Penemu-Dalam Solomon 1
1
Ngiga Pengelurus
1 Kita ke megai kuasa dunya mesti rinduka pengelurus. Tumpuka runding kita amat-amat ngagai Tuhan, lalu giga Iya enggau ati ti lurus. 2Orang ke enda nguji iya deka tetemuka iya; iya deka ngayanka diri ngagai sida ke andalka iya. 3Runding ti enda lurus nyerara orang ari Allah Taala, lalu enti kitai chukup beli deka nguji iya, kuasa iya deka ngasuh kitai malu. 4Penemu-dalam enda sekali-kali begulai enggau orang pengelakar tauka orang ke nyadi ulun dosa. 5Tiap iku orang ke kudus udah belajar ngenyauhka diri ari orang pengelakar. Iya enggai dia lebuh runding ti beli dibantaika; lalu iya berasai enda nyamai maya pengelurus enda dipejalaika.
Allah Taala Nemu Utai ti Disebut Kitai
6Penemu-dalam endang roh ti manah enggau orang tang iya enda ngampun orang ke bejaku jai ngelaban Allah Taala, laban Allah Taala nemu pengasai enggau runding kitai, lalu ninga tiap leka jaku ti disebut kitai. 7Laban roh Tuhan ngisi semua dunya, lalu ngempung semua utai begulai, iya nemu tiap leka jaku ti disebut orang. 8Nadai siku orang ke bejaku jai enda ditemu iya, lama laun orang nya tetap deka nerima ukum ti patut. 9Tuju ati orang ke nadai pengarap ke Allah Taala deka diperesa enggau silik. Jaku sida deka dipadah ngagai Tuhan, lalu udah nya sida deka nerima ukum ti patut diterima sida. 10Allah Taala enggai dichakap laban Iya ninga semua utai, neh kumplin nuan enda ulih dipelalaika ari Iya. 11Nya alai anang nuan muchau aja-aja - nadai penguntung ari nya - lalu anang bejaku pedis ati. Utai ti pemadu dipelalai ti ditusi nuan deka bisi pengujung, lalu pemula deka ngerusak semengat nuan.
Allah Taala Enda Ngaga Pemati
12Anang nuan mati ketegal pengawa nuan ti bedosa. 13 Allah Taala enda ngaga pemati. Lebuh utai ti idup mati, Allah Taala sigi enda gaga ati. 14Iya ngaga semua utai ngambika sida idup. Semua utai ti digaga Iya endang chukup sereta badas. Dalam sida nadai rachun ti munuh. Endang amat, pemati sigi nadai kuasa di dunya 15laban pengelurus Allah Taala enda nemu badu.
16 Orang ke nadai pengarap ke Allah Taala bulih pemati ketegal jaku enggau pengawa sida. Sida inginka pemati baka inginka ambai sida. Sida bepangan enggau pemati. Nya alai endang patut sida mati.
Currently Selected:
Penemu-Dalam Solomon 1: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia