एफिसी 2
2
ङीङ् मेस्ये सर् जीया
1 #
कलस्सी 2:13
नमयू रङ्सेजे अपराध मेस्ये पापयूजे कारणदे आत्माने सीयेब बीलने येशूदे नमयूने सोम्बो चीत्दे। 2हम्ब बीलने नमयू संसारने पाप चीत्देबे प्रख्य। नमयूदे मूजे शक्तिने नोबो मन्देख्य। परमेश्वरने अम्मन्देब मीयूने ङूदे दीनी रङ्सेजे काबुने ये ख्यङ्। 3ङीनये त्याफे थमयूदे चेप्र चे ख्य, ङीनजे ङ्वदे च चीत्तीङ् रीको सेम्जे इच्छा पूरा चीत्देबे रङ्सेजे पापी स्वभावने प्रख्य, मेस्ये सूजो लम ख्यब मीयूप्रने ङीनजे स्वभावदेने छी चेब छगूम्-पूर्गूम् यदेबे य ख्य। 4तर परमेश्वर, बेस्से कृपा चेब ख्यङ्, ङूदे रङ्सेजे बेस्से केन् प्रेम चीत्देबे ङीनने ङ्येम्दे, 5येरेक्यूत्देबे पापने ङी सीइलीने ङूदे ङीनने ख्रीष्टप्रे सूला चीत्दे, परमेश्वरजे अनुग्रहदेने नमयूदे उद्धार प्रेख्यङ्। 6मेस्ये ङूप्रेने ङीननेये लङ्दे, होर्दे स्वर्गजे नेयूने ख्रीष्ट येशूप्रे टूङ्सेपीन्दे। 7अम्बब नङ्गजे जूग्यूने ङूजे अनुग्रह मेस्ये दयाजे बेस्से कूम सम्पत्ति ख्रीष्ट येशूने क्यूत्देबे ङीनने तम्मेने ख्यङ्। 8परमेश्वरजे अनुग्रहदेने नमयूदे विश्वास चीत्देबे उद्धार प्रे ख्यङ्। मेस्ये अम्ब नमयू रङ्सेदेने धम चीत्देबे दी, अम्ब परमेश्वरदे पीनब बर ख्यङ्- 9ज्य कामयू चीत्देबे दी, नत्रलो मीदे केन् त्वोक्क्य। 10ङीन ज्य कामजे लागि ख्रीष्ट येशूने क्यूत्देबे बन्दीयेब ङूजे लाजे सीप ख्यङ्। ङीन हम्ब अनुसार प्रस्य यब कारणदे परमेश्वरदे खूम्देमेस्येने हम्ब तयार चीदे ख्य।
ख्रीष्ट येशूने ङीन क्वाने त्या ख्यङ्
11येरेक्यूत्देबे याद ची, खूम् नमयू ङ्व अनुसार यहूदी तेब ख्यङ्ब ङ्वने लादे खतना चीदेब मीयूदे नमयूने खतना अन्चेब मन्न ख्य। 12होस् ची, हम्ब बीलने नमयू ख्रीष्ट ट्यादे आलाक् ख्य। नमयू परमेश्वरजे सेलब जात इस्राएलप्रे सम्बन्धने त्वब फीदेशजे मीप्र ख्य। परमेश्वरदे बन्दीयेब कबुलजे बाचायूने नमयूजे चैत्याये हक त्व ख्य होर्दे संसारने नमयू आशा त्वब मेस्ये परमेश्वरने अन्स्येब ख्य। 13तर नमयू, सू हम्ब बीलने ख्रीष्ट येशूट्यादे चीन्तङ् ख्य, जेम्से ख्रीष्टजे कादे ट्याने क्यूर ख्यङ्।
14चेनेयलो ङीनने शान्ति पीनब ख्रीष्ट ख्यङ्। ङूदे यहूदी प्रे यहूदी तेब ङ्हीनेने त्या चीम्मे ख्यङ्, मेस्ये फुट् रेब शत्रुजे पङ्री हूल्बीक ख्यङ्। 15#कलस्सी 2:14मेस्ये ङूदे मोशाजे नियमने मेस्ये हम्बजे आज्ञायू मेस्ये धर्मजे-छ्याप्यूप्रेने रङ्से ङ्वने खारेज चीत्दे, यी अम्ब यहूदीप्रे यहूदी तेब ङ्हीजे सट्टने ङू रङ्सेने क्यूत्देबे मी सर् त्या क्यूस्स्य, मेस्ये येर्बे शान्ति क्यूस्स्य। 16#कलस्सी 1:20शत्रुने नाश चेने मेस्ये परमेश्वरप्रे यहूदी मेस्ये यहूदी तेब ङ्हीनेने मिलाप चीत्देबे जात त्या बन्देने ख्रीष्ट येशू क्रूसने बलि क्यूत्दे। 17#यशैया 57:19ख्रीष्टदे रदेबे न चीन्तङ् क्यूरेब मेस्ये ट्याने ख्यब मीयूने मिलापजे सूगब खबर स्य्वेत्दे। 18चेनेयलो ङूदे चीत्देबे ङीन यहूदी मेस्ये यहूदी तेब ङ्हीदेने पवित्र आत्माजे बोङ् प्रेत्देबे प परमेश्वर ट्याने प्र-प्रेब क्यूर ख्य।
19येर्बे जेम्से नमयू फीदेश मेस्ये रङ्से देश अन्स्येब मी दी, तर परमेश्वरजे पवित्र मीयूप्रे नमयूये त्याप्र नागरिक मेस्ये परमेश्वरजे कीम्-म्हीती क्यूर ख्यङ्। 20हम्ब कीम्-म्हीतीब मूल स्यूस्स्यायू मेस्ये अगमवक्तायूजे जा-फ्याने चोदेबे बन्दे ख्यङ्, मेस्ये मूख्य सूर्-लूङ्ब ख्रीष्ट येशू रङ्सेने ख्यङ्। 21पूरा कीम् ङूने क्यूत्देबे चेलाबे नेत्याने थूदेबे प्रभुने पवित्र मन्दिर त्या क्यूरने ठोङ्बीय। 22होर्दे पवित्र आत्माने परमेश्वरजे टूङब कीम् क्यूरने नमयूये ङूने क्यूत्देबे क्वाप्रे-प्रेने बन्दीकीय।
Currently Selected:
एफिसी 2: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
