रोमी 1
1
पावलजे चिट्ठी
1ङ पावल येशू ख्रीष्टजे त्वो, मूल स्यूस्स्या क्यूरने क्वब मेस्ये परमेश्वरजे सूगब खबर स्य्वेब कामजे लागि आलाक् चीक्कब ख्यङ्।
2हम्ब सूगब खबर परमेश्वरदे मीयूङ्ने रङ्सेजे अगमवक्ताप्रे क्यूत्देबे थमयूदे हम्ब कबुल पवित्र धर्मशास्त्रने लिख्दीदे।
3हम्ब सूगब खबरब परमेश्वरजे च ङीन प्रभू येशू ख्रीष्टजे बारेने ख्य। ङू दाऊद मूरूम्जे वंशजे मी क्यूत्देबे जन्मीदीदे। 4ङीनजे प्रभू येशू ख्रीष्ट सीयेबदे फेरि सोम्बो क्यूत्देबे पवित्र आत्माजे शक्तिने परमेश्वरजे च ख्यङ् यदेबे ठर्तीकदे। 5ङूजे मीन्जे लागि यहूदी तेब मीयू क्वादेने विश्वास चीत्देबे आज्ञा मन्देब चेजे लागि येशू ख्रीष्टने परमेश्वरदे ङीने मूल स्यूस्स्याजे काम चेब अनुग्रह पीन ख्यङ्। 6नमयूये येशू ख्रीष्टजे क्यूरने क्वबयू नङ्जे ख्यङ्।
7परमेश्वरदे छेब नम रोमजे मीयू क्वाने ङूजे पवित्र मीयू क्यूरने क्व ख्यङ्:
ङीनजे प परमेश्वर मेस्ये प्रभू येशू ख्रीष्टदे नमयूने अनुग्रह मेस्ये शान्ति पीन्स्य।
पावल रोमने सोरो प्रतीङ्रब
8पात्ता खूम्, ङ नमयू ख्वोताजे लागि येशू ख्रीष्टप्रे क्यूत्देबे ङैजे परमेश्वरने धन्यवाद पीन्क्य, चेनेयलो नमयूदे चेब विश्वासजे पो का-मुलुकने तैक ख्यङ्। 9ङ सेम्-नङ्देमेस्येने ङूजे चजे सूगब खबर स्योत्देबे ङूजे सेवा चीक्क्य। ङ प्रार्थना चीप्प येतार्ने नमयू ह्वे चीन्न ख्यङ् यब पोजे गवाही परमेश्वर ख्यङ्। 10होर्दे केरेनेक्यूल्ली परमेश्वरजे इच्छा अनुसार आखिरीने ङ नमयूप्रे त्व खूस्य यदेबे प्रार्थना चीक्क्य।
11चेनेयलो नमयूने बोल्यो चेने पवित्र आत्मादे पीनब असी तेते पीन खूस्य यदेबे ङ नमयूने सोरो त्वस्ये मन ख्यङ्। 12येर्बेने ङैजे विश्वासदे नमयूने, मेस्ये नमयूजे विश्वासदे ङैने, ङ्हीदेने त्यादे त्याप्रे आँट प्रे खूस्य। 13#मूल स्यूस्स्यायूजे कामजे किताब 19:21ओ अत-अची च्योन्यू, नमयूदे अम्ब पो था क्यूस्स्य यदेबे ङ मन्न ख्यङ्, ङैदे यहूदी तेब मीयू ट्यादेप्रने नमयूजे ट्यादेये मीयू ख्रीष्टने विश्वास चेजे लागि रे खूस्य यदेबे नमयू ट्याने रने कूम फे बोङ् चीत्दे। तर ङ चूजो सेमेने र अम्प्रे क्यून्न ख्यङ्।
14ग्रीक क्यूल्लीने या सूजो नैपङ्गी, छ्य्वेब या अन्छ्य्वेब क्यूल्लीने क्वाजे लागि ङैदे सूगब खबर स्य्वेने कर पर्दे ख्यङ्। 15येरेक्यूत्देबे खूदासेमे नम रोमने ख्यबयूनेये ङ सूगब खबर सोरो स्य्वेस्ये मन्न ख्यङ्।
16 #
मर्कूस 8:38
ङ अम्ब सूगब खबर स्य्वेने अन्त्वा। विश्वास चेबयू नङ्ने पात्ता खूम् यहूदी होर्दे यहूदी तेब मीयूजे लागिये अम्ब मुक्ति पीनब परमेश्वरजे शक्ति ख्यङ्। 17#हबकूक 2:4चेनेयलो परमेश्वरदे रङ्सेजे खूम्ने मीयू केर्बे धर्मी ठर्दीय यब पो सूगब खबरने तम्मीदे, अम्ब धर्मी ठर्देब पो पूरा रूप्ने विश्वास चीत्देबेत्या रीय। धर्मशास्त्रने येर्बे लिख्दीये ख्यङ्, “धर्मी ठर्देब मीब विश्वासदेने जीया चैय।”
मीयू फ्याने परमेश्वरजे छी
