نَحُمْ 1

کِيتَ اَللَّه شَاتُکَ دٛوْ کٛنّٜعٜنْ مُوطُمْ

1طٛ وٛنِ کٛنغٛلْ دٛوْ نِنِوٜ#1‏:1 نِنِوٜ وٛنّٛ بٜرْنِوٛلْ عَسُّورَ مَنغٛلْ؞؞ دٜڢْتٜرٜ ندٜعٜ طٛنْ عَنْدِنَ کٛ نَحُمْ عٜلْکٛسِيجٛ يِعِ؞

2جَوْمِرَاوٛ عٛ اَللَّه کَاجُطٛ، عٛوَاتٛتٛ‏! جَوْمِرَاوٛ وَاتٛتٛ، عٛ کٜىٰوْطٛ تِکّٜرٜ، عٛوَاتٛتٛ وَࢩْوَࢩْࢡٜ مَاکٛ، عٛيٜجِّتِتَّا عَيْبٜ کٛنّٜعٜنْ مَاکٛ‏! 3جَوْمِرَاوٛ عٛتِکَّتَا لَوْ، عَمَّا سٜمْبٜ مَاکٛ طُوطِ، عٛعَشَّتَا حِيتَاغٛ عَيْبُطٛ سَمْ‏! لَاوٛلْ مَاکٛ طٛنْ شَکَ دُلُورُ عٜ نَارْغٜوٛلْ، دُولٜ نغٛنِ شٛلَّاجٜ طٜ کٛسْطٜ مَاکٛ عُمِّنْتَ؞ 4عٛتٜلْࢡَنَنْ مبٜىٰلَ عٜ نغَ يٛورَنْ، عٛࢡٜىٰࢡْنَنْ مَاجٜ ڢُو؞ لٜسْطٜ بَاسَنْ عٜ کَرْمٜلْ مبَاتَنْ، ݠِنْدِ دٛوْ لِبَنٛنْ بٛو طَيْلَنْ؞ 5کٛوسٜىٰجٜ ندِوْنَنْ دَلِيلَ مَاکٛ، تٛوْندِيجٜ ࢡٛلْوَنْ؞ لٜسْدِ دِمْبٛتٛ يٜىٰسٛ مَاکٛ؞ نٛنْ بٛو دُنِيَارُ عٜ جٛوطِيࢡٜ ندٜرْ مَارُ ڢُو؞ 6مٛيْ دَرْتٛتٛ يٜىٰسٛ ࢡٜرْنُکِ مَاکٛ؟ مٛيْ وَاوَتَ دَرْتَنَاغٛ تِکّٜرٜ مَاکٛ سَاتُندٜ؟ ࢡٜرْنُکِ مَاکٛ طٛنْ وَانْجٛ بَنَ يِيتٜ، تَݠَاجٜ شٜىٰکِ يٜىٰسٛ مَاکٛ؞ 7جَوْمِرَاوٛ عٛ بٛوطّٛ، عٛ حِسْرُدٜ ندٜرْ ࢩَلَادٜ ࢡِلَّارٜ؞ عٛطٛنْ حَکِّلَنَ تَوْࢡٜ حِسْرُدٜ حَا مَاکٛ؞ 8عٛحِسْنَنْ ࢡٜ عٜ عِلَمْ مَوْطَمْ؞ عَمَّا عٛنَتِّنَنْ نٛکُّورٜ بٜرْنِوٛلْ، عٛتَاسْنَنْ کٛنّٜعٜنْ مَاکٛ حَا يٛتّٛ ندٜرْ ࢩِࢡْرٜ؞

حَبَرُوجِ نغَمْ يَحُودَ عٜ نِنِوٜ

9طُمٜ نُڢٛتٛنْ دٛوْ جَوْمِرَاوٛ؟ کَنغْکٛ عٛنَتِّنَنْ عٛنْ ڢُو؞ وَلَا حَاجٜ سَرُّ وَطَ ندٜ طِطِ؞ 10کٛو تٛ عٛنْ لَاتَکٜ بَنَ وُمْرٜ غِعٜ نَنغِندِرَنْطٜ، وُيْکِرَاࢡٜ نجَرَمْجِ مُوطُمْعٜنْ، عٛنْ نغُلَنْ ڢُو بَنَ حُطٛ يٛورْکٛ؞ 11عَنْ نِنِوٜ، حَا مَاطَ غٛطّٛ مٛ نُڢِ کَلُّطُمْ دٛوْ جَوْمِرَاوٛ عِوِ، عَنِّيَاجِ مَاکٛ کَلِّ مَسِنْ؞

12ندَا نِي جَوْمِرَاوٛ طٛنْ وِعَ‏: «کٛو تٛ ࢡٜنغَرْدِ ࢡٜ ڢُو عٜ نٛ ࢡٜطُوطِّرِ ڢُو، ࢡٜکَلْکَنْ، ࢡٜتِمَّنْ؞ عٛنٛنْ يَحُودُعٜنْ، مِتٛسْکِنِ عٛنْ، عَمَّا مِمٜىٰتَتَا تٛسْکِنغٛ عٛنْ؞ 13جٛنْتَ نغٜوَنْمِ کَࢡِّرْغَلْ مَࢡّٜ، مِعِتَّ نغَلْ دٛوْ دَاطٜ مٛوطٛنْ، مِتَعَنْ شَلَّلُّوجِ مٛوطٛنْ؞»

14عَنْ نِنِوٜ، ندَا کٛ جَوْمِرَاوٛ عُمْرِ دٛوْ مَاطَ‏: «يٜىٰسٛ طٛ، عَحٜࢡَتَا دَࢩْغٛلْ تَبِتِنَنْنغٛلْ عِنْدٜ مَاطَ ڢَحِنْ؞ مِنَتِّنَنْ سُورَ شٜحَاکَ عٜ سُورَ نجَمْندِ ࢡٛلِنَاندِ ندٜرْ سُودُ طٛوَنْتٜىٰࢡٜ مَاطَ؞ مِتَاسْکِتِنَنْ يٜنَاندٜ مَ، نغَمْ عَلَاتِ حُوندٜ مٜىٰرٜ؞»

Currently Selected:

نَحُمْ 1: داَ

Highlight

Copy