لِمْلٜ 32

لٜعِ جٛوطِيطِ حَا ڢُونَانغٜ عُرْدُنْ

(تٛوکْتَاکِ تَوْرٜىٰتَ 3‏:12‏-22)

1يِمْࢡٜ لٜعِ رُبٜنْ عٜ غَدَ مَرِ دَبَّاجِ طُوطِّ مَسِنْ؞ ࢡٜنغِعِ نٛ لٜسْدِ يَعَجٜرْ عٜ لٜسْدِ غِلٜعَتْ لَاتٛرِ دُرْدُدٜ وٛوندٜ؞ 2نغَمْ مَاجُمْ ࢡٜنجٜحِ حَا مُوسَى عٜ عٜلِعَزَارُ لِمَنْجٛ عٜ عَرْدِيࢡٜ جَمَعَارٜ، ࢡٜمبِعِ‏: 3‏-4«جَوْمِرَاوٛ جَالَکٜ لٜسْدِ ندِعِ يٜىٰسٛ جَمَعَارٜ إِسْرَاءِيلَ، وَاتٛ عَتَرٛتْ عٜ دِبٛنْ عٜ يَعَجٜرْ عٜ نِمْرَ عٜ حٜسْبٛنْ عٜ عٜلْعَلٜ عٜ سِبَمَ عٜ نٜبٛ عٜ بٜعٛنْ؞ ندِ لَاتِ دُرْدُدٜ وٛوندٜ، مِنِنْ بٛو مِنْ مَرِ دَبَّاجِ طُوطِّ؞ 5تٛ عَيٜرْدَکٜ مِنْ، عُسٜنِ مَرْنُ مِنْ لٜسْدِ ندِعِ؞ تَا عٜىٰرْنُ مِنْ مَايٛ عُرْدُنْ؞»

6مُوسَى جَابِ يِمْࢡٜ رُبٜنْ‏: «عٛنْ نجٛوطٛتٛ طٛ يَاکٜ بَنْدِرَاࢡٜ مٛنْ نجَحَتَ حَࢡٛيْغٛ‏! 7کٛنِ کُلْنٛتٛنْ إِسْرَاءِيلَعٜنْ نغَمْ تَا ࢡٜعٜىٰرٛ مَايٛ عُرْدُنْ، ࢡٜنَسْتَ لٜسْدِ ندِ جَوْمِرَاوٛ حٛکِّ ࢡٜ؟ 8بَنَ نٛنْ بَابِرَاࢡٜ مٛنْ مبَطِ سَاعِ مِنٜلِ ࢡٜ دِغَ کَادٜسْ-بَرْنٜعَ نغَمْ ࢡٜکٛرَ لٜسْدِ؞ 9ࢡٜنجٜحِ، ࢡٜنجٛتِّ وَادِوٛلْ عٜسْکٛلْ، ࢡٜندَارِ لٜسْدِ؞ عَمَّا ندٜ ࢡٜنغَرْتِ، ࢡٜکُلْنِ يِمْࢡٜ نغَمْ تَا ࢡٜنَسْتَ لٜسْدِ ندِ جَوْمِرَاوٛ حٛکِّ ࢡٜ؞ 10ࢩَلَادٜ مَنْ جَوْمِرَاوٛ تِکَّنِ إِسْرَاءِيلَعٜنْ، حُنِ‏: 11ڢَکَتْ، وٛرْࢡٜ وُرْتِيࢡٜ مِصْرَ، ࢡٜ دُوࢡِ نٛوغَسْ عٜ کٛ ࢡُرِ، نغِعَتَا لٜسْدِ ندِ کُنَنِيمِ إِبْرَاهِيمَ عٜ إِسْحَاقَ عٜ يَعْقُوبُ، نغَمْ ࢡٜتٛکَّاکِ يَمْ بٜى ࢡٜرْندٜ وٛورٜ؞ 12سٜيْ کَالٜبْ ࢡِي يٜڢُنَّ کٜنِزِّيجٛ عٜ يٛسُوَ ࢡِي نُونَ تَنْ نغِعَتَ ندِ، نغَمْ کَمْࢡٜ ࢡٜتٛکِّ يَمْ بٜى ࢡٜرْندٜ وٛورٜ؞ 13جَوْمِرَاوٛ تِکَّنِ إِسْرَاءِيلَعٜنْ، يِيلْنِ ࢡٜ ندٜرْ لَدّٜ دُوࢡِ شَݠَّنْطٜ نَيِ، حَا يِدٜرٜ مَࢡّٜ ڢُو مَايِ، نغَمْ ࢡٜمبَطِ کَلُّطُمْ حَا جَوْمِرَاوٛ؞ 14جٛنْتَ بٛو، يِمْࢡٜ يِدٜرٜ حَلُّندٜ ندٜعٜ طٛنْ مبَطَ بَنَ بَابِرَاࢡٜ مَࢡّٜ، حَا ࢡٜطُطِّنَ تِکّٜرٜ جَوْمِرَاوٛ دٛوْ إِسْرَاءِيلَ‏! 15تٛ عٛنْ نغَيْلِتَکٜ، عٛنْ عَشِّمٛ، ندٜنْ کَمْ عٛتٛکّٛتٛ يِيلْنُغٛ عٛنْ ندٜرْ لَدّٜ؞ بَنَ نٛنْ نَسْتِنْتٛنْ عُمَّاتٛورٜ ندٜعٜ ڢُو ندٜرْ حَلْکٜرٜ؞»

