मूल स्यूस्स्यायूजे कामजे किताब 28
28
पावल माल्टाने
1येर्बे ङी चेलाबे समुद्र नने फ्योये मेस्ये हम्ब टापूजे मीन् माल्टा टूङ् यब पो ङीदे था प्रेत्दे। 2हैयाने टूङब मीयूदे ङीने सोरो कूम दया चीत्दे। झीरी रदेबे खङ्ब थमयूदे मी नैम्मीदे मेस्ये ङीयू खोत्तानेने स्वागत चीत्दे। 3पावलदे पेन् त्या स्यङ् फूङ् पूत्देबे मीने होम्बीदे। प्ल्याङ्नब मीजे रप्दे चीप्प र्वे त्या योङ्रदेबे ङूजे लाने बेर्दीरदे। 4होने टूङब मीयूदे ङूजे लाने र्वे बेर्दीयेब तङ्देबे त्यादेत्याने य मेदे, “अम्ब मी पक्कने मीसेब मीने क्यूर पर्दीय। अम्ब समुद्रदे बच्दीदे योङ्रदे तर इन्साफदे अम्ब प्लीम्ब अन्खू।” 5तर पावलदेब हम्ब र्वे मीने फ्रूप्पीदे, मेस्ये ङूने चैत्याये हानी चे अम्प्रे। 6तर ङूजे ङ्व स्यङ्बीय, या ङू त्याफेने ग्यर्देबे सीबीय यदेबे थमयूदे रेन्दे। तर कूम सेमे लेल्लीने ङूने चैत्याये अन्क्यूरेब तङ्देबे थमयू रङ्सेजे सेम् नङ्जे पो सूजो चीत्देबे यदे, “अम्ब ब देवताम टूङ्।”
7हम्ब टापूजे पब्लियस मीन् ख्यब मूखियाजे स-क्यू हम्ब नट्याने ख्य। ङूदे ङीने स्वागत चीत्दे, मेस्ये सोम्-म्यासेमे ङूजे कीम्ने ङीने टूङ्से पीन्देबे ङीजे सेवा चीत्दे। 8पब्लियसजे प खङ्सीङ् प्रे हर्स क्यूत्देबे नेन ख्य। पावलब ङूने लेने गीलीदे, होर्दे ङूजे लागि प्रार्थना चीत्देबे ङूजे ला ङूफ्याने येत्देबे ङूने तम् चीम्मीदे। 9अम्ब घटना क्यूर ङ्येदे, हम्ब नेजे सूजो नवयूये रदे, मेस्ये तम् चीम्मीदे। 10थमयूदे ङीने कूम तर्तीप्दे ङीने गेसेन् चीत्दे। कन्छ्वाब ङी क्यू-जहाजने टदे, थमयूदे ङीने चैतेब जती सेयू जहाजने चङ्मीदे।
रोमने पावल
11ल सोम्-ङ्येदे ङी अलेक्जेन्ड्रियाजे क्यू-जहाजने टदे। अम्ब जहाज सर्कदे अम्ब टापूने ख्य। क्यू-जहाजजे खूम्तेलेजे नेने जूम्ल्या देवताजे मूर्ति खोप्तीये ख्य। 12सुराकुसाईने फ्योइदेबे ङी हैयाने सोम्म्या टूङ्दे। 13हैयादे न-न गीलीदेबे ङी रेगीयन यब सहरने फ्योरदे। तीयाङ्येदे दक्षिणदे उन्दू चील्लीदे, मेस्ये नैदेरेदे ङी पटीओलीने फ्योरदे। 14हैयाने ङीदे अत-च्योन्यूने तूदे, मेस्ये थमयूदे ङीने ङ्यीर्यासेमे थमयूप्रेप्रे टूङ् यदेबे बिन्ती चीत्दे। येर्बे ङी रोमने फ्योरदे। 15हैयादे ङी रीय यब खबर तदेबे अत-च्योन्यू ङीने त्वने अप्पियसजे बजारने मेस्ये तीन-पाटी यब नेने र ख्य। थमयूने तङ्देबे पावलदे परमेश्वरने धन्यवाद यदे, मेस्ये आँट प्रेत्दे। 16कन्छ्वाब ङी रोमने क्योइदे, हन्छ्वाब पावलने सिपाई त्याजे रेख्देख्ने त्याने टूङब मौका प्रेत्दे।
रोमने पावलजे प्रचार
