عٛبَدِيَ 1

تٛسْکَارٜ دٛوْ عٜدٛومْ

1ندَا کٛ جَوْمِرَاوٛ اَللَّه وَنغِنَنِ عٛبَدِيَ دٛوْ عٜدٛومْ؞ مِنْ نَنِ کٛنغٛلْ عِوْنغٛلْ حَا جَوْمِرَاوٛ، نٜلَاطٛ بٛو نٜلَامَ نغَمْ يَحْرَنْغٛ نغٛلْ عُمَّاتٛوجٜ غٛطّٜ‏: «عُمّٜ، عٜنْ کَࢡَ بٜى عٜدٛومْ‏!» 2جَوْمِرَاوٛ وِعِ يِمْࢡٜ عٜدٛومْ‏: «مِلٜىٰسْتِنَنْ عٛنْ شَکَ عُمَّاتٛوجٜ، عٛنْ لَاتٛتٛ مٜىٰرِطِنَاࢡٜ مَسِنْ؞ 3مَوْنِتَارٜ ࢡٜرْطٜ مٛنْ زَمْبَکٜ عٛنْ، عٛنٛنْ جٛوطِيࢡٜ ندٜرْ غَارُوجِ کٛوسٜىٰجٜ عٜ حَا نٛکُّوجٜ تٛوْطٜ؞ نغَمْ مَنْ مبِعٛتٛنْ‏: مٛيْ جِݠِّنْتَ مِنْ حَا لٜسْدِ؟ 4کٛو تٛ عٛنْ تٛوْتِ بَنَ دُتَلْ، کٛو تٛ سَࢡّٛ مٛوطٛنْ طٛنْ شَکَ کٛودٜ، مِجِݠِّنَنْ عٛنْ دِغَ تٛنْ؞» نِي جَوْمِرَاوٛ وِعِ؞

5«تٛ وُيْࢡٜ کٛو جَࢡْتٛوࢡٜ نغَرِ حَا مٛوطٛنْ جٜمَّ، ࢡٜکٛوشَنْ کٛ ࢡٜمبَاوِ حٛوشُغٛ ڢُو، ندٜنْ عٛنْ نَتَّنْ ڢُو‏! تٛ تٜࢡٛوࢡٜ ࢡِࢡّٜ عِنَبٛوجٜ نَسْتِ غٜسٜ مٛوطٛنْ، بُکِّ سٜطَّ تَنْ ࢡٜعَشَّتَ؞ 6بَنَ نٛنْ ࢡٜلِࢩِرِ عِسُوَ#1‏:6 عِسُوَ طُمْ عِنْدٜ عٜدٛومْ وٛطْندٜ؞، ندٜسَاجِ مُوطُمْ نجُݠَّامَ ڢُو؞ 7حَࢡُّࢡٜ عَلْکَوَلْ بٜى مٛوطٛنْ طٛنْ ندِيوَ عٛنْ دِغَ لٜسْطٜ مٛوطٛنْ، طٛنْ زَمْبٛ عٛنْ، سٛوبِرَاࢡٜ مٛنْ نجَالٛتٛ عٛنْ، سُلْحٛتِرْࢡٜ بٜى مٛوطٛنْ تُوڢَنْتٛ عٛنْ تُوڢٛرْغٛلْ بٜى ࢩَامْدُ مٛوطٛنْ، ࢡٜمبِعَنْ‏: ࢡٜنغَلَا حَکِّيلٛ؞»

8جَوْمِرَاوٛ وِعِ‏: «ࢩَلَادٜ کِيتَ، مِنَتِّنَنْ حِکْمَعٜنْ عٜدٛومْ عٜ مَرْࢡٜ ڢَامُ دٛوْ کٛوسٜىٰجٜ عِسُوَ؞ 9حٛنٛوࢡٜ سٜمْبِطْࢡٜ ندٜرْ بٜرْنِوٛلْ تٜمَنْ ندِوْتٛرَنْ، حَا وٛرْࢡٜ ڢُو کَلْکَ دٛوْ کٛوسٜىٰجٜ عِسُوَ، نغَمْ کٛنّٜعٜنْ مبَرْدَنْ ࢡٜ؞»