16ࢡٜࢡَدِتِ مُوسَى، ࢡٜمبِعِ‏: «عَشُّ مِنْ مبَطَ بَالْطٜ نغَمْ بَالِ عٜ بٜعِ عَمِنْ عٜ بٜرْنِيجِ نغَمْ ࢡِکّٛيْ عَمِنْ؞ 17ندٜنْ مِنْ تَاسْکٛتٛ، مِنْ عَرْدٛ جَمَعَارٜ کٛنُ إِسْرَاءِيلَعٜنْ، حَا تٛ مِنْ نَسْتِنِ ࢡٜ ندٜرْ لٜسْدِ مَࢡّٜ؞ سَاعِ مَنْ ࢡِکّٛيْ عَمِنْ نجٛوطٛتٛ ندٜرْ بٜرْنِيجِ شٜمْبِطِّ، کِسَنْ يِمْࢡٜ لٜسْدِ ندِعِ؞ 18مِنْ کٛوتَتَا شِعٜ#32‏:18 شِعٜ مَلَّ شَلَاجٜ؞ عَمِنْ، سٛنَا تٛ إِسْرَاءِيلَعٜنْ لُتُّࢡٜ کٜࢡِ مَرٜ لٜسْدِ مَࢡّٜ؞ 19مِنْ کٜࢡَتَا مَرَلْ غٜسٜ شَکَ مَࢡّٜ غَطَ عُرْدُنْ، نغَمْ مِنْ کٜࢡِ غٜطَلْ عَمِنْ حَا ڢُونَانغٜ عُرْدُنْ؞»

20مُوسَى جَابِ ࢡٜ‏: «تٛ عٛنْ نغِطِ وَطُغٛ بَنَ نٛنْ، ندٜنْ کَمْ تَاسْکٜ نغَمْ حَࢡْرٜ، جَوْمِرَاوٛ طٛوَنْ ندٜ؞ 21تَاسْکَنِيࢡٜ کٛنُ شَکَ مٛوطٛنْ ڢُو عٜىٰرٛ مَايٛ عُرْدُنْ دٛوْ عَرْدَانغَلْ جَوْمِرَاوٛ، حَا تٛ عٛڢَرْتِ کٛنّٜعٜنْ مَاکٛ، 22عٛࢩَامِ لٜسْدِ بٛو؞ ندٜنْ عٛنْ کٜࢡَنْ لٛرَاغٛ، جَوْمِرَاوٛ عٜ إِسْرَاءِيلَعٜنْ ݠٜلَتَا عٛنْ، لٜسْدِ ندِعِ بٛو لَاتٛتٛ مَرَلْ مٛوطٛنْ؞ 23عَمَّا تٛ عٛنْ مبَطَايْ کٛ مبِعْطٛنْ، ندٜنْ کَمْ عٛنْ مبَطَنْ حَکّٜ دٛوْ جَوْمِرَاوٛ؞ عَنْدٜ، عٛحِيتٛتٛ حَکّٜ مَنْ؞ 24ࢩِࢡٜ بٜرْنِيجِ نغَمْ ࢡِکّٛيْ مٛنْ، مبَطٜ بَالْطٜ نغَمْ بَالِ عٜ بٜعِ مٛنْ بٛو؞ مبَطٜ کٛ مبِعْطٛنْ؞»

25يِمْࢡٜ رُبٜنْ عٜ غَدَ مبِعِ مُوسَى‏: «مِنْ مبَطَنْ کٛ عُمْرُطَ؞ 26ࢡِکّٛيْ عَمِنْ، رٜوْࢡٜ عَمِنْ، بَالِ عٜ بٜعِ عٜ نَعِ عَمِنْ نجٛوطٛتٛ حَا طٛ ندٜرْ بٜرْنِيجِ لٜسْدِ غِلٜعَتْ؞ 27عَمَّا مِنِنْ تَاسْکَنِيࢡٜ کٛنُ ڢُو، مِنْ عٜىٰرٛتٛ مَايٛ عُرْدُنْ دٛوْ عَرْدَانغَلْ جَوْمِرَاوٛ، مِنْ کَࢡٛيَ بَنَ مبِعْطَ؞»

