रोमी 11
11
इस्राएलजे लम ख्यब मीयू
1 #
फिलिप्पी 3:5
येरेक्यूत्देबे ङ लोक्क्य, “होरेयलो परमेश्वरदे ङूजे मीयूने क्याबे औ?” दी! ङ रङ्सेये अब्राहामजे छगूम्-पूर्गूम्, बेन्यामीन कुलजे यहूदी ख्यङ्। 2परमेश्वरदे खूम्देमेस्येने सेलब रङ्से मीने अन्क्याबे ख्यङ्। धर्मशास्त्रदे अगमवक्ता एलियाजे बारेने स्य्वेब पो नमयूने था त्वा? ङूदे इस्राएलजे विरुद्धने परमेश्वरप्रे येर्बे य ख्यङ्, 3#१ राजा 19:10,14“प्रभू, थमयूदे नैजे पो क्यमब मीयूने सेत्दे, होर्दे जाक्क्यायू हूल्बीदे, ङ तीत्या पोङ्ये ख्यङ्, मेस्ये ङैनेये थमयूदे सेमे ख्यङ्।” 4#१ राजा 19:18हन्छ्वाब परमेश्वरदे ङूने जवाफ च पीन्दे? “बाल देऊताजे खूम्ने पूजी च्वोदेबे स्यूव अम्पीनब हजार ङ्यी मीयू ङैदे रङ्सेजे लागि साये ख्यङ्। 5येर्बेने दीन्नजेसेमेने परमेश्वरजे अनुग्रहदे सेलेब इस्राएलजे मीयू कोइ लम र ख्यङ्। 6तर अम्ब अनुग्रहदे क्यूर ख्यङ् यलो काम चीत्देबे दी, नत्रयलो अनुग्रह अनुग्रहप्रने अन्क्यूर ख्यङ्दे।
7होरेयलो अम्बजे अर्थ च क्यूत्दे? इस्राएलजे मीयूदे च मल ख्य हम्ब प्रेअङ्खू। तर परमेश्वरदे सेलब मीयूदे त्या हम्ब प्रेखूदे। सूजो मीयू क्वाने सेम् कोङ क्यूत्दे, 8#व्यवस्था 29:4; यशैया 29:10धर्मशास्त्रने येर्बे लिख्दीये ख्यङ्,
“परमेश्वरदे मीयूने चेत त्वब आत्मा पीन ख्यङ्। होर्दे होरप्रने येर म्या पीन्दे हम्बदे अन्तङस्य मेस्ये येर न पीन्दे हम्बदे अन्तस्य, मेस्ये थमयू दीनीसेमेने होरने क्यून्न ख्यङ्”,
9 #
भजनसंग्रह 69:22,23 मेस्ये मूरूम् दाऊददेये यीय, “थमयूजे भत्यार, यूयू मेस्ये देर्जेन् ताप्र क्यूस्स्य, होर्दे ठक्कर चदेबे थमयूदे दण्ड प्रेस्स्य।
10थमयूजे म्या अन्तङ्स्य यदेबे मून्दूङ्दे उप्स्य,
मेस्ये थमयूजे चीसार् येतार्ने कोत्रा क्यून्नूस्य।”
कलमी ख्यायेब हाँगा
11येरेक्यूत्देबे ङ लोक्क्य, “थमयू लङने अङ्ख्व क्यूरने च्या थूङ्ये औ स्व?” देने दी! तर इस्राएलदे चेब अपराधदे यहूदी तेब मीयूने उद्धार प्रेख्यङ्, होरेक्यूत्देबे इस्राएलये उद्धार प्रेजे लागि ठेन ख्यङ्। 12जेम्से कादेये इस्राएलदे चेब पापदे संसारजे मीयूजे लागि असी, मेस्ये थमयू फूङ्गब यहूदी तेब मीयूजे लागि सम्पत्ति क्यूर ख्यङ् यलो थमयूजे पूरा विश्वासदेब झन् कोला थेप् असी रेस्स्ये।
