇ bi mˇ-euˬ meh.
Currently Selected:
Daˬyeˬlaˇ 3: AHK
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.
Daˬyeˬlaˇ 3
3
Shuiˇ mawˇ kawˇ-ahˇ yawˬ gʼaˬ na luꞈ uˬ duˬ ya tahˬ meh lehˇ Neˬbuˬkaˬneˬzaˬ dawˬ biꞈ-euˬ
1Sahˬ paˬ Neˬbuˬkaˬneˬzaˬ-aˬ, yaw goˇ paw koꞈ tseˇ caˆ byah-awˇ, yaw huiˬ paw koꞈ caˆ byah-eu shuiˇ mawˇ kawˇ tiˬ kawˇ jahˇ-awˇ, Baˬbuˇloˬ meuˬ-euˬ gahˬ kaˬ-ahˇ jaˆ-eu Duˇlaˬ deh ga-ahˇ ka tuˇ taˬ-euˬ meh. 2Kʼoeˇ naˇ, sahˬ paˬ-euˬ gaˇ mˇ-eu yaw huiˬ yaw mahˇ deuˬ pyeuꞈ-euˬ sahˬ paˬ zaˬ yo deuˬ, sahˬ paˬ sahˬ ma geuꞈ-eu deuˬ, sahˬ paˬ sahˬ ma deuˬ-euˬ laꞈ oˆ teˬ ni uˆ lahˇ luꞈ-eu deuˬ, sahˬpa-euˬ kuiˇ laꞈ geuꞈ-awˇ gaˇ yaw huiˬ mˇ-eu deuˬ, pyuˇ jeˬ hmˬ-eu deuˬ, yaˇ kʼaˬ daˇ-eu deuˬ, yaˇ kʼaˬ daˇ-eu paw yaw huiˬ yaw mahˇ geuꞈ-eu deuˬ hawˇ-eu, miˇ kʼahˬ doe ni gaˇ yaw huiˬ kʼaˇ mˇ-eu deuˬ dawˬ tawˆ luꞈ-ahˇ, shuiˇ mawˇ kawˇ kʼoeˇ hmˬ a nehˬ-eu bawˬ-iˬ jahˇ gaˇ uiˬ laˇ jiˇ-eu gʼaˇ duˬ, sahˬ paˬ dawˬ biꞈ taˬ-euˬ meh. 3Kʼoeˇ miˇ neh, sahˬ paˬ-euˬ gaˇ mˇ-eu yaw huiˬ yaw mahˇ deuˬ pyeuꞈ-eu, sahˬ paˬ zaˬ yo deuˬ, sahˬ paˬ sahˬ ma geuꞈ-eu deuˬ, sahˬ paˬ sahˬ ma deuˬ-euˬ laꞈ oˆ teˬ ni uˆ lahˇ luꞈ-eu deuˬ, sahˬ paˬ-euˬ kuiˇ laꞈ geuꞈ-awˇ gaˇ yaw huiˬ mˇ luꞈ-eu deuˬ, pyuˇ jeˬ hmˬ-eu deuˬ, yaˇ kʼaˬ daˇ-eu deuˬ, yaˇ kʼaˬ daˇ-eu paw yaw huiˬ yaw mahˇ geuꞈ-eu deuˬ hawˇ-eu, miˇ kʼahˬ doe ni gaˇ yaw huiˬ kʼaˇ mˇ-eu deuˬ dawˬ tawˆ luꞈ, sahˬ paˬ Neˬbuˬkaˬneˬzaˬ neh ka tuˇ-euˬ shuiˇ mawˇ kawˇ a nehˬ-eu bawˬ-iˬ jahˇ gaˇ uiˬ laˇ jiˇ-awˇ, kʼoeˇ-euˬ mehˬ shi yawꞈ luꞈ-eu meh.
