२ कोरिन्थी 10
10
पावलजे सेवा
1ङ पावल, नमयूजे खूम्ने क्यूप्प सोरो चीद क्यूक्क्य, तर चीन्तङ् क्यूप्प नमयूजे लागि सेम्ने आँट रीय। ख्रीष्टने ख्यब चीद क्यूरब मेस्ये ङ्येमब सेम्दे ङ नमयूने बिन्ती चीक्क्य। 2ङीयू संसारजे तर्तीप्दे काम चीक्क्य यदेबे शङ्का चेबयू नमयूजे अन्द्रने ख्यङ्। ङ नमयू ट्याने रब होरयूने फ्राचे अम्पर्तीस्य यदेबे ङ नमयूने बिन्ती चीक्क्य। 3तम्दम्ने ङी अम्ब संसारने जीया चेन ख्यङ्, होरेक्यूल्लीने संसारजे मीयूदेप्र ङी च्य-जीङ अन्ची। 4चेनेयलो ङीनदे चील्लेब लास्यायू अम्ब संसारजेप्र दी, तर दुष्टदे बोल्यो चीत्देबे थ्यायेब पङ्रीयू हूल्बे ख्वब परमेश्वरजे शक्ति ङीनने ख्यङ्। 5परमेश्वरजे ज्ञानजे विरुद्ध लङब च्य-फा क्यूस्से पीनब, मेस्ये त्वोत्देबे बाधा पीनब साप्ता पोयूने ङी नाश चीक्क्य, मेस्ये साप्ता थर्जे विचारयूने ख्रीष्टजे आज्ञा मन्दीस्ये पीनजे लागि काबूने रेक्क्य। 6कन्छ्वाब नमयूदे पूरा आज्ञा मन्देब क्यूक्क्य हन्छ्वाब आज्ञा अम्मन्देबयूने सजाइ पीनने ङी तयार क्यूक्क्य।
7नमयूदे म्याजे खूम्ने ख्यब सेयूने ले। कादेये कोइ मीदे रङ्सेब ख्रीष्टजे ख्यङ्, यदेबे पक्क चीक्क्य यलो, ङीये ङूप्रने ख्रीष्टजे ख्यङ् यदेबे स्येस्य। 8कादेये ङीदे प्रेब हकजे पोने ङैदे थेप् केन् त्वोल्लीने ङ अन्त्वा, चेनेयलो नमयूने नोङ्बेने दी, तर नमयूने ज्य चेने प्रभुदे ङीने अम्ब हक पीन ख्यङ्। 9ङैदे नमयूने लला-फला चेने अम्ब चिट्ठी लिख्दे ख्यङ् अम्मन्लाची। 10चेनेयलो कोइदे य ख्यङ्, “ङूदे लिख्देब चिट्ठीजे पोयू सोरो भरपर्तेब मेस्ये मीजे सेम् छ्वेब क्यूक्क्य, तर ङू ङीनप्रे क्यूप्प ङू बोङ् त्वब क्यूक्क्य मेस्ये ङूदे क्यमब पोये चैकम्तेब क्यूक्क्य।” 11ङी होने फ्योर अम्प्रेल्ली चिट्ठीने चै पो लिख्दीये ख्यङ्, फ्योरबये हम्ब पोने चीक्क्य यदेबे होर मीयूदे कोस्य।
12रङ्सेजे सार्या रङ्सेदेने चेब कोइ मीयूप्रे-प्रे ङी त्याप्र नेने येत्देबे रङ्सेने थमयूप्रे करने बोङ् अन्ची। तर थमयू रङ्सेदे रङ्सेने त्यादे त्याप्रे कर्देबे लेप्प थमयू बुद्धि त्वब तङ्क्य। 13ङी सेन् गोल्देबे थेप् केन् अन्त्वे, तर नमयू टूनब नेसेमे फ्योबने परमेश्वरदे चीदेब सेन् नङ्ने ङी टूनीय। 14नमयू ट्याने रने अन्रेकप्र ङी सोरो पो थेप् चीत्देबे अन्क्यम्, चेनेयलो ख्रीष्टजे सूगब खबर पात्ता खूम् नमयू ट्याने टेल्लेब ङी ख्यङ्। 15सूजो मीयूदे धम चीदेब कामने ङी चूम् कोल्देबे केन् अन्त्वे, तर नमयूजे विश्वास बोल्यो क्यूप्पब, नमयूजे अन्द्रने ङीदे चेपर्तेब कामयूये थेप्-थेप् क्यूप्पीय यदेबे ङीदे आशा चीन्न ख्यङ्, 16येरेने सूजो मीयूदे खूम्ने काम फर-जेङ्कब नेयूने ङी केन् अन्त्वोल्लाबे नमयू ख्यनेदे सूजो ती-छो नेयूने सूगब खबर स्योक्के खूस्य। 17#यर्मिया 9:24धर्मशास्त्रदे यीय “केन् त्वेबदे परमप्रभु फ्याने केन् त्वोस्स्य। 18चेनेयलो रङ्सेजे सल्क रङ्सेदेने चेब मीजे गेसेन् क्यूस्से त्वो, तर प्रभुदे सल्क चेब मीजे गेसेन् क्यूक्क्य।
Currently Selected:
२ कोरिन्थी 10: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
