फिलिप्पी 1
1
1 #
मूल स्यूस्स्यायूजे कामजे किताब 16:12
येशू ख्रीष्टजे त्वोयू पावल मेस्ये तिमोथीदे, ख्रीष्टने विश्वास चेब फिलिप्पीजे बिशपयू मेस्ये डिकनयू होर्दे परमेश्वरजे पवित्र मीयू क्वानेने अम्ब चिट्ठी लिख्दीन ख्यङ्। 2ङीनजे प परमेश्वर मेस्ये प्रभु येशू ख्रीष्टदे अनुग्रह मेस्ये शान्ति पीन्स्य।
धन्यवाद मेस्ये प्रार्थना
3कलङ्नेयली नमयू ह्वेरब ङ ङैजे परमेश्वरने धन्यवाद पीन्क्य। 4ङ येतार्ने नमयू क्वाजे लागि प्रार्थना चीप्प सेम् सूग्देबे प्रार्थना चीक्क्य, 5चेनेयलो पात्ता खूम्ब दिनदे-छो चूजोसेमे सूगब खबर स्य्वेबने नमयूदे तोङ्मीन ख्यङ्। 6नमयूजे अन्द्रने ज्य काम सुरू चेब परमेश्वरदेने येशू ख्रीष्ट रब दिनने हम्ब पूरा चीक्क्य यदेबे ङैने पक्क ख्यङ्। 7नमयू क्वाजे लागि येरे मनब ङैने ज्य थेको, ङैदे नमयू क्वाने रङ्से सेम्ने ये ख्यङ्, चेनेयलो ङ चूजो जेल नङ्ने क्यूप्प या फीने सूगब खबर तम्दम् ख्यङ् यदेबे स्योप्प मेस्ये विश्वासने बोल्यो चीम्मेब कामने नमयू ङैप्रे-प्रे परमेश्वरजे अनुग्रहने सामेल् क्यूर ख्यङ्। 8ख्रीष्ट येशूजे प्रेमदे चीत्देबे नमयू क्वाप्रेने ङैजे गहिरो प्रेमजे तीर्सन ख्यङ्, अम्बजे साक्षी परमेश्वर ख्यङ्। 9ज्ञान मेस्ये ज्य अन्ज्य चेलाबे सेल ख्वब बुद्धिने नमयूजे प्रेम थेप् थेप् क्यूप्पीनूस्य यदेबे ङ प्रार्थना चीन्न ख्यङ्, 10येरेक्यूल्लोत्यामे नमयूदे पात्ता ज्य च ख्यङ् हम्ब स्ये खूइय, मेस्ये ख्रीष्ट रब दिनने शुद्ध मेस्ये दोष त्वब क्यूर खूस्य। 11परमेश्वरजे महिमा मेस्ये सार्याजे लागि नमयूजे जीया येशू ख्रीष्टदे फल लोस्ये पीनब सोरो ज्य स्वभावयूदे फ्यानब क्यूस्स्य।
ख्रीष्टजे लागि जीया चब
12अत-अची च्योन्यू, तम्दम्ने ङै फ्याने पर्तीरब पोयूदे चीत्देबे सूगब खबर कूम मीयूदे ङ्यीन्न प्रे-ख्यङ् यब पो नमयूदे था प्रे खूस्स्य यदेबे ङ मन्न ख्यङ्, 13#मूल स्यूस्स्यायूजे कामजे किताब 28:30ङ ख्रीष्टजे पोयू स्य्वेब क्यूत्देबे झ्यालखानने स्य्वोप्ये ख्यङ् यब पो दरबारजे सीन्त्रीयू मेस्ये सूजोयू क्वादेने था प्रेक्क ख्यङ्। 14कूम अत-अची च्योन्यू, ङ स्योप्कब पोदे प्रभुने थेप् बोल्यो क्यूत्देबे परमेश्वरजे वचन अम्फलाबे क्यमने आँटप्रे ख्यङ्। 15तम्दम्ने कोइ कोइ मीयू ठेन्देबे सूजोयूदे यली ङैदे थेप् चीत्दे यब तनने ख्रीष्टजे पोयू स्योक्क्य, तर सूजो मीयूदेब ज्य सेम्दे ख्रीष्टजे पोयू स्य्वे ख्यङ्। 16सूगब खबर तम्दम् ख्यङ् यदेबे स्य्वेजे लागि परमेश्वरदे ङैने खेर्तीबे ख्यङ् यदेबे स्येयूदे अम्ब काम प्रेमने फर्क्य। 