मूल स्यूस्स्यायूजे कामजे किताब 24
24
हाकिम केन् फेलिक्सजे खूम्ने पावल
1ङर्याङ्येदे पात्ता केन्ब पूस्र्या हननिया मेस्ये कोलाप्र धर्म गुरुयू, तर्तुल्लस यब न्याय चेब मी त्याप्रे हैयाने रदे, मेस्ये थमयूदे पावलजे विरुद्ध हाकिमजे खूम्दे मुद्दा उजूर चीत्दे। 2पावल हैयाने योनमेस्ये तर्तुल्लसदे ङूने येरे यदेबे दोष लैदीदे, “खोत्तादेने सोरो मन्देब फेलिक्स, नदे ङीने सोरो ज्य शन्ति चीम्मीदे, मेस्ये नदे अम्ब जातजे लागि ज्य सूसाल्तेब कामयू सुरु चे-ख्यङ्। 3का-मुलुकने अम्ब पोने ङीदे येतार्ने मन्दीय मेस्ये नने धन्यावाद पीन्क्य। 4तर नैजे कूम सेमे अन्स्य ङीजे बिन्ती ठून्यात्यानेये दया चीत्देबे ङ्यीम्मी। 5“चेनेयलो ङीदे अम्ब मीने केनेनेयली छरङ् पीनब, संसारभरीजे यहूदीयूजे अन्द्रने हुलदङ्गा मच्देब, मेस्ये नासरी यब हुलजे मूख्य अगुवाजे रूप्ने त्व ख्यङ्। 6ङूदे मन्दिर अपवित्र चेने बोङ् चे ख्य, तर ङूने ङीदे चूङ्दे। ङीदे मोशाजे नियम अनुसार न्याय चे ख्यङ्दे, 7तर सिपाईजे पात्ता केने मी लुसियस ङीट्याने रदेबे सोरो जबरजस्तीबे पावलने ङीजे लादे लेन्देबे कूतीदे, मेस्ये अम्बजे विरुद्धने दोष लैतेब मीयूने नैट्याने रब आज्ञा पीन्दे। 8जेम्से न रङ्सेदेने अम्बजे जाँच चील्लो ङीदे ङूने लैदेब दोषजे अम्ब पो क्वाने ङूदेने स्योत्देबे नदे था प्रे खूइय।”
9हम्ब यहूदीयूदेये हम्ब पोयू क्वाने ठीक ख्यङ् यदेबे यदे।
10हाकिम केन्दे ङूने पो क्यम् यदेबे लतप् चेमेस्ये पावलदे जवाफ पीन्दे, “कूम वर्षमेस्ये न यहूदी जातिजे न्याय चेब मी क्यूरब पो था क्यूत्देबे ङ रङ्से पक्षने सूग्देबे क्यम्क्य। 11नदे पत्त लैते खूइय ङ यरूशलेमने परमेश्वर पूस्तेने गीलेब बाह्र दिनयली थेप् अन्क्यूर ख्यङ्। 12थमयूदे सूमीप्रेये ङ सवाल-जवाफ चीन्नब अन्त्व ख्यङ्, मन्दिरने या सभा-कीम्ने या सहरने जनतायूने लङ्देबे हुलदङ्गा चीन्नबये अन्त्व ख्यङ्, 13सूजोब मोने प्रेनूस्य थमयूदे ङैने दोष लैदेब गवाहीये थमयूप्रे त्वो। 14तर अम्ब पोये ङ यीय, कम्ब मुक्तिप्रेब लम्ने थमयूदे लूच्च यीय, हम्ब लम्ने प्रदेबे ङ ङीनजे मेमेजे परमेश्वरने पूस्तीय। होर्नेयली मोशाजे नियमने ख्यब पो मेस्ये अगमवक्तायूदे लिख्दीयेब धर्मशास्त्रजे पो क्वाने ङ विश्वास चीक्क्य। 15ङैदे थमयूदेप्र धर्मी मेस्ये धर्म त्वब थर् ङ्ही मीयू क्वाने सीबमेस्ये फेरि लङ्क्य यदेबे परमेश्वरने ङैदे आशा चे ख्यङ्। 