१ कोरिन्थी 11
11
मदीदे ट उपजे पो
1 #
१ कोरिन्थी 4:16; फिलिप्पी 3:17 ङ ख्रीष्टदे चेप्रने चीक्क्य, नमयूदेये ङैदे चेप्रने ची।
2साप्ता पोयूने नमयूदे ङैने ह्वे चे ख्यङ्, मेस्ये ङैदे लोम्मेब पोयू नमयूदे मन्दीन ख्यङ्, होरेक्यूत्देबे ङ नमयूजे सार्या चीक्क्य।
3तर ख्रीष्ट मीयू क्वाजे ट ख्यङ्, मदीजे ट ङूजे पती ख्यङ्, होर्दे परमेश्वर ख्रीष्टजे ट ख्यङ् यब पो नमयूदे स्येस्य यदेबे ङ सेम् चीक्क्य। 4प्रार्थना चीप्प या अगमवाणी क्यम्ब रङ्सेजे ट उपब पतीयूदे रङ्से टजे न पूक्क्य। 5तर ट अङ्-उप्लाबे प्रार्थना चेब या अगमवाणी क्यमब मदीदे रङ्से टजे न पूक्क्य, चेनेयलो अम्ब ङूदे रङ्सेजे ट-फू क्य्वप्र ख्यङ्। 6कादेये कोइ मदीदे रङ्से ट अङ्-उप्यलो बरू ङूदे टफू टेप्स्य। तर टफू टेप या टफू क्य्व यब पो मदीजे लागि त्वाब पो ख्यङ् यलो ङूदे टूकू टने पूस्स्य। 7#उत्पत्ति 1:26,27पतीयूदे रङ्सेजे ट उप-अन्क्यूर् चेनेयलो परमेश्वरजे रूप् मेस्ये महिमा पतीने तङ्क्य, तर पतीजे महिमा ब मदिने तङ्क्य। 8#उत्पत्ति 2:18-23चेनेयलो मदीजे ङ्वदे पती सृष्टि क्यूर दी, तर पतीजे ङ्वदे मदी सृष्टि क्यूत्दे। 9मदीजे लागि यदेबे पती सृष्टि क्यूर दी, तर पतीजे लागि यदेबे मदी सृष्टि क्यूर ख्यङ्। 10येरेक्यूत्देबे स्वर्गदूतयूजे लागिये मदीदे रङ्से टने टूकूदे उप पर्दीय।
11येरेक्यूल्लीने प्रभुजे खूम्ने पतीजे बन्धन्ने मदी क्यूक्क्य, मेस्ये मदीजे बन्धन्ने पती क्यूक्क्य। 12चेनेयलो पतीजे ङ्वदे मदी केरे सृष्टि क्यूत्दे, होरप्रने मदीदे पतीने जन्म पीन्क्य। तर साप्ता थोक परमेश्वरदेने पीन्क्य। 13नमयू रङ्सेने विचार ची, मदीदे ट अङ्-उप्लाबे परमेश्वरने प्रार्थना चीप्प प्वेया स्व? 14पतीदे टफू रेङ सोत्देयलो हम्ब पतीजे लागि त्वाब पो ख्यङ् यदेबे अम्ब सृष्टिदेये नमयूने अन्लोम्मेया? 15तर कादेये मदीजे टफू रङ ख्यङ्देयलो हम्ब ङूजे लागि प्वब पो ख्यङ्। चेनेयलो टूकूदे उपप्र ङूने उपजे लागि मदीने टफू पीने ख्यङ्। 16तर कोइदे अम्ब पोने स्वाल्-जवाफ चीतीङ् रलो, ङीप्रे होर्दे परमेश्वरजे मण्डलीयूप्रे सूजो छ्यप् कम्बये त्वो।
प्रभु-भोज
17तर अम्ब आज्ञा पीन्ब ङ नमयूजे सार्या अन्ची, चेनेयलो नमयू सोरो ज्य चेजे लागि रूप् अन्क्यूर, तर थेप् अन्ज्य चेजे लागि नमयू रूप् क्यूर ख्यङ्। 18चेनेयलो पात्ता खूम् ब नमयू क्वाने मण्डलीने फूङ्क्यूप्प नमयूजे अन्द्रने त्या त्याप्रे अन्थून क्यूर ख्यङ् यब पो ङैदे तख्यङ्। अम्ब पो क्यून्न ख्यङ् यदेबे ङ तेते पत्तीय। 