17सोम्म्या ङ्येदे पावलदे यहूदीयूजे तजे अगुवायूने कोबीदे। थमयू फूङ् क्यूरमेस्ये ङूदे थमयूने यदे, “च्योन्यू, ङैदे रङ्से देशजे मीयू, मेस्ये मेमेजे छ्याप्जे विरुद्धने ङैदे चै कामये अन्चीक्कलीने यहूदी अत-च्योन्यूदे ङैने यरूशलेमने चूङ्देबे रोमजे मीयूजे जिम्माने सूम्दीबे ख्यङ्। 18थमयूदे केरकार चे चेनमेस्ये ङैने सेने पर्देब चै कारणये अम्प्रेत्देबे ङैने क्याबेब सेम् चीत्दे। 19#मूल स्यूस्स्यायूजे कामजे किताब 25:11तर यहूदीयूदे विरोध चीत्देबे कैसर ट्याने बिन्ती चेब ङैने कर्ने लादीदे-ङैजे रङ्से मीयूजे विरुद्धने दोष लैदे पर्देब पो चैये त्वो। 20अम्ब कारणदे ङैदे नमयूप्रे तूदेबे बात् सेने नमयूने क्व ख्यङ्। ङी इस्राएलजे मीयूदे आशा चेब ख्रीष्टजे लागि ङ येर्बे सङ्लोदे ख्याये ख्यङ्।”
21थमयूदे ङूने यदे, “ङीदे नैजे बारेने यहूदियाजे चिट्ठी चैत्याये अम्प्रे। कोइ च्योन्यूदे रदेबे नैजे विरुद्धने अन्ज्य पो चैत्याये अन्स्य्वे या अन्क्यम्। 22तर नैजे विचार च ख्यङ्, अम्ब नदेने स्योल्लो क्यूर ख्यङ्दे। चेनेयलो अम्ब हुलजे बारेने ङीने अन्छूत्या था ख्यङ्, यी केनेनेयली मीयूदे अम्बजे विरुद्धनेत्या क्यम्न ख्यङ्।”
23होर्दे थमयूदे पावलजे लागि दिन त्या तोक्तीदे, मेस्ये कूम मीयू ङूजे बास टूङब नेने रदे। ङूदे थमयूने नप्देमेस्ये नूस्यूङ्सेमे परमेश्वरजे राज्यजे बारेने शिक्षा पीन्दे। मोशाजे नियम मेस्ये अगमवक्तायूदे लिख्दीयेब किताबदे परमेश्वरजे राज्यजे गवाही पीन्दे, होर्दे ङूदे येशूजे बारेने थमयूने पक्क चेने बोङ् चीत्दे। 24ङूदे यब पो कोइदे कोदेबे विश्वास चीत्दे, कोइदे अन्ची। 25थमयू त्यात्याप्रे अम्मील्ले क्यूत्देबे प्र मेल्नूब पावलदे अम्ब आखिरीजे पो यदे, “यशैया अगमवक्ताप्रे क्यूत्देबे पवित्र आत्मादे नमयूजे मेमेने यब पो तम्दम् ख्यङ्,
26 #
यशैया 6:9,10 ‘अम्ब मीयू ट्याने प्रदेबे य, “ङ्यीनब नमयू ङ्यीन्क्य, तर कलङ्बेये अङ्को,
लेब लेक्क्य, तर कलङ्बेये अन्तङ्।”
27चेनेयलो अम्ब मीयूजे सेम् बोदो क्यूरे ख्यङ्, मेस्ये थमयूजे न नाक्तूङ् क्यूरे ख्यङ्, मेस्ये थमयूदे रङ्से म्या च्यूम् चे ख्यङ्, नत्र थमयूजे म्यादे तङ ख्यङ्दे, नदे त ख्यङ्दे, सेम्दे क्व ख्यङ्दे, मेस्ये ल्वार ख्यङ्दे, मेस्ये ङैदे थमयूने तम् चीम्मे ख्यङ्दे।’
28“होरेक्यूत्देबे नमयूने था क्यूस्स्य, परमेश्वरजे अम्ब मुक्ति यहूदी तेब मीयूजे लागि कूल्बे ख्यङ्, मेस्ये थमयूदे ङ्यीन्क्य।” 29[होर्दे ङूदे अम्ब वचन यमेस्ये, यहूदीयू त्यात्याप्रे बेस्से सवाल-जवाफ चीत्देबे गीलीदे।]#२८:२९ मीयूङ्जे कोइ कोइ ग्रीक पाण्डूलिपीयूने अम्ब पद अन्लीख्दीये ख्यङ्।
30पावल वर्ष ङ्हीसेमे रङ्सेजे खर्चदे रोमने टूङ्दे, मेस्ये ङूट्याने रबयू खोत्तानेने ङूदे स्वागत चीत्दे। 31ङूदे खूल्ला रूप्ने मेस्ये चै बाधाये अन्क्यूल्लाबे परमेश्वरजे राज्यजे प्रचार चे ख्य, मेस्ये प्रभु येशू ख्रीष्टजे बारेने शिक्षा पीन ख्य।
Currently Selected:
मूल स्यूस्स्यायूजे कामजे किताब 28: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
