لِمْلٜ 8
8
جٛعِّنْکِ ݠِتِّرْلَاجِ
1جَوْمِرَاوٛ عُمْرِ مُوسَى، 2عٛوِعَ هَـٰرُونَ نِعِ: «تٛ عَطٛنْ جٛعِّنَ ݠِتِّرْلَاجِ جٛوٜىٰطِطِ دٛوْ جٛعِّنِرْطُمْ مَاجِ، جٛعِّنْ طِ حَا طِ نجَيْنَ يٜىٰسٛ مَاجِ؞» 3هَـٰرُونَ وَطِ بَنَ نٛنْ؞ عٛجٛعِّنِ طِ حَا طِ نجَيْنَ يٜىٰسٛ جٛعِّنِرْطُمْ مَاجِ بَنَ نٛ جَوْمِرَاوٛ عُمْرِنٛ مُوسَى؞ 4جٛعِّنِرْطُمْ ݠِتِّرْلَاجِ کُووْرَاطُمْ بٜى کَنغّٜىٰرِ طُوطْندِ، دِغَ جٛوطٛرْطُمْ مَنْ حَا يٛتِّ ݠِنْدِ مَنْ ڢُو؞ طُمْ بَطَاطُمْ بٜى کَنغّٜىٰرِ تَݠَّاندِ، ࢡٜمبَطِ طُمْ ڢٛدّٜ مِسَالُ مٛ جَوْمِرَاوٛ حٛلِّ مُوسَى ندٜرْ وَحَيُ؞
شٜنْکِ لٜوِعٜنْ
5جَوْمِرَاوٛ وِعِ مُوسَى: 6«سٜنْدُ لٜوِعٜنْ بٜى إِسْرَاءِيلَعٜنْ وٛطْࢡٜ، سٜنْ ࢡٜ 7بَنَ نِعِ: وِشُّ ندِيَمْ عِتِّرْطَمْ حَکّٜىٰجِ دٛوْ مَࢡّٜ، ࢡٜلَࢡَ غَاسَ ࢡَلِّ مَࢡّٜ ڢُو، ࢡٜلٛوتَ لِمْشٜ مَࢡّٜ بٛو، ࢡٜشٜنَ کٛعٜ مَࢡّٜ؞ 8ندٜنْ ࢡٜکٛوعَ نغَارِ کَلْحَلْدِ، بٜى دٛکَّلْ ࢩَامْدُ مَارِ عٜ کُرٛورِ نجِيࢡَاندِ بٜى نٜبَّمْ؞ عَنْ بٛو، حٛوعُ نغَارِ طِطَوْرِ کِرْسٜتٜىٰندِ نغَمْ عِتُّکِ حَکّٜىٰجِ؞ 9ندٜنْ ࢡَدِتِنْ لٜوِعٜنْ يٜىٰسٛ لَيْمَارُ ڢٛتِّرْدٜ عٜ مٛوࢡْتُ جَمَعَارٜ إِسْرَاءِيلَ ڢُو؞ 10ࢡَدِتِنْ لٜوِعٜنْ يٜىٰسٛ عَمْ، إِسْرَاءِيلَعٜنْ بٛو نجٛوَ جُوطٜ مُوطُمْعٜنْ دٛوْ کٛعٜ لٜوِعٜنْ؞ 11لٜوِعٜنْ حٛوعَاࢡٜ ندٜرْ إِسْرَاءِيلَعٜنْ ࢡٜعٜ، هَـٰرُونَ لِيعٛ ࢡٜ يٜىٰسٛ عَمْ بَنَ دٛکَّلْ شٜنَانغَلْ حَا ࢡٜنجَغَّنٛ يَمْ؞ 12ندٜنْ لٜوِعٜنْ نجٛوَ جُوطٜ مُوطُمْعٜنْ دٛوْ کٛعٜ غَعِ کَلْحَلِ غٛ؞ هَـٰرُونَ تَاسْکِتِنَ نغٛورِ کِرْسٜتٜىٰندِ نغَمْ عِتُّکِ حَکّٜىٰجِ، نغٛورِ بٛو نغُلٜتٜىٰندِ نغَمْ عَمْ، نغَمْ حَا لٜوِعٜنْ کٜࢡْرَ يَاڢُيٜ؞