4Kʼoeˇ ngeh, dawˬ tsaꞈ dawˬ dzawˇ mˇ-eu gʼaˬ yaw kʼaˆ-ehˇ guˇ-awˇ, “Miˇ kʼahˬ gʼawˬ mya kʼahˬ hawˇ-eu, tsawˇ jeuˬ gʼawˬ mya jeuˬ laꞈ kʼoeˇ neh uiˬ laˇ bymˇ laˇ taˬ-euˬ tsawˇ haˬ deuˬ-oˇ, 5daˇ heh baw-awˇ, bawˬ law baw, deuˇ-mˬ diˬ-eu teˇ saˇ naw maꞈ ya gaˬ tehꞈ-a. Kʼoeˇ naˇ, caˇ dawˬ caˇ gaˇ diˬ-eu baw-eu keu ka dawˬ tawˆ luꞈ diˬ-eu baw-eu teˇ saˇ mahˇ doˆ laˇ tehꞈ-a. Kʼoeˇ loꞈ-ehˇ mahˇ doˆ laˇ-eu nehˬ-ehˇ, naw maꞈ dawˬ tawˆ luꞈ awˆ byaˆ-awˇ, sahˬ paˬ Neˬbuˬkaˬneˬzaˬ neh ka tuˇ-euˬ shuiˇ mawˇ kawˇ-ahˇ uˬ duˬ ya tahˬ meh. 6Awˆ byaˆ-awˇ uˬ duˬ maˬ tahˬ-eu tsawˇ haˬ aˬ geu gʼaˬ maˬ kaˬ, miˬ dzaˬ doꞈ luꞈ-eu tsawˬ bu bu ma-ahˇ biˬ ahˇ nehˬ gaˇ ya daˬ tehꞈ-a.” 7Kʼoeˇ naˇ, caˇ dawˬ caˇ gaˇ diˬ-eu baw-eu keu ka deuˬ-euˬ teˇ saˇ mahˇ doˆ laˇ-euˬ nehˬ-ehˇ, miˇ kʼahˬ dawˬ tawˆ luꞈ-ahˇ neh kʼaˇ uiˬ laˇ taˬ-euˬ tsawˇ jeuˬ dawˬ tawˆ luꞈ, sahˬ paˬ Neˬbuˬkaˬneˬza neh ka tuˇ taˬ-euˬ shuiˇ mawˇ kawˇ-ahˇ awˆ byaˆ-awˇ uˬ duˬ tahˬ-euˬ meh.
Daˬyeˬlaˇ-euˬ cawˬ smˇ gʼaˬ sahˬ paˬ ehˇ dawˬ-ahˇ maˬ naˇ haˬ geuꞈ-euˬ
8Kʼoeˇ ngeh, Baˬbuˇloˬ tsawˇ haˬ tiˬ paˆ na deuˬ Yuˇdaˆ tsawˇ haˬ deuˬ-ahˇ laˆ shaˬ-eu jeˬ jahˇ-euˬ meh. 9Sahˬ paˬ Neˬbuˬkaˬneˬzaˬ-ahˇ aˬ yawꞈ maꞈ heu loꞈ-ehˇ ehˇ nehˬ-euˬ meh. “Sahˬ paˬ ziˇ baw ziˇ za luꞈ-uˇ. 10Caˇ dawˬ caˇ ngeh diˬ-eu baw-eu keu ka deuˬ-euˬ teˇ saˇ mahˇ doˆ laˇ-eu nehˬ-ehˇ tiˬ poˆ tehꞈ-ehˇ, yawˬ gʼaˬ na luꞈ awˆ byaˆ-awˇ shuiˇ mawˇ kawˇ kʼoeˇ kawˇ-ahˇ uˬ duˬ ya tahˬ meh lehˇ, sahˬ paˬ nawˇ dawˬ biꞈ taˬ-euˬ meh. 11Awˆ byaˆ-awˇ uˬ duˬ maˬ kʼaˇ tahˬ-eu tsawˇ haˬ-ahˇ miˬ dzaˬ doꞈ luꞈ-eu tsawˬ bu-ahˇ biˬ ahˇ ma lehˇ nawˇ dawˬ biꞈ-euˬ meh. 12Nawˬ neh Baˬbuˇloˬ meuˬ-euˬ gahˬ kaˬ-ahˇ bi haw bi pyaˆ-eu Yuˇdaˆ tsawˇ haˬ deuˬ pyeuꞈ-eu, Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha maꞈ, nawˬ neh dawˬ biꞈ-euˬ gaˇ maˬ naˇ haˬ-a. Nawˬ-euˬ miˬ yehˇ-ahˇ aˬ yawꞈ maꞈ uˬ duˬ maˬ tahˬ-eu uˬ taꞈ, nawˬ neh ka tuˇ-euˬ mawˇ kawˇ mehˬ shi maˬ awˆ byaˆ-a.”