17सूजो मीयूदे यली ङैदे थेप् चीत्दे यदेबे तन मीयूदेब ङ झ्यालखानने क्यूप्प थेप् सकस् पीनब सेम् चीत्दे, मेस्ये शुद्ध सेम्दे दी, तर अन्ज्य सेम्दे ख्रीष्टजे पो स्योक्क्य। 18चनेक्यूल्ली! पो ल ब अम्ब ख्यङ् ज्य सेम्दे चीन्नू यी अन्ज्य सेम्दे चीन्नू ख्रीष्टजे प्रचार केरेनेयली चीस्स्य, अम्ब पोने ङ सूग ख्यङ् मेस्ये, अम्बनेने ङ सूग्नीय। 19चेनेयलो नमयूजे प्रार्थना मेस्ये येशू ख्रीष्टजे आत्मादे तोङ्मीब ङैदे छुटकारा प्रेक्क्य यब पो ङैने था ख्यङ्। 20ङ केर्बेनेयली त्वा पर्तीस्ये त्वो यदेबे ङैदे केन् इच्छा मेस्ये आशा चे ख्यङ्, तर ङैदे कूम आँट प्रेक्क्य मेस्ये येतारनेप्र चूजो ङ सीली सूलीये ङैजे जीयाने ख्रीष्टजे गेसेन् क्यून्नीय। 21चेनेयलो ङैजे जीया चब ख्रीष्टजे लागि ख्यङ्, मेस्ये ङ सीबली ङैने फाइदा ख्यङ्। 22कादेये अम्ब ङ्वनेने सोम्बो क्यून्नूदेयलो ख्रीष्टजे लागि थेप् फल पीनब काम चे खूइय। होरेक्यूत्देबे ङ सोम्बो क्यून्नब ज्य ख्यङ्, यी सीबब ज्य ख्यङ् यब पो सेल्देबे य अङ्खू। 23ङ अल्मल्ने पर्तीन ख्यङ्। क्यूत्देयलो अम्ब ङ्व पोङ्यीदेबे ख्रीष्टप्रे टूङ प्रेल्लो क्यूर ख्यङ्दे, चेनेयलो ङैजे लागि अम्ब सोरो ज्य ख्यङ्, 24तर नमयूजे लागि ङ सोम्बो क्यून्नबने थेप् ज्य ख्यङ् 25नमयूजे विश्वासने थेप् बोल्यो चेने मेस्ये सेम्ने थेप् सूग्स्ये पीनने ङ सोम्बो क्यून्नीय, मेस्ये नमयू क्वाप्रेने टूनीय यब पो ङैने पक्क था ख्यङ्। 26ङ फेरि नमयू ट्याने रब ङैजे कारणदे ख्रीष्ट येशूजे महिमा नमयूदे थेप् चे खूइय। 27चनेक्यूल्लीने नमयूजे बनी ब्यवहरायू ख्रीष्टजे सूगब खबर स्य्वेब लायकजे क्यूस्स्य। ङ नमयूने तूरलीने या अन्तूरलीने आत्माने नमयू त्या क्यूत्देबे बोल्यो टून ख्यङ्, मेस्ये सेम् त्या क्यूत्देबे सूगब खबरने विश्वास चेबजे लागि नमयू थून्देबे छेम्प्रे चीन्न ख्यङ् यब पो ङ ङ्यीन्तीङ् र ख्यङ्। 28नमयूजे विरोध चेबयूप्रे चैपोनेये अम्फलाची। थमयूजे लागि अम्ब नाश क्यूप्पब च्यूनू ख्यङ्, तर नमयूजे लागि अम्ब उद्धार प्रेबजे च्यूनू ख्यङ् हम्ब मुक्ति ब परमेश्वरदे पीन्क्य। 29चेनेयलो ख्रीष्टने विश्वास चेब पोत्यामे पीने दी, तर ख्रीष्टजे लागि दु:ख भोक्ते पर्तीय यब पोये नमयूने पीने ख्यङ्, 30#मूल स्यूस्स्यायूजे कामजे किताब 16:19-40ङीनयू अम्ब लडाइँने प्रे-प्रे ख्यङ्। गीलेब सेमेयूने ङैदे लडाइँ जीङब नमयूदे तङ्दे, मेस्ये चूजोये हम्ब लडाइँनेने ख्यङ् यदेबे नमयूदे स्ये ख्यङ्।
Currently Selected:
फिलिप्पी 1: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