18मीयूदे ङूने अम्पूस्तेब मेस्ये मीयूदे चेब अन्ज्य कामजे विरुद्धने परमेश्वरजे छी स्वर्गदे मो तङ्र ख्यङ्। थमयूजे अन्ज्य कामदे परमेश्वरजे तम्दम्ने क्व अन्ख्व चीन्न ख्यङ्। 19परमेश्वरजे बारेने थमयूदे स्ये ख्वब पो छार्लाङ्के ख्यङ्, चेनेयलो परमेश्वरदे थमयूने हम्ब पो तम्मीक ख्यङ्। 20संसारजे सृष्टि क्यूरमेस्येने चीतेब सेयूने परमेश्वरजे तङ अन्ख्वब गुण, या कलङ्बेये अन्जेनब परमेश्वरजे शक्ति मेस्ये परमेश्वरजे स्वभाव सोरो ज्य तङ ख्व ख्यङ्। येरेक्यूत्देबे थमयूदे बहाना चेब ने चैत्याये त्वो।
21 #
एफिसी 4:17,18 थमयूदे परमेश्वरने स्येदेबेये परमेश्वरने चे पर्देब गेसेन् अन्ची, थमयूदे परमेश्वरने धन्यावाद अम्पीन्, थमयू रङ्से विचारने काम अन्लादेब क्यूत्देबे थमयूजे मूर्ख सेम्ने मून्दूङ् क्यूत्दे। 22रङ्सेदेने बुद्धि ख्यब ख्यङ् मन्देबे बुद्धि ख्यब मन्लीने थमयू मूर्ख क्यूत्दे, 23#व्यवस्था 4:16-18मेस्ये थमयूदे कलङ्बेये अन्सीबब परमेश्वरने अम्पूस्तीलाबे सीबब मी, तोप् स्यी ख्यब रोला, ययू, गूदे स्यूनब जन्तूयूजेप्र मूर्तियू बन्तीदेबे हम्बने पूस्तीदे।
24येरेक्यूत्देबे थमयूदे त्यादेत्याप्रे त्वाब कामयू चीन्नूस्य यदेबे थमयूजे सेम्दे मन्नब अन्ज्य भस्त्व कामनेने परमेश्वरदे क्यापीदे। 25चेनेयलो थमयूदे परमेश्वरजे सत्य पोने विश्वास अन्चील्लाबे लूच्च पोने विश्वास चीत्देबे सृष्टि चेब परमेश्वरने अम्मन्दीलाबे बरू ङूदे बन्देब सेयूजे सेवा चीत्दे, मेस्ये पूस्तीदे। सृष्टि चेब परमेश्वर येतार्ने सार्या चेब लायाकजे ख्यङ्। आमेन।
26येरेक्यूत्देबे परमेश्वरदे थमयूने थमयूजे अन्ज्य भस्त्व काम चीन्नूस्य यदेबे क्यापीदे। थमयूजे मदीयूदे सृष्टिजे नियमने क्यादेबे मदी मदीयूने मेस्ये ङ्यूम्देबे अन्ज्य भस्त्व काम फर्दे। 27होरप्रने पती चयूदेये मदीप्रे चे पर्देब व्यवहारने क्यादेबे अन्ज्य पापजे इच्छा चीत्देबे पती पतीयूने प्रे ङ्यूम्देबे अन्ज्य भस्त्व काम फर्दे, मेस्ये रङ्से ङ्वदे चेब अन्ज्य काम अनुसार थमयूदे दण्ड प्रेत्दे।
28येर्बे थमयूदे परमेश्वरने तम्दम् पोने ठीक अन्थेदेबे परमेश्वरदे थमयूने चे अन्क्यूरब काम चेने अन्ज्य भस्त्व चेब सेम् क्यून्नूस्य यदेबे क्यापीदे। 29साप्ता थर्जे बदमाश चेब, अन्ज्य चेब, लोभ, खी फाब पोयूदे थमयूजे सेम् फ्यान ख्यङ्। ठेन, मी सेब, च्य-फा, छल्, मीजे पो चेब पोदे थमयूजे सेम् फ्यान ख्यङ्, मेस्ये थमयू पोच्येन्, 30मेस्ये मीजे न प्वे, परमेश्वरने ह्यल चेब, जीद्दी चेब, सोरो केन् त्वेब, केन् क्यूरब, अन्ज्य पो बन्तीदेबे क्यमे क्यमे प्रब, प-मजे आज्ञा अम्मन्देब, 31मूर्ख, मीने लूच्च चेब, माया त्वब, मीने अन्ङ्येमब क्यूक्क्य। 32येर काम फरब मीयू सेब लायकजे क्यूक्क्य यदेबे परमेश्वरजे धर्मजे छ्याप् स्येदेये थमयूदे येर काम फर्न त्याये दी, तर येरप्र काम चीन्नबयूने ची-ची यदेबे बोङ् तम्मीय।
Currently Selected:
रोमी 1: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
