गलाती 3
3
विश्वास चेब या मोशाजे नियम मन्देब
1मूर्ख गलातीयू, नमयूने सूदे होम्कदे? नमयूजे म्यादे तङ्लाबेने येशू ख्रीष्ट क्रूसने खील् ठोक्दीदेबे पील्कब पो चेलाबे स्योदे ख्य। 2अन्छूत्या ङ नमयूने ल्वेस्ये मन ख्यङ्, नमयूदे मोशाजे नियम अनुसार काम चीत्देबे पवित्र आत्मा प्रेत्दे, यी तब वचनने विश्वास चीत्देबे प्रेत्दे? 3नमयू चेने येर मूर्ख क्यूर, परमेश्वरजे आत्मा अनुसार सुरु चीत्दे, तर दीनी रङ्से ङ्वजे बोङ्ने जेम्बेमे औ? 4अन्छ्वा छरङ् नमयूदे थेन्ने चीन्न औ? पक्कने अम्बजे चत्या अर्थ क्यूर पर्तीय। 5परमेश्वरदे नमयूने पवित्र आत्मा पीन्देबे नमयूजे अन्द्रने हार्मन्देब कामयू चीत्दे। च मोशाजे नियम अनुसार काम फर्कब या नमयूदे तब वचनने विश्वास चीक्कबदे ङूदे अम्ब चीम्मीक औ?
6 #
उत्पत्ति 15:6; रोमी 4:3 अब्राहामने ले, “ङूदे परमेश्वरने विश्वास चेख्य, मेस्ये अम्बदे ङू धर्मी ठर्दीदे।” 7#रोमी 4:16येरेक्यूत्देबे सू-सूदे परमेश्वरने विश्वास चीक्क्य थमयूने अब्राहामजे छगूम्-पूर्गूम् क्यूक्क्य यदेबे नमयूदे स्ये पर्तीय। 8#उत्पत्ति 12:3यहूदी तेब मीयूदे परमेश्वरने विश्वास चीत्देबे परमेश्वरदे थमयूने धर्मी ठर्दीमीय यदेबे धर्मशास्त्रने खूम्मेस्येने लिख्दीये ख्य, होरेक्यूत्देबे अब्राहामने अम्ब सूगब खबर मीयूङ्ने येर्बे स्य्वेत्दे, “नेप्रे क्यूत्देबे साप्ता जातजे मीयूदे असी प्रेक्क्य।” 9अब्राहामदे परमेश्वरने विश्वास चीत्देबे असी प्रेप्रने परमेश्वरने विश्वास चेब मीयूदेये असी प्रेक्क्य।
10 #
व्यवस्था 27:26
मोशाजे नियम फ्याने भर् पर्देबयू क्वादेने श्राप प्रेक्क्य, चेनेयलो धर्मशास्त्रने येर्बे लिख्दीये ख्यङ्, “मोशाजे नियमजे किताबने लिख्दीयेब साप्ता पो अनुसार अन्टोङब मेस्ये हम्ब अम्मन्देब क्वादेने श्राप प्रेक्क्य।” 11#हबकूक 2:4परमेश्वरजे खूम्ने मोशाजे नियमदे सू मीनेये धर्मी अन्ठर्दी यब पो क्वादेने तङ ख्यङ्। चेनेयलो “धर्मी मीब परमेश्वरने विश्वास चीत्देने जीया चैय।” 12#लेवी 18:5मोशाजे नियमब विश्वास फ्याने भर् अम्पर्ती, बरू “कम्ब मीदे मोशाजे नियम अनुसार काम चीक्क्य, हम्बदेने ङू जीया चैय। 13#व्यवस्था 21:23ङीनदे प्रे पर्देब श्राप ख्रीष्टदे प्लेत्दे मेस्ये मोशाजे नियम अनुसार प्रे पर्तेब श्रापदे ङीनने छूर्दीमीदे, चेनेयलो “तोङ्बोने पीलब क्वाने श्राप प्रेब क्यूक्क्य” यदेबे धर्मशास्त्रने लिख्दीये ख्यङ्। 14अब्राहामने पीनेब असी ख्रीष्ट येशूने क्यूत्देबे यहूदी तेब मीयूदे प्रेस्स्य, होर्दे परमेश्वरने विश्वास चीत्देबे कबुल चीतेब पवित्र आत्मा ङीनदे प्रेखूस्य यदेबे ङूदे ङीनने लू फादेबे छूर्तीमीदे।
मोशाजे नियम मेस्ये कबुल