دَلِيلَ کَ اَللَّه حِيتٛرْتٛ عٜدٛومْ

10«عٛنْ تٛوࢩِ دٜىٰرْطِرَاࢡٜ مٛنْ يِمْࢡٜ يَعْقُوبُ؞ نغَمْ مَنْ تٛسْکَارٜ وَرَنْ دٛوْ مٛوطٛنْ، کٛنّٜعٜنْ نَتِّنَنْ عٛنْ حَا ڢٛرٛيْ؞ 11ࢩَلَادٜ ندٜ يِمْࢡٜ عِوْࢡٜ لٜسْدِ ڢٜىٰرٜ نَسْتِ دَمُّطٜ عُرُسَلِيمَ، ندٜ ࢡٜمبَطِ کُرْعُ نغَمْ سٜنْدُغٛ نغٛلْ، ندٜ جَنَنْࢡٜ عَدِ جَوْدِ يَعْقُوبُ، ࢩَلَادٜ مَنْ عٛنْ ندَرِ دَايِيطُمْ، عٛنْ لَاتِ حَلُّࢡٜ بَنَ ࢡٜيَ؞ 12حَانَايْنٛ عٛنْ مَوْنِتٛ دٛوْ دٜىٰرْطِرَاࢡٜ مٛنْ ندٜرْ ࢩَلَادٜ سَرُّ مَࢡّٜ، حَانَايْنٛ عٛنْ شٜيٛرٛ حَلْکٜرٜ يِمْࢡٜ يَحُودَ، عٛنْ مَࢡِّتَ کُنْدُطٜ مٛنْ نغَمْ جَلُغٛ ࢡٜ ࢩَلَادٜ ࢡِلَّارٜ مَࢡّٜ؞ 13حَانَايْنٛ عٛنْ نَسْتَ بٜرْنِوٛلْ يِمْࢡٜ عُمَّاتٛورٜ عَمْ نغَمْ عٛنْ شٜيٛرٛ سَرُّ مَࢡّٜ، عٛنْ نغُجَّ جَوْدِ مَࢡّٜ ࢩَلَادٜ سَرُّ مَࢡّٜ؞ 14حَانَايْنٛ عٛنْ ندَرٛ حَا غُرْتٛرْطٜ مَࢡّٜ نغَمْ مبَرُغٛ دٛغَّنْࢡٜ؞ حَانَايْنٛ عٛنْ ندٛکَّ دَطْࢡٜ حَا جُوطٜ کٛنّٜعٜنْ مَࢡّٜ ندٜرْ ࢩَلَادٜ ࢡِلَّارٜ مَࢡّٜ#عٜسَايَ 34‏:5‏-17؛ 63‏:1‏-6؛ يٜرٜمِيَ 49‏:7‏-22؛ عٜزٜکِيٜلْ 25‏:12‏-14؛ 35‏:1‏-15؛ عَمٛسْ 1‏:11‏-12؛ مَلَکِيَ 1‏:2‏-5؞‏!»