28نغَمْ مَاجُمْ مُوسَى عُمْرِ عٜلِعَزَارُ لِمَنْجٛ عٜ يٛسُوَ ࢡِي نُونَ عٜ بَابَ-شِعٜعٜنْ ندٜرْ لٜعِ إِسْرَاءِيلَ، 29وِعِ ࢡٜ‏: «تٛ يِمْࢡٜ رُبٜنْ عٜ غَدَ تَاسْکَنَکٜ حَࢡْرٜ، تٛ ࢡٜعٜىٰرٛدَکٜ مَايٛ عُرْدُنْ بٜى مٛوطٛنْ دٛوْ عَرْدَانغَلْ جَوْمِرَاوٛ، تٛ ࢡٜمبَلِّ عٛنْ ࢩَامُغٛ لٜسْدِ تٛنْ، ندٜنْ کَمْ ندٛکّٜ ࢡٜ لٜسْدِ غِلٜعَتْ، ࢡٜمَرَ ندِ؞ 30عَمَّا تٛ ࢡٜعٜىٰرٛدَاکِ مَايٛ بٜى مٛوطٛنْ، تٛ ࢡٜمبَلَّايْ عٛنْ حَࢡُغٛ، ندٜنْ کَمْ ࢡٜکٜࢡَنْ غٜطَلْ مَࢡّٜ شَکَ مٛوطٛنْ ندٜرْ لٜسْدِ کَنَانَ؞» 31يِمْࢡٜ رُبٜنْ عٜ غَدَ نجَابِ‏: «مِنْ مَشُّࢡٜ جَوْمِرَاوٛ، مِنْ مبَطَنْ بَنَ عٛعُمْرِ مِنْ؞ 32مِنْ تَاسْکَنْتٛ حَࢡْرٜ، مِنْ عٜىٰرٛ مَايٛ دٛوْ عَرْدَانغَلْ مَاکٛ، مِنْ نَسْتَ لٜسْدِ کَنَانَ، حَا مِنْ نجٛغِتٛ مَرَلْ عَمِنْ حَا ڢُونَانغٜ عُرْدُنْ؞»

33مُوسَى مَرْنِ لٜعِ غَدَ عٜ رُبٜنْ عٜ رٜىٰتَ لٜࢩٛلْ مَنَسَّ ࢡِي يُوسُڢُ مَرَلْ سِحٛنْ، لَامِيطٛ عَمٛورِعٜنْ عٜ مَرَلْ عٛوکْ، لَامِيطٛ بَاسَنْ، بٜرْنِيجِ ڢُو بٜى لٜسْدِ تَارِيندِ طِ؞ 34يِمْࢡٜ غَدَ ࢩِࢡْتِ بٜرْنِيجِ دِبٛنْ عٜ عَتَرٛتْ عٜ عَرٛعٜرْ 35عٜ عَتَرٛتْ-سٛڢَنْ عٜ يَعَجٜرْ عٜ يٛغْبٜحَ 36عٜ بَيْتِ-نِمْرَ عٜ بَيْتِ-حَرَمْ، بٜرْنِيجِ شٜمْبِطِّ عٜ بَالْطٜ نغَمْ بَالِ عٜ نَعِ؞ 37يِمْࢡٜ رُبٜنْ ࢩِࢡْتِ بٜرْنِيجِ حٜسْبٛنْ عٜ عٜلْعَلٜ عٜ کِرِيَتَيِمْ 38عٜ نٜبٛ عٜ بَعَلْ-مٜعٛنْ – ࢡٜشَنْجِ عِنْدٜ مَاغٛلْ – عٜ سِبَمَ؞ ࢡٜندٛکِّ بٜرْنِيجِ ࢩِࢡْتَاطِ ڢُو عِنْطٜ کٜسٜ؞

39ࢡِࢡّٜ مَکِرْ ࢡِي مَنَسَّ نَسْتِ لٜسْدِ غِلٜعَتْ، ࢩَامِ ندِ، ندِيوِ عَمٛورِعٜنْ وٛنْࢡٜ تٛنْ؞ 40مُوسَى مَرْنِ ࢡِࢡّٜ مَکِرْ لٜسْدِ غِلٜعَتْ، ࢡٜنجٛوطِ تٛنْ؞ 41يَعِرْ، غٛطّٛ لٜࢩٛلْ مَنَسَّ، يٜحِ ࢩَامِ غُرٜ غٛطّٜ، عِنْدِ طٜ غُرٜ-يَعِرْ؞ 42نٛبَحْ بٛو يٜحِ ࢩَامِ بٜرْنِوٛلْ کٜنَتْ بٜى غُرٜ مَاغٛلْ، عِنْدِ نغٛلْ بٜى عِنْدٜ مُمْ؞

Currently Selected:

لِمْلٜ 32: داَ

Highlight

Copy