13Kʼoeˇ ngeh, sahˬ paˬ nui ma pehˇ laˇ-awˇ, tsawˇ haˬ kʼoeˇ smˇ gʼaˬ-ahˇ aˬ yawꞈ mehˬ shi bi sheuˬ laꞈ-eu gʼaˇ duˬ dawˬ biꞈ-euˬ meh. 14Aˬ ha smˇ gʼaˬ-ahˇ sahˬ paˬ ehˇ nehˬ-eu, “Shaˬdaˬlaˆ, Meˬshaˆ hawˇ-eu Aˬbeˬdaˬneˬgoˬ-oˇ, nawˬ ha smˇ gʼaˬ ngaˬ-euˬ miˬ yehˇ-ahˇ uˬ duˬ maˬ tahˬ-ehˇ, ngaˬ neh ka tuˇ taˬ-euˬ shuiˇ mawˇ kawˇ-ahˇ uˬ duˬ maˬ tahˬ-aˬ lehˇ ehˇ-eu ngeuˇ meh loˇ. 15Nymˬ-mˇ poˆ jawˇ, daˇ heh baw, bawˬ law baw, deuˇ-mˬ diˬ-eu teˇ saˇ hawˇ-eu, caˇ dawˬ caˇ gaˇ zmˬ-eu keu ka nui deuˬ-euˬ teˇ saˇ mahˇ doˆ laˇ gaˇ naw maꞈ ya gaˬ-eu nehˬ-ehˇ, shuiˇ mawˇ kawˇ kʼoeˇ kawˇ mehˬ shi awˆ byaˆ-awˇ uˬ duˬ tahˬ-awˬ. Naw maꞈ uˬ duˬ maˬ tahˬ de leˇ ngeuˇ naˇ, tiˬ poˆ tehꞈ-ehˇ miˬ dzaˬ doꞈ luꞈ-eu tsawˬ bu-ahˇ biˬ ahˇ ma. Naw maꞈ-ahˇ ka kʼoꞈ nya-eu miˬ yehˇ jawˇ tehꞈ-a lehˇ naw maꞈ noeˬ te loˇ.”
16Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ heu loꞈ-ehˇ ehˇ-eu meh. “Sahˬ paˬ-oˇ, gaˇ kawˆ heu-ahˇ taꞈ leˇ-awˇ, nawˬ-ahˇ nga maꞈ dawˬ poˆ maˬ paˇ poˆ ma. 17Doꞈ luꞈ-eu miˬ dzaˬ tsawˬ bu hawˇ-eu nawˬ-euˬ baoˬ laꞈ kʼoeˇ, nga maꞈ uˬ duˬ tahˬ-eu Miˬyehˇ ngaˬ ha smˇ gʼaˬ-ahˇ ka kʼoꞈ nehˬ laꞈ nya naˇ ka kʼoꞈ nehˬ laꞈ luꞈ-uˇ. 18Aˬ yawꞈ maˬ ka kʼoꞈ nehˬ laꞈ law hawˇ kʼawꞈ, nawˬ-euˬ miˬ yehˇ-ahˇ nga maꞈ uˬ duˬ maˬ tahˬ-ehˇ, nawˬ neh ka tuˇ taˬ-euˬ shuiˇ mawˇ kawˇ mehˬ shi maˬ awˆ byaˆ lehˇ, kʼaˬ duˬ ni nawˬ-ahˇ ehˇ tsehˆ-eu ma.”