13जेम्से नम यहूदी देब मीयूने येन ख्यङ्। यहूदी देब मीयूजे लागि खर्दीयेब मूल स्यूस्स्या क्यूत्देबे ङ अम्ब कामजे सार्या चीक्क्य, 14येर आशा चीक्क्य अम्ब कामदे ङैजे रङ्से जातजे मीयूदेये ठेन्स्य, मेस्ये थमयू नङ्ने कोइ कोइदेब उद्धार प्रेखूस्य। 15चेनेयलो कादेये थमयू योम्बीब संसारने ख्यब मीयू परमेश्वरप्रे थून्क्य यलो, च थमयूने फेरि रङ्से मी बन्दीययलो सीयेबदेये जीया प्रे-सर अन्क्यूरया? 16कादेये क्यङ् फूनने च्योबब ता छ्योङ्बजे छीत्यात्या परमेश्वरने पाता खूम चेर्दे ख्यङ्यलो, हम्ब ता छ्योङ्ब टक्कने पवित्र क्यूक्क्य। होरप्रने तङ्बो-छ पवित्र ख्यङ्लो हाँगायूये टक्कने पवित्र क्यूक्क्य।
17कोला हाँगायू ज्य जैतूनजे तोङ्बोदे क्योदीदेबे गीली मेस्ये नाजे जैतून तोङ्बोजे हाँगा हम्बने कलमी चीत्देबे ख्याकदे। नम यहूदी तेब मीयू हम्ब नाजे जैतून तोङ्बोप्र ख्यङ् मेस्ये जेम्से यहूदीयूप्रेने आत्माजे असीयू प्रेब क्यूर ख्यङ् मेस्ये परमेश्वरको खास जैतून तोङ्बोजे ट्वादे बोङ् प्रेब खूराक प्रेक्क ख्यङ्। 18होरेक्यूत्देबे हम्ब क्यूत्देबे गीलेब हाँगायूजे खूम्ने केन् अन्त्वोल्लाची। कादेये केन्ने त्वेयलो, अम्ब ह्वे ची, नमयूदे छने थम्दीन दी, तर छदे नमयूने थम्दीन ख्यङ्। 19तर नदे यख्यङ्, “ङ कलमी ख्याने हम्ब हाँगा चेबे ख्य।” 20अम्ब तम्दम् ख्यङ्, थमयूदे विश्वास अन्चीत्देबे हाँगायू चेबे ख्यङ्। नमयूब रङ्सेदे चेब विश्वासदेत्या मेरन ख्व ख्यङ्। केन् अन्त्वोल्लाची, तर होस्स्यार क्यून्नू। 21चेनेयलो कादेये परमेश्वरदे ज्य हाँगायूने बाँकी अन्-येन् यलो नमयूनेये क्यापीसे त्वो।
22येरेक्यूत्देबे परमेश्वरजे दया चेब मेस्ये कोङ सेम्ने ह्वे ची। आज्ञा अम्मन्देयूने ङ्येम्स्ये त्वो, तर ङूजे दयाने टूनूदेयलो नने परमेश्वरदे दया तन्क्य, नत्रलो नेये चेबीय। 23कादेये इस्राएलजे मीयूदे विश्वास चीत्देबे रदेयलो थमयू खूम्जे नेने कलमी ख्याय। चेनेयलो परमेश्वरदे फेरि थमयूने हम्ब नेने कलमी ख्या खूइय। 24न यहूदी देब मी नाजे जैतून तोङ्बोदे चेरेब हाँगाप्र ख्यङ्। स्वभाव अनुसार अम्मील्ले क्यूल्लीने ज्य जैतूनजे तोङ्बोने कलमी ख्याये ख्यङ्। यहूदीयूब ज्य जैतूनजे तोङ्बोप्र ख्यङ्, हम्ब ज्य जैतूनजे तोङ्बोदे चदेबे रेब हाँगायू रङ्सेजे तोङ्बोप्रे फेरि कलमी ख्याने कूम सूस्योलो क्यूक्क्य।