13«دَرْنُ لٜوِعٜنْ يٜىٰسٛ هَـٰرُونَ عٜ ࢡِࢡّٜ مُمْ، ࢡٜلَاتٛ دٛکَّلْ شٜنَانغَلْ نغَمْ عَمْ؞ 14سٜنْدُ ࢡٜ بٜى إِسْرَاءِيلَعٜنْ وٛطْࢡٜ، نِي نٛنْ لٜوِعٜنْ، مِنْ جٜيِ؞ 15ࢡَاوٛ مَنْ لٜوِعٜنْ نغَرَنْ، کُووَنْ ندٜرْ لَيْمَارُ ڢٛتِّرْدٜ؞ نِي نٛنْ شٜنِرْتَ ࢡٜ، ࢡٜلَاتٛتٛ دٛکَّلْ شٜنَانغَلْ نغَمْ عَمْ؞ 16ࢡٜلَاتَنْتٛ يَمْ دٛکَّلْ شَکَ إِسْرَاءِيلَعٜنْ؞ مِجَࢡِ ࢡٜ مبَتُّدِ عَڢْࢡٜ إِسْرَاءِيلَعٜنْ ڢُو، مبَتُّدِ کَلَ عَڢٛ دَادَ مُمْ ڢُو؞ 17نغَمْ کٛ عَارْتِ دَࢩٜىٰغٛ ڢُو، مِنْ جٜيِ؞ ࢩَنْدٜ ندٜ مِمبَرِ عَڢْࢡٜ ڢُو ندٜرْ لٜسْدِ مِصْرَ، مِسٜنِ عَڢْࢡٜ إِسْرَاءِيلَعٜنْ عٜ عَڢِ دَبَّاجِ مُوطُمْعٜنْ نغَمْ عَمْ؞ 18جٛنْتَ مِحٛوعِ لٜوِعٜنْ مبَتُّدِ عَڢْࢡٜ إِسْرَاءِيلَعٜنْ؞ 19شَکَ إِسْرَاءِيلَعٜنْ، مِحٛکِّ هَـٰرُونَ عٜ ࢡِࢡّٜ مُمْ لٜوِعٜنْ، حَا ࢡٜکُووَنَ إِسْرَاءِيلَعٜنْ ندٜرْ لَيْمَارُ ڢٛتِّرْدٜ، ࢡٜشُکْلَنٛ جٛࢡْکِ حَکّٜىٰجِ إِسْرَاءِيلَعٜنْ بٛو، نغَمْ تَا مَسِيبٛ وَطَ شَکَ مَࢡّٜ، تٛ ࢡٜࢡَدِتَکٜ سُودُ سٜنِيندُ؞»
20مُوسَى عٜ هَـٰرُونَ عٜ جَمَعَارٜ إِسْرَاءِيلَ ڢُو مبَطَنِ لٜوِعٜنْ کَلْ-کَلْ بَنَ جَوْمِرَاوٛ عُمْرُنٛ مُوسَى؞ إِسْرَاءِيلَعٜنْ مبَطَنِ ࢡٜ طُمْ؞ 21لٜوِعٜنْ لَࢡِّنِ کٛعٜ مُوطُمْعٜنْ، لٛوتِ لِمْشٜ مُوطُمْعٜنْ؞ هَـٰرُونَ سٜنِ ࢡٜ نغَمْ جَوْمِرَاوٛ، بَنَ دٛکَّلْ شٜنَانغَلْ؞ ندٜنْ عٛحٜࢡْنِ ࢡٜ يَاڢُيٜ، عٛلَࢡِّنِ ࢡٜ؞ 22ࢡَاوٛ مَنْ لٜوِعٜنْ ݠُطِّ حُووُغٛ ندٜرْ لَيْمَارُ ڢٛتِّرْدٜ، دٛوْ عَرْدَانغَلْ هَـٰرُونَ عٜ ࢡِࢡّٜ مُمْ بَنَ جَوْمِرَاوٛ عُمْرُنٛ مُوسَى دٛوْ لٜوِعٜنْ؞ ࢡٜمبَطَنِ ࢡٜ نٛنْ؞
23جَوْمِرَاوٛ وِعِ مُوسَى: 24«ندَا عُمْرٛورٜ دٛوْ لٜوِعٜنْ: تٛ غٛطّٛ لٜࢩٛلْ لٜوِ وَطِ دُوࢡِ نٛوغَسْ عٜ جٛوِ، عٛڢُطَّ حُووُغٛ ندٜرْ لَيْمَارُ ڢٛتِّرْدٜ؞ 25تٛ عٛوَطِ دُوࢡِ شَݠَّنْطٜ جٛوِ، عٛوُرْتٛ کُوغَلْ مَنْ، عٛعَشَّ نغَلْ؞ 26عٛوَلَّنْ بَنْدِرَاࢡٜ مَاکٛ حُووَنْࢡٜ ندٜرْ لَيْمَارُ ڢٛتِّرْدٜ، عَمَّا تَا عٛحُووَ کُوغَلْ مَنْ بٜى حٛورٜ مَاکٛ؞ نِي نٛنْ نجٛعِّنِرْتَ لٜوِعٜنْ دٛوْ کُوطٜ مَࢡّٜ؞»
Currently Selected:
لِمْلٜ 8: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