15अत-अची च्योन्यू, ङीनजे दिन-दिनजे जीयाने क्यून्नब नमूना त्या लेदे, त्याफे पक्क चीत्देबे लिख्दीयेब तमसूक सूदेये अन्ची यदेबे यअङ्खू, मेस्ये हम्बने चैत्याये अदल-बदल चे अङ्खू। 16अब्राहाम मेस्ये ङूजे छगूम्-पूर्गूम्ने कबुलयू पीने ख्य। धर्मशास्त्रदे “छगूम्-पूर्गूम्यूने” अन्-य, अम्बदे कूम मीयू यब अर्थ लादीय। तर धर्मशास्त्रदे “नैजे छगूम्-पूर्गूम्ने” यीय, अम्बदे मी तीत्या यब अर्थ लादीय, हम्ब ख्रीष्ट ख्यङ्। 17#प्रस्थान 12:40ङैदे यमेब अर्थ अम्ब ख्यङ्, यी सैस्यी सूम्च्यू वर्ष ङ्येदे रब मोशाजे नियमदे हम्बयली खूम परमेश्वरदे पक्क चीतेब कबुलने चस्ये त्वो, नत्रलो कबुल खारेज क्यूप्प ख्यङ्दे। 18#रोमी 4:14परमेश्वरदे पीन्क्य यब हक मोशाजे नियम मन्दीदे प्रेक्क्य यलो हम्ब कबुलने दी। तर अम्ब परमेश्वरदे कबुल चीत्देबे अब्राहामने पीन्क ख्यङ्।
19होरेयलो मोशाजे नियम चेने चैदे? कम्ब छगूम्-पूर्गूम्प्रे कबुल चे ख्य, ङू अन्-रदासेमे मीयूजे पाप चेब बानीने नेने-येनने मोशाजे नियम थप्दीदे। होर्दे पो मील्लेब त्यादे स्वर्गदूतयूट्यादे मोशाजे नियमजे छ्यप् रेत्दे। 20पो मील्लेब मीजे लागि दल ङ्हीजे मी चैतीय, तर परमेश्वर तीत्यात्या ख्यङ्।
21होरेयलो मोशाजे नियम परमेश्वरजे कबुलयूजे विरुद्धने ख्य औ? अँह तेने-दी। कादेये जीया पीन ख्वब मोशाजे नियम पीन यलो, तम्दम्ने मोशाजे नियमदेने मीयू धर्मी ठर्ते ख्यङ्दे।
22तर येशू ख्रीष्टने विश्वास चेब मीयूजे विश्वासदेने कबुल चेब असी प्रेस्स्य यदेबे धर्मशास्त्रदे साप्ता कूरूने पापजे खोने स्योप्ये ख्यङ्।
23तर येशू ख्रीष्टने विश्वास चेयली खूम् ङीन मोशाजे नियम नङ्ने स्योप्ये ख्य, मेस्ये विश्वास अन्चीत्दासेमे ङीन मोशाजे नियमदे ख्याये ख्य। 24विश्वास चीत्देबे धर्मी ठर्दीस्य यदेबे ख्रीष्टसेमे स्योलब जिम्मा मोशाजे नियमने पीने ख्य।
25तर जेम्से येशू ख्रीष्टने विश्वास चेब क्यूत्देबे ङीन मोशाजे नियमजे नङ्ने टून अम्पर्दी।
परमेश्वरजे छगूम्-पूर्गूम्
26चेनेयलो येशू ख्रीष्टने विश्वास चेब क्यूत्देबे नमयू क्वाने परमेश्वरजे छगूम्-पूर्गूम् क्यूर ख्यङ्। 27चेनेयलो नमयू नङ्ने सू-सूदे ख्रीष्टजे मीन्ने बप्तिस्मा कीन्दे, नमयू क्वाने ख्रीष्टप्रने क्यूर ख्यङ्। 28जेम्से यहूदी, ग्रीक, त्वो-त्वोम, स्वतन्त्र, पती मेस्ये मदी सूनेयली नमयू क्वाने ख्रीष्ट येशूने त्या क्यूर ख्यङ्। 29#रोमी 4:13नमयू ख्रीष्टने त्या क्यूर ख्यङ्लो नमयू अब्राहामजे छगूम्-पूर्गूम् ख्यङ्, मेस्ये परमेश्वरदे चेब कबुल अनुसार हकप्रेबयू ख्यङ्।
Currently Selected:
गलाती 3: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