Daˬyeˬlaˇ-euˬ cawˬ smˇ gʼaˬ-ahˇ sehꞈ-eu gʼaˇ duˬ sahˬ paˬ dawˬ biꞈ-euˬ
19Kʼoeˇ ngeh, Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ-ahˇ Neˬbuˬkaˬneˬzaˬ nui ma pehˇ dui dui laˇ-awˇ, baˬ ba neˇ tseuˆ ni pyeuꞈ laˇ-euˬ meh. Kʼoeˇ miˇ neh, miˬ dzaˬ tsawˬ bu kʼoeˇ shiꞈ bymˇ lahˇ dzehˬ laˇ ni laˆ nyehˆ-eu gʼaˇ duˬ aˬ yawꞈ dawˬ biꞈ-euˬ meh. 20Kʼoeˇ naˇ, aˬ ha smˇ gʼaˬ-ahˇ paꞈ cuꞈ-awˇ miˬ dzaˬ tsawˬ bu-ahˇ biˬ ahˇ-eu gʼaˇ duˬ, aˬ yawꞈ-euˬ guiˇ maꞈ laꞈ kʼoeˇ gʼaˬ kʼaˆ dui dui-eu tsawˇ haˬ deuˬ-ahˇ aˬ yawꞈ dawˬ biꞈ-euˬ meh. 21Aˬ ha smˇ gʼaˬ-ahˇ aˬ yawꞈ maꞈ paꞈ cuꞈ-awˇ, miˬ dzaˬ doꞈ nyehˆ taˬ-euˬ tsawˬ bu-ahˇ biˬ ahˇ-euˬ meh. Kʼoeˇ loꞈ-ehˇ biˬ ahˇ nehˬ ngeh, mehˬ tsoeˬ tiˬ kahˇ-iˬ maˬ lehˆ doˆ ni, pehˇ kʼahˬ pehˇ nymˇ hawˇ-eu pehˇ kʼahˬ pehˇ mahˇ kʼawꞈ dm luꞈ-awˇ, uˬ kʼoˆ kʼawꞈ kʼoˆ luꞈ-eu meh. 22Sahˬ paˬ neh dawˬ biꞈ-awˇ miˬ dzaˬ aˇ dzehˬ dzeuˇ ni laˆ nyehˆ taˬ-euˬ miˇ neh, aˬ ha smˇ gʼaˬ-ahˇ biˬ ahˇ-euˬ tsawˇ haˬ deuˬ-ahˇ miˬ dzaˬ myawꞈ sehꞈ-euˬ meh. 23Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ-aˬ, bi paꞈ cuꞈ taˬ-awˇ, miˬ dzaˬ tsawˬ bu gʼahˇ ceh nyiˬ paˆ-ehˇ ga ahˇ-iˇ-euˬ meh.
24Neˬbuˬkaˬneˬzaˬ zahˬ leˇ-awˇ, ja pyuˬ ni tsawˬ tuˇ laˇ-euˬ meh. “Tsawˇ haˬ smˇ gʼaˬ-ahˇ paꞈ cuꞈ-awˇ miˬ dzaˬ tsawˬ bu-ahˇ biˬ ahˇ-euˬ maˬ ngeuˇ loˇ” lehˇ, aˬ yawꞈ-euˬ gaˇ mˇ-euˬ yaw huiˬ yaw mahˇ deuˬ-ahˇ aˬ yawꞈ naˇ haˬ ngeh, “Ngeuˇ ma. Tsawˇ haˬ smˇ gʼaˬ paꞈ cuꞈ-awˇ biˬ ahˇ-euˬ ma” lehˇ, yaw huiˬ yaw mahˇ kʼoeˇ deuˬ ehˇ-eu meh.
25“Toˆ-ehˇ ngeuˇ naˇ, aˬ jeˬ miˇ neh miˬ dzaˬ laꞈ kʼoeˇ tsawˇ haˬ oeˬ gʼaˬ cah luꞈ-eu ngaˬ-ahˇ mawˇ laˇ ta. Aˬ yawꞈ maꞈ-ahˇ aˇ caˆ gʼeh maˬ paꞈ taˬ-ehˇ, miˬ dzaˬ lahˇ leˇ gaˇ jiˇ maˬ duˇ nga. Oeˬ gʼaˬ tiˬ gʼaˬ miˬ yehˇ-euˬ aˬ li-ahˇ duˇ nga” lehˇ, aˬ yawꞈ ehˇ-eu meh.
