कलस्सी 2
2
1नमयू मेस्ये लाउडिकियाने ख्यबयू होर्दे ङैजे त्वाने अन्तङबयू क्वाजे लागि केरे ङैदे सोरो बोङ्बे छेम्प्रे चीत्दे यब पो नमयूदे था प्रेस्स्य मन्न ख्यङ्, 2थमयूदे आँट प्रेस्स्य मेस्ये प्रेमने त्या क्यूत्देबे थून्नूस्य यदेबे ङैदे येरे चे ख्यङ्, होरे क्यूप्प थमयूदे चेलाबे क्व ख्वब ज्ञानजे सम्पत्ति प्रेक्क्य होर्दे परमेश्वरजे क्व अङ्ख्वब नङ्सू योजना या ख्रीष्टने पूरा स्ये ख्वब क्यूक्क्य। 3परमेश्वरजे ज्ञान मेस्ये बुद्धिजे सम्पत्ति क्वाने ख्रीष्टप्रे फूये ख्यङ्। 4मीयूदे लूच्च पोयूने तम्दम्प्र चीत्देबे नमयूने होम्देबे अन्कूपस्य यदेबे ङ अम्ब पो यीय। 5चेनेयलो नमयूप्रे ङैजे ङ्व चीन्तङ् ख्यङ्लीने ङैजे आत्माब नमयूप्रेने ख्यङ्, नमयू क्वाने थून्देबे टूनब मेस्ये नमयूदे ख्रीष्टने चेब विश्वास सोरो बोल्यो क्यून्नब पो तदेबे ङ सूग ख्यङ्।
ख्रीष्टप्रेजे पूरा जीया
6होरेक्यूत्देबे येशू ख्रीष्टने नमयूदे केर्बे प्रभु यदेबे ग्रहण चीत्दे, होर्बेने नमयू ङूप्रे जीया च। 7नमयूने लोम्येब पो अनुसार येशूने चेलाबे छ-च्वोदेबे ङू-फ्याने रङ्सेजे जीया चब क्यूरो। होर्दे विश्वासने सोरो बोल्यो क्यूत्देबे कलङ्नेयली ङूने धन्यवाद पीन्नब क्यूरो।
8नमयू चङ्ख क्यूत्देबे टूङ्, नत्रलो मीयूजे ज्ञान बुद्धि मेस्ये चैये अर्थ त्वब लूच्च पोदे नमयू होम्कने। येर पोयू ख्रीष्टजे दी, तर मीयूदे चेब पेयूदे मेस्ये संसारजे शिक्षायूदे रब ख्यङ्।
9चेनेयलो परमेश्वरने ख्यब गुणयू क्वाने ख्रीष्टजे ङ्वने टून ख्यङ्। 10ख्रीष्टने नमयूजे जीया चेलाबे पूरा क्यूट्ट ख्यङ्। साप्ता हुकुम मेस्ये हक चील्लेबयू नङ्ने पात्ता केन् ङू ख्यङ्। 11ख्रीष्टने विश्वास चे ङ्येदे नमयूजे पाप स्वभाव ख्यब ङ्वने ख्रीष्टदे खतना चीप्पे ख्यङ्। मीजे लादे चेब खतनादे दी, तर ख्रीष्टने नमयूजे खतना क्यूक्क ख्यङ्। 12#रोमी 6:4बप्तिस्मा क्यूप्प नमयूजे पापजे स्वभावयू ख्रीष्टप्रेने पोप्पीक ख्य। सीयेङ्येदे ख्रीष्टने सोम्बो चीम्मेब परमेश्वरजे शक्तिने नमयूदे विश्वास चीत्देबे अम्ब बप्तिस्माने नमयूये ख्रीष्टप्रेने सोम्बो चीम्मीदे।
13 #
एफिसी 2:1-5
नमयूजे पापदे मेस्ये ङ्वने खतना अन्चीत्देबे नमयूजे आत्मा सीये ख्य। तर परमेश्वरदे ङीनजे पापयू क्वाने क्षमा पीन्देबे ख्रीष्टप्रेने सोम्बो चीम्मीदे। 14#एफिसी 2:15ङीनजे विरुद्धने लिख्दीयेब तमसूक, मेस्ये हम्बने ख्यब साप्ता नियम-कानूनजे हकयूने ङूदे क्रूसने खील् ठोक्दीदेबे खारेज चीक्क ख्यङ्। 15ङूदे हुकुम चील्लेबयू मेस्ये शक्तियूने लास्या त्वब चीप्पीदे। हम्बयू फ्याने ट्यादे, मेस्ये क्वादेने तङ्लाबे हम्बयूने तमासा चीप्पीदे।
16 #
रोमी 14:1-6
होरेक्यूत्देबे च-थूङ या दीन्बरने मेस्ये औंसी या आराम टूङब दिन मन्देब पोने सूदेये नमयूने गल् अन्चीस्स्य। 17अम्बब ङ्येदे क्यूट्टब पोजे छायाप्रत्या ख्यङ्। तर हम्ब छायाजे तम्दम् च्यूनूब ख्रीष्ट ख्यङ्। 18रङ्सेजे ङ्वने सकस् पीनब पोनेत्या ट्यादेबे, स्वर्गदूतने पूस्तीस्ये पीन्देबे, रङ्सेजे ज्ञानदे तङब पोनेत्या क्यूत्देबे, रङ्सेजे सेम्दे च चीतीङ्र हम्ब पोने केन् त्वोत्देबे प्रब सूमीदेये नमयूजे प्रेपर्तेब इनाम मल्बेब काम चे अङ्खूस्य। 19#एफिसी 4:16येरमीयू ख्रीष्ट या टप्रे अन्थूनूलाबे आलाक् क्यूत्देबे टूङ ख्यङ्। ख्रीष्टजे पोस् प्रेत्देबे जोर्न्या मेस्ये छयू ङ्वत्या चेने थूनीय, मेस्ये हम्ब ङ्व टक्कने परमेश्वरजे इच्छा अनुसार ठोङ्बीय।
20नमयूब ख्रीष्टप्रे सीइदेबे अम्ब संसारजे आत्माजे शक्तियूदे छुट्कारा प्रे ख्यङ्। चेने अम्ब संसारजे मीयूप्र क्यूत्देबे जीया च?, चेने हम्ब नियमयू मन्दे? 21हम्ब नियमयूब “अन्चूङ्लाची, अम्-म्यङ्लाची, अन्छूल्लाची?” 22अम्ब साप्ता नियमयू चील्लीकीबने नाश क्यूप्पीय। अम्ब क्वाने मीयूजे आज्ञा मेस्ये शिक्षायूनेत्या भर् पर्तीय। 23धर्मजे मीन्ने रङ्सेने सकस् पीन्देबे ईश्वरने पूस्ते, रङ्सेनेब चीद चेब होर्दे रङ्से ङ्वने सकस् पीनब पोयूब बुद्धिजे पोयूप्र तङ्क्य, तर ङ्वजे अन्ज्य इच्छायू कबूने येनने अम्ब पोयू चैकम्ते ख्यङ्।
Currently Selected:
कलस्सी 2: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