19नमयूजे अन्द्रने परमेश्वरजे खूम्ने सेम् ज्य ख्यब मीयू चीन्तेने अन्थूनये क्यूर पर्ते ख्यङ्। 20नमयू नेत्याने फूङ् क्यूत्देबे च-थूङ चेब-ब प्रभु-भोज दी। 21चेनेयलो चसे चने टूङ्ब क्वादेने रङ्से चसे च मेल्क्य, मेस्ये कोइब तक्प क्यूक्क्य, होरदे कोइब चीदे स्य्वब क्यूक्क्य। 22च-थूङ चेने नमयू रङ्से-रङ्सेजे कीम् त्वया? या नमयूदे परमेश्वरजे मण्डलीने ह्यल चीत्देबे चैये त्वबयूने त्वाला चीक्क्या? ङ नमयूने च य? अम्बजे लागि ङ नमयूजे सार्या चे औ? ङ नमयूजे सार्या चेने अन्ची।
23चेनेयलो प्रभुदे ङैने लोम्मेब पो ङैदे नमयूने लोम्मे ख्यङ्, प्रभु येशू कम्ब मून्ने चूङ्ग ख्य, हम्ब मून्नेने चूङ्ग यली खूम् प्रभु येशूदे क्यङ् टेल्दे। 24मेस्ये धन्यवाद पीन ङ्येदे प्रभुदे हम्ब क्यङ् क्योत्देबे यदे, “नमयूजे लागि अम्ब ङैजे ङ्व ख्यङ्। ङैने ह्वे चेने नमयूदे अम्ब ची।” 25#प्रस्थान 24:8; यर्मिया 31:31-34; प्रस्थान 24:6-8होरप्रने क्यङ् च ङ्येदे प्रभुदे पील टेल्देबे येरे यदे, “अम्ब पील ङैजे काने ख्यब सर् करार ख्यङ्। कन्छ्वाब नमयू अम्ब थूङ्क्य, ङैने ह्वे चेने नमयूदे बील बीलने अम्ब चील्लीम ची।” 26चेनेयलो कन्छ्वाब नमयूदे अम्ब क्यङ् चीय, मेस्ये अम्ब पीलदे थूङ्क्य, ङू अन्रदासेमे नमयूदे ङ सीयेब पो प्रचार चीक्क्य।
27येरेक्यूत्देबे सूदे परमेश्वरजे खूम्ने सेम् अन्ज्य क्यूल्लीने प्रभुजे क्यङ् चीय, मेस्ये पीलदे थूङ्क्य, हम्ब मी प्रभुजे ङ्व मेस्ये काने अशुद्ध चेब क्यूत्देबे दोषी ठर्दीय। 28मी क्वादेने रङ्से सेम् कर ख्यङ् यदेबे जाँचदीस्य, होर्देम हम्बदे क्यङ् चस्य, मेस्ये पीलदे थूङ्स्य। 29चेनेयलो प्रभुजे ङ्वने चेला अन्स्येलाबेने सूदे चीय मेस्ये थूङक्य, हम्बदे च मेस्ये थूङ्कबदे रङ्से फ्याने दण्ड रेक्क्य। 30येरेक्यूत्देबे नमयू नङ्ने कूम मीयू बोङ् त्व मेस्ये नव ख्यङ्, होर्दे कूम मीयूब सीयेजन्क ख्यङ्। 31तर तम्दम्ने ङीनदे-रङ्से सेम् कर ख्यङ् यदेबे जाँचदीदे यलो परमेश्वरजे न्यायने ङीन पर्दीस्ये त्वो। 32तर कन्छ्वाब प्रभुदे ङीनने न्याय चीक्क्य, हन्छ्वाब संसारजे मीयूप्रे ङीनये दोषी अन्ठर्दीस्य यदेबे ङीनने सकस् पीन्क्य।
33येरेक्यूत्देबे ङैजे छेब अत-अची च्योन्यू, नमयू प्रभु-भोज चने फूङ् क्यूप्प त्यादे-त्याने रेन्। 34कादेये कोइ ठीन ख्यङ्देयलो हम्बदे कीम्नेने चसे चस्य, नत्र प्रभु-भोज चने नेत्याने रुप् क्यूप्प परमेश्वरदे पीनब दण्ड नमयूदे प्रेक्क्य। सूजो पोयूजे बारेने ङ रबने लोम्मीय।
Currently Selected:
१ कोरिन्थी 11: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