Aˬ ha smˇ gʼaˬ-ahˇ pyehˬ nehˬ-awˇ gaˇ yaw huiˬ bi mˇ-euˬ
26Kʼoeˇ naˇ, miˬ dzaˬ tsawˬ bu nymˇ kʼoeˇ nymˇ-euˬ gʼoˆ kʼehˬ-ahˇ Neˬbuˬkaˬneˬzaˬ le daˆ-awˇ, “Dawˬ tawˆ kʼoeˇ taˆ huiˬ-eu Miˬyehˇ-euˬ zaˬ kʼaˆ deuˬ pyeuꞈ-eu, Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ-oˇ, doˆ laˇ-awˬ” lehˇ guˇ-euˬ meh. 27Sahˬ paˬ zaˬ yo dawˬ tawˆ luꞈ, sahˬ paˬ sahˬ ma dawˬ tawˆ luꞈ, sahˬ paˬ sahˬ ma deuˬ laꞈ oˆ teˬ ni gaˇ mˇ-eu deuˬ dawˬ tawˆ luꞈ hawˇ-eu, yaw huiˬ yaw mahˇ kʼaˇ geuꞈ luꞈ-eu deuˬ dawˬ tawˆ luꞈ laˇ-awˇ, aˬ ha smˇ gʼaˬ miˬ dzaˬ maˬ lahˇ ni jawˇ luꞈ gaˇ haw laˇ-euˬ meh. Aˬ ha smˇ gʼaˬ-euˬ uˬ duˬ tsehˇ kahˇ miˬ dzaˬ maˬ myawꞈ-ehˇ, mehˬ tsoeˬ maˬ puiˆ dzaˬ-euˬ uˬ taꞈ, miˬ shmˇ kʼawꞈ maˬ behꞈ laꞈ-a.
28Kʼoeˇ ngeh, sahˬ paˬ heu loꞈ-ehˇ ehˇ-eu meh. “Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ-euˬ Miˬyehˇ-ahˇ ja ceuˬ-awˬ. Aˬ yawꞈ-ahˇ gʼoe-awˇ aˬ yawꞈ-euˬ nui kʼahˇ mˇ-eu tsawˇ haˬ heu smˇ gʼaˬ-ahˇ, aˬ yawꞈ-euˬ mˬ taˆ gʼaˬ kʼehˇ pyehˬ leꞈ-awˇ bi ka kʼoꞈ le-euˬ meh. Aˬ yawꞈ maꞈ-euˬ Miˬyehˇ-ahˇ maˬ ngeuˇ naˇ miˬ yehˇ nui gʼaˬ-ahˇ uˬ duˬ maˬ tahˬ lehˇ, shiˇ gaˇ maˬ guˆ ni ngaˬ-euˬ ehˇ dawˬ-ahˇ puiˬ-euˬ meh.
29“Nymˬ-mˇ ngaˇ heu loꞈ-ehˇ dawˬ biꞈ-eu ma. Miˇ kʼahˬ aˬ geu kʼahˬ-ahˇ jawˇ-eu tsawˇ jeuˬ aˬ geu jeuˬ maˬ kaˬ, Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ-euˬ Miˬyehˇ-ahˇ yaw zeu maˬ baw-eu dawˬ ngehˬ naˇ, gʼawˇ mawˇ deuˆ tm deuˆ tmˇ-awˇ, nymˇ deh pyaˆ nehˬ gaˇ bi daˬ ma. Aˬ jeˬ miˇ neh ehˇ naˇ, heu loꞈ-ehˇ ka kʼoꞈ nehˬ nya-eu miˬ yehˇ nui gʼaˬ maˬ jawˇ-a.”
30Kʼoeˇ naˇ, Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ-ahˇ, Baˬbuˇloˬ meuˬ-euˬ gahˬ kaˬ laꞈ kʼoeˇ, huiˬ dzehˬ goˇ dzehˬ-eu gaˇ paˇ bi mˇ-euˬ meh.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Akha Bible Revision (Latin Script) © Thailand Bible Society, 2011.