ࢩَلَادٜ جَوْمِرَاوٛ عٜ جَالٛرْغَلْ إِسْرَاءِيلَ

15«نغَمْ ࢩَلَادٜ جَوْمِرَاوٛ ࢡَدَکٜ، عٛحِيتٛتٛ عُمَّاتٛوجٜ ڢُو؞ کٛ عٛنْ مبَطِ وٛطْࢡٜ، کَنْجُمْ ࢡٜمبَطَتَ عٛنْ؞ حَلّٜىٰندٜ ندٜ عٛنْ مبَطَنِ وٛطْࢡٜ لٛرٛتٛ دٛوْ کٛعٜ مٛنْ؞ 16عٛنٛنْ يِمْࢡٜ يَحُودَ دٛوْ حٛوسٜىٰرٜ عَمْ سٜنِيندٜ، عٛنْ نجَرِ جَرْدُغٜلْ تِکّٜرٜ عَمْ؞ عَمَّا يِمْࢡٜ عُمَّاتٛوجٜ غٛطّٜ تٛکّٛتٛ يَرُغٛ نغٜلْ تُمْ، ࢡٜنجَرَنْ حَا ࢡٜنغُيْکَ، ندٜنْ ࢡٜمَجَّ ࢡٜ ڢُو بَنَ ࢡٜمٜىٰطَايْ وٛنُغٛ؞ 17عَمَّا حَا حٛوسٜىٰرٜ سِيٛنَ وٛطْࢡٜ ندَطَنْ، کِسَنْ؞ ندٜ لَاتٛتٛ نٛکُّورٜ سٜنَاندٜ؞

«عَمَّا يِمْࢡٜ يَعْقُوبُ مَرْتَنْ لٜسْدِ مُوطُمْعٜنْ#1‏:17 يِمْࢡٜ يَعْقُوبُ مَرْتَنْ لٜسْدِ مُوطُمْعٜنْ مَلَّ بٛو يِمْࢡٜ يَعْقُوبُ نجَࢡْتَنْ لٜسْدِ جَࢡْتُنٛوࢡٜ ࢡٜ لٜسْدِ؞؞ 18يِمْࢡٜ يَعْقُوبُ لَاتٛتٛ بَنَ يِيتٜ، يِمْࢡٜ يُوسُڢُ بٛو بَنَ جَمْرٜ يِيتٜ؞ عَمَّا يِمْࢡٜ عِسُوَ لَاتٛتٛ بَنَ تِيتِيحٛ؞ يِيتٜ مَنْ وُلَنْ تِيتِيحٛ غٛ، ࢩَامَنْ کٛ؞ وَلَا کٛو غٛوتٛ لُتَّتَ ندٜرْ دَࢩْغٛلْ عِسُوَ؞» مِنْ جَوْمِرَاوٛ وِعِ طُمْ؞

19يِمْࢡٜ يَحُودَ وٛنْࢡٜ حَا ڢٛمْبِنَ، کٛوشَنْ کٛوسٜىٰجٜ عِسُوَ، مَرَنْ طٜ؞ وٛنْࢡٜ حَا لٜسْدِ تٛوْندِيجٜ بٛو کٛوشَنْ لٜسْدِ ڢِلِسْتِعٜنْ؞ ࢡٜمَرَنْ لٜسْدِ عٜڢْرَيِمْ بٜى لٜسْدِ سَمَرِيَ؞ يِمْࢡٜ بٜنْيَمِنْ مَرَنْ لٜسْدِ غِلٜعَتْ؞ 20وٛودِ دَحَاࢡٜ#1‏:20 دَحَاࢡٜ يِطِ وِعْغٛ عٜغِّنَاࢡٜ بٜى دٛولٜ؞ دِغَ لَامُ إِسْرَاءِيلَ، ࢡٜ حٛنٛوࢡٜ، ࢡٜمَرَنْ لٜسْطٜ کَنَانِعٜنْ حَا يٛتّٛ سَرَڢَتْ؞ دَحَاࢡٜ دِغَ عُرُسَلِيمَ وٛنْࢡٜ حَا سَرَڢَتْ مَرَنْ بٜرْنِيجِ حَا ڢٛمْبِنَ، لٜسْدِ يَحُودَ؞

21رِمْطِنٛوࢡٜ مبَعّٛتٛ حٛوسٜىٰرٜ سِيٛنَ نغَمْ لَامَنَاغٛ کٛوسٜىٰجٜ عِسُوَ؞ جَوْمِرَاوٛ لَاتٛتٛ لَامِيطٛ‏!

Currently Selected:

عٛبَدِيَ 1: داَ

Highlight

Copy