16होरेक्यूत्देबे परमेश्वरप्रे मेस्ये मीयूप्रे ङ येतार्ने शुद्ध विवेक येने बोङ् चीक्क्य। 17#मूल स्यूस्स्यायूजे कामजे किताब 21:17-28“कूम वर्ष गीलेङ्येदे ङ रङ्से यहूदी अत-च्योनयूने दानयू पीनने मेस्ये परमेश्वरने बलि चेर्तेस्ये यदेबे यरूशलेमने र ख्य। 18थमयूदे ङैने मन्दिरने तूब शुद्ध क्यूरब पेकये ङैदे पूरा चीक्क ख्य। हैयाने चूक्लीत्या हुलये त्व ख्य, पाराये अम्पून्नू तर हैयाने एशियाजे कोइ कोइ यहूदीयू ख्य, 19थमयू यैयाने नैजे खूम्ने मेर्रपर्ते ख्य। ङैजे विरुद्धने य पर्देब पो ख्यङ्लो थमयूदे दोष लैदे ख्व ख्यङ्दे। 20या पात्ता केन् सभाजे खूम्ने ख्यङ्ब ङैजे नोकोस् च प्रेख्य चूजो अम्ब मीयू रङ्सेदेने यैयाने यस्ये। 21#मूल स्यूस्स्यायूजे कामजे किताब 23:6पोब च यलो, अम्ब तीत्यात्यामे ख्यङ्, हम्ब ङैदे थमयूजे अन्द्रने मेर्देबे हूत्दे पारा पूत्देबे येक ख्य, ‘सीयेबदे फेरि सोम्बो क्यूक्क्य यब पोजे बारेने दीनी नमयूजे खूम्ने ङैजे मुद्दा चील्लीन ख्यङ्’।’’
22अम्ब शिक्षाजे बारेने फेलिक्सने साप्ताजे ज्ञान ख्यबदे ङूदे अम्ब पोयू तमेस्ये थमयूने येरे यदेबे टर्दीदे कूल्बीदे, “सिपाईजे पात्ता केन् मी लुसियस अने रमेस्ये ङैदे नमयूजे मुद्दा फैसला चीम्मीय।” 23होर्दे ङूदे पावलने सिपाईदे सुरक्षा ची मेस्ये छीत्या ङूजे रङ्से सूर्ये चीस्स्येपीन्, तर ङूजे हर्जोजे पो पूरा चेने अन्-कालाची यदेबे कप्तानने आज्ञा पीन्दे।
24ते-दिनङ्येदे फेलिक्स ङूजे यहूदी मज द्रुसिल्लाने प्रेटेल्देबे रदे, मेस्ये ङूदे पावलने कोदेबे ख्रीष्ट येशू फ्याने चेब विश्वासजे बारेने ङूदे क्यमब पोयू सेम् पीन्देबे ङ्यीन्दे। 25पावलदे धार्मिकता, सैदेख्वब, मेस्ये ङ्येदे क्यूरब न्यायजे बारेने सवाल-जवाफ चीप्प फेलिक्स आतीकदे, मेस्ये येर्बे यदे, “चूजोब प्र, मौका पर्देब बीलने ङैदे नने क्वस्ये।” 26कादेये पावलदे नोर् पीन्की यब आशाये चे ख्य। अम्ब कारणदेये फेलिक्सदे ङूने घरी-घरी कोदेबे बात् चे ख्य।
27तर वर्ष ङ्ही ङ्येदे फेलिक्सजे सट्टने पर्किअस फेस्तस रदे, होर्दे फेलिक्सदे यहूदीयूने सूग्लाबे चेजे लागि पावलने झ्यालखाननेने हीत्देबे गीलीदे।
Currently Selected:
मूल स्यूस्स्यायूजे कामजे किताब 24: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