इस्राएल मीयू क्वाजे उद्धार
25अत-अची च्योन्यू, नमयूदे रङ्सेने केन् अन्त्वोस्स्य यदेबे नङ्सू पो त्या नमयूने था क्यूस्स्य मन ख्यङ्। अम्ब नङ्सू पो येर ख्यङ्, र परदेब यहूदी तेब मीयू ख्रीष्टने अन्रदासेमेत्या यहूदीयूजे सेम् कोङ क्यून्नीय। 26#यशैया 59:20,21येर्बे इस्राएलजे मीयू क्वादे उद्धार प्रेक्क्य यदेबे धर्मशास्त्रने लिख्दीये ख्यङ्,
“सियोनदे उद्धार पीनब मी रीय, होर्दे ङूदे याकूबजे छगूम्-पूर्गूम्यूने अन्ज्य कामदे ल्वामीय।”
27 #
यशैया 27:9
“कन्छ्वाब ङ थमयूजे पापने मैल्बीय, हन्छ्वाब थमयूप्रे चेब करार पूरा क्यूक्क्य।”
28इस्राएलजे मीयूदे सूगब खबरने विश्वास अन्चीत्देबे परमेश्वरजे शत्रु क्यूर ख्यङ्। होरेक्यूत्देबे नमयू यहूदी तेब मीयूने फाइदा क्यूर ख्यङ्। तर परमेश्वर रङ्सेदेने सेलब मेमेयूजे कारणदे इस्राएलजे मीयूने प्रेम चीक्क्य। 29चेनेयलो परमेश्वरदे पीनब बर मेस्ये असी येतार्ने टूनीय। 30केर्बे मीयूङ् नम यहूदी तेब मीयू परमेश्वरजे आज्ञा अम्मन्दे ख्य, तर चूजो इस्राएलजे मीयूदे परमेश्वरजे आज्ञा अम्मन्दे क्यूत्देबे परमेश्वरदे नमयूने ङ्येम ख्यङ्। 31येर्बेने दीनी आज्ञा अम्मन्दीलाबे टूनब मीयूदेये त्याफे कृपा प्रेस्स्य यदेबे परमेश्वरदे नमयूने कृपा तन्दे। 32चेनेयलो परमेश्वरजे दया मीयू क्वादेने प्रेस्स्य यदेबे ङूदे मी क्वानेने आज्ञा अम्मन्देब चीम्मीदे।
परमेश्वरजे सार्याजे प्रू
33 #
यशैया 55:8
परमेश्वरजे सम्पति कर फत्या कूम! ङूजे बुद्धि मेस्ये ज्ञान सोरो कूम गहिरो ख्यङ्! ङूदे चेब न्यायने सूदे बयान चे खूइय मेस्ये ङूजे लम् सूदे था प्रे खूइय!
34 #
यशैया 40:13
“चेनेयलो परमेश्वरजे सेम्जे पो सूदे स्येख्यङ्? या ङूने मोतो पीनब सू क्यूत्दे?
35 #
अय्यूब 41:11
“या, चत्या कूसीली परमेश्वरने सूदे पीन ख्यङ् स्व, कम्ब से ख्यङ् परमेश्वरदे ङूने ल्वामे पर्देब?”
36 #
१ कोरिन्थी 8:6
चेनेयलो टक्कने परमेश्वरदे बन्देब ख्यङ्। हम्ब साप्ता थोकने ङूजे बोङ्दे, मेस्ये ङूजे महिमाजे लागि ख्यङ्। ङूनेने येतार्ने महिमा क्यूस्स्य। आमेन।
Currently Selected:
रोमी 11: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
